Ezira gũkinya Jerusalemu
1 Na rĩĩrĩ, thuutha wa matukũ maingĩ gũthira, o hĩndĩ ĩrĩa Aritashashita aarĩ mũthamaki wa Perisia, hagĩũka mũndũ wetagwo Ezira oimĩĩte Babiloni. Naake aarĩ wa rũciaro rwa Mũthĩnjĩri Ngai Ũrĩa Mũnene wetagwo Harũni. Ezira aarĩ mũrũ wa Seraia, Seraia mũrũ wa Azaria, Azaria mũrũ wa Hilikia,
2 Hilikia mũrũ wa Shalumu, Shalumu mũrũ wa Zadoku, Zadoku mũrũ wa Ahitubu,
3 Ahitubu mũrũ wa Amaria, Amaria mũrũ wa Azaria, Azaria mũrũ wa Meraiothu, Meraiothu
4 mũrũ wa Zeraia, Zeraia mũrũ wa Uzi, Uzi mũrũ wa Buki,
5 Buki mũrũ wa Abishua, Abishua mũrũ wa Finehasi, Finehasi mũrũ wa Eleazaru, Eleazaru mũrũ wa Harũni.
6-7 Na rĩĩrĩ, Ezira aarĩ mũndũ mũũgĩ mũno ũhoroinĩ wa Watho ũrĩa MWATHANI Ngai wa Isiraeli aaheete Musa. Naake mũthamaki akĩmwĩtĩkĩria ũndũ o wothe aahoire harĩ we, nĩ ũndũ wa ũrĩa Ngai wake amũraathimĩĩte na akamũteithia. Naake Ezira agĩkiuma Babiloni aarĩ na gĩkundi kĩa andũ a Isiraeli, matukanĩĩte athĩnjĩri Ngai, Alawii, aini a nyĩmbo, aikaria a mĩrango, na ndungata cia Hekaarũ, magĩthiĩ Jerusalemu mwaka wa mũgwanja wa ũthamaki wa Aritashashita.
8-9 Nao magĩkĩambata kuuma Babiloni mũthenya wa mbere wa mweri wa mbere, magĩkinya Jerusalemu mũthenya wa mbere wa mweri wa gataano nĩ ũndũ wa ũrĩa Ngai aamateithirie.
10 Na rĩĩrĩ, Ezira nĩeyamũrĩire kwĩruta watho wa MWATHANI, kũũhingia o na ningĩ kũruta andũ a Isiraeli mawatho na maathani macio.
Marũa marĩa Aritashashita aaheire Ezira
11 Naake Aritashashita akĩnengera Ezira, ũcio mũthĩnjĩri Ngai na mũrutani, mũndũ wamenyeete wega ũhoro wa mawatho na maathani marĩa MWATHANI aaheete Isiraeli, marũa maya:
12 Kuuma kũrĩ niĩ Aritashashita, mũthamaki wa athamaki, kũrĩ Ezira, mũthĩnjĩri Ngai na mũrutani wa watho wa Ngai wa igũrũ.
13 Nĩndaathana atĩ Aisiraeli oothe, athĩnjĩri Ngai, o na Alawii, arĩa marĩ bũrũri ũrĩa njathanaga, arĩa mangĩenda gũthiĩ nawe Jerusalemu, nĩetĩkĩrie.
14 Nĩ niĩ ndagũtũma tũrĩ hamwe na andũ aakwa mũgwanja arĩa maheaga kĩrĩra, ũthiĩ ũgatuĩrie ũrĩa maũndũ maikarĩĩte kũu Jerusalemu na Juda, nĩ geetha wone kana watho ũrĩa Ngai waku aakũnengerire no ũrarũmĩrĩrwo wega.
15 Ningĩ nĩwagĩrĩirwo nĩgũkuua betha na thahabu, iria niĩ na andũ aakwa arĩa maheyaga kĩrĩra tũrutĩire Ngai wa Isiraeli, o ũcio Hekaarũ yake ĩ kũu Jerusalemu.
