Meehia ma Jerusalemu
1 Tacangacangaai njĩrainĩ cia Jerusalemu!
Roraai na mũcarie!
Tuĩriai o na njĩrainĩ ciarĩo,
mũrore muone kana muona mũndũ o na ũmwe, wĩkaga ũrĩa kwagĩrĩire
na waragia ũhoro wa ma.
Mũngĩona mũndũ ta ũcio-rĩ,
niĩ MWATHANI no njohere Jerusalemu.
2 O na gũtuĩka nĩmoigaga nĩmaathaathayagia MWATHANI,
gũthaathaiya kũu kwao nĩ kwa maheeni.
3 Wee, MWATHANI, maitho maaku meendaga kuona ũhoro wa ma.
Kũhũũra nĩũmahũũrĩĩte, no matiiguaga ruwo.
Nĩũmathĩĩte o biũ, no matingĩtaarĩĩka.
Nĩ aremi na nĩmaregeete kwĩrira.
4 Ngĩkiuga atĩrĩ, “Andũ aya nĩ athĩĩni,
na matirĩ ũmenyo.
Matiũĩ ũrĩa Ngai eendaga,
na ũrĩa MWATHANI angĩenda kuona magĩĩka.
5 Kwoguo ngũthiĩ kũrĩ arĩa me na ũhoti, njarie nao,
tondũ nĩmooĩ ũrĩa Ngai eendaga,
na ũrĩa MWATHANI angĩenda kuona magĩĩka.”
No o nao-rĩ, nĩmakararĩĩtie watho wa MWATHANI,
na makaaga kũmwathĩkĩra.
6 Tondũ ũcio-rĩ, mĩrũũthi ya mũtitũ nĩ yo ĩkaamooraga.
Njũũi cia werũinĩ nĩcio ikaamatambũranga
nacio ngaari ciikare imooheirie matũũrainĩ maao.
Mũndũ o wothe ũrĩa ũkoima nja ya matũũra macio,
nĩgũtambũrangwo agaatambũrangwo,
nĩ ũndũ meehia maao nĩ maingĩ,
na maikaraga magĩtiganagĩria Ngai.
7 MWATHANI arooria atĩrĩ, “Andũ aakwa ingĩkĩmoohera meehia maao nĩkĩ?
Nĩmandiganĩirie na magathaathaiya ngai cia maheeni.
Ndamahe irio nginya makĩhũũna-rĩ,
maacookire gũtharia
na kũriũnga nyũmbainĩ cia maraaya.
8 Mahaanaga o ta mbarathi cia njamba iheetwo irio ikanora
na irĩ na ũrugarĩ wa kũhaica,
o mũndũ akahĩahĩagĩra mũtumia wa mũndũ ũrĩa marigainie naake,
akeerirĩria gũkoma naake.
9 No ngĩage kũmaherithia nĩ ũndũ wa maũndũ macio?
No njage kwĩrĩhĩria harĩ rũũrĩrĩ ta rũu?
10 Ngũrekia thũ ithiĩ cianange mĩgũnda ya mĩthabibũ ya andũ aakwa,
no itikũmĩananga o biũ.
Ikũhũrũra honge ciayo tondũ honge icio ti ciakwa.
11 Andũ a Isiraeli na Juda nĩmaangunyanĩire o biũ.
Nĩ niĩ MWATHANI, ndoiga ũguo.”
MWATHANI kũrega andũ a Isiraeli
12 Andũ a MWATHANI maarĩĩtie ũhoro ũtarĩ wa ma igũrũ rĩa MWATHANI
makoiga atĩrĩ, “Ndarĩ ũndũ egwĩka.
Hatirĩ ũũru tũgũtũngana naguo,
o na kana tũgĩe na mbaara kana ng’aragu.
13 Anabii no kũhũhũũtĩka marahũhũũtĩka;
matirĩ na ndũmĩrĩri kuuma kũrĩ MWATHANI.
Hatirĩ na ũndũ mategũtũngana naguo!”
14 Tondũ ũcio, MWATHANI Ngai Mwene Hinya Wothe akĩnjĩĩra atĩrĩ,
“Tondũ andũ aya nĩmoigĩĩte maũndũ macio-rĩ,
ngũtũma ciugo ciakwa ihaane ta mwaki irĩ kanuainĩ gaaku,
nao andũ aya mahaane ta ngũ, macinwo nĩ mwaki ũcio.
15 “Atĩrĩĩrĩ, andũ aya a Isiraeli,
MWATHANI ekũmũreehithĩria rũũrĩrĩ rwa kuuma kũraaya rũmũtharĩkĩre,
rũũrĩrĩ rũu rũrĩ na hinya na nĩ rwa tene.
