Jesũ gũtwarwo kwĩ Pilato
1 O hĩndĩ ĩyo acio oothe arĩa moonganĩĩte magĩũkĩra, magĩtwara Jesũ kwĩ Pilato.
2 Magĩkĩambĩrĩria kũmũthitanga makiuga atĩrĩ, “Tũranyiitire mũndũ ũyũ akĩhĩtithia andũ a bũrũri witũ akĩmeeraga atĩ matikaarutagĩre mũthamaki wa Roma mbeeca cia igooti, na akoiga atĩ nĩ we Mesia, na nĩ mũthamaki.”
3 Naake Pilato agĩkĩmũũria atĩrĩ, “Nĩ we mũthamaki wa Ayahudi?”
Naake Jesũ akĩmũcookeria atĩrĩ, “Nĩ we woiga ũguo.”
4 Naake Pilato akĩĩra athĩnjĩri Ngai arĩa anene na mũingĩ atĩrĩ, “Niĩ ndirona ũndũ o na ũmwe mũũru ũrĩa mũndũ ũyũ eekĩĩte.”
5 No o makĩĩrutanĩria magwatĩirie makiuga atĩrĩ, “Nĩatũmĩĩte andũ oothe, kuuma Galili nginya Judea guothe o hamwe na gũũkũ, mookanĩrĩre nĩ ũndũ wa ũrutani wake.”
Jesũ gũtwarwo kwĩ Herode agaciirithio
6 Rĩrĩa Pilato aiguire ũguo akĩũria atĩrĩ, “Mũndũ ũyũ nĩ Mũũgalili?”
7 Arĩĩkia kũmenya atĩ Jesũ oimĩĩte bũrũri ũrĩa Herode aathanaga, akiuga atwarwo Jerusalemu kũrĩa Herode aarĩ hĩndĩ ĩyo.
8 Rĩrĩa Herode oonire Jesũ, nĩakenire mũno tondũ nĩaiguĩte ũhoro wake, na nĩatũire eriragĩria kũmuona, arĩ na mwĩhoko wa kuona akĩringa ciama.
9 Herode agĩkĩũria Jesũ ciũria nyingĩ, no we ndamũcookeirie.
10 Nao athĩnjĩri Ngai arĩa anene na arutani a Watho makĩrũũgama makĩmũthitanga na hinya mũno.
11 Naake Herode na thigari ciake makĩmũmenereria, na makĩmũnyũrũria; magĩcooka makĩmũhumba nguo yarĩ njega, makĩmũcookia kwĩ Pilato.
12 Mũthenya o ro ũcio Herode na Pilato makĩgĩa ndũgũ nĩ ũndũ maatũire marĩ thũ.
Jesũ gũtuĩrwo kũũragwo
13 Naake Pilato agĩĩta athĩnjĩri Ngai arĩa anene na aathani na mũingĩ,
14 akĩmeera atĩrĩ, “Mũndeheire mũndũ ũyũ mwanjĩĩra atĩ nĩarahĩtithagia andũ. Rĩu nĩndamũciirithia mwĩ ho, na ndinoona mahĩtia o na mamwe ma macio mũramũthitangĩra.
15 O naake Herode ndanoona mahĩtia maake, tondũ nĩamũcookia kũrĩ ithuĩ. Mũndũ ũyũ ndarĩ ũndũ eekĩĩte wa gũtũma ooragwo.
16 Kwoguo ngũmũhũũrithia iboko, njooke ndĩmũrekererie.” [
17 O hĩndĩ ya Thigũkũ ya Bathaka Pilato nĩamoohoragĩra muohwo ũmwe.]
18 No rĩĩrĩ, mũingĩ ũkĩanĩrĩra wĩ wothe ũkiuga atĩrĩ, “Mũndũ ũcio nĩoragwo! Tuohorere Baraba!”
19 (Baraba ooheetwo nĩ ũndũ wa ngũĩ aarutithĩĩtie itũũrainĩ, o na kũũragana.)
