Mĩario ya Sitefano
1 Naake Mũthĩnjĩri Ngai Ũrĩa Mũnene akĩũria Sitefano atĩrĩ, “Ũguo nĩguo kũhaana?”
2 Naake Sitefano akĩmũcookeria atĩrĩ, “Aariũ a Ithe wĩtũ na aabaaba tathikĩrĩriai! Ngai mwene riiri nĩoimĩrĩire ithe witũ Aburahamu, rĩrĩa aarĩ bũrũriinĩ wa Mesopotamia. Ataanathiĩ gũtũũra bũrũri wa Harani
3 akĩmwĩra atĩrĩ, ‘Thaama uume bũrũri wanyu ũtige andũ aanyu ũthiĩ bũrũri ũrĩa ngaakuonia.’
4 Hĩndĩ ĩyo Aburahamu akiuma bũrũri wa Akalidei, agĩthiĩ gũtũũra Harani. Rĩrĩa ithe aakuire, Ngai akĩmũruta kũu akĩmũreehe gũũkũ bũrũri ũyũ mũtũũraga.
5 Na rĩĩrĩ, Ngai ndamũheire bũrũri ũcio o na ikinya rĩmwe ũtuĩke igai rĩake, no nĩamwĩrĩire bũrũri ũcio atĩ nĩũgaatuĩka wake hamwe na ciana ciake, o na gwatuĩka Aburahamu ndaarĩ na mwana.
6 Ngai eerire Aburahamu atĩ: ‘Njiarwa ciaku igaatũũra bũrũri mũgeni irĩ ng’eni kũrĩa igaatuo ngombo na cione mathĩĩna mĩaka magana mana (400).
7 Na niĩ nĩngaatuĩra rũũrĩrĩ rũu igaatungatagĩra na ndarĩĩkia gũciruta rũũrĩrĩinĩ rũu, nĩigaathaathayagia irĩ bũrũriinĩ ũyũ.’
8 Ngai agĩgĩtũma irua rĩtuĩke rũũri rwa kĩrĩĩkanĩro. Nĩ ũndũ ũcio Aburahamu akĩruithia Isaaka arĩ wa mĩthenya ĩnaana thuutha wa gũciarwo. Naake Isaaka akĩruithia mũũrũwe Jakubu, naake Jakubu akĩruithia aariũ aake ikũmi na eerĩ, na acio nĩ o maithe maitũ.
9 “Na rĩĩrĩ, aariũ a Jakubu makĩiguĩra mũrũ wa ithe wao Josefu ũiru makĩmwendia bũrũriinĩ wa Misiri.
10 No Ngai aarĩ hamwe naake, agĩkĩmũhonokia kuuma mathĩĩnainĩ moothe. Agĩkĩmũhe ũũgĩ agĩtũma eendwo nĩ mũthamaki wa Misiri, ũrĩa wamũtuire mũnene bũrũriinĩ ũcio o na akĩmũhe wĩra wa kũroraga Misiri guothe o hamwe na mũciĩ wake wothe.
11 Thuutha ũcio gũkĩgĩa ng’aragu bũrũri wothe wa Misiri o na Kanaani, o na mathĩĩna maingĩ mũno. Namo maithe maitũ makĩaga irio.
12 No rĩrĩa Jakubu aiguire atĩ Misiri kwarĩ na irio, agĩtũma aariũ aake riita rĩa mbere, nĩ o maithe maitũ.
13 Nao mathiĩ riita rĩa keerĩ, Josefu akĩĩmenyithania na aariũ a ithe na andũ a Josefu makĩmenyeka nĩ mũthamaki wa Misiri.
14 Hĩndĩ ĩyo Josefu agĩtũmanĩra ithe Jakubu athiĩ Misiri na andũ aake oothe, nao maarĩ ta andũ mĩrongo mũgwanja na ataano.
15 Naake Jakubu na aariũ aake magĩgĩthiĩ Misiri kũrĩa oothe maakuĩrĩire.
16 Na rĩĩrĩ, mĩĩrĩ yao ĩgĩkuuo ĩgĩtwarwo Shekemu, ĩgĩthikwo mbĩĩrĩrainĩ ĩrĩa Aburahamu aagũrĩĩte kuuma kũrĩ ciana cia Hamori kũu Shekemu.
17 “Na rĩrĩa ihinda rĩakuhĩrĩirie rĩa Ngai kũhingia kĩĩranĩro kĩrĩa eerĩire Aburahamu, andũ aitũ magĩkorwo moongererekeete mũno kũu bũrũri wa Misiri.
