Bathaka
1 MWATHANI akĩarĩria Musa na Harũni marĩ o kũu bũrũriinĩ wa Misiri akĩmeera atĩrĩ,
2 “Mweri ũyũ nĩguo ũgaatuĩka mweri wanyu wa mbere wa mwaka.
3 Ĩra andũ oothe a Isiraeli atĩ: Mũthenya wa ikũmi wa mweri ũyũ wakinya-rĩ, o mũndũ nĩageecarĩria gatũrũme kũringana na ũrĩa mũciĩ wake ũigana.
4 Angĩkorwo mũciĩ wa mũndũ nĩ mũniini ũguo atĩ ndũngĩhota kũniina gatũrũme goothe, no ũnyiitane na mũciĩ wa mũndũ ũrĩa ũrigainie naguo, ũgayane gatũrũme kamwe kũringana na mũigana wa andũ, na kũringana na ũrĩa o mũndũ angĩhota kũrĩa.
5 Gatũrũme kau no mũhaka mũgathuure kuuma rũũruinĩ rwa ng’ondu kana rwa mbũri, nako gakorwo gatarĩ na kaũũgũ, na gatakĩrĩĩtie mwaka ũmwe.
6 Mũkaiga tũtũrũme tũu nginya hwaĩinĩ wa mũthenya wa ikũmi na ĩna wa mweri ũyũ, hĩndĩ ĩrĩa andũ oothe a Isiraeli magaatũthĩnja.
7 Na rĩĩrĩ, andũ makooya thakame ĩmwe ya tũtũrũme tũu, mamĩhake buremuinĩ na mwana wa na rũgongo wa mĩrango ya nyũmba iria tũtũrũme tũu tũkaarĩrwo.
8 Nyama ciatuo ikaahĩĩhio ũtukũ o ro ũcio, na irĩanĩrio na nyeni ndũrũ na mĩgate ĩtarĩ mĩĩkĩre ndaawa ya kũimbia.
9 Mũtikaanarĩe nyama o na ĩmwe ya tũtũrũme tũu ĩrĩ njĩthĩ kana ĩtherũkĩĩtio na maaĩ; mũgaatũrĩa tũhĩĩhĩĩtio tuothe, nginya mũtwe, na magũrũ, o na nyama cia nda.
10 Na mũtikaanatigie gĩcunjĩ o na kĩmwe kĩraare nginya rũũciinĩ; kĩrĩa gĩothe gĩgaatigara, no mũhaka gĩgaacinwo.
11 Mũkĩrĩa nyama icio mũgaakorwo mũhaana ũũ: mũgaacirĩa na ihenya, na mũkorwo mwĩhumbĩĩte ta andũ mehaarĩirie gũthiĩ rũgendo, mwĩkĩrĩĩte iraatũ magũrũ, na mĩtirima yanyu ĩrĩ mooko. Ĩno nĩ thigũkũ ya Bathaka ya MWATHANI.
12 “Ũtukũ ũcio nĩngaatuĩkania bũrũri wothe wa Misiri ngiũragaga marigithaathi moothe ma tũhĩĩ ma Amisiri, o na marigithaathi moothe ma nyamũ, na herithie ngai ciothe cia Misiri. Niĩ nĩ niĩ MWATHANI.
13 Nayo thakame ĩrĩa ĩgaakorwo ĩrĩ buremuinĩ cia mĩrango ya nyũmba ĩgaakorwo ĩrĩ kĩmenyithia gĩa kũmenyithania nyũmba iria mũrĩ. Ndoona thakame ĩyo, nĩngaamwagarara na ndikaamwĩka ũũru rĩrĩa ngaakorwo ngĩherithia andũ a Misiri.
14 Nĩmũgaakũngũyagĩra mũthenya ũcio ũrĩ ta thigũkũ nyamũre ya kũmũririkanagia ũrĩa niĩ, MWATHANI, ndamwĩkĩire. Ũkũngũagĩreei matukũinĩ moothe marĩa magooka.”
Thigũkũ ya Mĩgate ĩtarĩ mĩĩkĩre ndaawa ya kũimbia
15 Ningĩ MWATHANI akiuga atĩrĩ, “Mĩthenya mũgwanja no mũhaka mũrĩage mĩgate ĩtarĩ mĩĩkĩre ndaawa ya kũimbia. Mũthenya wa mbere wa mĩthenya ĩyo no nginya mweheragie kuuma nyũmbainĩ cianyu ndaawa yothe ya kũimbia mĩgate, nĩ amu mĩthenyainĩ ĩyo mũgwanja mũndũ ũrĩa ũrĩrĩaga mĩgate ĩĩkĩrĩĩtwo ndaawa ya kũimbia, nĩarĩingatagwo kuuma harĩ andũ a Isiraeli.
