Magongoona kwambĩrĩria rĩngĩ
1 Na rĩĩrĩ, mweri wa mũgwanja ũgĩkinya, andũ a Isiraeli oothe magĩkorwo matũũrĩĩte matũũrainĩ maao. Nao makĩũngana marĩ na ngoro ĩmwe oothe kũu Jerusalemu.
2 Naake Joshua mũrũ wa Jehozadaku, na athĩnjĩri Ngai a nyũmba yao, na Zerubabeli mũrũ wa Shealitieli na aariũ a ithe, magĩgĩaka rĩngĩ kĩgongoona kĩa Ngai wa Isiraeli, nĩ geetha marutagĩre magongoona ma njino igũrũ rĩakĩo, o ta ũrĩa kwandĩkĩĩtwo Wathoinĩ wa Musa, mũndũ ũrĩa wa Ngai.
3 O na gũtuĩka no meetigagĩra andũ a bũrũri ũcio, maagĩakire rĩngĩ o handũ harĩa gĩakĩĩtwo mbere ĩyo. Magĩkĩrurumũkia kũrutagĩra MWATHANI magongoona ho ma rũũciinĩ na ma hwaĩinĩ.
4 Ningĩ magĩkũngũĩra Thigũkũ ya Ithũnũ o ta ũrĩa kwandĩkĩĩtwo, na makaarutaga magongoona ma njino ma mũthenya o mũthenya.
5 Ningĩ makaarutaga magongoona ma njino na magongoona marĩa mangĩ ma karũũgamo ka mweri, o na ma thigũkũ iria ingĩ cia MWATHANI, o na magongoona marĩa maarutagwo nĩ mũndũ na kwĩyendera gwake.
6 Nao maambĩrĩirie kũrutĩra MWATHANI magongoona ma njino mũthenya wa mbere wa mweri wa mũgwanja. No rĩĩrĩ, nginyagia hĩndĩ ĩyo matiambĩrĩirie gwaka Hekaarũ ya MWATHANI rĩngĩ.
Mwako wa Hekaarũ kwambĩrĩria rĩngĩ
7 Nao andũ magĩkĩruta mbia cia kũrĩha aaki na mahiga, o na mabundi ma mbaaũ. Magĩcooka magĩtwarithĩria andũ a Sidoni na Turo irio, o na gĩakũnyua, o na maguta ma mĩtamaiyũ, nĩguo nao mamaheage mĩtarakwa, mamĩrutĩĩte kũu Lebanoni makamĩgereria iriainĩ o kinya Jopa. Ũndũ ũyũ wothe wekĩkire ta ũrĩa Cairasi mũthamaki wa Perisia aathanĩĩte.
8 Na rĩĩrĩ, mwaka wa keerĩ mweriinĩ wa keerĩ, kuuma rĩrĩa maakorirwo macookeete handũ hau ha gwaka Hekaarũ ya MWATHANI o kũu Jerusalemu-rĩ, magĩkĩambĩrĩria wĩra wa mwako. Nao Zerubabeli mũrũ wa Shealitieli, Joshua mũrũ wa Jehozadaku, o na Aisiraeli arĩa angĩ, athĩnjĩri Ngai o na Alawii, nĩ ta kuuga andũ oothe arĩa maacookeete Jerusalemu kuuma ithaamĩrio, makĩnyiitanĩra wĩra ũcio wa mwako. Alawii arĩa maakinyĩĩtie mĩaka mĩrongo ĩĩrĩ, o na makĩria, magĩtuuo arori a wĩra wa mwako ũcio wa Hekaarũ ya MWATHANI.
9 Hĩndĩ ĩyo Jeshua ũrĩa Mũlawii na aariũ aake, o na aariũ a ithe, na Kadimieli na aariũ aake (arĩa maarĩ a mbarĩ ya Hodavia) acio makĩnyiitanĩra hamwe gũtuĩka arũũgamĩrĩri a aruti wĩra wa mwako ũcio wa Hekaarũ ya MWATHANI. (Nao Alawii a mbarĩ ya Henadadi makĩmateithĩrĩria kũrutithia wĩra ũcio).
10 Na rĩĩrĩ, hĩndĩ ĩrĩa aaki maambĩrĩirie gwaka mũthingi wa Hekaarũ-rĩ, athĩnjĩri Ngai meehumbĩĩte nguo ciao cia ũtungati, na me na tũrumbeeta makĩrũũgama ho, o nao Alawii a mbarĩ ya Asafu, makĩrũũgama ho me na thaani iria ihũũrithanagio ikagamba. Nao makĩgooca MWATHANI kũringana na ũrĩa mũthamaki Daudi aathanĩĩte gwĩkagwo.
11 Nao makĩina, makĩgoocaga MWATHANI, magĩcookagĩra makiugaga atĩrĩ, “MWATHANI nĩ Mwega, naguo ũtugi wake kũrĩ andũ a Isiraeli nĩ wa tene na tene.” Nao andũ oothe magĩkĩanĩrĩra na hinya mũno makĩgoocaga MWATHANI, nĩ ũndũ mũthingi wa Hekaarũ nĩwarĩĩkĩĩtie gwakwo.
12 No rĩĩrĩ, hĩndĩ ĩrĩa athĩnjĩri Ngai na Alawii arĩa akũrũ, o na anene a mbarĩ, arĩa mooneete Hekaarũ ĩrĩa ya mbere, moonire ũrĩa mũthingi ũcio wakĩĩtwo makĩrĩra makiugĩrĩria mũno. No andũ arĩa angĩ maarĩ ho makĩanĩrĩra nĩgũkena.
13 Hatirĩ mũndũ ũngĩahotire gũkũũrana rĩanĩrĩra rĩa gĩkeno o na kana rĩa kĩrĩro nĩ gũkorwo inegene rĩu rĩao nĩrĩahotaga kũiguĩka kũndũ kũraaya.