Mũbango wa kũũraga Jesũ
1 Na rĩĩrĩ, Thigũkũ ya mĩgate ĩtarĩ mĩĩkĩre ndaawa ya kũimbia, nĩ yo ĩĩtagwo Bathaka, nĩyakuhĩrĩirie.
2 Nao athĩnjĩri Ngai arĩa anene na arutani a Watho nĩmaatuĩragia ũrĩa mangĩũragithia Jesũ na hitho, nĩ ũndũ nĩmeetigagĩra mũingĩ.
Judasi gwĩtĩkĩra gũkunyanĩra Jesũ
3 Hĩndĩ ĩyo Caitaani agĩtoonya thĩinĩ wa Judasi ũrĩa wetagwo Mũisikariota, ũrĩa warĩ ũmwe wa arutwo arĩa ikũmi na eerĩ a Jesũ.
4 Kwoguo Judasi agĩgĩthiĩ akĩrĩĩkanĩra na athĩnjĩri Ngai arĩa anene na anene a arangĩri a Hekaarũ ũrĩa angĩakunyanĩire Jesũ kũrĩ o.
5 Nao magĩgĩkena na makĩiguithanĩria atĩ nĩmekũmũrĩha mbeeca.
6 Judasi nĩetĩkĩrire, na akĩambĩrĩria gũcaria mweke wa gũkunyanĩra Jesũ kũrĩ o rĩrĩa hatarĩ andũ.
Jesũ kwĩhaarĩria kũrĩa Bathaka
7 Naguo mũthenya wa mĩgate ĩtarĩ mĩĩkĩre ndaawa ya kũimbia, na noguo mũthenya ũrĩa tũtũrũme twa kũrĩĩo Bathaka tũthĩnjagwo, ũgĩkinya.
8 Naake Jesũ agĩtũma Petero na Johana, akĩmeera atĩrĩ, “Thiĩi mũkahaarĩrie Bathaka tũrĩe.”
9 Nao makĩmũũria atĩrĩ, “Ũkwenda tũkamĩhaarĩrie kũ?”
10 Naake Jesũ akĩmacookeria atĩrĩ, “Mwatoonya itũũrainĩ nĩmũgũtũngwo nĩ mũndũ ũkuuĩĩte mũtũngi wa maaĩ; mũrũmĩrĩreei kinya nyũmba ĩrĩa arĩtoonya.
11 Mwatoonya thĩinĩ ĩraai mwene nyũmba ĩyo atĩrĩ, ‘Mũrutani egũkũũria atĩrĩ, ĩ ha nyũmba ya ageni ĩrĩa ngũrĩĩra Bathaka na arutwo aakwa?’
12 Naake mũndũ ũcio nĩekũmuonia nyũmba nene ya igũrũ, ĩ na indo ciothe haarĩrĩriai Bathaka kuo.”
13 Nao magĩgĩthiĩ, magĩkora o ta ũrĩa Jesũ aameerĩĩte, magĩkĩhaarĩria Bathaka.
Irio cia Mwathani
14 Narĩo ihinda rĩakinya, Jesũ agĩikara thĩ kũrĩa hamwe na atũmwo aake.
15 Akĩmeera atĩrĩ, “Nĩndĩrirĩirie mũno kũrĩanĩra na inyuĩ irio ici cia Bathaka itanathĩĩnio!
16 Nĩ ũndũ ngũmwĩra na ma atĩ ndigaacooka gũcirĩa kinya rĩrĩa igaakorwo ciagĩrĩĩte biũ Ũthamakiinĩ wa Ngai.”
17 Jesũ agĩcooka akĩoya gĩkombe, na arĩĩkia gũcookeria Ngai ngaatho, akiuga atĩrĩ, “Oyai gĩkombe gĩĩkĩ mũnyuanĩre.
18 Ngũmwĩra na ma atĩ, kuuma rĩu ndigaacooka kũnyua ndibei ĩno kinya rĩrĩa Ũthamaki wa Ngai ũgooka.”
19 Ningĩ akĩoya mũgate, na arĩĩkia gũcookeria Ngai ngaatho akĩwenyũra, akĩmahe akiugaga atĩrĩ, [“Ũyũ nĩ mwĩrĩ wakwa ũrĩa ũheanĩĩtwo nĩ ũndũ wanyu. Ĩkagaai ũũ nĩ geetha mũndirikanage.”
