Jesũ kuumĩrĩra arutwo mũgwanja
1 Thuutha ũcio, Jesũ nĩoimĩrĩire arutwo aake rĩngĩ iriainĩ rĩa Tiberia. Aamoimĩrĩire ta ũũ:
2 Hĩndĩ ĩmwe Simoni Petero, Toma (ũrĩa wetagwo wa Mahatha), marĩ na Nathanaeli (ũrĩa wa kuuma Kana ya Galili), aariũ a Zebedi hamwe na arutwo angĩ eerĩ a Jesũ maikarĩĩte hamwe.
3 Simoni Petero akĩmeera atĩrĩ, “Niĩ nĩndathiĩ gũtega thamaki.”
Nao acio angĩ makĩmwĩra atĩrĩ, “O na ithuĩ nĩtũgũthiĩ hamwe nawe.” Magĩkiumagara makĩingĩra gatarũ magĩthiĩ, ĩndĩ ũtukũ ũcio wothe matiigana kũgwatia o na kĩ.
4 Rũũciinĩ riũa rĩkĩratha, Jesũ akĩrũũgama hũgũrũrũinĩ cia iria, no arutwo aake matiamũmenyaga.
5 Naake akĩmooria atĩrĩ, “Aanake, mũrĩ mũragwatia kĩndũ?”
Nao makĩmũcookeria atĩrĩ, “Aaca.”
6 Naake Jesũ akĩmeera atĩrĩ, “Ikiai ngara mwena wa ũrĩo wa gatarũ na nĩmũkũgwatia.” Magĩgĩikia ngara ciao, nao makĩremwo nĩgũciguucia nĩ ũndũ nĩciagwatĩĩtie thamaki nyingĩ.
7 Na hĩndĩ ĩyo mũrutwo ũrĩa wendeetwo nĩ Jesũ akĩĩra Petero atĩrĩ, “Nĩ Mwathani!” Rĩrĩa Simoni Petero aiguire atĩ “Nĩ Mwathani”, agĩkĩĩra nguo yake ya igũrũ amu nĩarutĩĩte nguo ciake, akĩrũũga maaĩinĩ.
8 Nao arutwo acio angĩ makiumĩra na gatarũ maguucĩĩtie rũgara rũiyũrĩĩte thamaki. Hau maarĩ hatiarĩ haraaya tondũ haarĩ ta mita igana rĩmwe kuuma rũteereinĩ.
9 Maakinya rũteereinĩ magĩkora mwaki wa makara wakĩĩtio ũigĩrĩirwo thamaki na mũgate.
10 Naake Jesũ akĩmeera atĩrĩ, “Reeheei thamaki imwe cia iria mwagwatia.”
11 Simoni Petero akĩingĩra gatarũ akĩguucia rũgara akĩruumĩria rũiyũrĩĩte thamaki nene, ta igana rĩa mĩrongo ĩtaano na ithatũ; o na akorwo ciarĩ nyingĩ ũguo, rũgara rũtiatuĩkire.
12 Jesũ agĩkĩmeera atĩrĩ, “Ũkaai mwĩgagũre.” Na gũtirĩ mũrutwo womĩrĩirie kũmũũria, “Wee nĩ we ũ?” Amu nĩmaamenyire atĩ nĩ Mwathani.
13 Jesũ agĩgĩũka, akĩoya mũgate akĩmahe, agĩcooka agĩĩka o taguo na thamaki.
14 Rĩu nĩrĩo riita rĩa gatatũ rĩa Jesũ kuumĩrĩra arutwo aake, arĩĩkia kũriũka kuuma kũrĩ arĩa akuũ.
Jesũ na Petero
15 Marĩĩkia kwĩgagũra, Jesũ akĩũria Simoni Petero atĩrĩ, “Simoni mũrũ wa Johana, nĩũnyendeete gũkĩra aya angĩ?”
Naake akĩmũcookeria atĩrĩ, “Ĩĩ Mwathani, wee nĩũũĩ atĩ nĩngwendeete.”
Jesũ akĩmwĩra atĩrĩ, “Heaga tũgondu twakwa gĩa kũrĩa.”
16 Agĩcooka akĩmũũria rĩa keerĩ atĩrĩ, “Simoni mũrũ wa Johana, nĩũnyendeete?”
Naake Simoni akĩmũcookeria atĩrĩ, “Ĩĩ Mwathani, wee nĩũũĩ atĩ nĩngwendeete.”
Jesũ akĩmwĩra atĩrĩ, “Rĩithagia ng’ondu ciakwa.”
17 Agĩcooka akĩmũũria rĩa gatatũ atĩrĩ, “Simoni, mũrũ wa Johana, nĩũnyendeete?”
Petero akĩigua kĩeha nĩ tondũ wa kũũrio rĩa gatatũ “Nĩũnyendeete?” Kwoguo agĩkĩmwĩra atĩrĩ, “Mwathani, wee nĩũũĩ maũndũ moothe; nĩũũĩ atĩ niĩ nĩngwendeete!”
Jesũ agĩkĩmwĩra atĩrĩ, “Heaga ng’ondu ciakwa gĩa kũrĩa.
18 Ngũkwĩra na ma atĩ, rĩrĩa warĩ mwĩthĩ nĩwehaaragĩria ũgathiĩ o kũrĩa ũngĩendire, no rĩrĩa ũgaakũra ũgaatambũrũkia mooko maaku, mũndũ ũngĩ akuohe, agũtware kũrĩa ũtarenda gũthiĩ.”
19 (Jesũ akiuga ũguo oonanagia ũrĩa Petero agaakua agoocithie Ngai.) Jesũ agĩcooka akĩmwĩra atĩrĩ, “Nũmĩrĩra!”
Jesũ na mũrutwo ũrĩa eendeete
20 Na rĩĩrĩ, Petero akĩĩhũgũra akĩona mũrutwo ũrĩa Jesũ eendeete amarũmĩrĩire. Mũrutwo ũcio no we ũrĩa wetiiranĩĩtie gĩthũriinĩ kĩa Jesũ rĩrĩa maarĩaga irio akĩmũũria, “Mwathani, nũũ ũgũgũkunyanĩra?”
21 Rĩrĩa Petero oonire mũrutwo ũcio akĩũria Jesũ atĩrĩ, “Mwathani, ĩ naake mũndũ ũyũ ũhoro wake nĩ atĩa?”
22 Naake Jesũ akĩmũcookeria atĩrĩ, “Ingĩenda aikare nginya rĩrĩa ngooka-rĩ, ũcio ũkĩrĩ ũhoro waku? Wee nũmĩrĩra!”
23 Tondũ ũcio ũhoro ũgĩkĩhunja gatagatĩinĩ ka arũmĩrĩri a Jesũ atĩ mũrutwo ũcio ndagaakua. Ĩndĩ Jesũ we mwene ndeerĩĩte mũrutwo ũcio ndagaakua; oigĩĩte atĩrĩ, “Ingĩenda aikare nginya rĩrĩa ngooka-rĩ, ũcio ũkĩrĩ ũhoro waku?”
24 Mũrutwo ũcio nĩ we ũheanĩĩte ũhoro wa maũndũ maya, na no we wamaandĩkĩre; na ithuĩ nĩtũũĩ atĩ ũrĩa oigire nĩ ũhoro wa ma.
Kũrĩĩkia
25 Nĩkũrĩ maũndũ mangĩ maingĩ Jesũ eekire. Korwo no maandĩkwo moothe ũmwe ũmwe ngwĩciiria atĩ o na thĩ yo nyene ndĩngĩiganĩra mbuku iria ingĩandĩkwo.