Kĩoneki kĩa ibuku rĩa gĩkũnjo rĩrĩ rĩerainĩ
1 Nĩndacookire ngĩrora riita rĩngĩ. Riita rĩĩrĩ ndoonire ibuku rĩa gũkũnjwo rĩũmbũkĩĩte rĩerainĩ.
2 Mũraika ũrĩa wanjaragĩria akĩnjũũria kĩrĩa ndoona. Niĩ na niĩ ngĩmũcookeria atĩ ndoona ibuku rĩa gĩkũnjo rĩa mita kenda ũraihu na mita inya na nuthu wariĩ rĩũmbũkĩĩte rĩerainĩ.
3 Mũraika agĩkĩnjĩĩra atĩrĩ, “Thĩinĩ wa ibuku rĩu rĩa gĩkũnjo kwandĩkĩĩtwo kĩrumi kĩrĩa gĩkũnyiita bũrũri wothe. Mwena ũmwe warĩo ũroiga atĩ mũici o wothe nĩagaathengio bũrũriinĩ; naguo mwena ũrĩa ũngĩ ũroiga atĩ mũndũ o wothe ũheenanagia akĩĩhĩtaga, nĩakaanyiitwo eeherio.
4 MWATHANI Mwene Hinya Wothe ekuuga atĩ nĩagaatũma kĩrumi gĩĩkĩ kiumagare, gĩthiĩ gĩgĩtoonyaga nyũmba ya mũici o wothe na nyũmba ya mũndũ o wothe ũheenanagia akĩĩhĩtaga. Gĩgaatoonyaga gĩgaikara nyũmbainĩ ciao na gĩgatiga gĩaciharagania.”
Mũnabii kuona kĩoneki kĩa mũndũ wa nja ũrĩ gĩkabũinĩ
5 Mũraika agĩkĩĩyonithania rĩngĩ akĩnjĩĩra atĩrĩ, “Rora! Kũrĩ kĩndũ kĩngĩ kĩrooka!”
6 Ngĩmũũria atĩrĩ, “Nĩ kĩĩ?” Akĩnjookeria atĩrĩ, “Nĩ gĩkabũ na kĩrũũgamĩrĩire meehia ma bũrũri wothe.”
7 Atĩrĩĩrĩ, gĩkabũ kĩu kĩarĩ na ngunĩko ya cuuma ya bũrũbũrũ. Na rĩĩrĩ, ndĩroreire o ũguo, ngunĩko ĩyo ĩkĩambarario, ngĩona mũndũ wa nja aikaire thĩ kũu gĩkabũinĩ kĩu.
8 Mũraika akĩnjĩĩra atĩ mũndũ wa nja ũcio arũũgamĩrĩire ũmaramari. Agĩcooka akĩhatĩrĩria mũndũ wa nja ũcio thĩinĩ wa gĩkabũ agĩgĩkunĩka.
9 Ngĩcooka ngĩtiira maitho ngĩona andũ a nja eerĩ moombũkĩĩte maroreete kũrĩ niĩ marĩ na mathagu marĩ na hinya ta ma mũũhau. Andũ a nja acio magĩkĩoya gĩkabũ kĩu makĩũmbũka nakĩo magĩthiĩ.
10 Ngĩkĩũria mũraika atĩrĩ, “Maratwara gĩkabũ kĩu kũ?”
11 Naake akĩnjookeria atĩrĩ, “Maragĩtwara Babiloni magagĩakĩre hekaarũ kuo. Nayo hekaarũ yarĩĩka-rĩ, gĩkabũ kĩu kĩrĩigwo kũu thĩinĩ nĩguo gĩthaathayagio.”