Andũ a Isiraeli kwĩrwo merire
1 MWATHANI ekuuga atĩrĩ,
“Andũ aya a Isiraeli, mũngĩenda gũcooka, kĩnjookerereei.
Mũngĩthengia mĩhianano ĩrĩa thũire mbere ya maitho maakwa,
mũtuĩke ehokeku harĩ niĩ,
2 mũngĩhĩtaga na rĩĩtwa rĩakwa,
mũrĩ na kĩhooto, ũthingu na mũtarĩ na itherũ,
hĩndĩ ĩyo ndũũrĩrĩ ciothe no ihooyage ndĩciraathime
ta ũrĩa ndĩmũraathimĩĩte,
na ingoocage.”
3 MWATHANI areera andũ a Juda na a Jerusalemu atĩrĩ,
“Cimbaai ngamba cianyu;
tigaai kũhanda mbeũ cianyu mĩiguainĩ.
4 Inyuĩ andũ aya a Juda na a Jerusalemu,
rũmiai kĩrĩĩkanĩro gĩakwa na inyuĩ na mwĩneane kũrĩ niĩ.
Mwaga gwĩka ũguo, maraakara maakwa mekũrĩrĩmbũka ta mwaki
nĩ ũndũ wa maũndũ mooru marĩa mwĩkĩĩte,
na matihorio nĩ mũndũ.”
Juda gũthĩĩgĩrĩrio gũtharĩkĩrwo
5 Huuhaai karumbeeta bũrũriinĩ wothe!
Anĩrĩraai na mũgambo mũnene mwĩre andũ a Juda na a Jerusalemu atĩrĩ,
“Cookanĩrĩraai, tũũrĩre matũũrainĩ marĩa mairigĩirwo na thingo cia hinya!
6 Ĩkĩraai kĩbaaũ gĩa kuonanĩrĩria njĩra ya gũthiĩ Zayuni.
Mwĩthareei! Tigaai kũgonderera!
Nĩ gũkorwo nĩngũreehithia ũũru uumanĩĩte na mwena wa na rũgongo,
o na ndeehithie mwanangĩko mũnene.
7 Mwanangi wa ndũũrĩrĩ nĩoimagarĩĩte,
o ta mũrũũthi ũkiuma kĩmaamoinĩ kĩaguo.
Oimagarĩĩte nĩguo aanange bũrũri wa Juda;
matũũra ma Juda megũtigwo matharũranĩĩtio;
megũtigwo o maganjo matheri.
8 Tondũ ũcio, mwĩhumbeei makũnia, mũrĩre mũkiugagĩrĩria,
nĩ gũkorwo maraakara me gwakana ta mwaki ma MWATHANI,
matitigĩĩte kũrĩrĩmbũkĩra Juda.”
9 MWATHANI akiuga atĩrĩ, “Mũthenya ũcio athamaki na atongoria nĩmakoorwo nĩ hinya; athĩnjĩri Ngai nĩkũgegeara makaagegeara, nao anabii manyiitwo nĩ kĩmako.”
10 Hĩndĩ ĩyo ngiuga atĩrĩ, “MWATHANI Ngai, ti itherũ nĩũheeneetie andũ aya a Jerusalemu o biũ! Uugĩĩte atĩ hatirĩ ũũru mekuona, o rĩrĩa hiũ cia njora ciigĩrĩirwo mĩmeroinĩ yao!”
11 Ihinda nĩrĩrooka rĩrĩa andũ a Jerusalemu makeerwo atĩ rũhuuho rũhiũ nĩrũrahuruutana rũerekeire na kũrĩ o ruumĩĩte na werũinĩ. Rũtigaakorwo rũrĩ rũhuuho rũrooka kahora ta rũrĩa rũmbũraga o mahuti.
12 Rũhuuho rũrĩa MWATHANI akaareehithia rũgaakorwo rũrĩ na hinya mũingĩ gũkĩra rũu! MWATHANI we mwene nĩ we ũratuĩra andũ aake.
Juda gũthiũrũrũkĩrio nĩ thũ
13 Taoneei thũ nĩgũũka ĩrooka o ta matu!
Ngaari ciayo cia mbarathi cia ita itariĩ o ta kĩhuuhũkanio kĩnene,
nacio mbarathi ciayo ci na ihenya gũkĩra rwĩgĩ.
Kaĩ twĩ thĩĩnainĩ-ĩ! Nĩtwathira!
14 Jerusalemu, thambia ũũru ũrĩa ũrĩ ngoroinĩ yaku, nĩguo ũhonokio.
Nĩ nginya rĩ ũgũtũũra ũthugundaga maũndũ mooru?
15 Nĩ gũkorwo arekio kuuma itũũrainĩ rĩa Dani na irĩmainĩ cia Efiraimu,
nĩkwanĩrĩra maranĩrĩra ndũmĩrĩri njũru.
16 Mookĩĩte nĩguo makaanie ndũũrĩrĩ,
na mamenyithie Jerusalemu atĩ thũ irooka ciumĩĩte bũrũri wa kũraaya.
