1 Naake agĩthiĩ na mbere kwaria akiuga atĩrĩ, “Ngũmwĩra na ma atĩ, haaha nĩharĩ andũ amwe matagaakua matooneete Ũthamaki wa Ngai ũgĩũka wĩ na hinya.”
Jesũ kũgarũrũka ũrĩa aatariĩ
2 Na rĩĩrĩ, thuutha wa mĩthenya ĩtandatũ yathira Jesũ akĩoya Petero, Jakubu na Johana akĩmatwara handũ kĩrĩma igũrũ marĩ oiki. Naake Jesũ akĩgarũrũka ũrĩa aatariĩ mamwĩroreire.
3 Nguo ciake ikĩerũha cua; gũtirĩ mũndũ o na ũmwe gũũkũ thĩ ũngĩahotire gũcierũhia ũguo.
4 Hĩndĩ ĩyo arutwo acio atatũ makĩona Elija na Musa makĩaria na Jesũ.
5 Naake Petero akĩĩra Jesũ atĩrĩ, “Mũrutani, nĩ wega tondũ twĩ haaha! Reke twake ithũnũ ithatũ, kĩmwe gĩaku, kĩrĩa kĩngĩ kĩa Musa, na kĩrĩa kĩngĩ kĩa Elija.”
6 Petero oigire ũguo nĩ ũndũ we na arutwo acio angĩ nĩmaamakĩĩte mũno, o kinya makarigwo nĩ wa kuuga.
7 O hĩndĩ ĩyo gũgĩũka itu rĩkĩmahumbĩra, naguo mũgambo ũkiuma ituinĩ ũkiuga atĩrĩ, “Ũyũ nĩ we Mũrũ wakwa ũrĩa nyendeete; mũiguageei!”
8 Nao magĩcooka kwĩhũgũra na ihenya mationire mũndũ o na ũ, tiga Jesũ we wiki.
9 Rĩrĩa maikũrũkaga kuuma kĩrĩmainĩ, Jesũ akĩmaatha matikeere mũndũ o na ũ maũndũ marĩa mooneete, kinya rĩrĩa Mũrũ wa Mũndũ akaariũka oime kũrĩ arĩa akuũ.
10 Nao magĩgĩĩka o ta ũguo aameerire, ĩndĩ magakĩũranagia gatagatĩinĩ kaao atĩrĩ, “Kũriũka kuuma kũrĩ arĩa akuũ-rĩ, nĩkuuga atĩa?”
11 Magĩkĩũria Jesũ atĩrĩ, “Arutani a Watho moigaga atĩ no mũhaka Elija aambe ooke nĩkĩ?”
12 Naake Jesũ akĩmacookeria atĩrĩ, “Noguo, Elija nĩakaamba gũũka mbere nĩ geetha ahaarĩrĩrie maũndũ moothe. No nĩkĩ gĩtũmaga Maandĩko moige atĩ Mũrũ wa Mũndũ nĩagaathĩĩnio mũno na aregwo nĩ andũ?
13 Ngũmwĩra atĩrĩ, Elija nĩarĩĩkĩĩtie gũũka, na andũ makamwĩka ũrĩa meendaga kũmwĩka kũringana na ũrĩa ũhoro wake wandĩkĩĩtwo Maandĩkoinĩ.”
Jesũ kũhonia kamwana kaarĩ na ngoma
14 Na rĩĩrĩ, maakinya harĩ arutwo arĩa angĩ, makĩona andũ aingĩ mamathiũrũrũkĩirie, na arutani amwe a Watho arĩa maarĩ ho magĩkararania nao.
15 Rĩrĩa andũ moonire Jesũ, makĩgega mũno, magĩteng’era harĩ we makĩmũgeithia.
16 Naake Jesũ akĩũria arutwo atĩrĩ, “Nĩ kĩĩ mũgũkararanagĩria nao?”
17 Naake mũndũ ũmwe warĩ hau andũinĩ akĩmũcookeria atĩrĩ, “Mũrutani, ngũkũreeheire mũrũ wakwa ũkoragwo arĩ na ngoma na ndaaragia.
