Andũ gũcooka kuuma ithaamĩrio
1 MWATHANI nĩakaaringwo nĩ tha nĩ ũndũ wa Aisiraeli andũ aake na amatue aake kĩũmbe o rĩngĩ. Ningĩ nĩakaamaiga bũrũriinĩ wao kĩũmbe, na andũ a ndũũrĩrĩ nĩmageeturanĩra na matũuranie nao.
2 Ndũũrĩrĩ nyingĩ nĩigaateithĩrĩria Aisiraeli gũcooka bũrũri ũrĩa MWATHANI aamaheire. Marĩ bũrũriinĩ wao ndũũrĩrĩ icio, ikaamatungataga ta ngombo. Andũ arĩa maatuĩte Aisiraeli ngombo, magaatuĩka ngombo cia Aisiraeli. Andũ arĩa maatũire mahinyagĩrĩria Aisiraeli, magaathagwo nĩ o.
Mũthamaki wa Babilonia gũkua
3 MWATHANI nĩagaakũũra andũ aake a Isiraeli, amũrute maruwoinĩ, mathĩĩnainĩ, o na mawĩrainĩ maritũ marĩa maarutithagio.
4 Hĩndĩ ĩyo nĩmakaina magĩthirĩkagia mũthamaki wa Babilonia moige atĩrĩ:
“Taoneei ũrĩa ũratũhinyagĩrĩria!
Rĩu ndarĩ ho!
Ndegũcooka gũtũhinyĩrĩria rĩngĩ!
5 MWATHANI nĩaniinĩĩte ũthamaki wa aathani ooru,
6 arĩa mahinyagĩrĩria andũ marĩ na maraakara maingĩ,
na matatigithagĩria kũnyamaaria arĩa maahootire marĩ na marũrũ maingĩ.
7 Rĩu thĩ yothe nĩnogokeete na ĩkagĩa na thaayũ,
na andũ nĩkũina maraina makeneete.
8 O na mĩthengera na mĩtarakwa ya Lebanoni
nĩrakenerera mũthamaki ũcio ũng’aũranĩĩtio,
tondũ rĩu nĩathengeetio,
na gũtirĩ mũndũ ũgaacooka kũmĩtema!
9 “Atĩrĩĩrĩ, gwa akuũ nĩkwĩhaarĩria kũreehaarĩria
gũtũnge mũthamaki wa Babilonia.
Ngoma cia andũ arĩa maarĩ hinya gũũkũ thĩ nĩirethagathaga;
ngoma cia athamaki nĩgũũkĩrĩria irookĩrĩria itĩ.
10 Ciothe iramwanĩrĩra ikiugaga atĩrĩ,
‘Rĩu ũrĩ ũmwe witũ, na wagĩĩte hinya o ta ithuĩ!
11 Ũratũire ũinagĩrwo na mĩtũũrirũ,
no rĩu wĩ gũũkũ kwa arĩa akuũ!
Ũrĩkomagĩra gĩtanda kĩa igunyũ,
na wĩhumbagĩre na mũrengeti wa mũthũa!’ ”
12 “Ũũi, mũthamaki wa Babilonia!
Ũrakengaga ta njata ya Kĩwariĩ,
no rĩu ũharũrũkĩĩtio ũkoima igũrũ!
Ũratũire ũtooragia ndũũrĩrĩ ciothe,
no rĩu ũbacanĩĩtio ũkagũa thĩ!
13 Ũreĩĩraga ũgwĩtũũgĩria,
ũthondeke gĩtĩ gĩaku gĩa ũthamaki na kũu igũrũ rĩa njata.
Ũreciiragia ũrĩikaraga ta mũthamaki
kĩrĩmainĩ kĩa na rũgongo kũrĩa ngai igomanaga.
14 Ũroigaga ũkwambata na kũu igũrũ rĩa matu,
nĩguo mũiganane na Mwene Hinya Wothe.
15 No rĩu ũikũrũkĩĩtio kwa arĩa akuũ,
ũgathinĩkanio o kũrĩa kũriku mũno!
16 “Rĩu arĩa akuũ megũkwĩrorera magegeete meyũrie atĩrĩ,
‘Ĩ ũyũ nĩ mũndũ ũrĩa ũrainainagia thĩ,
na agatũma moothamaki meenyenye?
17 Ũyũ-rĩ, nĩ ũrĩa ũraharaganagia matũũra,
agatũma thĩ yothe ĩhaane werũ,
o na ũtangĩrarekereirie mĩgwate yake ĩinũke kwao?’ ”
18 Athamaki oothe a mabũrũri mathikĩĩtwo na gĩtĩĩo,
o mũndũ mbĩĩrĩrainĩ yake?
