1 Naarĩ korwo mũtwe wakwa nĩ gĩthima kĩa maaĩ,
na maitho maakwa nĩ karũũĩ ka maithori,
nĩguo ndĩrage ũtukũ na mũthenya
nĩ ũndũ wa andũ aakwa arĩa mooragĩĩtwo!
2 Naarĩ korwo ndĩ na handũ ha kũraara werũinĩ,
njũrĩre ho njeherere andũ aakwa!
Tondũ oothe nĩ itharia,
nĩ mbũtũ ya imaramari.
3 Hingo ciothe makoragwo mehaarĩirie kũheenania;
maheeni nĩ mo marathamaka handũ ha ũũma bũrũriinĩ.
MWATHANI ekuuga atĩrĩ,
“Andũ aakwa matitigithagĩria gwĩka ũũru,
na matimenyaga atĩ niĩ ndĩ Ngai wao.”
4 O mũndũ nĩehũũge mũraatawe,
na ndakeehoke andũ aao;
nĩ gũkorwo andũ a mũndũ oothe nĩ aara o ta Jakubu,
na mũndũ o wothe athiaga agĩcambagia mũraatawe.
5 O mũndũ araheenia mũraatawe,
na gũtirĩ mũndũ o na ũmwe waragia ma;
nĩmĩ ciao macirutĩĩte kwaragia o maheeni;
meekaga ũũru ũguo atĩ matingĩhota kwĩrira.
6 Makĩragĩrĩria o kũhinyanĩrĩria na kũheenania
na makarega gũũthikĩrĩria.
Ũguo nĩguo niĩ MWATHANI ndoiga.
7 Tondũ ũcio MWATHANI Mwene Hinya Wothe ekuuga atĩrĩ,
“Nĩngũtheria andũ aakwa, ta ũrĩa cuuma ĩtheragio na mwaki
o na ndĩmagerie.
Andũ aakwa nĩmeekĩĩte ũũru,
nĩ atĩa ũngĩ ingĩmeeka?
8 Nĩmĩ ciao no ta mĩguĩ mĩrũrũ;
ciaragia o maheeni.
O mũndũ aaragia wega na ũrĩa marigainie naake,
no ngoroinĩ yake akoragwo akĩmwĩciirĩria ũũru.
9 No ngĩage kũmaherithia nĩ ũndũ wa maũndũ macio?
No njage kwĩrĩhĩria harĩ rũũrĩrĩ ta rũu?
Niĩ, MWATHANI nĩ niĩ ndoiga ũguo.”
10 Ngũkiuga atĩrĩ, “Nĩngũrĩrĩra irĩma,
na njakaĩre kũndũ gwa kũrĩithia mahiũ,
nĩ ũndũ guothe nĩkũũmĩĩte,
na gũtituĩkanagĩrio nĩ mũndũ o na ũrĩkũ.
Mahiũ matiiguagwo makĩania kuo;
nyoni na nyamũ cia gĩthaka nĩciũrĩĩte igathiĩ.”
11 MWATHANI ekuuga atĩrĩ,
“Jerusalemu ngũgũtua hĩba ya mahiga,
gũtuĩke gwa gũikaragwo nĩ mbwe.
Matũũra ma Juda namo ngũmatua werũ,
kũndũ gũtarĩikaragwo nĩ mũndũ o na ũrĩkũ.”
12 Ngũũria atĩrĩ, “MWATHANI, nĩ kĩĩ gĩtũmĩĩte bũrũri wanangĩke na ũũmagare o ta werũ, ũguo atĩ ndũngĩtuĩkanĩrio nĩ mũndũ o na ũrĩkũ? Mũndũ ũrĩa mũũgĩ ũũ wega wa kũhota kũmenya ũndũ ũcio nĩ ũrĩkũ? Nũũ ũtaarĩirie nĩ geetha akaũheane kũrĩ andũ arĩa angĩ?”
13 MWATHANI agĩcookia atĩrĩ, “Kũhaanĩĩte ũguo tondũ andũ aakwa nĩmaatiganĩirie watho wakwa ũrĩa ndamaheire. Matinjathĩkĩire o na kana mageeka ũrĩa ndamaathire.
14 Ũndũ ũrĩa meekĩĩte nĩkũrema na magathaathaiya mĩhianano ya Baali o ta ũrĩa maarutirwo nĩ maithe maao meekage.