Rũthiomi rwa rũũrĩrĩ rũu mũtirũũĩ
o na mũtingĩtaũkĩrwo nĩ ũrĩa rũroiga.
16 Thigari ciaruo iria irathaga na mĩguĩ
nĩ andũ njamba mooraganaga matarĩ na tha.
17 Makaarĩa magetha maanyu na irio cianyu,
moorage aariũ aanyu na aarĩ aanyu,
mathĩnje mbũri na ng’ombe cianyu,
na maanange mĩthabibũ yanyu o na mĩkũyũ yanyu.
Matũũra maanyu marĩa mairigĩirwo na thingo cia hinya, o marĩa mwĩhokeete,
nĩkũmomoranio makaamomoranio nĩ thigari icio ciao cia ita.”
18 MWATHANI ekuuga atĩrĩ, “No o na matukũinĩ macio ndikaaniina andũ aakwa o biũ.
19 Hĩndĩ ĩrĩa makooria kĩrĩa niĩ, MWATHANI Ngai wao, gĩatũmire njĩke maũndũ macio moothe, ũkaameera nĩ tondũ nĩmaandiganĩirie magĩtungatĩra ngai ng’eni marĩ bũrũriinĩ wao. Tondũ ũcio, no nginya magaatungatĩra andũ matooĩ marĩ bũrũriinĩ ũtarĩ wao.”
Ngai gũkaania andũ aake
20 MWATHANI ekuuga atĩrĩ,
“Anĩrĩra ũndũ ũyũ matũinĩ ma njiarwa cia Jakubu,
o na ũũmemeerekerie andũ a Juda:
21 Tathikĩrĩriai, inyuĩ irimũ ici,
o inyuĩ mũtarĩ mbuguĩro!
Mwĩ na maitho, no mũtionaga;
mwĩ na matũ, no mũtiiguaga.
22 Niĩ nĩ niĩ MWATHANI;
mwagĩĩte kũndĩĩya nĩkĩ?
Mwagĩĩte kũinaina mwĩ mbere yakwa nĩkĩ?
Niĩ nĩ niĩ ndaigire mũthanga ũtuĩke mũhaka wa iria,
mũhaka wa mahinda moothe rĩtangĩhota gũkĩra.
Makũmbĩ ma iria no maikanie,
no matingĩhota kũũhĩtũka,
o na no marurume,
no matingĩũrũũga.
23 No inyuĩ mũrĩ andũ ang’athia na aremi;
na mũndiganĩirie mũgathiĩ na kũrĩa mũkwenda.
24 Mũtionaga bata wa kũndĩĩya niĩ MWATHANI Ngai wanyu,
o niĩ ndĩmũheaga mbura ihinda rĩrĩa rĩagĩrĩire;
mbura ĩrĩa nene na ĩrĩa niini,
na ngamũhe magetha mwaka o mwaka.
25 No rĩĩrĩ, meehia maanyu nĩ mo matũmĩĩte
maũndũ maya meega mamũraihĩrĩrie.
26 “Nĩ gũkorwo gatagatĩinĩ ka andũ aakwa harĩ na andũ ooru
maikaraga mooheirie ta ũrĩa ategi a nyoni maikaraga mooheirie.
Mĩtego ĩrĩa mategeete no ya kũnyiita andũ.
27 O ta ũrĩa mũtegi wa nyoni aiyũragia gĩkerenge gĩake na nyoni,
noguo maiyũrĩĩtie nyũmba ciao na indo cia gũtuunyana.
Nĩkĩo magĩĩte na hinya
na magatonga ũguo,
28 o na makanora na mĩĩrĩ yao ĩkanyoroka.
Ciĩko njũru iria meekaga nĩitororeetie;
maticaayagĩra ciana cia ngoriai,
o na kana makagitĩra ihooto cia arĩa ahinyĩrĩrie.
29 Niĩ MWATHANI, no ngĩage kũmaherithia nĩ ũndũ wa maũndũ ta macio?
No njage kwĩrĩhĩria harĩ rũũrĩrĩ ta rũu?
30 “Ũndũ mũũru na wa kũmakania nĩwĩkĩkĩĩte bũrũriinĩ:
31 anabii marathaga o moohoro ma maheeni,
athĩnjĩri Ngai magaathana o ta ũrĩa maathĩĩtwo nĩ anabii acio,
nao andũ aakwa magakenio nĩ ũndũ ũcio.
No rĩĩrĩ, mageeka atĩa hĩndĩ ĩrĩa ũndũ ũcio ũgaakinya mũthia?”