Thũ icio ciakinya igũkaĩrĩria matũũra ma Juda,
17 na ithiũrũrũkĩrie Jerusalemu,
ta ũrĩa ariri mathiũrũrũkagĩria mũgũnda ndũgaathũũkio nĩ nyamũ.
Igwĩka ũguo, tondũ andũ a Jerusalemu nĩmaanemeire.
Ũguo nĩguo niĩ MWATHANI ndoiga.
18 Juda, mĩthiĩre yaku na ciĩko ciaku nĩcio ikũreeheire ũũru ũyũ wothe.
Rĩu nĩrĩo ihera rĩaku rĩtangĩtatĩka;
rĩkũiguithĩĩtie ũũru o ngoro thĩinĩ.
Jeremia kũiguĩra andũ a Isiraeli kĩeha
19 Wũi gũtuurwo-ĩ! Wũi gũtuurwo-i!
Ĩ ndirĩ na ruwo rũnene!
Ndĩraigua ruwo o ngoro thĩinĩ!
Ngoro yakwa ĩrahũũra na hinya mũno,
ndingĩhota gũkirĩrĩria.
Tondũ nĩndĩraigua mũgambo wa karumbeeta,
na mũkayũrũrũko wa mbaara.
20 Mĩthiro ĩrarũmanĩrĩra kũrũmanĩrĩra;
bũrũri wothe ũtigĩĩtwo o maganjo.
Hema ciitũ irathũũkanio o na tũterĩgĩrĩire,
o nacio ciandarũũa igatarũrangwo ihinda o inyiinyi.
21 Nĩ nginya rĩ, ngũtũũra nyonaga gũũkĩrĩrwo
na ngĩiguaga mũgambo wa karumbeeta?
22 MWATHANI ekuuga atĩrĩ,
“Andũ aakwa nĩ irimũ, matinjũũĩ.
Mahaana ta ciana ngĩĩgu, matirĩ ũmenyo.
Mooĩ o gwĩka ũũru,
no gwĩka wega matiũĩ.”
Jeremia kuonio nĩ Ngai mwanangĩko ũrĩa ũrooka
23 Ndacũũthĩrĩirie thĩ,
ngĩona ĩhaana o ũguo.
Ngĩcooka ngĩcũũthĩrĩria igũrũ,
ngĩona rĩtarĩ na ũtheri.
24 Ndacũũthĩrĩria irĩma,
ngĩona igĩthingitha,
o nacio ithũngũri ciothe ngĩona ikĩinaina.
25 Ngĩcũũthangĩrĩria, ngĩona gũtarĩ mũndũ o na ũmwe,
o na nyoni ciothe nĩcietharĩĩte.
26 Ndathiĩ na mbere gũcũũthangĩrĩria,
ngĩona mĩgũnda yatuĩkĩĩte o ta werũ,
namo matũũra moothe ma thĩ magatharũranio
nĩ ũndũ wa maraakara me gwakana ta mwaki ma MWATHANI.
27 Nĩ gũkorwo MWATHANI oigĩĩte atĩrĩ,
“Bũrũri wothe ũgũtigwo ũkirĩĩte ihooru,
no ndikũũniina o biũ.
28 Nĩ ũndũ ũcio, thĩ nĩgaacakaya
narĩo igũrũ rĩtuĩke nduma.
Nĩ niĩ MWATHANI njugĩĩte ũguo na ndingĩricũkwo;
nĩnduĩte itua na ndingĩgarũrũka.”
29 Andũ oothe arĩa maarĩ matũũrainĩ nĩkũũra mooraga,
maigua mbugĩrĩrio ya thigari cia mbarathi na arathi na mĩguĩ;
amwe aao mooragĩra mũtitũũinĩ,
nao arĩa angĩ makahaica ndwaroinĩ cia mahiga makeehithe kuo.
Matũũra moothe nĩgũtiganĩrio matiganĩirio,
gũtiarĩ mũndũ o na ũmwe thĩinĩ wamo.
30 Jerusalemu, kaĩ wĩ thĩĩnainĩ-ĩ!
Nguo icio nduune wĩhumbaga,
na mathaga macio ma thahabu wĩgemagia namo,
o na marangi macio wĩhakaga maitho nĩ ma kĩ?
Kwĩgemia kũu gwaku nĩ gwa tũhũ!
Anyaanya aaku nĩmakũnyararĩĩte,
na nĩkwenda marenda gũkũũraga.
31 Ndaiguire mũkayo ta wa mũtumia akĩrũmwo,
ngĩigua mũcaayo ta wa mũtumia agĩciara mwana wa irigithaathi.
Warĩ mũkayũrũrũko wa Jerusalemu nĩ ũrĩa aahũũmĩĩte,
agĩtambũrũkagia mooko akiugaga atĩrĩ,
“Kaĩ ndĩ thĩĩnainĩ-ĩ! Ooragani nĩgũũka marooka kũnjũraga!”