Isiraeli kwaga kwĩhokeka
1 MWATHANI ekuuga atĩrĩ,
“Mũndũ angĩtigana na mũtumia wake,
naake mũtumia ũcio athiĩ ahikio nĩ mũndũ ũngĩ,
no acooke gũikarania naake, ta mũtumia wake, hĩndĩ ĩngĩ?
Githĩ ũndũ ta ũcio to ũthaahie bũrũri mũno?
Rĩu-rĩ, wee Isiraeli nĩũhũũrĩĩte ũmaraaya na anyaanya aingĩ mũno;
wakĩhota atĩa gũtuĩka mũtumia wakwa hĩndĩ ĩngĩ?
2 Tatiira maitho maaku ũbaare wega kũũrĩa tũcũmbĩrĩinĩ twa irĩma.
Nĩ kũ ũtarĩ wakomwo nawe?
Ũraikaraga mĩkĩrainĩ ya njĩra wetereire anyaanya aaku,
o ta mũkora woheirie andũ werũinĩ.
Nĩũthaahĩĩtie bũrũri na ũmaraaya waku.
3 Nĩkĩo mbura ĩrĩa nene ĩgirĩĩtio kuura,
o na ĩrĩa niini ĩkaaga gũũka.
No o na kũhaana ũguo-rĩ,
wee no gũkĩrĩrĩria ũkĩrĩrĩirie kũhũũra ũmaraaya ũtegũconoka o na haniini.
4 “Rĩu ũranjĩta ũkoiga atĩrĩ,
‘Wee nĩ we baaba, na ũtũire ũnyendeete kuuma o ndĩ o mwana.
5 Ndũngĩtũũra ũraakarĩĩte;
ndũngĩtũũra ũng’ũrĩkĩĩte nĩ niĩ nginya tene.’
Ũguo nĩguo wee Isiraeli ũroiga,
o na wĩkĩĩte waganu ũrĩa wĩkĩĩte.”
Isiraeli na Juda no nginya merire
6 Hĩndĩ ĩrĩa Josia aarĩ mũthamaki, MWATHANI akĩnjĩĩra atĩrĩ, “Nĩũrĩĩkĩĩtie kuona ũrĩa Isiraeli mũtumia ũcio ũtarĩ mwĩhokeku eekĩĩte? Athiĩte akĩhũũraga ũmaraaya kĩrĩmainĩ o gĩothe kĩraaya, na rungu rwa mũtĩ o wothe mũruru wega.
7 Ndĩreciiragia atĩ arĩĩkia gwĩka ũguo wothe nĩekũnjookerera, no ndaigana gwĩka ũguo. Ndeto ĩyo yothe nĩronirwo nĩ Juda mwarĩ wa nyina ũrĩa ũtarĩ mwĩhokeku o taake.
8 Ningĩ Juda nĩareyoneire na maitho ngĩtigana na Isiraeli na ngĩmũingata tondũ nĩandiganĩirie agĩthiĩ kũhũũra ũmaraaya. No Juda, mwarĩ ũcio wa nyina na Isiraeli, ũtarĩ mwĩhokeku, o na ooneete ngĩĩka ũguo, ndaigana gwĩtigĩra. O naake aarũmĩrĩire mĩtugo ya mwarĩ wa nyina agĩtuĩka mũmaraaya
9 na ndaigana kũigua thoni o na haniini. Athaahirie bũrũri, na ũndũ wa gũthaathaiya mĩhianano ĩthondekeetwo na mahiga na mĩtĩ.
10 Thuutha wa gwĩka maũndũ macio moothe mooru, Juda, mwarĩ ũcio wa nyina na Isiraeli ũtarĩ mwĩhokeku, ndaigana kũnjookerera na ngoro yake yothe, aanjookereire na ngoro ĩrĩ na ũhinga. Nĩ niĩ MWATHANI ndoiga ũguo.”
11 Hĩndĩ ĩyo MWATHANI akĩnjĩĩra atĩrĩ, “O na gũtuĩka Isiraeli nĩandiganĩirie-rĩ, we nĩ mwegeega kũrĩ Juda, ũcio ũtarĩ mwĩhokeku.
12 Thiĩ kũrĩ Isiraeli ũrĩa ũikaraga na mwena wa na rũgongo ũmũkinyĩrie ndũmĩrĩri ĩno ũmwĩre atĩrĩ,
‘Wee Isiraeli ũtarĩ mwĩhokeku, njookerera.
Ndigũcooka gũkũrora na maraakara, nĩ ũndũ ndĩ tha;
ndigũtũũra ngũraakarĩire nginya tene na tene.
