Ezekieli kwenja njuĩrĩ na nderu ciake
1 MWATHANI akĩnjĩĩra atĩrĩ, “Mũrũ wa mũndũ, oya rũhiũ rwa njora rũũgĩ ta kanyũi wĩenje mũtwe na nderu. Ũcooke woe ratiri ya gũthima, ũgayanie njuĩrĩ icio maita matatũ.
2 Gĩkundi kĩmwe ũgĩcine na mwaki o kũu gatagatĩ ka itũũra rĩa Jerusalemu mũtharĩko wathira. Gĩkundi gĩa keerĩ ũkĩoe ũthiũrũrũke itũũra ũgĩgĩtinangagia na rũhiũ; nakĩo gĩkundi gĩa gatatũ ũkĩhurunje gĩthiĩ na rũhuuho, na niĩ njomore rũhiũ rwa njora ndĩciume thuutha.
3 No rĩĩrĩ, nĩũkuoya gakundi kaniini ka njuĩrĩ icio ũkoohanie na nguo yaku.
4 Ningĩ kuuma gakundiinĩ kau woe imwe, ũciikie riiko ihĩe nĩ mwaki. Mwaki ũkuuma hau ũcine bũrũri wothe wa Isiraeli.”
5 MWATHANI Ngai agĩthiĩ na mbere kuuga atĩrĩ, “Cũũthĩrĩria itũũra rĩa Jerusalemu rĩrĩa njigĩĩte gatagatĩ ka ndũũrĩrĩ, na rĩthiũrũrũkĩirio nĩ mabũrũri na mĩena yothe.
6 No nĩrĩregenyũkĩĩte rĩkaregana na mataaro maakwa. Rĩrĩ na ũtũrĩka mũingĩ gũkĩra ndũũrĩrĩ iria ingĩ na nĩrĩreganĩĩte na mawatho maakwa gũkĩra ũrĩa mabũrũri marĩa marĩrigiicĩirie maaneeka. Nĩrĩregeete mataaro maakwa o kũrega na rĩkaaga kũrũmĩrĩra mawatho maakwa.
7 Kwoguo niĩ MWATHANI Ngai nguuga atĩrĩ, ‘Jerusalemu, ũrĩ mũregenyũku gũkĩra ndũũrĩrĩ iria ikũrigiicĩirie; nĩwagĩĩte kũrũmĩrĩra mawatho maakwa; ũkaaga gũconokera matua maakwa o na ũkarũmĩrĩra mĩtugo ya ndũũrĩrĩ iria ikũrigiicĩirie.
8 Niĩ na niĩ MWATHANI Ngai nĩngũkũgarũrũka na nĩngũhingia matua maakwa igũrũ rĩaku, ndũũrĩrĩ ciĩoneire.
9 Nĩ ũndũ wa maũndũ ma thaahu marĩa waneeka, ngũgwĩka maũndũ itarĩ ndagwĩka o na itagaacooka gũgwĩka thuuthainĩ.
10 Atĩrĩĩrĩ, aciari nĩmekũrĩa ciana ciao, nacio ciana irie aciari aacio. Njooke hingie matua maakwa ma ciira igũrũ rĩaku, nao arĩa megũtigara, ndĩmahurunje na mĩena yothe.’
11 “O ta ũrĩa ndũũraga muoyo-rĩ, na nĩ niĩ MWATHANI Ngai ndehĩta, tondũ nĩmũthaahĩĩtie handũ haakwa harĩa hatheru, na ũtũrĩka wanyu wothe na o na ũmaramari wanyu, nĩngũmũniina itarĩ na tha na ndikũmũcaaĩra.
12 Gĩcunjĩ kĩmwe gĩa ithatũ kĩanyu gĩgũkua nĩ mĩrimũ kana kĩũragwo nĩ ng’aragu. Gĩcunjĩ kĩngĩ gĩa ithatũ kĩũragĩrwo mbaarainĩ; nakĩo gĩcunjĩ kĩu kĩngĩ gĩa ithatũ ndĩkĩhurunje mĩena yothe, njooke ndĩkĩrũmĩrĩre na rũhiũ rwa njora.
13 “Ngũmũitũrũrĩra marũrũ maakwa na ndĩmũkinyĩrie matũkũya maakwa o nginya ndĩrĩhĩrie njiganĩre. Ndamũitũrũrĩra maraakara maakwa nĩmũkũmenya atĩ niĩ MWATHANI njarĩĩtie ũguo tondũ ndiendaga kũigananio na ngai ĩngĩ nĩ inyuĩ.
14 Ngũmũtua kĩndũ kĩanangĩku na gĩa gũthekererwo nĩ ndũũrĩrĩ iria imũrigiicĩirie o na nĩ andũ arĩa oothe marĩhĩtũkagĩra gatagatĩinĩ kaanyu.
15 “Nĩngũhingia matua maakwa ma ciira igũrũ rĩanyu ndĩ na maraakara na marũrũ maingĩ. Ngũmũherithia na ihũũra inene, mũgĩtuĩke kĩndũ gĩa gũthekererwo, gĩa kũnyararwo, gĩa gũkaanania nakĩo, na gĩa kũmakania harĩ ndũũrĩrĩ iria imũrigiicĩirie. Nĩ niĩ MWATHANI ndoiga ũguo.
16 Hĩndĩ ĩyo nĩ rĩrĩa ndĩrekereria mĩguĩ mĩrũrũ ya ng’aragu na ya kũniinana ĩmũkorerere, tondũ ngũmĩtũma ĩmũniine. Hĩndĩ ĩyo nĩ rĩrĩa ndĩrĩtũma ng’aragu ĩrũre mũno na kwage irio mathitooinĩ.
17 Ndĩrĩmũtũmĩra ng’aragu na nyamũ cia gĩthaka imũtuunye ciana cianyu; mũthiro na haaro imwakĩrĩre kĩraaro na ndeke rũhiũ rwa njora rũmũomokere. Nĩ niĩ MWATHANI ndoiga ũguo.”