Ũrĩa Ngai athaathayagĩrio kũũrĩa igũrũ matuinĩ
1 Thuutha wa ũguo ngĩrora ngĩona mũrango ũrĩ mũhingũre kũũrĩa igũrũ matuinĩ. Naguo mũgambo ũrĩa ndaiguĩte mbere ĩyo ũkĩnjarĩria ũhaana ta karumbeeta ũkiuga atĩrĩ, “Ambata ũũke haaha na nĩngũkuonia ũrĩa gũgwĩkĩka thuutha wa maũndũ maya.”
2 O rĩmwe ngĩnyiitwo nĩ Roho, nakuo kũu igũrũ matuinĩ nĩkwaigĩĩtwo gĩtĩ kĩa ũnene, nakĩo nĩgĩaikarĩirwo nĩ mũndũ.
3 Na rĩĩrĩ, mũndũ ũcio gĩthiithi gĩake gĩakengaga ta mahiga ma goro ma marangi mĩthemba mĩingĩ meetagwo Jasiperi, o na gĩgakenga ta mahiga ma goro ma rangi mũtuune. Gĩtĩ kĩu kĩa ũnene nakĩo gĩathiũrũrũkĩirio nĩ mũkũngambura, naguo wakengaga ta mahiga ma goro ma rangi wa ngirini ũrĩa mũtheru mũno.
4 Ningĩ gĩtĩ kĩu kĩa ũnene nĩgĩathiũrũrũkĩirio nĩ itĩ ingĩ mĩrongo ĩĩrĩ na inya, nacio ciaikarĩirwo nĩ athuuri mĩrongo ĩĩrĩ na ana mehumbĩĩte nguo cia rangi mwerũ, na mageekĩra thũmbĩ cia thahabu mĩtwe.
5 Gĩtĩinĩ kĩu kĩa ũnene hoimaga heni, mĩgambo na marurumĩ. Ningĩ hau mbere ya gĩtĩ kĩu kĩa ũnene nĩhaarĩ na mataawa mũgwanja maakanaga, namo nĩ mo maroho marĩa mũgwanja ma Ngai.
6 Ningĩ o hau mbere ya gĩtĩ kĩu nĩhaarĩ kĩndũ kĩahaanaga ta iria rĩa gĩciicio, rĩahenagia o ta gĩciicio.
Gĩtĩ kĩu nĩgĩathiũrũrũkĩirio nĩ ciũmbe inya i muoyo, nacio ciaiyũrĩĩtwo nĩ maitho mbere na thuutha.
7 Kĩũmbe kĩa mbere kĩahaanaga ta mũrũũthi, gĩa keerĩ ta ndeegwa; gĩa gatatũ kĩarĩ na ũthiũ ta wa mũndũ, na gĩa kana kĩahaanaga ta rwĩgĩ rũmbũkĩĩte.
8 Ciũmbe icio inya i muoyo, o kĩũmbe kĩarĩ na mathagu matandatũ, na ciaiyũirwo nĩ maitho guothe. Ningĩ mũthenya na ũtukũ itiatigithagĩria kũina atĩrĩ:
“Mũtheru, mũtheru, mũtheru
nĩ Mwathani Ngai Mwene Hinya Wothe;
Ũrĩa warĩ kuo, na no we wĩ kuo,
na no we ũgooka.”
9 Na rĩĩrĩ, hĩndĩ yothe rĩrĩa ciũmbe icio i muoyo ikũinĩra ũcio ũikarĩire gĩtĩ kĩa ũnene, o we ũtũũraga tene na tene, nyĩmbo cia kũmũgooca, na cia kũmũtĩĩa, na cia kũmũcookeria ngaatho,
10 athuuri arĩa mĩrongo ĩĩrĩ na ana makeegũithia thĩ mbere ya ũcio ũikarĩire gĩtĩ kĩa ũnene, o we ũtũũraga tene na tene, makamũthaathaiya. Magacooka makaiga thũmbĩ ciao mbere ya gĩtĩ kĩu kĩa ũnene makĩina atĩrĩ:
11 “Mwathani Ngai witũ!
Wee no we wagĩrĩirwo nĩkũgoocwo,
na gũtĩĩo, na gwĩkĩrĩrwo,
amu nĩ we wombire indo ciothe,
na nĩ ũndũ wa kwenda gwaku ikĩgĩa kuo na igĩikara o muoyo.”