18 Rĩrĩa yamũnyiitũkia, ĩmũrũndaga thĩ, naake akaambĩrĩria kũruta mũhũũyũ, akahagarania magego, na akoomagara mwĩrĩ wothe. Nĩnjũũririe arutwo aaku maingate ngoma ĩyo, no matinahota.”
19 Naake Jesũ akĩmeera atĩrĩ, “Kaĩ andũ aya nĩmwagĩĩte wĩtĩkio-ĩ! Ngũikara na inyuĩ kinya rĩ, na ngũmũkirĩrĩria kinya rĩ? Ndeehereei kamwana kau!”
20 Nao magĩgatwarĩra Jesũ. Nayo ngoma ĩyo yona Jesũ ĩgĩkanyiitũkia ĩgĩgathiora, ĩgĩgaikia thĩ, nako gakĩgaragara gagĩitaga mũhũũyũ na kanua.
21 Naake Jesũ akĩũria ithe atĩrĩ, “Gatũire ũũ kuuma rĩ?”
Naake ithe akĩmũcookeria atĩrĩ, “Kuuma o gaaciarwo.
22 Mahinda maingĩ ngoma ĩno yanageria gũkooraga na njĩra ya gũgaikia mwakiinĩ, o na maaĩinĩ. Akorwo wahota-rĩ, tũiguĩre tha ũtũteithie!”
23 Naake Jesũ akĩmwĩra atĩrĩ, “Atĩ akorwo ndahota! Maũndũ moothe nĩmahotekaga kũrĩ mũndũ ũrĩa wĩtĩkĩĩtie.”
24 Naake ithe wa kamwana kau agĩcookia o rĩmwe akiuga atĩrĩ, “Nĩnjĩtĩkĩĩtie, no ndeithĩrĩria harĩa ndigĩĩtie gwĩtĩkia!”
25 Hĩndĩ ĩyo Jesũ oona atĩ andũ aingĩ no maamũthiũrũrũkagĩria, agĩkũũma ngoma ĩyo akĩmĩĩra atĩrĩ, “Wee ngoma ĩno ĩtaiguaga na ĩtaaragia, ndagwatha uume thĩinĩ wa kamwana gaaka na ndũkaanagatoonye rĩngĩ!”
26 Nayo ngoma ĩyo yarĩĩkia gũkaya na gũkoomagaria ĩkiuma thĩinĩ wako. Nako kamwana kau gakĩhaana ta kaarĩ gakuũ, o kinya andũ aingĩ makiuga atĩ nĩ gakuũ.
27 No Jesũ agĩkanyiita guoko agĩgookĩria, nako gakĩrũũgama na igũrũ.
28 Thuutha ũcio Jesũ aingĩra nyũmba arutwo aake makĩmũũria marĩ oiki atĩrĩ, “Nĩkĩ gĩtũmire tũremwo nĩkũingata ngoma ĩyo?”
29 Naake Jesũ akĩmeera atĩrĩ, “Ngoma ya mũthemba ta ũcio ndĩngĩrutĩka na njĩra ĩngĩ tiga o mahooya.”
Jesũ kwaria rĩngĩ ũhoro wa gũkua gwake
30 Thuutha ũcio Jesũ na arutwo aake makiuma kũu magĩtuĩkanĩria Galili. Naake Jesũ ndeendaga mũndũ o na ũmwe amenye kũrĩa aarĩ,
31 amu nĩarutaga arutwo aake akameera atĩrĩ, “Mũrũ wa Mũndũ nĩakaaneanwo kũrĩ andũ, nao nĩmakaamũũraga, no thuutha wa mĩthenya ĩtatũ nĩakaariũka.”
32 Ĩndĩ arutwo matiigana gũtaũkĩrwo nĩ ũhoro ũcio, no magĩĩtigĩra kũmũũria amataũrĩre.
Nũũ mũnene gatagatĩinĩ ka arutwo
33 Nao magĩgĩkinya Kaperinaumu, na matoonya nyũmba thĩinĩ, Jesũ akĩũria arutwo aake atĩrĩ, “Mũgũkararanagĩria kĩ rĩrĩa tuuma njĩrainĩ?”
