Kũgarũrũka gwa Saũlũ
1 Hĩndĩ ĩyo Saũlũ agĩkorwo arĩ na ũũru mũingĩ na akoigaga atĩ arutwo oothe a Mwathani mooragwo. Agĩgĩthiĩ kũrĩ Mũthĩnjĩri Ngai Ũrĩa Mũnene,
2 akĩũria aheeo marũa ma gũthiĩ namo thunagogiinĩ iria ciarĩ Damasiki, nĩ geetha arĩa oothe angĩona a Njĩra ya Mwathani amanyiite, amoohe amatware Jerusalemu.
3 Na rĩĩrĩ, akuhĩrĩria Damasiki ũtheri ũkiuma igũrũ o rĩmwe, ũkĩmwarĩra kuuma mĩena yothe.
4 Naake akĩgũa thĩ, akĩigua mũgambo ũkĩmwĩra atĩrĩ, “Saũlũ, Saũlũ! Ũnyariiraga nĩkĩ?”
5 Naake Saũlũ akĩmũũria atĩrĩ, “Wee nĩ we ũ, Mwathani?”
Naguo mũgambo ũcio ũgĩcookia atĩrĩ, “Nĩ niĩ Jesũ ũrĩa ũnyariiraga.
6 Atĩrĩĩrĩ, ũkĩra ũtoonye itũũra, na nĩũkwĩrwo ũrĩa wagĩrĩirwo nĩũgwĩka.”
7 Nao andũ arĩa maarĩ naake makĩrũũgama makirĩĩte ki, tondũ nĩmaiguire mũgambo no mationire ũrĩa waragia.
8 Naake Saũlũ agĩũkĩra akĩrũũgama na ahingũra maitho ndahotire kuona kĩndũ. Agĩkĩnyiitwo guoko nĩ arĩa maarĩ naake, makĩmũtoonyia Damasiki.
9 Naake agĩikara mĩthenya ĩtatũ atekuona na atekũrĩa kana akanyua.
10 Na rĩĩrĩ, kũu Damasiki nĩkwarĩ mũrutwo wetagwo Anania. Mwathani akĩmwarĩria na njĩra ya kĩoneki akĩmwĩra atĩrĩ, “Anania!”
Naake akiuga atĩrĩ, “Ĩ niĩ ũyũ haaha, Mwathani.”
11 Naake Mwathani akĩmwĩra atĩrĩ, “Ũkĩra, ũthiĩ njĩrainĩ ĩrĩa ĩĩtagwo ‘Nũngarũ’ ũtoonye nyũmba ya Judasi, ũũrie mũndũ wa kuuma Tariso wĩtagwo Saũlũ. Nĩkũhooya arahooya,
12 na nĩoneete thĩinĩ wa kĩoneki mũndũ ũgwĩtwo Anania agĩtoonya nyũmba akamũigĩrĩra mooko nĩ geetha ahote gũcooka kuona.”
13 No Anania agĩcookia atĩrĩ, “Mwathani, nĩnjiguĩte ũhoro wa mũndũ ũcio kuuma kũrĩ andũ aingĩ na maũndũ moothe mooru marĩa eekĩĩte andũ aaku thĩinĩ wa Jerusalemu.
14 Rĩu aheetwo ũhoti nĩ athĩnjĩri Ngai arĩa anene ooke gũũkũ anyiite arĩa oothe magũthaathayagia.”
15 No Mwathani akĩmwĩra atĩrĩ, “Wee thiĩ, amu mũndũ ũcio nĩ we thuurĩĩte andungate, atũme rĩĩtwa rĩakwa rĩmenyeke kũrĩ andũ a Ndũũrĩrĩ na athamaki na andũ a Isiraeli.
16 Nĩngũmuonia atĩ no mũhaka athĩĩnio nĩ ũndũ wakwa.”
17 Naake Anania agĩgĩthiĩ agĩtoonya nyũmba akĩigĩrĩra Saũlũ mooko akĩmwĩra atĩrĩ, “Saũlũ mũrũ wa Awa, Mwathani Jesũ ũrĩa ũrakuumĩrĩire ũrĩ njĩrainĩ ũgĩũka nĩ we wandũma. Andũma nĩ geetha ũcooke kuona na ũiyũrwo nĩ Roho Mũtheru.”
18 Na ihinda o rĩu tũnyamũ tũhaana ngaracũ tũkiuma maitho maake tũkĩgũa thĩ, naake akĩhota kuona rĩngĩ. Naake agĩgĩũkĩra akĩbatithio,
19 na akĩrĩa irio akĩgĩa na hinya.
Saũlũ kũhunjia itũũrainĩ rĩa Damasiki
Naake Saũlũ agĩikarania na andũ arĩa meetĩkĩĩtie kũu Damasiki matukũ gakundi.
20 Hĩndĩ o ĩyo agĩthiĩ thunagogiinĩ akĩhunjagia ũhoro wa Jesũ akiugaga atĩ Jesũ nĩ Mũrũ wa Ngai.
21 Nao arĩa oothe maamũiguire makĩgega, makĩũrania atĩrĩ, “Githĩ mũndũ ũyũ ti ũrĩa ũrooragaga arĩa mathaathayagia mũndũ ũcio ti Jesũ kũũrĩa Jerusalemu? Na githĩ ndookĩĩte gũũkũ no ũndũ wa gĩtũmi o kĩu gĩa kũnyiita andũ acio amatware kũrĩ athĩnjĩri Ngai arĩa anene?”