20 Ningĩ no taguo aamaneire gĩkombe marĩĩkia kũrĩa akiugaga atĩrĩ, “Gĩkombe gĩĩkĩ nĩ kĩrĩĩkanĩro kĩerũ gĩthondekeetwo na thakame yakwa, ĩrĩa ĩgũitwo nĩ ũndũ wanyu.]
21 “No rĩĩrĩ, mũndũ ũrĩa ũkũngunyanĩra e hamwe na niĩ meethainĩ ĩno!
22 Mũrũ wa Mũndũ nĩegũkua o ta ũrĩa Ngai atuĩte, no mũndũ ũcio ũkũmũkunyanĩra kaĩ e thĩĩnainĩ-ĩ!”
23 Nao arutwo makĩambĩrĩria kũũrania o eene nũũ gatagatĩinĩ kaao ũngĩekire ũguo.
Ngarari ĩkoniĩ ũnene
24 Na rĩĩrĩ, nĩhaagĩire ngarari gatagatĩinĩ ka arutwo makĩũrania nũũ ũngĩatuirwo mũnene wao.
25 Naake Jesũ akĩmeera atĩrĩ, “Athamaki a andũ arĩa mateetĩkĩĩtie nĩmakoragwo na wathani igũrũ rĩao, na aathani acio nĩmeĩĩtaga, ‘Araata a andũ.’
26 No ũguo tiguo inyuĩ mũhaana; rekeei ũrĩa mũnene gatagatĩinĩ kaanyu atuĩke ta arĩ we mũnyiinyi, na ũrĩa ũratongoria atuĩke wa kũmũtungatĩra.
27 Atĩrĩĩrĩ, mũndũ ũrĩa ũikaraga meethainĩ areeherwo irio, na ũrĩa ũreehage irio icio, nĩ ũrĩkũ mũnene? Na githĩ ti ũrĩa ũikaraga meethainĩ areeherwo irio? No niĩ-rĩ, ndũũranagia na inyuĩ haana ta arĩ niĩ ndĩmũtungatagĩra.
28 “Inyuĩ nĩmũkoreetwo hamwe na niĩ magerioinĩ maakwa;
29 Kwoguo, o ta ũrĩa Awa aaheire wathani, o na niĩ nĩndamũhe wathani,
30 nĩ geetha mũkaarĩa na mũnyue meethainĩ yakwa Ũthamakiinĩ wakwa, na mũgaikarĩra itĩ cia Ũthamaki, mwathe mĩhĩrĩga ĩrĩa ikũmi na ĩĩrĩ ya Isiraeli.”
Jesũ Kwĩra Petero o mbere atĩ nĩarĩmũkaana
31 Naake Jesũ akiuga atĩrĩ, “Simoni, Simoni! Tathikĩrĩria! Caitaani nĩahoeete rũũtha mũneanwo inyuothe kũrĩ we nĩguo amũcunge o ta ũrĩa ngano icungagwo nĩ mũrĩmi.
32 No wee nĩngũhoeire wĩtĩkio waku ndũgaathire, na warĩĩkia kũnjookerera, ũũmagĩrĩrie aariũ a Thooguo.”
33 No Petero akĩmũcookeria atĩrĩ, “Mwathani, niĩ nĩndĩharĩirie gũthiĩ nawe njeera o na gũkuanĩra nawe!”
34 Naake Jesũ akĩmwĩra atĩrĩ, “Ngũkwĩra na ma atĩ, ũtukũ wa ũũmũũthĩ ngũkũ ndĩkũga ũtangaanĩĩte gatatũ atĩ ndũnjũũĩ.”
Tũbeeti, mondo, na rũhiũ
35 Ningĩ Jesũ akĩũria arutwo aake atĩrĩ, “Rĩrĩa ndamũtũmire mũtarĩ na tũbeeti, kana mondo, kana iraatũ-rĩ, he kĩndũ mwagire?”