34 Nao magĩkira ki nĩ ũndũ rĩrĩa maarĩ njĩrainĩ nĩmaakararanagia gatagatĩinĩ kaao makĩũranagia nũũ mũnene makĩria.
35 Naake Jesũ agĩikara thĩ agĩĩta arutwo acio ikũmi na eerĩ akĩmeera atĩrĩ, “Ũrĩa wothe wendaga gũtuĩka wa mbere no aatuĩkire wa mũthia harĩ arĩa angĩ oothe, na atuĩke ndungata yao oothe.”
36 Agĩcooka akĩoya kaana agĩkarũũgamia gatagatĩinĩ kaao, agĩkahĩmbĩria akĩmeera atĩrĩ,
37 “Ũrĩa wothe wamũkagĩra kaana ta gaaka thĩinĩ wa rĩĩtwa rĩakwa, nĩ niĩ aamũkagĩra; ũrĩa wothe ũnyamũkagĩra, ti niĩ aamũkagĩra, no aamũkagĩra ũrĩa wandũmire.”
Ũrĩa wothe ũtarĩ thũ iitũ nĩ mũraata witũ
38 Naake Johana agĩcooka akĩmwĩra atĩrĩ, “Mũrutani, nĩtuonire mũndũ ũkũingataga ngoma thĩinĩ wa rĩĩtwa rĩaku, twamũkaania nĩ ũndũ ti mũraata witũ.”
39 No Jesũ akĩmwĩra atĩrĩ, “Tigaai kũmũkaania, amu mũndũ o wothe ũkũringa ciama thĩinĩ wa rĩĩtwa rĩakwa ndangĩcooka arĩthaahie,
40 tondũ mũndũ o wothe ũtarĩ thũ iitũ nĩ mũraata witũ.
41 Ngũmwĩra na ma atĩ, mũndũ o wothe ũrĩa ũkaamũhe maaĩ ma kũnyua tondũ mũrĩ aakwa nĩakaaheeo igai rĩake.
Magerio
42 “Mũndũ o na ũmwe angĩkĩhĩtithia kamwe ga tũũtũ tũnjĩtĩkĩĩtie atũme keehie, wega nĩ mũndũ ũcio oohererwo ihiga rĩa gĩthĩi ngingo aikio iriainĩ.
43 Angĩkorwo nĩ guoko gwaku gũgũtũma wĩhie, gũtinie! Nĩ kaba kũingĩra muoyoinĩ ũtarĩ na guoko kũmwe, gũkĩra gũthiĩ icuainĩ wĩ na mooko meerĩ, kũrĩa kũrĩ mwaki ũtahorekaga. [
44 Kũu ‘igunyũ iria imarĩaga itikuaga, kana mwaki ũrĩa ũmacinaga ũkahora.’]
45 Angĩkorwo nĩ kũgũrũ gwaku gũgũtũma wĩhie, gũtinie! Nĩ kaba kũingĩra muoyoinĩ wĩ gĩthua gũkĩra gũikio icuainĩ wĩ na magũrũ meerĩ. [
46 Kũu ‘igunyũ iria imarĩaga itikuaga, kana mwaki ũrĩa ũmacinaga ũkahora.’]
47 Angĩkorwo nĩ riitho rĩaku rĩgũtũma wĩhie, rĩkũũre! Nĩ kaba kũingĩra Ũthamakiinĩ wa Ngai wĩ na riitho rĩmwe handũ ha gũikio icuainĩ wĩ na maitho meerĩ;
48 kũu ‘igunyũ iria imarĩaga itikuaga kana mwaki ũrĩa ũmacinaga ũkahora.’
49 “Mũndũ o wothe nĩagaatherio na mwaki o ta ũrĩa nyama cia igongoona itheragio na cumbĩ.
50 “Cumbĩ nĩ mwega, no ũngĩthira mũcamo, ũngĩcooka gũcamithio ta cumbĩ nĩ kĩĩ?
“Tuĩkaai ta cumbĩ, na mũikarage mũiguaine inyuothe.”