1 Ĩno nĩ yo ndũmĩrĩri ĩrĩa MWATHANI aaheire Joeli mũrũ wa Pethueli.
Andũ gũcakaĩra kwanangwo kwa mĩmera.
2 Atĩrĩĩrĩ inyuĩ andũ akũrũ, tegaai matũ,
na inyuĩ atũũri oothe a bũrũri wa Juda, thikĩrĩriai.
Ũndũ ta ũyũ-rĩ, ũrĩ woneka
mahindainĩ maanyu kana marĩa ma maithe maanyu?
3 Menyithiai ciana cianyu,
ciana cianyu nacio nĩikaaũmenyithia ciacio,
icio nacio nĩikaaũmenyithia rũciaro rũrĩa rũkaarũmĩrĩra.
4 Mĩrumbĩ ya ngigĩ ĩrũmanĩrĩire
nĩyomookeire mĩmera mĩgũndainĩ.
Kĩrĩa mũrumbĩ ũmwe watigia,
mũrumbĩ ũrĩa ũngĩ ũrooka ũgakĩhaata.
5 Inyuĩ mĩrĩĩu ĩno, ũkĩraai mũrĩre;
inyuĩ oothe mũnyuaga ndibei mũkarĩĩo, girĩkaai;
thabibũ cia gũthondeka ndibei ya mũhihano nĩcianangĩĩtwo.
6 Mbũtũ nene ya ngigĩ nĩtharĩkĩire bũrũri witũ;
ĩrĩ na hinya mũingĩ na ndĩngĩtarĩka.
Magego ma ngigĩ icio moohĩgĩĩte o ta ma mũrũũthi.
7 Nĩthũũkangĩĩtie mĩthabibũ iitũ,
na ĩkarĩa mĩtĩ iitũ ya mĩkũyũ.
Ĩthũgũnĩĩte makoni maayo ĩkamarekia thĩ,
ĩgatiga honge ĩrĩ theru.
8 Rĩraai o ta mũirĩĩtu akĩrĩra ekĩrĩĩte nguo ya ikũnia,
agĩcakaĩra mwendwa wake ũrĩa mangĩrahikanirie naake.
9 Gũtirĩ mũtu kana ndibei cia kũruta Hekaarũinĩ.
Athĩnjĩri Ngai no gũcakaya maracakaya
tondũ matirĩ na iheeo cia kũrutĩra MWATHANI.
10 Mĩgũnda nĩyanangĩĩtwo;
tĩĩri nĩgũcakaya ũracakaya,
tondũ ngano nĩndĩe, mĩthabibũ ĩkooma,
na mĩtamaiyũ ĩkahooha.
11 Inyuĩ arĩmi, wĩthikĩreei nĩ kĩeha,
na inyuĩ aceehi a mĩthabibũ girĩkaai,
tondũ ngano na mbaarĩ, na magetha moothe ma mĩgũnda nĩmaanangĩĩtwo.
12 Mĩthabibũ na mĩkũyũ nĩhooheete,
mĩtĩ yothe ya matunda ĩhooheete ĩkooma biũ.
Gĩkeno gĩothe kĩa andũ nĩgĩthiru.
13 Ĩkĩraai nguo cia makũnia mũcakae inyuĩ athĩnjĩri Ngai,
rĩraai inyuĩ mũtungataga kĩgongoonainĩ.
Thiĩi Hekaarũinĩ mũgacakae ũtukũ wothe,
inyuĩ mũtungatagĩra Ngai wakwa,
tondũ gũtirĩ ngano na ndibei cia kũrutĩrwo Ngai wanyu.
14 Raarĩriai mũthenya wa kwĩhinga irio;
ĩtanaai kĩgomano gĩtheru!
Cookanĩrĩriai atongoria na andũ oothe a bũrũri wa Juda
Hekaarũinĩ ya MWATHANI Ngai wanyu
na mũmũkaĩre.
15 Ũũi, ĩiya wakwa-ĩ, Mũthenya wa MWATHANI ũrĩ hakuhĩ;
nĩ mũthenya ũrĩa Mwene Hinya Wothe ekũreehithia mwanangĩko!
16 Githĩ tũtireyoneire mĩmera ĩkĩniinwo mĩgũndainĩ iitũ,
na gĩkeno na gũcanjamũka igĩthira Hekaarũinĩ ya Ngai witũ?
17 Mbegũ iromanĩrĩire o tĩĩriinĩ itanamera.
Thitoo itigĩĩtwo itarĩ kĩndũ,
na makũmbĩ magatigwo marĩ ciĩgĩĩgĩ,
tondũ gũtirĩ irio ciakũigwo kuo.
18 Mahiũ marania magĩcangacangaga,
tondũ matirĩ na gĩa kũrĩa;
nacio ndũũru cia ng’ondu irĩ o na thĩĩna.
19 Nĩndĩragũkaĩra, MWATHANI,
tondũ mwaki nĩũcinĩĩte nyeki ya werũ
na mĩtĩ yothe ya gĩthaka nĩyumĩĩte o ta ĩcinĩĩtwo nĩ mwaki.
20 O nacio nyamũ cia gĩthaka nĩiragũkaĩra,
tondũ njũũĩ nĩihũĩte,
na mwaki ũgacina nyeki ya werũ.