20 Naake Pilato agĩkĩarĩria mũingĩ o rĩngĩ, tondũ nĩendaga kũrekereria Jesũ.
21 No mũingĩ ũkĩanĩrĩra ũkiuga atĩrĩ, “Mwambe! Mwambe!”
22 Ningĩ Pilato akĩwarĩria riita rĩa gatatũ akĩũria atĩrĩ, “Nĩ ũũru ũrĩkũ mũndũ ũyũ eekĩĩte? Niĩ ndirĩ ũndũ o na ũmwe mũũru ndĩrona eekĩĩte wa gũtũma ooragwo! Kwoguo ngũmũhũũrithia iboko njooke ndĩmũrekererie.”
23 No mũingĩ ũgĩthiĩ na mbere kwanĩrĩra mũno makĩria atĩ Jesũ aambwo na mũthiainĩ kwanĩrĩra kwaguo gũkĩhootana.
24 Nĩ ũndũ ũcio Pilato agĩtuĩra Jesũ kũringana na wendi waguo.
25 Agĩkĩwohorera mũndũ ũrĩa wendaga, ũrĩa woheetwo nĩ ũndũ wa kũruta ngũĩ itũũrainĩ, na kũũragana, agĩcooka akĩneana Jesũ eekwo o ta ũrĩa wendaga.
Jesũ kwambwo
26 Na rĩĩrĩ, rĩrĩa thigari ciamuumagaragia nĩciacemanirie na mũndũ woimaga na mũgũndainĩ wetagwo Simoni woimĩĩte itũũrainĩ rĩa Kurene. Nacio ikĩmũnyiita, ikĩmũigĩrĩra mũtharaba akuue arũmĩrĩre Jesũ.
27 Nĩarũmĩrĩirwo nĩ andũ aingĩ mũno. Amwe aao maarĩ atumia maagirĩkaga na makarĩra maanĩrĩire nĩ ũndũ wake.
28 Naake Jesũ akĩĩhũgũra na kũrĩ o akĩmeera atĩrĩ, “Atumia aya a Jerusalemu, tigaai kũndĩrĩra, no rĩraai nĩ ũndũ wanyu na ciana cianyu.
29 Nĩ ũndũ ihinda nĩrĩrooka rĩrĩa andũ mariuga atĩrĩ, ‘Kaĩ atumia arĩa thaata, arĩa matarĩ maaciara, o arĩa nyondo ciao itarĩ ciongwo nĩaraathime-ĩ!’
30 Hĩndĩ ĩyo nĩguo andũ makeera irĩma atĩrĩ, ‘Tũgũĩreei!’ Na meere ithũngũri atĩrĩ, ‘Tũhitheei!’
31 Nĩ ũndũ angĩkorwo maũndũ ta maya mareekwo mĩtĩ ĩ mĩruru-rĩ, yoma gũgaagĩĩkwo atĩa?”
32 Na rĩĩrĩ, andũ eerĩ maarĩ aici nĩmaatwarirwo makooraganĩrio hamwe na Jesũ.
33 Rĩrĩa thigari icio ciakinyire handũ heetagwo, “Ihĩndĩ rĩa Mũtwe,” ikĩmwamba ho hamwe na aici eerĩ, ũmwe mwena wake wa ũrĩo, na ũrĩa ũngĩ mwena wa ũmotho.
34 Naake Jesũ akiuga atĩrĩ, “Awa moohere tondũ matiũĩ ũrĩa mareeka.”
Thigari icio igĩcooka igĩcuukĩra nguo ciake mĩtĩ, igĩcigayana.
35 Nao andũ makĩrũũgama ho makĩĩrorera. Nao atongoria a Ayahudi makĩnyũrũria Jesũ makiugaga atĩrĩ, “Nĩarahonokagia andũ arĩa angĩ; nĩakĩĩhonokie angĩkorwo nĩ we Mesia ũrĩa mũthuure wa Ngai!”
36 O nacio thigari nĩciamũnyũrũririe; ciathiire harĩ we kũmũhe thiki,
37 ikĩmwĩraga atĩrĩ, “Angĩkorwo nĩwe mũthamaki wa Ayahudi-rĩ, wĩhonokie!”
38 Na rĩĩrĩ, hau igũrũ wa mũtharaba ũrĩa Jesũ aambĩĩtwo nĩhaandĩkirwo ũndũ ũrĩa aathitangĩirwoatĩrĩ, “Ũyũ nĩ we Mũthamaki wa Ayahudi.”
