Mũbango wa kũũraga Jesũ
1 Na rĩĩrĩ, gũtigairie mĩthenya ĩĩrĩ Thigũkũ ya Bathaka o hamwe na Thigũkũ ya mĩgate ĩtarĩ mĩĩkĩre ndaawa ya kũimbia ikinye-rĩ, athĩnjĩri Ngai arĩa anene, o na arutani a Watho makĩambĩrĩria gũtuĩria ũrĩa mangĩnyiita Jesũ na hitho nĩguo mamũũrage.
2 No makĩĩrana atĩrĩ, “Tũtigwĩka ũguo hĩndĩ ya thigũkũ andũ matigaatũũkĩrĩre.”
Jesũ gũitĩrĩrio maguta e Bethania
3 Na rĩĩrĩ, hĩndĩ ĩmwe Jesũ aarĩ Bethania mũciĩ gwa Simoni ũrĩa warũarĩĩte mũrimũ wa ngoothi. Naake Jesũ rĩrĩa aarĩaga hagĩũka mũtumia warĩ na cuuba yaiyũire maguta ma goro manungi wega. Akĩmĩkunũra, agĩitĩrĩria Jesũ maguta macio mũtwe.
4 Nao andũ amwe arĩa maarĩ ho makĩraakara makĩũrania atĩrĩ, “Maguta macio maitangwo ũguo nĩkĩ?
5 Nĩmangĩendio makĩria dinarimagana matatũ iheeo athĩĩni.” Magĩgĩtetia mũtumia ũcio mũno.
6 No Jesũ akiuga atĩrĩ, “Tiganaai naake! Mũramũthĩĩnia nĩkĩ? We nĩanjĩka ũndũ mwega.
7 Andũ arĩa athĩĩni-rĩ, mũrĩkoragwo nao hĩndĩ ciothe, na rĩrĩa rĩothe mũngĩenda kũmateithia no mũmateithie. No niĩ mũtirĩkoragwo na niĩ hĩndĩ ciothe.
8 We nĩanjĩka ũrĩa ahota; aitĩrĩria mwĩrĩ wakwa maguta nĩ ũndũ wa kũũhaarĩrĩria gũthikwo.
9 Ngũmwĩra na ma atĩ kũrĩa guothe Ũhoro Ũrĩa Mwega ũkaahunjio thĩinĩ wa thĩ yothe, ũndũ ũcio anjĩka nĩũkaaganagwo nĩ geetha aririkanagwo.”
Judasi gwĩtĩkĩra gũkunyanĩra Jesũ
10 Thuutha ũcio Judasi Mũisikariota, ũmwe wa arutwo arĩa ikũmi na eerĩ, akiuma agĩthiĩ kũrĩ athĩnjĩri Ngai arĩa anene nĩguo agakunyanĩre Jesũ kũrĩ o.
11 Nao magĩkena rĩrĩa Judasi aamaheire ũhoro ũcio, makĩmwĩra atĩ nĩmekũmũhe mbeeca. Naake Judasi akĩambĩrĩria gũcaria mweke wa kũneana Jesũ kũrĩ o.
Jesũ kũrĩanĩra Bathaka na arutwo aake
12 Mũthenya wa mbere wa Thigũkũ ya mĩgate ĩtarĩ mĩĩkĩre ndaawa ya kũimbia, ũrĩa tũtũrũme twa kũrĩĩo Bathaka tũthĩnjagwo-rĩ, arutwo a Jesũ makĩmũũria atĩrĩ, “Ũkwenda tũgakũhaarĩrĩrie irio cia Bathaka kũ?”
13 Naake Jesũ agĩgĩtũma arutwo aake eerĩ akĩmeera atĩrĩ, “Thiĩi itũũrainĩ, na nĩmũgũcemania na mũndũ ũkuuĩĩte mũtũngi wa maaĩ. Mũrũmĩrĩreei,
14 mũingĩre nyũmba ĩrĩa arĩtoonya, mwĩre mwene nyũmba ĩyo atĩrĩ, ‘Mũrutani ekũũria atĩrĩ, ĩ ha nyũmba ya ageni harĩa ngũrĩĩra irio cia Bathaka hamwe na arutwo aakwa?’
