Andũ a Isiraeli me kĩrĩmainĩ gĩa Sinai
1-2 Nao andũ a Isiraeli makiumagara kuuma Refidimu, naguo mũthenya wa mbere wa mweri wa ĩtatũ kuumagia hĩndĩ ĩrĩa moimire Misiri, magĩkinya werũinĩ wa Sinai. Nao makĩamba hema ciao kũng’ethera kĩrĩma gĩa Sinai.
3 Naake Musa akĩambata kĩrĩmainĩ agatũngane na Ngai.
Naake MWATHANI akĩmwĩta arĩ kĩrĩmainĩ kĩu akĩmwĩra athiĩ eere andũ a Isiraeli, o acio njiarwa cia Jakubu, atĩrĩ,
4 “Nĩmweyoneire maũndũ marĩa ndeekire andũ a Misiri, na mũkĩĩyonera ũrĩa ndamũkuuire inyuĩ o ta ũrĩa rwĩgĩ rũkuuaga tũcui twayo na mathagu, ngĩmũreehe kũrĩ niĩ.
5 Kwoguo rĩu, angĩkorwo nĩmũkũnjathĩkĩra na mũmenyagĩrire kĩrĩĩkanĩro gĩakwa, nĩmũgũtuĩka andũ aakwa. Nĩ gũkorwo thĩ yothe nĩ yakwa, no inyuĩ mũgũtuĩka andũ aakwa athuure,
6 ndĩmũtue andũ aakwa aamũre na mũndungatagĩre ta athĩnjĩri Ngai.” Icio nĩcio ciugo iria ũkwĩra andũ a Isiraeli.
7 Kwoguo Musa agĩikũrũka agĩĩta atongoria a andũ a Isiraeli, akĩmeera maũndũ moothe marĩa MWATHANI aamwathĩĩte.
8 Nao andũ oothe magĩcookanĩria hamwe atĩrĩ, “Maũndũ macio moothe MWATHANI oigĩĩte nĩtũrĩmeekaga.” Naake Musa akĩĩra MWATHANI ũrĩa andũ moigire.
9 Naake MWATHANI akĩĩra Musa atĩrĩ, “Nĩngũũka kũrĩ we ndĩ ituinĩ itumanu nĩguo andũ maigue ngĩaria nawe, na nĩguo makwĩhoke kuuma rĩu gũthiĩ na mbere.”
10 Musa agĩkĩĩra MWATHANI ũrĩa andũ maacooketie. Naake MWATHANI akĩmwĩra atĩrĩ, “Thiĩ kũrĩ andũ ũmeere metherie ũũmũũthĩ na rũũciũ, nĩ ũndũ wa gũthaathaiya. No mũhaka mathambie nguo ciao
11 na makorwo mehaarĩirie mũthenya wa ĩtatũ. Mũthenya ũcio nĩngaikũrũka kĩrĩmainĩ gĩa Sinai, andũ oothe makĩnyonaga.
12 Nawe nĩũgeekĩra mũhaka ũthiũrũrũkĩrie kĩrĩma gĩothe nĩ geetha andũ matikaae kũhĩtũka. Ũcooke wĩre andũ memenyerere matikaambate kĩrĩmainĩ o na kana magĩkuhĩrĩrie. Mũndũ o wothe ũkaahuutia kĩrĩma no mũhaka akooragwo.
13 Gũtikaanagĩe na mũndũ ũkaamũhuutia na mooko; akaahũũrwo na mahiga kana arathwo na mĩguĩ. Ũguo nĩguo mũgeeka mũndũ o na nyamũ; mũtikaanareke mũndũ ũcio atũũre muoyo, o na nyamũ ĩyo. Rĩrĩa karumbeeta gakaahuuhwo, nĩguo andũ makaambata kĩrĩma igũrũ.”
14 Naake Musa agĩkiuma kĩrĩmainĩ, akĩĩra andũ metherie na mathambie nguo ciao.
15 Naake Musa akĩmeera atĩrĩ, “Mwĩthagathageei nĩ ũndũ wa mũthenya wa gatatũ, na mũtigakomane na atumia.”
16 Na rĩĩrĩ, rũũciinĩ rwa mũthenya wa gatatũ gũkĩgĩa ngwa o na heni, narĩo itu itumanu rĩkĩoneka kĩrĩma igũrũ, na mũgambo mũnene mũno wa karumbeeta ũkĩiguuo. Nao andũ oothe arĩa maarĩ kambĩinĩ makĩinaina nĩ guoya.
17 Naake Musa agĩgĩtongoria andũ akĩmoimia nja ya hema magatũũngane na MWATHANI, nao makĩrũũgama magũrũinĩ ma kĩrĩma.
18 Na rĩĩrĩ, kĩrĩma gĩothe gĩa Sinai kĩahumbĩrĩĩtwo nĩ ndoogo, amu MWATHANI nĩaikũrũkĩĩte e thĩinĩ wa mwaki, agaikara igũrũ rĩakĩo. Nayo ndoogo ĩyo ĩgĩtooga yambatĩĩte na igũrũ o ta ya icua inene, nao andũ oothe makĩinaina mũno.
19 Naguo mũgambo wa karumbeeta ũgĩkĩrĩrĩria kũneneha. Naake Musa aaria, Ngai aamũcookagĩria arĩ thĩinĩ wa marurumĩ.
20 Naake MWATHANI agĩikũrũka igũrũ wa kĩrĩma gĩa Sinai o gacũmbĩrĩ, agĩĩta Musa aambate o kũu gacũmbĩrĩ ga kĩrĩma; naake Musa agĩkĩambata ho.
21 Naake MWATHANI akĩmwĩra atĩrĩ, “Ikũrũka ũgakaanie andũ matikaae kũhĩtũka mũhaka mooke manjũũthĩrĩrie; mangĩĩka ũguo, aingĩ aao nĩmegũkua.
22 O na athĩnjĩri Ngai arĩa mekũnguhĩrĩria nĩmetherie, kwaga ũguo nĩngũmaherithia.”
23 Musa akĩĩra MWATHANI atĩrĩ, “Andũ matingĩambata kĩrĩmainĩ gĩĩkĩ amu we mwene nĩwatwathire tũtuage kĩrĩma gĩĩkĩ atĩ nĩ gĩtheru na tũthondeke mũhaka gũgĩthiũrũrũkĩria.”
24 Naake MWATHANI agĩcookeria Musa atĩrĩ, “Ikũrũka, ũgĩĩre Harũni mũũke naake. No rĩĩrĩ, ndũkaareke athĩnjĩri Ngai o na andũ arĩa angĩ makĩre mũhaka maambate kũrĩ niĩ; mangĩĩka ũguo nĩngũmaherithia.”
25 Kwoguo Musa agĩikũrũka kũrĩ andũ akĩmeera ũrĩa MWATHANI oiga.