Ngai nĩakaaniina Moabi
1 Ĩno nĩ yo ndũmĩrĩri nditũ ĩrĩa yaheanirwo ĩkoniĩ Moabi.
Matũũra ma Ari na Kiri maniinĩĩtwo ũtukũ o ũmwe,
na bũrũri wa Moabi ũkirĩĩte ihooru ki.
2 Andũ a Diboni moorĩire kũndũ gũtũũgĩru kũrĩa mathaathayagĩria makarĩrĩre kuo.
Amoabi maragirĩka moigĩrĩirie,
makĩrĩrĩra matũũra ma Nebo na Medeba.
Oothe nĩmeenjeete njuĩrĩ na nderu
moonanie ũrĩa manyiitĩĩtwo nĩ kĩeha.
3 Andũ marathiĩ mehumbĩĩte nguo cia makũnia;
kũgirĩka na kũrĩra nocio iraiguo ciathĩinĩ na nyũmba igũrũ.
4 Andũ a Heshiboni na Eleale no kũrĩra mararĩra;
kĩrĩro kĩao kĩraiguuo nĩ andũ marĩ Jahazu.
Thigari cia Moabi no kũrĩra irarĩra ciugĩrĩirie
ikĩinainaga nĩ guoya.
5 Ngoro yakwa nĩkũrĩrĩra ĩrarĩrĩra Moabi,
andũ arĩa matigarĩĩte maroorĩra matũũrainĩ ma Zoari
na Egilathu Shelishiya.
Marambata Luhithu o makĩrĩraga;
meerekeire Horonaimu
makĩrĩraga moigĩrĩirie nĩ ũrĩa kũniinanĩĩtwo.
6 Maaĩ ma karũũĩ ka Nimirimu nĩ mahũu,
ndeereinĩ ciako nyeki nĩkũũma ĩrooma;
gũtirĩ kĩndũ kĩruru gĩtigarĩĩte.
7 Andũ mararinga karũũĩ karĩa ke mĩtĩ hũgũrũrũinĩ ciako
makuuĩĩte kĩrĩa gĩothe mahoteete kũhonokia.
8 Kĩrĩro nĩkĩhunjĩĩte bũrũriinĩ wothe wa Moabi;
nĩkĩiguĩtwo matũũrainĩ ma Egilaimu na Beerelimu.
9 Atĩrĩĩrĩ, itũũrainĩ rĩa Diboni rũũĩ rũiyũire thakame;
o na gũtuĩka ũguo, Ngai nĩaigĩire andũ aakuo maũndũ mooru gũkĩra ũguo.
Andũ oothe arĩa matigarĩĩte Moabi nĩmekũũragwo.