Nao magĩcookia atĩrĩ, “Aaca.”
36 Jesũ agĩcooka akĩmeera atĩrĩ, “Rĩu-rĩ, ũrĩa wĩ na kabeeti kana mondo nĩakuue, na mũndũ ũrĩa ũtarĩ na rũhiũ nĩendie nguo yake arũgũre.
37 Nĩ ũndũ ngũmwĩra na ma atĩ, ũhoro ũrĩa wandĩkĩĩtwo atĩ, ‘Nĩatuĩrĩirwo ũndũ ũmwe na andũ arĩa eehia,’ no mũhaka ũhinge harĩ niĩ, nĩ gũkorwo maũndũ marĩa maandĩkĩĩtwo igũrũ rĩakwa nĩ hĩndĩ marahinga.”
38 Nao arutwo makĩmwĩra atĩrĩ, “Mwathani, tarora; haaha he na hiũ igĩrĩ!”
Naake akĩmacookeria atĩrĩ, “Nĩ njiganu!”
Jesũ kũhooya kĩrĩmainĩ kĩa Mĩtamaiyũ
39 Naake Jesũ akiuma itũũrainĩ rĩu, agĩthiĩ kĩrĩmainĩ kĩa Mĩtamaiyũ o ta ũrĩa aamenyereete, nao arutwo aake makĩmũrũmĩrĩra.
40 Akinya ho akĩmeera atĩrĩ, “Hooyai nĩguo mũtikagũe magerioinĩ.”
41 Agĩcooka akĩmeeherera agĩthiĩ o ta itĩĩna rĩa harĩa mũndũ angĩikia ihiga, agĩturia ndu akĩhooya
42 atĩrĩ, “Awa, angĩkorwo nĩũkwenda, njehereria gĩkombe gĩĩkĩ kĩa mĩnyamaaro, no ti ũrĩa niĩ mwene ngwenda; wendi waku ũroekĩka” [
43 Na o hĩndĩ ĩyo mũraika akĩmuumĩrĩra kuuma igũrũ, akĩmũũmĩrĩria.
44 Naake Jesũ akĩhooya mũno makĩria e na ruwo rũnene. Thithino yake yataataga thĩ ĩhaana ta mataata manene ma thakame.]
45 Rĩrĩa Jesũ aarĩĩkirie kũhooya, akĩrũũgama na igũrũ, agĩcooka harĩa aatigĩĩte arutwo aake, agĩkora makomeete nĩ ũrĩa moorĩĩtwo nĩ hinya nĩ ũndũ wa kĩeha.
46 Agĩkĩmooria atĩrĩ, “Mũkomeete nĩkĩ? Ũkĩraai mũhooe nĩguo mũtikagũe magerioinĩ.”
Jesũ kũnyiitwo
47 Na rĩĩrĩ, o Jesũ akĩaragia hagĩũka gĩkundi kĩa andũ gĩtongoreetio nĩ Judasi, ũmwe wa arutwo arĩa ikũmi na eerĩ, naake agĩgĩkuhĩrĩria Jesũ nĩguo amũmumunye.
48 No Jesũ akĩmũũria atĩrĩ, “Judasi, ũgũkunyanĩra Mũrũ wa Mũndũ na ũndũ wa kũmũmumunya?”
49 Rĩrĩa arutwo arĩa maarĩ na Jesũ moonire ũrĩa kwerekeire gwĩkĩka makĩmũũria atĩrĩ, “Mwathani, tũmatemenge na hiũ?”
50 Naake ũmwe wao agĩtema ngombo ya Mũthĩnjĩri Ngai Ũrĩa Mũnene, akĩmĩtinia gũtũ kwa ũrĩo.
51 No Jesũ akiuga atĩrĩ, “Tigĩraai hau!” Agĩcooka akĩhuutia gũtũ kwa ngombo ĩyo, agĩkũhonia.
52 Hĩndĩ ĩyo Jesũ akĩũria athĩnjĩri Ngai arĩa anene na arangĩri a Hekaarũ na athuuri arĩa mookĩĩte kũmũnyiita atĩrĩ, “Kaĩ ndĩ mũici tondũ mwoka na hiũ na njũgũma kũũnyiita?