13 Ĩtĩkĩra atĩ nĩwĩhĩĩtie;
na atĩ nĩũremeire MWATHANI, Ngai waku,
na ũkeeyagĩra bata na ũndũ wa gũthaathaiya ngai ng’eni,
rungu rwa mũtĩ o wothe mũruru wega,
na ndwathikĩrĩirie mũgambo wakwa.
Nĩ niĩ MWATHANI ndoiga ũguo.’
14 Inyuĩ andũ aya mũtarĩ ehokeku njookereraai,
nĩ ũndũ niĩ nĩ niĩ mwathi wanyu.
Nguoya mũndũ wanyu ũmwe kuuma o itũũra
na njoe andũ eerĩ kuuma o mbarĩ,
ndĩmũcookie kĩrĩmainĩ gĩa Zayuni.
15 “Nĩngaamũhe arĩithi arĩa makaanjathĩkagĩra, nao makaamũrĩithagia na ũũgĩ o na ũmenyi.
16 Hĩndĩ ĩrĩa mũgaakorwo mũingĩhĩĩte bũrũriinĩ ũcio, andũ matigaacooka kwaria rĩngĩ ũhoro wa Ithandũkũ rĩakwa rĩa Kĩrĩĩkanĩro kana maririkane ũhoro warĩo. Matikaabatario nĩrĩo hĩndĩ ĩngĩ, kana mathondeke rĩngĩ.
17 Rĩrĩa ihinda rĩu rĩgaakinya, Jerusalemu ĩgeetagwo Gĩtĩ kĩa Ũthamaki kĩa MWATHANI. Ndũũrĩrĩ ciothe ikaarũrũngana kũu Jerusalemu ithaathaiye, na itigaacooka kũrũmĩrĩra rĩngĩ mataaro mooru ma ngoro ciacio nemi.
18 Hĩndĩ ĩyo andũ a Juda magaathiĩ na andũ a Isiraeli moime bũrũriinĩ ũrĩa ũrĩ na mwena wa na rũgongo, macooke bũrũriinĩ ũrĩa ndaheire maithe maao, ũtuĩke igai rĩao.”
Ũrĩa andũ a Ngai mahooyaga mĩhianano
19 MWATHANI ekuuga atĩrĩ,
“Isiraeli ndeendaga nguoe ũtuĩke mwana wakwa,
na ngũhe bũrũri mwega,
bũrũri ũrĩa mũthaka mũno thĩ yothe.
Ndeciiragia ũrĩnjĩtaga Baaba,
na ndũrĩ hingo ũkaaga kũũnũmĩrĩra.
Nĩ niĩ MWATHANI ndoiga ũguo
20 No rĩĩrĩ, wee Isiraeli ũkoreetwo ũtarĩ mwĩhokeku harĩ niĩ,
o ta mũtumia ũtarĩ mwĩhokeku harĩ mũthuuriwe.
Nĩ niĩ MWATHANI ndoiga ũguo.”
21 Mbugĩrĩrio nĩiraiguuo kũũrĩa irĩma igũrũ;
andũ a Isiraeli nĩkũrĩra mararĩra magĩthaithanaga,
tondũ nĩmogomeetie mĩthiĩre yao,
makariganĩrwo nĩ MWATHANI Ngai wao.
22 Inyuĩ andũ aya mũtarĩ ehokeku njookereraai,
na nĩngũmũhonia mũtuĩke ehokeku.
Na inyuĩ kiugeei atĩrĩ,
“Ĩĩ, nĩtũgũgũcookerera MWATHANI tondũ wee nĩ we Ngai witũ.
23 Mũtugo witũ wa gũthaathaiya mĩhianano kũũrĩa irĩma igũrũ
ndũrĩ na uumithio ũtũreeheire.
Ũhonokio wa Isiraeli ũrĩ he MWATHANI Ngai witũ.
24 “Mũtugo wa gũthaathaiya Baali, ngai ĩrĩa ya gĩconoko, ũniinĩĩte indo ciothe, iria maithe maitũ maaramataga kuuma o tene. Indo icio nĩ mbũri na ng’ombe, na aariũ na aarĩ aitũ.
25 Tũkĩagĩrĩirwo nĩgũkoma thĩ tũhithĩĩte moothiũ maitũ nĩ ũrĩa tũconokeete, tũreke gĩconoko giitũ gĩtũkunĩkĩre. Nĩ ũndũ ithuĩ eene o na maithe maitũ, tũtũire twĩhagĩria MWATHANI Ngai witũ; na tũtianaathĩkĩra mũgambo wake.”