16 Ningĩ nĩwagĩrĩirwo nĩgũkuua betha o na thahabu ciothe iria ũkũũngania bũrũriinĩ ũyũ wothe wa Babiloni, o na ningĩ indo iria andũ a Isiraeli o na athĩnjĩri Ngai mekũruta na kwĩyendera nĩ ũndũ wa Hekaarũ ya Ngai wao ĩrĩa ĩrĩ kũu Jerusalemu.
17 Mbeeca icio ũgaacihũthĩra wega na kũgũra ndeegwa, ndũrũme, tũtũrũme, irio, na ndibei, na ũgaacirutĩra igũrũ rĩa kĩgongoona kĩa Hekaarũ ya Ngai ĩrĩa ĩrĩ Jerusalemu.
18 Na rĩĩrĩ, thahabu na betha iria igaatigara-rĩ, wee na andũ aaku mũgeeka nacio o ũrĩa mũkoona kwagĩrĩire, o na ta ũrĩa Ngai wanyu eendeete.
19 Indo iria ũheetwo cia kũhũthĩrwo Hekaarũinĩ ya Ngai, ũgacitwara ũciige mbere ya Ngai o kũu Jerusalemu.
20 O na ningĩ ũngĩkaabatario nĩ kĩndũ kĩngĩ o gĩothe nĩ ũndũ wa Hekaarũ, ũkaaruta kuuma mũthiithũinĩ wa indo cia mũthamaki.
21 Na rĩĩrĩ, nĩndaatha aigi mĩthiithũ oothe arĩa marĩ na mwena wa ithũĩro wa rũũĩ rwa Farati makaahe na ihenya Ezira mũthĩnjĩri Ngai na mũrutani mũũgĩ wa watho wa Ngai wa igũrũ kĩrĩa gĩothe akaabatario nĩkĩo.
22 No aheeo kinya kiro ngiri ithatũ na magana mana (3,400) cia betha, ngiri ikũmi (10,000) cia ngano, rita ngiri igĩrĩ (2,000) cia ndibei, rita ngiri igĩrĩ (2,000) cia maguta ma mĩtamaiyũ, na cumbĩ mũingĩ o ta ũrĩa ũgaakorwo ũkĩendekana.
23 Atĩrĩĩrĩ, no nginya wone atĩ nĩwaneana kĩrĩa gĩothe Ngai wa igũrũ akaabatario nĩkĩo nĩ ũndũ wa Hekaarũ yake nĩguo ndakaanandaakarĩre o na kana araakarĩre athamaki arĩa magaathamaka thuutha wakwa.
24 Ningĩ athĩnjĩri Ngai, Alawii, aini a nyĩmbo, arangĩri a mĩrango, aruti wĩra wa Hekaarũ, o na kana mũndũ o wothe ũkaaruta wĩra kũu Hekaarũinĩ, acio oothe matikaaneetio igooti rĩa mũthemba o na ũrĩkũ.
25 Nawe Ezira-rĩ, o ta ũrĩa ũheetwo ũũgĩ nĩ Ngai waku, thuura andũ ũmatue aathani na aciirithania nĩguo maathage andũ oothe arĩa matũũraga mũrĩmo ũcio wa ithũĩro wa rũũĩ rwa Farati, o arĩa marũũmagĩrĩra watho wa Ngai waku. Na mũndũ o wothe ũtooĩ watho ũcio ũmũthoomithie.
26 Na rĩĩrĩ, mũndũ o wothe ũrĩa ũgaakararia watho wa Ngai waku, o na kana watho wa mũthamaki, ũcio aagĩrĩirwo nĩkũherithio na ihenya. Ũcio akooragwo kana athaamio, indo ciake itahwo kana oohwo njeera.
Ezira kũgaatha Ngai
27 Naake Ezira akiuga atĩrĩ, “MWATHANI Ngai wa maithe maitũ arogoocwo! O we ũtũmĩĩte mũthamaki agoocithie Hekaarũ ya MWATHANI ĩrĩa ĩrĩ Jerusalemu.
28 Na nĩ ũndũ wa tha cia Ngai, mũthamaki o na andũ aake arĩa mamũheaga kĩrĩra, o na njaama ciake ciothe nĩmandaanahĩire. MWATHANI Ngai wakwa nĩaheete hinya na ngoonganithia atongoria aingĩ a mbarĩ cia Isiraeli tũcooke nao.”