Kũgaathĩrĩria ũhootani#
1 MWATHANI, mũthamaki nĩakeneetio nĩ we nĩ ũndũ nĩũmũheete hinya;
nĩ mũcanjamũku nĩ ũndũ nĩũmũhootanĩire.
2 Nĩũmũhingĩirie ũrĩa erirĩirie na ngoro yake,
na ndwagĩĩte kũmũcookeria ũrĩa akũhoeete na mĩromo yake.
3 Nĩũmũreehithĩirie iraathimo nene,
na ũkamwĩkĩra mũtwe thũmbĩ ya thahabu ĩrĩa njega mũno.
4 Aakũhoire muoyo, nawe ũkĩmũhe,
ũgĩkĩmuongerera matukũ maingĩ.
5 Riiri wake nĩ mũnene nĩ ũndũ wa ũrĩa wee ũmũteithĩĩtie;
nĩũmũheete ũnene o na igweta.
6 Nĩũmũraathimĩĩte na iraathimo cia gũtũũra nginya tene na tene,
na ũgatũma aikarage akeneete nĩ ũndũ wa gũkuonaga.
7 Nĩ gũkorwo mũthamaki ehokeete o MWATHANI
na tondũ wa ũtugi wa Ũrĩa Ũrĩ Igũrũ Mũno ndarĩ hingo akeenyenyeka.
8 Guoko gwaku nĩgũkaanyiita thũ ciaku ciothe;
guoko gwaku kwa ũrĩo nĩgũgaakumbata arĩa oothe magũthũire.
9 Rĩrĩa ũkaamoimĩrĩra-rĩ, ũkaamaniina mahaane o ta macinĩĩtwo na mwaki mũnene.
Nĩkũmeria ũkaamameria nĩ ũrĩa ũmaraakarĩire MWATHANI
naguo mwaki ũmaniine.
10 Nĩũkaaniina ciana ciao ciothe ciehere gũũkũ thĩ;
mbeũ yao ĩthire biũ thĩinĩ wa andũ.
11 O na mangĩbanga ũrĩa megũgwĩka ũũru,
matingĩgĩa na ũhootani mĩbangoinĩ ĩyo yao ya ungumania.
12 Nĩ gũkorwo wee nĩũkaamaratha na mĩguĩ yaku,
o nginya mahũndũke moore.
13 Nĩtũgũgũkumia, MWATHANI, nĩ ũndũ wa hinya waku mũnene,
o na tũine na tũgaathe ũhoti waku.