15 Naake nĩekũmuonia nyũmba ya igũrũ, ĩrĩ haarĩrie. Amuonia mũtũthondekere irio cia Bathaka kuo.”
16 Nao arutwo acio magĩgĩthiĩ itũũrainĩ, magĩkora maũndũ moothe o ta ũrĩa Jesũ aameerĩĩte, magĩkĩhaarĩria Bathaka.
17 Gwakinya hwaĩinĩ Jesũ agĩũka na arutwo arĩa ikũmi na eerĩ.
18 Na rĩrĩa maikarĩĩte meethainĩ makĩrĩa akiuga atĩrĩ, “Ngũmwĩra na ma atĩ ũmwe wanyu ũrĩa ũrarĩanĩra na niĩ nĩekũngunyanĩra.”
19 Nao arutwo makĩambĩrĩria kũnyiitwo nĩ kĩeha, magĩkĩmũũria ũmwe kwa ũmwe atĩrĩ, “Hiihi nĩ niĩ?”
20 Naake Jesũ akĩmacookeria atĩrĩ, “Nĩ ũmwe wanyu ikũmi na eerĩ, ũrĩa ndĩratobokanĩria mũgate mbakũriinĩ ĩmwe naake.
21 Mũrũ wa Mũndũ nĩegũkua o ta ũrĩa kwandĩkĩĩtwo. Ĩndĩ kaĩ mũndũ ũrĩa ũkũmũkunyanĩra e thĩĩna-ĩ! Kaba mũndũ ũcio atangĩaciarirwo!”
Irio cia Mwathani
22 Na rĩĩrĩ, rĩrĩa maarĩaga, Jesũ akĩoya mũgate, akĩũraathima, agĩcooka akĩwenyũra, akĩũnengera arutwo aake, akĩmeera atĩrĩ, “Keei, ũyũ nĩ mwĩrĩ wakwa.”
23 Agĩcooka akĩoya gĩkombe, na arĩĩkia gũcookeria Ngai ngaatho, akĩmanengera, nao oothe makĩnyuanĩra.
24 Naake Jesũ akĩmeera atĩrĩ, “Ĩno nĩ yo thakame yakwa ya kĩrĩĩkanĩroĩrĩa ĩgũitwo nĩ ũndũ wa andũ aingĩ.
25 Ngũmwĩra atĩrĩ na ma, ndigaacooka kũnyua ndibei rĩngĩ kinya rĩrĩa ngaamĩnyua yerũhĩĩtio Ũthamakiinĩ wa Ngai.”
26 Nao marĩĩkia kũina rwĩmbo makiuma magĩthiĩ kĩrĩmainĩ kĩa mĩtamaiyũ.
Petero kwĩrwo atĩ nĩarĩkaana Jesũ
27 Naake Jesũ akĩmeera atĩrĩ, “Inyuothe nĩmũrĩndirika. Amu nĩkwandĩkĩĩtwo atĩrĩ, ‘Ngai nĩakooraga mũrĩithi, nacio ng’ondu ihurunjũke.’
28 No ndariũka nĩngaamũtongoria gũthiĩ Galili.”
29 Naake Petero akĩmwĩra atĩrĩ, “O na arĩa angĩ oothe mangĩgũtirika, niĩ ndingĩgũtirika!”
30 Naake Jesũ akĩmwĩra atĩrĩ, “Ngũkwĩra na ma atĩ, ũtukũ wa ũũmũũthĩ ngũkũ ĩtaanakũga keerĩ nĩũrĩngaana gatatũ.”
31 Naake Petero akĩrega na hinya mũno akiuga atĩrĩ, “O na angĩkorwo nĩgũkuanĩra nawe niĩ ndirĩgũtirika!” Nao arutwo acio angĩ oothe makiuga o ro ũguo.
Jesũ kũhooya e Gethisemane
32 Thuutha ũcio magĩthiĩ magĩkinya handũ heetagwo Gethisemane. Marĩ hau Jesũ akĩĩra arutwo aake atĩrĩ, “Ikaragaai haaha thiĩ ngahooe.”
33 Akĩoya Petero, Jakubu, na Johana agĩthiĩ nao. Naake akĩambĩrĩria kũigua kĩeha mũno na gũthĩĩnĩka ngoro,
34 akĩmeera atĩrĩ, “Nĩndĩraigua kĩeha mũno ngoro o ta ngirie gũkua. Ikaragaai haaha na mwĩhũũge.”