53 Ndĩratũũraga na inyuĩ na mũtirĩ mwageria kũũnyiita. No rĩĩrĩ, nĩ ihinda rĩanyu, o hĩndĩ ĩno hinya wa nduma ũrathana.”
Petero gũkaana Jesũ
54 Nao magĩkĩnyiita Jesũ makĩmũtwara kwa Mũthĩnjĩri Ngai Ũrĩa Mũnene, naake Petero akĩmũrũmĩrĩra arĩ o haraaya.
55 Na rĩĩrĩ, rĩrĩa maakirie mwaki nja gatagatĩ magĩikara thĩ hamwe, Petero agĩikara hamwe nao.
56 Nayo ndungata ĩmwe ya mũirĩĩtu ikĩmuona aikarĩĩte hau mwakiinĩ ĩkĩmũkũũrĩra maitho ĩkiuga atĩrĩ, “O naake mũndũ ũyũ oima hamwe na Jesũ!”
57 Naake Petero agĩkaana akiuga atĩrĩ, “Mũtumia ũyũ, mũndũ ũcio o na ndimũũĩ!”
58 Ihinda iniini rĩathira mũndũ ũngĩ akĩona Petero akĩmwĩra atĩrĩ, “O nawe wĩ ũmwe wao!”
Naake Petero agĩcookia atĩrĩ, “Mũndũ mũrũme ũyũ, niĩ ndirĩ ũmwe wao!”
59 Thuutha wa ithaa rĩmwe, mũndũ ũngĩ akiuga agwatĩirie atĩrĩ, “Ti itherũ mũndũ ũyũ oima naake; nĩ ũndũ o naake nĩ Mũũgalili!”
60 No Petero akiuga atĩrĩ, “Mũndũ mũrũme ũyũ, niĩ ndiũĩ ũrĩa ũroiga!”
Na rĩĩrĩ, ihinda o rĩu aaragia, ngũkũ ĩgĩkũga.
61 Naake Mwathani akĩhũgũka, akĩrora Petero, naake Petero akĩririkana ciugo iria eerĩĩtwo nĩ Mwathani atĩrĩ, “Ũtukũ wa ũũmũũthĩ ngũkũ ĩtaanakũga nĩũrĩngaana gatatũ.”
62 Naake Petero akiuma nja akĩrĩra e na ruwo rũingĩ.
Jesũ kũnyũrũrio na kũhũũrwo
63 Nao andũ arĩa maarangĩrĩĩte Jesũ makĩmũnyũrũria na makĩmũhũũra.
64 Magĩcooka makĩmuoha maitho na gĩtambaya makĩmwĩra atĩrĩ, “Ragũra uuge nũũ wakũgũtha!”
65 Magĩcooka makĩaria ciugo ingĩ nyingĩ cia kũmũruma.
Jesũ gũtwarwo mbere ya kĩama
66 Kwarooka gũkĩa, atongoria a thunagogi na athĩnjĩri Ngai arĩa anene na arutani a Watho magĩcemania, naake Jesũ akĩreehwo mbere yao.
67 Makĩmũũria atĩrĩ, “Tatwĩre kana wee nĩ we Mesia?”
Naake Jesũ akĩmacookeria akĩmeera atĩrĩ, “Ingĩmwĩra, mũtingĩĩtĩkia,
68 na ingĩmũũria mũtingĩcookia.
69 Kuuma rĩu Mũrũ wa Mũndũ arĩkoragwo aikarĩĩte mwena wa ũrĩo wa Ngai Mwene Hinya Wothe.”
70 Nao oothe makĩmũũria atĩrĩ, “Wee ũkĩrĩ Mũrũ wa Ngai?”
Naake Jesũ akĩmacookeria akĩmeera atĩrĩ, “Nĩ inyuĩ mwoiga atĩ nĩ niĩ we.”
71 Magĩkĩũrania atĩrĩ, “Nĩ ũira ũrĩkũ ũngĩ tũgũkĩenda? Nĩtweiguĩra kuuma kanua gaake!”