Jesũ kũhũũnia andũ ngiri inya
1 Na rĩĩrĩ, matukũinĩ o macio andũ aingĩ magĩkorwo magomanĩĩte rĩngĩ no matiarĩ na gĩa kũrĩa. Naake Jesũ agĩĩta arutwo aake harĩ we akĩmeera atĩrĩ,
2 “Nĩndĩraiguĩra andũ aya tha, tondũ makoreetwo na niĩ rĩu mĩthenya ĩtatũ, na matirĩ na kĩndũ gĩa kũrĩa.
3 Ingĩmeera mainũke mahũũtiĩ mahota kũringĩkĩra njĩra, amu andũ amwe aao moimĩĩte kũraaya.”
4 Nao arutwo makĩmũcookeria atĩrĩ, “Mũndũ angĩkĩruta irio kũ gũũkũ werũinĩ cia kũhũũnia andũ ta aya?”
5 Naake Jesũ akĩmooria atĩrĩ, “Mwĩ na mĩgate ĩigana?”
Nao makĩmũcookeria atĩrĩ, “Twĩ na mĩgate mũgwanja.”
6 Naake agĩgĩatha andũ acio maikare thĩ, agĩcooka akĩoya mĩgate ĩyo mũgwanja, na arĩĩkia gũcookeria Ngai ngaatho akĩmĩenyũranga, akĩmĩnengera arutwo aake mahe andũ, nao arutwo makĩmatwarĩra.
7 Ningĩ nĩmaarĩ na tũthamaki tũniini tũtaarĩ tũingĩ; naake Jesũ arĩĩkia gũtũraathima akĩĩra arutwo matũhe andũ o na tuo.
8-9 Nao andũ makĩrĩa, makĩhũũna. Nao arutwo magĩcooka makĩũngania cienyũ iria ciatigarĩĩte, ikĩiyũra ciondo mũgwanja. Na rĩĩrĩ, maarĩ andũ ta ngiri inya (4,000). Jesũ agĩcooka akĩmeera mainũke.
10 Naake ihinda o rĩu akĩingĩra gatarũinĩ o hamwe na arutwo aake, magĩthiĩ rũgongo rwa Dalumanutha.
Afarisai kũũria maringĩrwo kĩama
11 Nao Afarisai magĩũka, makĩambĩrĩria gũkararania na Jesũ makĩmwĩraga atĩ amaringĩre kĩama kuuma igũrũ, no nĩkũmũgeria maamũgeragia.
12 No Jesũ akĩhũũmũka ihũũmũka inene kuuma o ngoro thĩinĩ, akĩũria atĩrĩ, “Andũ a matukũ maya mekuuga maringĩrwo kĩama nĩkĩ? Ngũmwĩra na ma atĩ, gũtirĩ kĩama mekũringĩrwo!”
13 Naake akĩmatiga, akĩingĩra gatarũ rĩngĩ, akĩringa mũrĩmo ũrĩa ũngĩ wa iria.
Ndaawa ya kũimbia mĩgate ya Afarisai na ya Herode
14 Na rĩĩrĩ, arutwo nĩmaariganĩirwo nĩgũkuua mĩgate no nĩmaarĩ na mũgate ũmwe gatarũinĩ.
15 Naake Jesũ akĩmataara akĩmeera atĩrĩ, “Mwĩmenyagĩrĩreei ndaawa ya kũimbia mĩgate ya Afarisai o na ya Herode.”
16 Nao makĩĩrana atĩrĩ, “Aratwĩra ũguo, nĩ ũndũ tũtirĩ na mĩgate.”
17 Naake Jesũ tondũ nĩamenyire ũrĩa moigaga akĩmeera atĩrĩ, “Mũkwĩrana nĩ ũndũ mũtarĩ na mĩgate nĩkĩ? Kaĩ mũtarĩ mũramenya ũhoro o na kana mũgakuuũka? Mũtirĩ mũratiga kũũmia ngoro?
18 Kaĩ mũtoonaga na mũrĩ na maitho. Kaĩ mũtaiguaga na mũrĩ na matũ? Nĩmũkũririkana
19 rĩrĩa ndaheire andũ arĩa ngiri ithaano (5,000) mĩgate ĩrĩa ĩtaano? Nĩ ciondo ciigana mwacookire gũkuua ciyũire cienyũ?”
Nao makĩmũcookeria atĩrĩ, “Nĩ ikũmi na igĩrĩ.”
20 “Ningĩ rĩ, rĩrĩa ndaheire andũ arĩa ngiri inya (4,000) mĩgate ĩrĩa mũgwanja, nĩ ciondo ciigana muonganirie ciyũrĩĩte cienyũ?”