39 Naake ũmwe wa aici acio maambanĩirio naake akĩmũruma atĩrĩ, “Na githĩ ti we Mesia? Kĩĩhonokie na ũtũhonokie!”
40 No ũcio ũngĩ akĩmũkũũma akĩmwĩra atĩrĩ, “Kaĩ ũtetigĩrĩĩte Ngai? Ũtuĩrĩirwo ũndũ ũmwe na ũrĩa atuĩrĩirwo.
41 Ithuĩ-rĩ, tũtuĩrĩirwo ũrĩa kwagĩrĩire tondũ tũtuĩrĩirwo kũringana na ciĩko ciitũ, no mũndũ ũyũ ndarĩ na ũndũ mũũru eekĩĩte.”
42 Mũici ũcio agĩcooka akĩĩra Jesũ, atĩrĩ, “Jesũ ndirikana wakinya Ũthamakiinĩ waku.”
43 Naake Jesũ akĩmwĩra atĩrĩ, “Ngũkwĩrĩra na ma atĩ, ũũmũũthĩ ũrĩkorwo na niĩ Ikenero.”
Jesũ gũkua
44 Na rĩĩrĩ, thaa thita ũtheri wa riũa ũkĩhumbĩrwo, naguo bũrũri wothe ũkĩgĩa nduma kinya thaa kenda,
45 nakĩo gĩtambaya kĩa Hekaarũ gĩgĩatũkana maita meerĩ.
46 Naake Jesũ akĩgũũthũka na mũgambo mũnene akiuga atĩrĩ, “Awa! Roho wakwa ndaũiga mookoinĩ maaku!” Na arĩĩkia kuuga ũguo, agĩtuĩkana.
47 Naake mũnene wa thigari igana oona ũrĩa gwekĩka, akĩgooca Ngai akiuga atĩrĩ, “Ti itheru mũndũ ũyũ araarĩ mũthingu!”
48 Rĩrĩa andũ oothe arĩa moonganĩĩte hau kwĩrorera moonire ũrĩa gwekĩka, makĩinũka methikĩire nĩ ũndũ wa kĩeha.
49 Nao andũ oothe arĩa maamũũĩ, o hamwe na atumia arĩa maamũrũmĩrĩire kuuma Galili, makĩrũũgama o haraaya merorere maũndũ macio.
Jesũ gũthikwo
50 Na rĩĩrĩ, thĩinĩ wa itũũra rĩa Arimathea, bũrũriinĩ wa Judea, nĩkwarĩ mũndũ ũmwe wetagwo Josefu. Mũndũ ũcio aarĩ mwega na mũthingu, na aarĩ wa gĩkundi kĩa Ayahudi kĩrĩa gĩathanaga.
51 We ndaiguithanĩirie nao ũhoroinĩ wa gũtuĩra Jesũ, o na gĩĩko kĩao gĩa kũmwamba. We nĩatũũraga eetereire Ũthamaki wa Ngai.
52 Naake agĩgĩthiĩ kũrĩ Pilato akĩũria aheeo mwĩrĩ wa Jesũ.
53 Agĩkĩruta mwĩrĩ ũcio kuuma mũtharaba igũrũ, akĩwoha na cuka, agĩthiĩ akĩũiga thĩinĩ wa mbĩĩrĩra yenjeetwo rwaroinĩ rwa ihiga, nayo mbĩĩrĩra ĩyo ndĩakoreetwo ĩigĩĩtwo mwĩrĩ ũngĩ o na ũmwe.
54 Kwarĩ mũthenya wa Jumaa, naguo mũthenya wa Thabatũ warĩ hakuhĩ kwambĩrĩria.
55 Nao atumia arĩa moimĩĩte na Jesũ Galili makĩrũmĩrĩra Josefu, magĩkĩona mbĩĩrĩra na ũrĩa mwĩrĩ wa Jesũ waigirwo ho.
56 Magĩcooka makĩinũka magĩthiĩ magĩthondeka indo nungi wega na maguta manungi wega ma kũhaka mwĩrĩ.
Mũthenya wa Thabatũ magĩkĩhuurũka, kũringana na Watho.