35 Agĩgĩthiĩ kabere haniini, agĩturumithia ũthiũ thĩ akĩhooya atĩ kũngĩhoteka thĩĩna ũcio ũmũthengere.
36 Akiuga atĩrĩ, “Awa, o wee Baaba, maũndũ moothe nĩmahotekaga nĩ we; gĩĩthengerie gĩkombe gĩĩkĩ kĩa mĩnyamaaro, no ti ũrĩa niĩ ngwenda, nĩ ũrĩa wee ũkwenda.”
37 Agĩcooka harĩa arutwo maarĩ, agĩkora makomeete akĩũria Petero atĩrĩ, “Simoni, nĩgũkoma ũkomeete? Ndũnahota gũikara o na ithaa rĩmwe wĩhũgĩĩte?”
38 Agĩkĩmeera atĩrĩ, “Mwĩhũũgeei, na mũhooe mũtigatoonye magerioinĩ. Ngoro nĩkwenda, no mwĩrĩ ndũrĩ na hinya.”
39 Akĩmatiga rĩngĩ, agĩthiĩ akĩhooya o ta ũrĩa aahoeete rĩa mbere.
40 Naake acooka harĩa arutwo maarĩ agĩkora makomeete, tondũ nĩmaathĩĩnagio nĩ toro. Nao makĩrigwo nĩ ũrĩa mangĩmwĩra.
41 Agĩũka ihinda rĩa gatatũ, agĩkora o makomeete akĩmeera atĩrĩ, “No gũkoma mũkomeete mũkahuurũka? Kinyiai hau. Ihinda nĩikinyu! Mũrũ wa Mũndũ nĩekũneanwo mookoinĩ ma andũ eehia.
42 Ũkĩraai tũthiĩ. Oneei ũrĩa ũkũngunyanĩra nĩakinya!”
Jesũ kũnyiitwo
43 Na Jesũ o akĩaragia, Judasi, ũmwe wa arutwo arĩa ikũmi na eerĩ agĩgĩkinya. Naake agĩũka na andũ gĩkundi me na hiũ cia njora na njũgũma, matũmĩĩtwo nĩ athĩnjĩri Ngai arĩa anene, na arutani a Watho o na athuuri.
44 Naake Judasi ũrĩa wamũkunyanagĩra nĩamaheete kĩmenyithia akameera atĩrĩ, “Ũrĩa ndĩmumunya, ũcio nĩ we. Mũmũnyiite, mũmũtware mũmũrangĩire.”
45 Rĩrĩa Judasi aakinyire agĩgĩthiĩ eerekeire o harĩ Jesũ o rĩmwe akiuga atĩrĩ, “Mũrutani!” na akĩmũmumunya.
46 Nao magĩũka makĩnyiita Jesũ makĩmũrũmia biũ.
47 Naake ũmwe wa arĩa maarũngiĩ hau agĩcomora rũhiũ rwa njora, agĩtema ngombo ya Mũthĩnjĩri Ngai Ũrĩa Mũnene gũtũ.
48 Hĩndĩ ĩyo Jesũ akĩmooria atĩrĩ, “Kaĩ mũũkĩĩte na hiũ na njũgũma ta arĩ gĩtoi mũũkĩĩte kũnyiita?
49 Ndĩratũũraga na inyuĩ Hekaarũinĩ, ngĩmũruta mũthenya o mũthenya na mũtingĩnyiita. Ĩndĩ no mũhaka Maandĩko matheru mahingio.”
50 Na arĩĩkia kũnyiitwo, arutwo aake oothe makĩmũtirĩka makĩũra.
51 Naake mwanake ũmwe akĩrũmĩrĩra Jesũ erigiicĩirie cuka. Na rĩrĩa andũ acio maatuire kũmũnyiita,
52 akĩmatigĩra nguo, akĩũra e njaga.
Jesũ mbere ya kĩama
53 Na rĩĩrĩ, thuutha wa kũnyiitwo, Jesũ agĩtwarwo kwa Mũthĩnjĩri Ngai Ũrĩa Mũnene, kũrĩa athĩnjĩri Ngai arĩa angĩ anene maagomanĩĩte, o hamwe na athuuri na arutani a Watho.
54 Naake Petero agĩthiĩ amũrũmĩrĩire arĩ o haraaya, o nginya nja kwa Mũthĩnjĩri Ngai ũcio Mũnene. Agĩgĩikara thĩ hau nja hamwe na arangĩri, agĩotagĩra mwaki ho.
