Jethero gũceerera Musa
1 Naake Jethero, ũrĩa warĩ mũthĩnjĩri Ngai wa Midiani na mũthoni we wa Musa, akĩigua ũrĩa wothe Ngai eekĩire Musa na andũ a Isiraeli rĩrĩa aamarutire Misiri.
2 Jethero nĩ we waikaraga na Zipora mũtumia wa Musa, arĩĩkia gũcookio Midiani nĩ Musa kuuma Misiri.
3 O na nĩatũire na aariũ a Musa eerĩ Gerishomu na Eliezeri. (Musa oigĩĩte atĩrĩ, “Ndũũrĩĩte bũrũri ũtarĩ witũ ndĩ mũgeni.” Nĩkĩo atuĩte mũũriũ ũmwe wake Gerishomu.
4 Ningĩ no oigĩĩte atĩ, “Ngai wa baaba nĩ we wandeithirie na akĩhonokia ndikaae kũũragwo nĩ mũthamaki wa Misiri.” Nĩkĩo atuĩte mũũriũ ũcio ũngĩ Eliezeri.)
5 Naake Jethero agĩtwarĩra Musa mũtumia wake Zipora na aariũ aake eerĩ werũinĩ kũrĩa aambĩĩte hema kĩrĩmainĩ gĩtheru.
6 Jethero nĩarĩĩkĩĩtie gũtũmanĩra Musa atĩ nĩmarooka,
7 kwoguo Musa akiumagara, agĩthiĩ gũtũnga mũthoni we, agĩkĩmũinamĩrĩra, o na akĩmũmumunya. Nao magĩkĩũrania o mũndũ na ũrĩa ũngĩ ũhoro wake, magĩcooka magĩtoonya hemainĩ ya Musa.
8 Musa agĩgĩtaarĩria mũthoni we ũrĩa wothe MWATHANI eekĩĩte mũthamaki na andũ a Misiri, nĩguo ahonokie andũ a Isiraeli. O na ningĩ nĩamũtaarĩirie mathĩĩna moothe marĩa mooneete njĩrainĩ na ũrĩa MWATHANI aamahonokeetie.
9 Naake Jethero agĩkena nĩ ũndũ wa maũndũ moothe meega marĩa MWATHANI eekĩĩte andũ a Isiraeli, nĩ ũndũ nĩamahonokeetie kuuma mookoinĩ ma andũ a Misiri.
10 Jethero agĩkiuga atĩrĩ, “MWATHANI arogaathwo ũcio ũmũhonokeetie kuuma mookoinĩ ma andũ a Misiri o na ma mũthamaki wa Misiri.
11 Rĩu nĩndamenya atĩ MWATHANI nĩ mũnene gũkĩra ngai ciothe, amu nĩahonokirie andũ aake kuuma kũrĩ andũ a Misiri arĩa maamanyararaga.”
12 Thuutha ũcio Jethero akĩreehe indo cia kũrutĩrwo Ngai igongoona rĩa njino, na magongoona marĩa mangĩ. Naake Harũni hamwe na atongoria oothe a Isiraeli magĩũka kũrĩanĩra irio icio theru na mũthoni we wa Musa, o na mathaathaiye Ngai.
Gũthuurwo kwa atuithania
13 Na rĩĩrĩ, mũthenya ũyũ ũngĩ Musa agĩikara thĩ atuithanie andũ maciira, naake agĩgĩtinda na mĩhang’o ĩyo kuuma rũũciinĩ o nginya hwaĩinĩ.
14 Rĩrĩa mũthoni we oonire maũndũ moothe marĩa Musa eekagĩra andũ, akĩmũũria atĩrĩ, “Nĩ maũndũ marĩkũ maya ũreekĩra andũ? Nĩkĩ kĩratũma wĩke maũndũ maya ũrĩ wiki, nao andũ magatinda marũũgamĩĩte magũthiũrũrũkĩirie kuuma rũũciinĩ nginya o hwaĩinĩ?”
15 Naake Musa agĩcookeria mũthoni we atĩrĩ, “No mũhaka njĩke ũguo, amu andũ aya mookaga kũrĩ niĩ gũtuĩria wendi wa Ngai.
16 Rĩrĩa andũ eerĩ maagĩa na ciira, mookaga kũrĩ niĩ, ngamatuithania, na ngamamenyithia maathani o na mawatho ma Ngai.”
17 Mũthoni we agĩkĩmwĩra atĩrĩ, “Ndũreeka ũndũ ũyũ na njĩra ĩrĩa yagĩrĩire.
18 Nĩũkwĩnogia o na ũnogie andũ aya, amu ũndũ ũyũ nĩũgũkũritũhĩra mũno, na ndũngĩhota kũwĩka wĩ wiki.
19 Rĩu kĩnjĩtĩkĩrie ngũtaare, na Ngai arokoragwo hamwe nawe. Ti itherũ nĩkwagĩrĩire ũrũũgamagĩrĩre andũ aya mbere ya Ngai na ũmũtwaragĩre maciira maao.
20 Ningĩ ũmarutage maathani na mawatho ma Ngai na ũmaataaragĩrie ũrĩa maagĩrĩirwo nĩgũtũũra o na gwĩkaga.
21 Wĩthuurĩre thĩinĩ wa andũ aya, andũ amwe ehoti, matĩĩĩte Ngai, ehokeku na matangĩhakwo, ũmatue atongoria a andũ. Nao matongoragie ikundi cia andũ ngiri, igana, mĩrongo ĩtaano, o na ikũmi.
22 Reke andũ acio matuithanagie andũ maciira mahinda moothe. Nĩmakũreehagĩre maciira marĩa maritũ, no maciira marĩa maniini nĩmamatuithanagie arĩ o. Weka ũguo, nĩũkũhũthĩrwo nĩ wĩra, nĩ ũndũ nĩmarĩteithanagia wĩra ũcio nawe.
23 Weka ũguo, o ta ũrĩa MWATHANI egũgwatha, ndũgũcooka kũnoga, nao andũ aya oothe marĩinũkaga maciira maao matuithanĩĩtio.”
24 Kwoguo Musa akĩigua mataaro ma mũthoni we,
25 agĩthuura andũ ehoti kuuma andũinĩ oothe a Isiraeli, akĩmatua atongoria a ikundi cia andũ ngiri, igana, mĩrongo ĩtaano, o na ikũmi.
26 Nao andũ acio magagĩtuithanagia andũ maciira mahinda moothe, namo maciira marĩa maritũ magatwaragĩra Musa, no marĩa maniini magatuithania o eene.
27 Musa agĩkiugĩra mũthoni we ũhoro, naake mũthoni we akĩinũka.