16 Mũthenyainĩ wa mbere na wa mũgwanja nĩmũrĩũnganaga nĩ ũndũ wa gũthaathaiya. Gũtirĩ wĩra ũrĩrutagwo mĩthenyainĩ ĩyo yerĩ, tiga o wa kũhaarĩria irio.
17 Menyagĩrĩraai thigũkũ ĩyo, nĩ amu mũthenya ũcio nĩguo ndarutire mĩhĩrĩga yanyu kuuma bũrũri wa Misiri. Kwoguo no mũhaka mũkũngũagĩre mũthenya ũcio ũrĩ ta thigũkũ matukũ moothe marĩa magooka.
18 Mũtikaarĩage mĩgate mĩĩkĩre ndaawa ya kũimbia kuuma hwaĩinĩ wa mũthenya wa ikũmi na ĩna wa mweri wa mbere, nginya hwaĩinĩ wa mũthenya wa mĩrongo ĩĩrĩ na ũmwe.
19-20 Gũtikaanooneke ndaawa ya kũimbia mĩgate nyũmbainĩ cianyu mĩthenya ĩyo mũgwanja. Mũndũ o wothe ũkaarĩa mũgate wĩ na ndaawa ya kũimbia akaingatwo kuuma harĩ andũ a Isiraeli, e mũgeni, kana e Mũisiraeli.”
Bathaka ya mbere
21 Musa agĩgĩĩta atongoria oothe a Isiraeli akĩmeera atĩrĩ, “Mwĩthuurĩreei o mũndũ gatũrũme agathĩnje, nĩguo andũ a mĩciĩ yanyu makũngũĩre Bathaka.
22 Mũcooke muoe mathangũ ma hithobu, mũmatobokie thakameinĩ ĩrĩa ĩrĩ mbakũriinĩ. Nayo thakame ĩyo mũmĩhake buremuinĩ o na mwana wa na rũgongo wa mĩrango ya nyũmba cianyu. Na rĩĩrĩ, gũtikaagĩe mũndũ o na ũmwe ũkuuma nyũmba nginya rũũciinĩ.
23 Nĩ amu MWATHANI nĩegũtuĩkania Misiri akĩũragaga Amisiri, na rĩrĩa arĩona thakame ĩyo ĩrĩ buremuinĩ na igũrũ wa mĩrangoinĩ, nĩarĩagarara nyũmba cianyu na ndarĩtĩkĩria mũraika wa gĩkuũ aingĩre nyũmba cianyu amũũrage.
24 Mawatho macio mũmarũmagĩrĩre inyuĩ o hamwe na ciana cianyu nginya tene.
25 Na rĩĩrĩ, rĩrĩa mũgaakinya bũrũriinĩ ũrĩa MWATHANI aamwĩrĩire, mũgeekaga ũndũ ũyũ.
26 Rĩrĩa ciana cianyu ikaamũũria atĩrĩ, ‘Gĩtũmi kĩa ũndũ ũyũ-rĩ, nĩ kĩrĩkũ?’
27 Mũgaacicookeria atĩrĩ, ‘Nĩ igongoona rĩa Bathakaya MWATHANI, nĩ amu nĩagararire nyũmba cia andũ a Isiraeli bũrũriinĩ wa Misiri, rĩrĩa ooragire Amisiri, no agĩtũhonokia.’ ”
Nao andũ a Isiraeli makĩinamĩrĩra magĩthaathaiya.
28 Magĩcooka magĩthiĩ magĩĩka o ta ũrĩa MWATHANI aathĩĩte Musa na Harũni.
Marigithaathi kũũragwo
29 Na rĩĩrĩ, ũtukũ gatagatĩ MWATHANI akĩũraga aariũ oothe a marigithaathi bũrũriinĩ wa Misiri, aambĩrĩirie na irigithaathi rĩa mũthamaki rĩrĩa rĩngĩaikarĩire gĩtĩ gĩake kĩa ũthamaki, nginya irigithaathi rĩa mũndũ ũrĩa woheetwo njeera, o na marigithaathi moothe ma njamba ma mahiũ.
30 Naake mũthamaki agĩũkĩra ũtukũ arĩ hamwe na njaama ciake ciothe, o na andũ oothe a Misiri. Nakuo gũkĩgĩa na kĩrĩro kĩnene bũrũriinĩ wothe wa Misiri, amu gũtirĩ nyũmba o na ĩmwe ĩtaakuĩte mũndũ.
31 Na rĩĩrĩ, ũtukũ o ro ũcio mũthamaki agĩtũmanĩra Musa na Harũni akĩmeera atĩrĩ, “Ũkĩraai muume gũũkũ, inyuĩ na andũ aanyu a Isiraeli! Umaai bũrũri wakwa; thiĩi mũgatungatĩre MWATHANI o ta ũrĩa mworĩĩtie.
