Jeremia kũhunjia kĩhingoinĩ kĩa Hekaarũ
1 Ĩno nĩ yo ndũmĩrĩri ĩrĩa yakinyĩire Jeremia yumĩĩte harĩ MWATHANI:
2 “Thiĩ ũrũũgame kĩhingoinĩ kĩa Hekaarũ, wanĩrĩre ndũmĩrĩri ĩno uuge atĩrĩ, ‘Inyuĩ andũ a Juda arĩa mũtoonyaga na ihingo ici nĩguo mũgathaathaiye MWATHANI, taiguai ndũmĩrĩri ya MWATHANI.’
3 MWATHANI Mwene Hinya Wothe, O we Ngai wa Isiraeli, ekuuga ũũ: ‘Garũraai mĩthiĩre yanyu na ciĩko cianyu, na nĩngũmwĩtĩkĩria mũthiĩ na mbere gũtũũra kũndũ gũũkũ.’
4 Tigaai kwĩheenia mũkiugaga atĩrĩ, ‘Tũrĩ agitĩre! Ĩno nĩ yo Hekaarũ ya MWATHANI, ĩno nĩ yo Hekaarũ ya MWATHANI, ĩno nĩ yo Hekaarũ ya MWATHANI!’
5 “Garũraai mĩthiĩre yanyu na ciĩko cianyu. Ĩkanagaai maũndũ ma kĩhooto mũndũ na ũrĩa ũngĩ.
6 Tigaai kũhinyĩrĩria ageni, ciana cia ngoriai, na atumia a ndigwa. Tigaai kũũraga andũ matarĩ na mahĩtia meekĩĩte bũrũriinĩ ũyũ. Tigaai gũthaathaiya ngai ingĩ tondũ ũndũ ũcio nĩũkũmũũnũha.
7 Mũngĩgarũrũka, nĩngũmwĩtĩkĩria mũthiĩ na mbere gũtũũra gũũkũ bũrũriinĩ ũrĩa ndaheire maithe maanyu ũtuĩke igai rĩao tene na tene.
8 “Atĩrĩĩrĩ, mũigĩĩte mwĩhoko wanyu ciugoinĩ cia maheeni.
9 Mũiyaga, mũkooragana, mũgatharania, mũkaheenania mũkĩĩhĩtaga, mũkarutĩra Baali magongoona, na mũgathaathaiya ngai iria mũtaamenyeete hĩndĩ ya mbere.
10 Mwĩkaga maũndũ macio thũire, mũgacooka mũgooka Hekaarũinĩ ĩno yakwa kĩũmbe mũkarũũgama mbere yakwa, mũkoiga atĩrĩ, ‘Tũrĩ agitĩre!’
11 Kaĩ mũreciiria Hekaarũ yakwa nĩ kũndũ gwa kwĩhithwo nĩ atuunyani? Niĩ mwene nĩnyoneete ũrĩa mũreeka.
12 Tathiĩi Shilo,kũndũ kũrĩa ndaambire gũthuura thaathayagĩrio, mũone ũrĩa ndagwĩkire nĩ ũndũ wa meehia ma andũ aakwa a Isiraeli.
13 Inyuĩ-rĩ, nĩmwĩkĩĩte meehia macio moothe; o na harĩa ndĩmwaragĩria itegũtigithĩria, nĩmũregeete gũũthikĩrĩria. O na ndamwĩta mũtiigana kũnjĩtĩka.
14 Tondũ ũcio, ngwĩka Hekaarũ ĩno yakwa, ĩrĩa mwĩhokeete, ũrĩa ndeekire Shilo. O nakuo kũndũ gũũkũ kũrĩa ndaheire maithe maanyu o na ngĩmũhe inyuĩ, ngũgwĩka o taguo.
15 Njooke ndĩmũingate mwehere mbere yakwa o ta ũrĩa ndaingatire andũ aanyu; nĩ o andũ a Isiraeli.Nĩ niĩ MWATHANI, ndoiga ũguo.”
Ũremi wa andũ
16 MWATHANI akĩnjĩĩra atĩrĩ, “Jeremia, ndũkahoere andũ aya. Ndũkaarĩre kana ũhooe nĩ ũndũ wao. Ndũkaae kũmathaithanĩrĩra harĩ niĩ, tondũ ndigũgũthikĩrĩria.
17 Kaĩ ũtarona ũrĩa mareeka matũũrainĩ ma Juda na njĩrainĩ cia Jerusalemu?
18 Ciana irongania ngũ, maithe magaakia mwaki, namo maanyina magakanda mũtu nĩguo mathondekere ngai ĩrĩa meetaga kwini wa igũrũ, keeki. O na ningĩ maitangagĩra ngai ingĩ ndibei irĩ ta igongoona, no geetha manjiguithie ũũru.