55 Nao athĩnjĩri Ngai arĩa anene o na kĩama gĩothe magĩcaria ũira ũrĩa mangĩrutire nĩguo mooragithie Jesũ no makĩaga.
56 No nĩkwarĩ andũ aingĩ maarutire ũira wa maheeni, no maũira maao makĩaga kũiguana.
57 Nao andũ amwe magĩkĩrũũgama makĩruta ũira wa maheeni, makiuga atĩrĩ,
58 “Nĩtwamũiguire akiuga atĩrĩ, ‘Nĩngũtharia Hekaarũ ĩno yakĩĩtwo na mooko ma andũ, na mĩthenya ĩtatũ ĩtaanathira njake ĩngĩ ĩtaakĩĩtwo na mooko.’ ”
59 Ĩndĩ o na moiga ũguo maũira maao makĩregana.
60 Hĩndĩ ĩyo Mũthĩnjĩri Ngai Ũrĩa Mũnene akĩrũũgama hau mbere yao akĩũria Jesũ atĩrĩ, “Kaĩ wee ũtarĩ ũndũ ũngĩcookia igũrũ rĩa maũndũ maya moothe ũrathitangwo namo?”
61 No Jesũ agĩkira ki na ndamũtumũke. Naake mũthĩnjĩri Ngai ũcio Mũnene agĩkĩmũũria atĩrĩ, “Wee nĩ we Kristũ Mũrũ wa Ngai Ũrĩa Mũraathime?”
62 Naake Jesũ akĩmũcookeria atĩrĩ, “Ĩĩ nĩ niĩ. Na nĩmũkoona Mũrũ wa Mũndũ aikarĩire gĩtĩ mwena wa ũrĩo wa Ũrĩa Mwene Hinya Wothe, o na muone agĩũka na matu ma igũrũ!”
63 Naake Mũthĩnjĩri Ngai ũcio Mũnene agĩtembũranga nguo yake nĩ ũndũ wa kũraakara akiuga atĩrĩ, “Kaĩ tũgũkĩenda aira angĩ?
64 Githĩ mũtiakĩiguĩra ũrĩa aruma Ngai? Mũgũtua atĩa?”
Nao oothe makiuga magwatĩirie atĩ aagĩrĩire nĩkũũragwo.
65 Nao amwe aao makĩambĩrĩria gũtuĩra Jesũ mata, na kũmũhumba maitho, makĩmũhũũra na hĩ makĩmwĩraga atĩrĩ, “Ragũra uuge nũũ wakũgũtha!” O nao arangĩri makĩmũhũũra.
Petero gũkaana Jesũ
66 Na rĩĩrĩ, hĩndĩ ĩyo Petero aikarĩĩte thĩ nja, hagĩũka ndungata ĩmwe ya mũirĩĩtu ya kũu kwa Mũthĩnjĩri Ngai Ũrĩa Mũnene.
67 Nayo yakinya hau Petero ootagĩra mwaki ĩkĩmũkũũrĩra maitho ĩkiuga atĩrĩ, “O nawe uuma hamwe na Jesũ wa Nazarethi.”
68 Naake agĩkaana akiuga atĩrĩ, “Niĩ ũguo ndiũĩ o na ndiramenya nĩ atĩa ũroiga.” Oiga ũguo akiuma hau agĩthiĩ na thoome na hĩndĩ ĩyo ngũkũ ĩgĩkũga.
69 Naake mũirĩĩtu ũcio oona Petero rĩngĩ akĩambĩrĩria kwĩra arĩa marũũgamĩĩte ho atĩrĩ, “Mũndũ ũyũ nĩ ũmwe wao!”
70 No Petero agĩkaana rĩngĩ.
Thuutha haniini arĩa marũũgamĩĩte hau makĩambĩrĩria kwĩra Petero atĩrĩ, “Wee no mũhaka ũkorwo ũrĩ ũmwe wao, amu wĩ Mũgalili.”
71 No Petero akĩambĩrĩria kwĩhĩta akiugaga atĩrĩ, “Ndĩraaria ma na Ngai nĩ mũira atĩ niĩ ndiramenya mũndũ ũcio mũraaria ũhoro wake!”
72 Ihinda o rĩu ngũkũ ĩgĩkũga rĩa keerĩ. Naake Petero akĩririkana ũrĩa Jesũ aamwĩrĩĩte, “Mbere ya ngũkũ gũkũga keerĩ nĩũrĩngaana gatatũ.” Naake akĩambĩrĩria kũrĩra.