32 Oyai ng’ondu cianyu, mbũri, o na ng’ombe, mũthiĩ! Hoeraai kĩraathimo o na niĩ!”
33 Nao andũ a Misiri makĩhĩkahĩka andũ a Isiraeli moime bũrũriinĩ makĩmeeraga atĩrĩ, “Mwarega gũthiĩ nĩmũgũtũma tũkue ithuothe.”
34 Kwoguo andũ a Isiraeli makĩiyũria mbakũri ciao cia gũkandĩra mũtu mũkande ũtaarĩ mwĩkĩre ndaawa ya kũimbia, magĩcioha na nguo, magĩcikuua na ciande.
35 Andũ acio a Isiraeli nĩmeekĩĩte ũrĩa Musa ameerĩĩte, amu nĩmeetĩĩtie andũ a Misiri indo cia betha, thahabu, o na nguo.
36 MWATHANI nĩatũmire andũ a Isiraeli meetĩkĩrĩke nĩ andũ a Misiri, magĩkĩmahe o kĩrĩa meetirie. Na njĩra ĩyo andũ a Isiraeli magĩgĩkuua ũtonga wa andũ a Misiri.
Andũ a Isiraeli kuuma Misiri
37 Andũ a Isiraeli magĩkiumagara kuuma Ramesese meerekeire Sukothu. Nao maarĩ ta arũme ngiri magana matandatũ (600,000), atumia na ciana mategũtarwo.
38 Ningĩ gĩkundi kĩnene kĩa andũ angĩ nĩkĩoimagaranirie hamwe nao, o na makiumagara na ng’ondu, mbũri, na ng’ombe nyingĩ.
39 Nao makĩruga mĩgate ĩtarĩ mĩĩkĩre ndaawa ya kũimbia na mũtu ũrĩa mũkande maakuuĩĩte kuuma Misiri. Maingatĩĩtwo Misiri na ihenya ũguo atĩ matingĩahotire kũhaarĩria irio ciao, kana meekĩre mũtu ũcio ndaawa ya kũimbia.
40 Ihinda rĩrĩa andũ a Isiraeli maikarire Misiri rĩarĩ mĩaka magana mana ma mĩrongo ĩtatũ (430).
41 Mũthenya ũrĩa mĩaka ĩyo magana mana ma mĩrongo ĩtatũ yathirire, mĩhĩrĩga yothe ya andũ a MWATHANI ĩkiuma Misiri.
42 Ũtukũ ũcio MWATHANI ndahingire riitho nĩ geetha amarute kuuma bũrũri wa Misiri. Ũtukũ ũcio Aisiraeli oothe maraaraga matahingĩĩte riitho nĩ ũndũ wa MWATHANI njiarwainĩ ciao ciothe.
Mawatho makoniĩ Bathaka
43 Ningĩ MWATHANI akĩĩra Musa na Harũni atĩrĩ, “Maya nĩ mo mawatho makoniĩ Bathaka: gũtirĩ mũgeni ũrĩrĩaga Bathaka.
44 No rĩĩrĩ, ngombo o yothe ĩrĩa mwĩgũrĩire no ĩrĩe, angĩkorwo nĩmũkwamba kũmĩruithia.
45 Gũtirĩ muumi na njĩra kana mũruti wĩra wa kũrĩhwo ũrĩmĩrĩaga.
46 Ningĩ Bathaka yothe ĩrĩrĩagĩrwo thĩinĩ wa nyũmba ĩrĩa ĩhaarĩirio. Mũtikaanamiumie nja ya nyũmba ĩyo, o na kana muunange ihĩndĩ o na rĩmwe rĩa nyamũ ĩyo.
47 No mũhaka andũ oothe a Isiraeli makũngũagĩre thigũkũ ĩyo.
48 Na rĩĩrĩ, mũrũũrĩrĩ ũratũũrania na inyuĩ angĩenda gũkũngũĩra Bathaka atĩĩye MWATHANI-rĩ, no mũhaka mũruithie arũme oothe a nyũmba yake. Thuutha wa ũguo agagĩtuuo o ta mũndũ ũciarĩirwo bũrũri wanyu. No gũtirĩ mũndũ mũrũme ũtarĩ mũruu ũrĩmĩrĩaga.
49 Mawatho macio no mo marĩhũthagĩrwo harĩ mũndũ wanyu, na harĩ mũrũũrĩrĩ ũratũũrania na inyuĩ.”
50 Nao andũ a Isiraeli magĩgĩĩka o ta ũrĩa MWATHANI aathĩĩte Musa na Harũni.
51 Na rĩĩrĩ, mũthenya o ro ũcio, MWATHANI akĩruta mĩhĩrĩga yothe ya andũ a Isiraeli bũrũriinĩ wa Misiri.