19 Mareciiria atĩ nĩ niĩ maraiguithia ũũru? Nĩ o eene mareiguithia ũũru ngoro na makereehere gĩconoko.
20 Tondũ ũcio, niĩ, MWATHANI Ngai, nĩngũitĩrĩria Hekaarũ ĩno maraakara maakwa me gwakana ta mwaki. O na nyamũ, mĩtĩ, irio iria ihandĩĩtwo mĩgũndainĩ, na andũ ngũmeeka o taguo. Maraakara maakwa mekũhaana mwaki ũtangĩhorio nĩ mũndũ o na ũrĩkũ.”
21 MWATHANI Mwene Hinya Wothe, o we Ngai wa Isiraeli ekuuga atĩrĩ, “Onganĩrĩriai magongoona maanyu ma njino na magongoona marĩa mangĩ na mũrĩe nyama ciamo.
22 Tondũ rĩĩrĩ, hĩndĩ ĩrĩa ndarutire maithe maanyu bũrũriinĩ wa Misiri, ndiamaheire rĩathani o na rĩmwe rĩkonainie na magongoona ma njino kana magongoona.
23 Ũrĩa ndamaathire nĩ atĩrĩ, manjathĩkagĩre nĩguo nduĩke Ngai wao, nao matuĩke andũ aakwa. O na ningĩ nĩndameerire maikarage ta ũrĩa ndamaathĩĩte nĩguo magĩage na thaayũ.
24 No o matiathĩkire kana magĩthikĩrĩria; maarũmĩrĩire ũrĩa wothe ngoro ciao nemi na njũru ciamataarire meeke. Nao handũ ha gũtuĩka eega nĩgũthũũka maathũũkire makĩria.
25 Kuuma mũthenya ũrĩa maithe maanyu moimire Misiri nginyagia mũthenya wa ũũmũũthĩ, ndũire ndĩmũrekagĩria ndungata ciakwa anabii.
26 No inyuĩ mũtirĩ mwathikĩrĩria kana mũkanjigua. Ũrĩa mũkĩragĩrĩria gwĩka nĩkũrema na kũng’athia makĩria ma maithe maanyu.
27 “Jeremia, maũndũ macio moothe nĩ mo ũkwĩra andũ aakwa, no o matigũgũthikĩrĩria; o na wameeta matigũgwĩtĩka.
28 Nawe ũrĩmeera atĩ rũũrĩrĩ rwao nĩrũregeete kũnjathĩkĩra niĩ, MWATHANI Ngai wao, na rũkarega ndĩrũrũnge. Ũũma nĩgũkua ũkuĩte; tũnua twao tũtiwaragia o na haniini.”
Ciĩko cia meehia iria ireekĩrwo gĩtuambainĩ kĩa Hinomu
29 MWATHANI ekuuga atĩrĩ,
“Cakayai, inyuĩ andũ a Jerusalemu;
Enjaai njuĩrĩ cianyu mũcite.
Inaai rwĩmbo rwa macakaya mũrĩ irĩma igũrũ,
tondũ niĩ MWATHANI nĩndegeete na ngatiganĩria andũ aakwa arĩa mandaakarĩĩtie.”
30 Tondũ MWATHANI ekuuga atĩrĩ, “Andũ a Juda nĩmeekĩĩte ũndũ mũũru; nĩmaigĩĩte mĩhianano ĩrĩa thũire, Hekaarũinĩ yakwa, magatũma Hekaarũ ĩgĩe na thaahu.
31 Ningĩ nĩmeekĩĩte ũndũ itarĩ ndeciiria o na rĩ; nĩmaakĩĩte gĩtuambainĩ kĩa Hinomu kũndũ gũtũũgĩru gwa gũthaathaĩria gwĩtagwo Tofethi nĩguo marutagĩre aariũ aao na aarĩ aao kuo marĩ magongoona ma gũcinwo na mwaki. Ũndũ ũyũ niĩ ndirĩ ndamaatha mawĩkage.
32 Kwoguo, ihinda nĩrĩrooka rĩrĩa kĩgongoona kĩu gĩtagacooka gwĩtwo rĩngĩ Tofethi kana gĩtuamba kĩa Hinomu, no gĩgeetagwo gĩtuamba gĩa Kĩng’eero. Gũkaahaana ũguo tondũ kũu nĩkuo magaathikaga andũ nĩ ũrĩa kwagĩĩte handũ hangĩ mangĩthikwo.
33 Ciimba cia andũ aanyu cigaatuĩka irio cia nyoni cia rĩerainĩ na nyamũ cia gĩthaka, na gũtigaakorwo na mũndũ o na ũmwe wa gũcimakia ciũre.
34 Nĩngaaniina mĩgambo ya gĩkeno, ya mĩtheko, o na ya ndũũhiũ cia maruga ma ũhiki matũũrainĩ ma Juda na njĩrainĩ cia Jerusalemu. Bũrũri wothe ũgaatigwo ũrĩ maganjo.