Nao magĩcookia makĩmwĩra atĩrĩ, “Nĩ mũgwanja.”
21 Agĩkĩmooria atĩrĩ, “Na mũtirĩ mũrataũkĩrwo nĩ ũhoro o na rĩu?”
Jesũ kũhonia mũtumuumu Bethisaida
22 Na rĩĩrĩ, maakinya Bethisaida, andũ makĩreehere Jesũ mũndũ warĩ mũtumuumu, makĩmũthaitha atĩ amũhuutie.
23 Naake akĩnyiita mũndũ ũcio guoko akĩmuumagaria nja ya gĩcagi. Thuutha wa kũmũtuĩra mata maitho, na kũmũigĩrĩra mooko, akĩmũũria atĩrĩ, “Wĩ kĩndũ ũrona?”
24 Naake mũndũ ũcio agĩtiira maitho akiuga atĩrĩ, “Nĩndĩrona andũ, no rĩĩrĩ, ndĩrona mahaana ta mĩtĩ ĩgĩthiĩ.”
25 Jesũ agĩcooka akĩmũigĩrĩra mooko maitho rĩngĩ; naake mũndũ ũcio agĩkũũra maitho mũno, akĩhota kuona indo ciothe wega.
26 Naake Jesũ akĩmwatha ainũke, na ndagaacooke gĩcagiinĩ kĩu.
Petero kuumbũra Jesũ
27 Naake Jesũ akiuma kũu na arutwo aake magĩthiĩ kinya icagi iria irĩ hakuhĩ na Kaisarea Filipi. Me njĩra akĩmooria atĩrĩ, “Andũ moigaga niĩ ndĩ ũ?”
28 Nao makĩmũcookeria atĩrĩ, “Kũrĩ moigaga wee nĩ we Johana Mũbatithania, angĩ Elija, nao angĩ ũmwe wa anabii.”
29 Agĩcooka akĩmooria atĩrĩ, “Ĩ inyuĩ na inyuĩ muugaga niĩ ndĩ ũ?” Naake Petero akĩmũcookeria atĩrĩ, “Wee nĩ we Mesia.”
30 Naake Jesũ akĩmakaania matikeere mũndũ o na ũmwe ũhoro wake.
Jesũ kwaria ũhoro wa gũthĩĩnio na gũkua gwake
31 Na rĩĩrĩ, Jesũ akĩambĩrĩria kũmaruta atĩ Mũrũ wa Mũndũ no mũhaka oone mathĩĩna maingĩ, na aregwo nĩ athuuri na athĩnjĩri Ngai arĩa anene, na arutani a Watho. Na rĩĩrĩ, nĩakooragwo na thuutha wa mĩthenya ĩtatũ acooke ariũke.
32 Agĩkĩmeera ũhoro ũcio atekũhithĩrĩra. Naake Petero akĩmũtwara ndundu, agĩitĩka kũmũkaania.
33 No Jesũ akĩĩhũgũra akĩrora arutwo aake agĩkaania Petero, akĩmwĩra atĩrĩ, “Cooka thuutha wakwa Caitaani! Nĩ ũndũ meciiria macio maaku matiumĩĩte kũrĩ Ngai, moimĩĩte kũrĩ andũ!”
34 Agĩcooka agĩĩta andũ oothe na arutwo aake hamwe akĩmeera atĩrĩ, “Mũndũ o wothe ũngĩenda kũũnũmĩrĩra no aambire eerege we mwene, ooe mũtharaba wake anũmĩrĩre.
35 Tondũ-rĩ, mũndũ o wothe wendaga kũhonokia muoyo wake, ũcio nĩakoorwo nĩguo, no ũrĩa ũũragwo nĩ muoyo wake nĩ ũndũ wakwa, o na nĩ ũndũ wa Ũhoro ũrĩa Mwega, nĩakaũhonokia.
36 Nĩ amu-rĩ, mũndũ angĩĩguna na kĩ o na angĩgaya thĩ yothe na oorwo nĩ muoyo wake?
37 Ningĩ nĩ kĩĩ mũndũ angĩkũũrania muoyo wake nakĩo?
38 Amu mũndũ ũrĩa ũconokaga nĩ ũndũ wakwa na nĩ ũndũ wa ciugo ciakwa thĩinĩ wa rũciaro rũũrũ rũteetĩkĩĩtie na rwa meehia, Mũrũ wa Mũndũ o naake nĩakaamũconokera rĩrĩa agooka na riiri wa Ithe arĩ na araika arĩa atheru.”