19 No wee o na mbĩĩrĩra ndũrĩ.
Kĩimba gĩaku gĩikanĩĩtio o ro ũguo kĩbuthe na gĩkarangarangwo.
Gĩkomeirwo nĩ ciimba cia thigari iria ciũragĩirwo mbaarainĩ,
na gĩgaikanio hamwe nacio irimainĩ rĩenjeetwo mahigainĩ.
20 Tondũ nĩwanangĩĩte bũrũri waku,
na ũkooraga andũ aaku,
ndũgũthikwo ta athamaki arĩa angĩ.
Gũtirĩ mbeũ yaku o na ĩmwe ĩgũtigara, wee mwaganu ũyũ.
21 Tarekeei mbũragano ĩkinye!
Ciana cia mũthamaki ũyũ nĩgũkua igũkua
nĩ ũndũ wa meehia ma maithe maacio;
itigaacooka gwatha thĩ,
o na kana ciake matũũra mangĩ gũũkũ thĩ.
Ngai nĩakaaharagania Babiloni
22 MWATHANI Mwene Hinya Wothe aroiga atĩrĩ, “Nĩngũtharĩkĩra itũũra rĩa Babiloni na ndĩrĩharaganie. Ndirĩ kĩndũ ngũtigia; ciana na andũ agima gũtirĩ ũgũtigara. Nĩ niĩ MWATHANI ndoiga ũguo.
23 Nĩngaatũma gũtuĩke gwa gũtũũrwo nĩ ngũrũe cia gĩthaka, o na kwarahage maaĩ. Ngaahaata Babiloni na kĩhaato, haate indo ciothe biũ. Niĩ MWATHANI Mwene Hinya Wothe nĩ niĩ ndoiga ũguo.”
Ngai nĩakaaniina Aasiria
24 MWATHANI Mwene Hinya Wothe nĩehĩtĩĩte akoiga atĩrĩ,
“Ũndũ ũrĩa ndĩciirĩĩtie no ũkaahinga.
Ũndũ ũrĩa nduĩte atĩ nĩngwĩka no ũgeekĩka.
25 Aasiria arĩa matũũraga bũrũriinĩ wakwa wa Isiraeli nĩngũmaniina
na ndĩmarangĩrĩrie irĩmainĩ ciakwa.
Nĩngũthengeria andũ aakwa mũtĩ wa ngingo,
na mũrigo ũrĩa matũire makuuithĩĩtio nĩ Aasiria.
26 Atĩrĩĩrĩ, ũyũ nĩ mũbango ũrĩa bangĩire thĩ yothe,
na nĩndambũrũkĩĩtie guoko gwakwa nĩguo
herithie andũ a ndũũrĩrĩ.”
27 MWATHANI Mwene Hinya Wothe nĩeciirĩĩtie kũhingia ũndũ ũcio.
Nũũ ũngĩkĩmũgiria?
Nĩatambũrũkĩtie guoko gwake aherithanie.
Nũũ ũngĩgĩgũkũnja?
Ngai nĩakaaniina Afilisiti
28 Ĩno nĩ yo ndũmĩrĩri nditũ ĩrĩa MWATHANI aaheanire mwaka ũrĩa mũthamaki Ahazu aakuire.
29 Andũ a Filisitia, njũgũma ĩrĩa mũrahũũragwo nayo nĩyunangĩĩtwo,
no rĩĩrĩ, mũtikaarũũhie.
Tondũ-rĩ, nyoka ya mũthemba ũmwe yathenga,
hacookaga ĩngĩ njũru makĩria.
Itumbĩ rĩayo rĩtũrĩkaga
nyamũ ĩngĩ ya thĩ ĩkũũmbũka na ĩgwakana mwaki.
30 MWATHANI nĩarĩrĩithagia marigithaathi ma athĩĩni aake,
na amaarahagie na thaayũ.
No rĩĩrĩ, inyuĩ Afilisiti aya, ekũmũtũmĩra ng’aragu nene mũno,
na gũtirĩ o na ũmwe wanyu ũgũtigwo arĩ muoyo.
31 Matũũra moothe ma Afilisiti, girĩkaai mũgĩĩtagia ũteithio!
Nyiitwoi nĩ guoya inyuothe!
Nĩ gũkorwo mbĩĩri ya rũkũngũ nĩrooka yumĩĩte na mwena wa na rũgongo
yũmbũrĩĩtwo nĩ thigari,
na gũtirĩ o na ĩmwe yacio kĩguoya.
32 Tũgũcookeria atĩa njaama iria irooka itũmĩĩtwo kũrĩ ithuĩ nĩ Afilisiti?
Tũgũciĩra atĩ MWATHANI nĩ we wakĩĩte Zayuni,
na atĩ andũ aake arĩa anyamaarĩku nĩmekuona ũhuurũko kuo.