15 Tondũ ũcio, thikĩrĩriai ũrĩa niĩ, MWATHANI Mwene Hinya Wothe, Ngai wa Isiraeli, ngwĩka. Ngũhe andũ aakwa mĩtĩ mĩrũrũ marĩe, na ndĩmahe maaĩ me na ũrogi manyue.
16 Ngũmahurunja ndũũrĩrĩinĩ iria o, o na maithe maao matarĩ maigua ũhoro wacio. Njooke ndĩmoime thuutha na mbũtũ cia ita nginya ndigĩrĩre nĩndamaniina oothe.”
Andũ a Jerusalemu gũkaya mateithio
17 MWATHANI Mwene Hinya Wothe akiuga atĩrĩ,
“Wĩciirie ũhoro wa ũrĩa kũreekĩka!
Ĩta andũ a nja arĩa macakayaga mooke,
rekanĩria atumia arĩa mooĩ kũina nyĩmbo cia mathiko.”
18 Nao andũ makiuga atĩrĩ,
“Meere mahiũhe mooke matũinĩre rwĩmbo wa mathiko,
nginya maitho maitũ maiyũre maithori,
na mbutu ciitũ ciihũge nĩkũrĩra.”
19 Nĩ gũkorwo mũgambo wa kĩrĩro nĩũraiguuo kũu Zayuni ũkiuga atĩrĩ,
“Kaĩ nĩtwanangĩĩtwo-ĩ!
Tũconoreetwo o biũ!
No nginya tuume bũrũriinĩ witũ;
tondũ mĩciĩ iitũ nĩmomoranĩĩtio.”
20 Na niĩ ngiuga atĩrĩ, “Atumia aya, thikĩrĩriai ciugo cia MWATHANI,
na mũnyiite ũrĩa aramwĩra.
Rutaai aarĩ aanyu gũcakaya,
na muonie arĩa mũrigainie nao kũina nyĩmbo cia mathiko.
21 Nĩ gũkorwo gĩkuũ nĩkĩgereire ndiricainĩ ciitũ,
gĩgatoonya nyũmba ciitũ cia ũnene;
nĩkĩũragĩire ciana njĩrainĩ cia itũũra
na gĩkaniina andũ eethĩ ndũũnyũinĩ.
22 MWATHANI akĩnjĩĩra njuge ũũ:
‘Ciimba cia andũ ciaraganĩĩte kũndũ guothe
o ta mai ma mahiũ mĩgũndainĩ,
kana ta rũũa rũtemeetwo nĩ agethi
rũgatigwo rũtarĩ na wa kũrũcookanĩrĩria.’ ”
23 MWATHANI ekuuga atĩrĩ, “Andũ arĩa oogĩ matigeetĩĩe nĩ ũndũ wa ũũgĩ wao; arĩa marĩ hinya matigeetĩĩe nĩ ũndũ wa hinya wao, o nao arĩa itonga matigeetĩĩe nĩ ũndũ wa ũtonga wao.
24 Mũndũ o wothe angĩenda gwĩtĩĩa-rĩ, nĩetĩĩe na ũrĩa anjũũĩ na ũrĩa tuumĩranĩĩtie ngoro, tondũ niĩ MWATHANI njĩkaga maũndũ ma ũtugi, ngatuanĩra na kĩhooto, na ngarũũgamĩrĩra maũndũ ma ũthingu gũũkũ thĩ. Maũndũ macio nĩ mo mangenagia. Niĩ MWATHANI, nĩ niĩ ndoiga ũguo.”
25-26 MWATHANI ekuuga atĩrĩ, “Hĩndĩ nĩrooka rĩrĩa ndĩrĩherithia andũ a Misiri, Juda, Edomu, Aamoni, Moabi, o na andũ oothe arĩa maikaraga werũinĩ arĩa meenjaga njuĩrĩ ciao igakuhĩha.Andũ acio oothe nĩ aruu, no rĩĩrĩ, matimenyereire kĩrĩĩkanĩro kĩrĩa ũndũ ũcio wa kũrua ũkoragwo ũrĩ kĩmenyithia kĩaguo. Hatirĩ mũndũ o na ũmwe wa andũ acio, o na wa andũ a Isiraeli ũmenyereire kĩrĩĩkanĩro gĩakwa.”