1 Nũũ ũtariĩ ta mũndũ mũũgĩ?
Na nũũ ũũĩ ũrĩa maũndũ moigĩĩte?
Ũũgĩ nĩũtũmaga ũthiũ wa mũndũ ũkenge,
na ũthitu wa gĩthiithi gĩake ũgarũrũke.
Athĩkĩra mũthamaki
2 Athĩkagĩra mawatho ma mũthamaki, na ndũkehĩtage mbere ya Ngai ũtagwatĩirie.
3 Ehagĩrĩra mũthamaki; tiga gũikaraga hakuhĩ naake rĩrĩa maũndũ matarathiĩ wega, amu we eekaga o ũrĩa angĩenda.
4 Mũthamaki aaragia na ũnene, na gũtirĩ mũndũ ũngĩkararia ũrĩa oiga.
5 Mũndũ ũrĩa wathĩkagĩra watho ndarĩ hingo angĩona ũũru, na mũndũ wĩ na ũũgĩ nĩamenyaga ihinda rĩa kũwathĩkĩra na ũrĩa ekũwathĩkĩra.
6 Ũndũ o wothe nĩũrĩ ihinda rĩrĩa rĩwagĩrĩire na ũrĩa wagĩrĩirwo nĩgwĩkwo, no ũmenyo wa mũndũ nĩ mũnyiinyi mũno.
7 Amu mũndũ ndamenyaga ũrĩa gũgũtuĩka, na gũtirĩ mũndũ wa kũmwĩra.
8 Gũtirĩ mũndũ wĩ na hinya wa kũgiria akue, kana oige mũthenya ũrĩa agaakua. Ĩyo nĩ mbaara tũtangĩhota kweherera; na waganu ndũngĩhonokia arĩa meheanĩĩte kũrĩ guo.
Andũ arĩa aaganu na arĩa athingu
9 Maũndũ maya ndamoonire hĩndĩ ĩrĩa ndeciiragia ũhoro wa maũndũ moothe marĩa meekagwo gũũkũ thĩ, kũrĩa andũ amwe marĩ na ũnene, nao arĩa angĩ mahinyagĩrĩrio marĩ rungu rwao.
10 O na nĩndoonire andũ aaganu magĩthikwo; o acio maamenyereete gũtoonyaga na kuumaga handũ harĩa hatheru, na nĩmaagĩkumagio o matũũrainĩ kũrĩa meekaga maũndũ mooru, o na ũguo no tũhũ.
11 Ngoro cia andũ ikoragwo kũna ciĩhaarĩirie gwĩka ũũru tondũ iherithia rĩa gwĩka maũndũ mooru rĩtiherithanagio narua.
12 Mũndũ mwĩhia o na angĩĩka ũndũ mũũru maita igana, no athiaga na mbere gũtũũra muoyo. Niĩ nĩnjũũĩ atĩ nĩgũgaakorwo kũrĩ kwega harĩ andũ arĩa matĩĩĩte Ngai,
13 no gũtigaakorwo kũrĩ kwega harĩ andũ arĩa aaganu. Matukũ maao magaathira o ta kĩĩruru tondũ matitĩĩĩte Ngai.
14 Nĩkũrĩ ũndũ wa tũhũ ũthiaga na mbere thĩinĩ wa thĩ: atĩ andũ athingu makaherithio tondũ wa andũ aaganu, nao andũ aaganu makagaya iheeo cia andũ athingu; o na ũguo nguuga atĩ no tũhũ.
15 Kwa ũguo nĩnjũũĩ wega atĩ mũndũ aagĩrĩirwo nĩgwĩkenia, amu gũtirĩ ũndũ ũngĩ mwega wa mũndũ gũũkũ thĩ tiga arĩe, anyue na ekenie. Maũndũ macio no ameeke ihindainĩ rĩa kwĩnogia matukũinĩ ma ũtũũro wake ũrĩa Ngai amũheete gũũkũ thĩ.
16 Hĩndĩ ĩrĩa ndeciiragia ũrĩa ingĩgĩa na ũũgĩ na menye ũhoro wa maũndũ marĩa meekagwo gũũkũ thĩ nĩndamenyire atĩ mũndũ no aage toro ũtukũ na mũthenya
17 na aage gũtaũkĩrwo nĩ ũrĩa Ngai areeka gũũkũ thĩ. O na mũndũ angĩgeria na hinya atĩa kũũmenya, ndangĩmenya; o na mũndũ mũũgĩ angiuga nĩoĩ, ndooĩ.