22 No Saũlũ agĩkĩrĩrĩria o kũgĩa na hinya na akĩrigithia Ayahudi arĩa maatũũraga kũu Damasiki na kũmoonia na ma atĩ Jesũ nĩ we Mesia.
23 Thuutha wa matukũ maingĩ kũhĩtũka, Ayahudi magĩcookania ndundu ya ũrĩa mekũũraga Saũlũ,
24 no Saũlũ akĩmenyithio. Ayahudi maikaraga marangĩire kĩhingo mũthenya na ũtukũ nĩguo mamũũrage.
25 No arutwo aake makĩmuoya ũtukũ ũmwe, makĩmwagararĩria rũthingo igũrũ makĩmũharũrũkia aikĩĩtio gĩkabũinĩ.
Saũlũ arĩ Jerusalemu
26 Na rĩĩrĩ, rĩrĩa Saũlũ aathiire Jerusalemu nĩageririe gũtuĩka ũmwe wa arutwo, no oothe nĩmaamwĩtigagĩra tondũ matietĩkagia atĩ nĩatuĩkĩĩte mũrutwo.
27 No Baranaba akĩoya Saũlũ akĩmũtwara kũrĩ atũmwo, akĩmeera ũrĩa Saũlũ arĩ njĩrainĩ oonire Mwathani ũrĩa wamuumĩrĩire, na ũrĩa ahunjĩĩtie thĩinĩ wa rĩĩtwa rĩa Mwathani e na ũũmĩrĩru kũu Damasiki.
28 Kwoguo Saũlũ agĩikarania na atũmwo, na agĩthiĩ kũu Jerusalemu guothe, akĩhunjagia thĩinĩ wa rĩĩtwa rĩa Mwathani oomĩrĩirie mũno.
29 Ningĩ nĩaragia na agakararania na Ayahudi arĩa maaragia Kĩngiriki, nao nĩmaageragia ũrĩa mangĩmũũraga.
30 Rĩrĩa andũ arĩa meetĩkĩĩtie maamenyire ũguo, makĩmũtwara Kaisarea magĩcooka makĩmwĩra athiĩ Tariso.
31 Nao andũ a kanitha kũu guothe Judea, Galili, na Samaria magĩikara na thaayũ. Nĩmoomagĩrĩrio nĩ Roho Mũtheru, magathiaga na njĩra ya gũtĩĩa Mwathani o makĩingĩhaga.
Petero gũthiĩ Luda na Jopa
32 Na rĩrĩa Petero aaceerangaga kũndũ na kũndũ, agĩkinya kũrĩ andũ a Ngai arĩa maatũũraga Luda.
33 Nakuo kũu agĩkora mũndũ wetagwo Aenea, warũarĩĩte mũrimũ wa gũkua ciĩga na watũire atoimaga ũrĩrĩ mĩaka ĩnaana.
34 Petero akĩmwĩra atĩrĩ, “Aenea, Jesũ Kristũ nĩegũkũhonia. Ũkĩra ware ũrĩrĩ waku.” Ihinda o rĩu agĩũkĩra.
35 Nao andũ oothe arĩa maatũũraga Luda na Sharoni mamuona, magĩĩtĩkia Mwathani.
36 Nakuo itũũrainĩ rĩa Jopa nĩkwarĩ mũtumia mwĩtĩkia wetagwo Tabitha. (Rĩĩtwa rĩu na Kĩngiriki nĩ Dorokasi, na nĩ ta kuuga thwariga.) Nĩarutaga mawĩra meega na agateithia athĩĩni.
37 Na matukũinĩ macio mũtumia ũcio akĩrũara agĩkua. Na marĩĩkia kũmũthambia, makĩmũiga nyũmba ngoroba ya igũrũ.
38 Tondũ Luda kwarĩ gũkuhĩ na Jopa, andũ arĩa meetĩkĩĩtie marĩĩkia kũigua atĩ Petero aarĩ kũu Luda, magĩtũma athuuri eerĩ makamũthaithe mamwĩre atĩrĩ, “Ĩtĩkĩra gũũka gũũkũ gwitũ na ndũgaikare.”
39 Naake Petero agĩũkĩra agĩtwarana nao. Akinya, makĩmũtwara nyũmba ĩyo ngoroba ya igũrũ. Nao atumia a ndigwa oothe makĩrũũgama harĩ we makĩrĩraga, makĩmuonagia nguo iria Dorokasi atumaga rĩrĩa aarĩ muoyo.
40 No Petero akĩmeera moime nja oothe, agĩturia ndu akĩhooya; agĩcooka akĩhũgũkĩra kĩimba akiuga atĩrĩ, “Tabitha, ũkĩra!” Naake akĩhingũria maitho, na oona Petero agĩĩtiira.
41 Naake Petero akĩmũnyiita guoko, akĩmũrũũgamia. Agĩcooka agĩĩta andũ arĩa meetĩkĩĩtie na atumia a ndigwa, akĩmũneana kũrĩo e muoyo.
42 Naguo ũndũ ũcio ũkĩmenyeka Jopa guothe, nao andũ aingĩ magĩĩtĩkia Mwathani.
43 Naake Petero agĩikara kũu Jopa matukũ maingĩ kwa mũndũ wetagwo Simoni warĩ mũtanduki wa njũũa.