Maciaro ma ũũgĩ
1 Atĩrĩĩrĩ, ciana ciakwa, tegaai matũ mũthikĩrĩrie kĩrĩra gĩa ithe wanyu,
na nĩmũkwĩgĩĩra na ũmenyo.
2 Ndĩmũrutaga ndeto iria njega,
menyaai gũkaanatigana na ũrutani wakwa.
3 Rĩrĩa ndarĩ mwana mũnyiinyi ndĩ na baaba,
ndĩ o wa mũũmwe kwa maitũ-rĩ;
4 baaba aaheaga kĩrĩra akoiga atĩrĩ,
“Tũũra ũririkanaga ũrĩa wothe njugaga,
menyagĩrĩra maathani maakwa na nĩũgũtũũra.
5 Wĩgĩĩre na ũũgĩ na ũgerereri!
Ndũkaanariganĩrwo nĩ ciugo cia kanua gaakwa.
6 Menya gũkaanatigana na ũũgĩ
naake nĩarĩkũmenyagĩrĩra;
tuma ndũgũ naake na nĩegũtũũra akũrangĩire.
7 Ũndũ ũrĩa wa bata wĩgiĩ ũũgĩ
no kwĩgĩĩra na ũũgĩ we mwene,
nakuo kũgĩa na ũgerereri nĩguo ũndũ ũrĩa ũngĩ wa bata mũno.
8 Tuma ndũgũ na ũũgĩ naake nĩegũgũtũũgĩria;
mũhĩmbĩrie na nĩegũtũma ũheeo gĩtĩĩo.
9 Naake ekũhaana o ta thũmbĩ aragwĩkĩra mũtwe.
thũmbĩ thaka nĩ yo agaakũhe.”
10 Mwana wakwa, thikĩrĩria na ũrũmie na kinyi ũhoro wakwa,
na nĩũgũtũũra muoyo matukũ maingĩ.
11 Nĩnguonereirie mĩthiĩre ya ũũgĩ,
na ngagũtongoria na njĩra iria njega.
12 Ndũkaahĩngĩĩcwo rĩrĩa ũgũthiĩ na njĩra,
o na ũgĩteng’era ndũkaahĩngwo nĩ kĩndũ.
13 Tũũra ũrũmĩĩtie kĩrĩra kĩrĩa wĩrutĩĩte,
na ndũkaanariganĩrwo nĩkĩo o na haniini;
tũũra ũkĩmenyereire wega na nĩgĩgũgũtũũria muoyo.
14 Ndũkaanarũmanĩrĩre na mĩthiĩre ya andũ arĩa aaganu,
ndũkaanathiĩ na mĩthiĩre ya andũ arĩa ooru.
15 Mĩĩtheemage, na ndũkaanathiĩ nayo,
eheria meciiria maaku harĩ yo, wĩhĩtũkĩre.
16 O matikomaga mateekĩĩte ũndũ mũũru;
o na matingĩona toro matatiihĩĩtie mũndũ.
17 Meyonagĩra gĩa kũrĩa kuumana na ũmaramari,
na gĩa kũnyua kuumana na haaro.
18 No rĩĩrĩ, mĩthiĩre ya arĩa athingu no ta riũa rĩkĩratha,
o na ta ũrĩa rĩthiaga rĩkĩaraga o nginyagia mĩaraho.
19 Mĩthiĩre ya arĩa aaganu ĩhaana ta nduma ndumanu mũno;
o na mangĩgũa matingĩmenya kĩrĩa kĩamahĩnga.
20 Mwana wakwa, thikĩrĩria ciugo ciakwa,
tega gũtũ ũthikĩrĩrie ũrĩa ndĩrakwĩra.
21 Ndũkaanareke ciugo ciakwa ikweherere,
ciririkanage na ũcigage ngoroinĩ yaku.
Wĩciiragie ũhoro wacio.
22 Kũrĩ arĩa macimenyeete nĩ muoyo,
o na nĩ ũgima kũrĩ arĩa marĩ nacio.
23 Menyerera mũno mathugunda ma ngoro yaku;
amu mathugunda macio nĩ mo mathondekaga mũtũũrĩre waku.
24 Wĩmenyerie kwaga kwaria ndeto hotomu,
o namo maheeni nĩmeehere harĩ we.
25 Ikaraga ũcũũthĩrĩirie o mbere na ndũkaanehũgũre.
26 Menyagĩrĩra mũno mĩthiĩre yaku,
naguo mũtũũrĩre waku nĩũgũũtũra wĩhandĩĩte wega.
27 Tũũra wĩhandĩĩte o wega, na wĩtheemage ũũru.