18 Na gũgĩkorwo kũgĩĩte na mũthamaki ũngĩ, ũrĩa ũtaamenyeete Josefu.
19 Mũthamaki ũcio nĩahinyĩrĩirie andũ aitũ mũno, na agĩatha maithe maitũ marute twana tuothe nĩguo tũũragwo.
20 Hĩndĩ ĩyo nĩguo Musa aaciarirwo, naake aarĩ mũthaka mũno. Agĩkĩrererwo mũciĩ gwa ithe mĩeri ĩtatũ.
21 Na rĩrĩa aateirwo kuuma mũciĩ, mwarĩ wa mũthamaki akĩmuoya akĩmũrera ta mwana wake.
22 Musa agĩkĩrerwo na ũũgĩ wothe wa andũ a Misiri, naake agĩtuĩka mũndũ wĩ na ũhoti rĩrĩa ekwaria o na agĩĩka maũndũ.
23 “Na hĩndĩ ĩrĩa aakinyirie mĩaka mĩrongo ĩna, akĩigua e na wendo wa gũthiĩ kũrora ũrĩa andũ a rũũrĩrĩ rwake rwa Isiraeli maikaraga.
24 Naake oona ũmwe wao agĩĩkwo ũũru nĩ Mũmisiri agĩthiĩ kũmũũrĩria akĩmũteithĩrĩria, akĩringa Mũmisiri ũcio akĩmũũraga.
25 (Musa eeciiragia atĩ andũ aao nĩmekũmenya atĩ Ngai nĩakaamũhũthĩra amarute ũkomboinĩ no o matiamenyire.)
26 Na mũthenya ũyũ ũngĩ agĩkora Aisiraeli eerĩ magĩtetania, akĩgeria kũmaiguithania akĩmeera atĩrĩ, ‘Andũ aitũ, mũranegenania nĩkĩ na mũrĩ amwe?’
27 Naake mũndũ ũrĩa wekĩĩte ũcio ũngĩ ũũru agĩikania Musa akĩmũũria atĩrĩ, ‘Nũũ ũgũtuĩte mũnene witũ na mũtũtuĩri?
28 Anga nĩũkwenda kũnjũraga ta ũrĩa ũrooragire Mũmisiri ira?’
29 Rĩrĩa Musa aiguire ũguo, akĩũra akiuma Misiri agĩthiĩ gũtũũra e mũgeni bũrũri wa Midiani. E kũu akĩgĩa na aariũ eerĩ.
30 “Na rĩĩrĩ, mĩaka mĩrongo ĩna yathira, Musa arĩ werũinĩ wa kĩrĩma gĩa Sinai, akiumĩrĩrwo nĩ mũraika arĩ rũrĩrĩmbĩinĩ rwa mwaki ũrĩa wakanaga kĩhingainĩ.
31 Na rĩrĩa Musa oonire ũguo akĩgega, na rĩrĩa aakuhagĩrĩria nĩguo oone wega akĩigua mũgambo wa Mwathani ũkĩmwĩra atĩrĩ,
32 ‘Nĩ niĩ Ngai wa maithe maanyu, o we Ngai wa Aburahamu, na Isaaka na Jakubu.’ Naake Musa akĩambĩrĩria kũinaina o na agĩĩtigĩra kũrora.
33 Naake Mwathani akĩmwĩra atĩrĩ, ‘Ruta iraatũ amu hau ũrũngiĩ nĩ handũ hatheru.
34 Hatirĩ nganja nĩnyoneete ũrĩa andũ aakwa marathĩĩnio kũu Misiri na nĩnjiguĩte kĩrĩro kĩao. Nĩnjũkĩĩte thĩ nĩguo ndĩmahonokie; rĩu ũka nĩngũgũtũma Misiri.’
35 “Na rĩĩrĩ, Musa o ũrĩa andũ maaregire makĩũria atĩrĩ, ‘Nũũ ũgũtuĩte mũnene witũ na mũtũtuĩri?’ Ũcio nĩwe Ngai aatũmire arĩ mũtongoria na mũkũũri wao ahotithĩĩtio nĩ mũraika ũrĩa wamuumĩrĩire kĩhingainĩ gĩkĩhĩa.
36 Akĩmatongoria akĩmaruta kuo thuutha wa kũringa ciama na gwĩka maũndũ ma magegania kũu Misiri na Iriainĩ Ituune, o na werũinĩ ihinda rĩa mĩaka mĩrongo ĩna.
37 Musa ũcio nowe werire andũ a Isiraeli atĩrĩ, ‘Ngai nĩakaamũtũmĩra mũnabii kuuma kũrĩ andũ aanyu, o ta ũrĩa niĩ aandũmire.’
38 Ningĩ Musa ũcio nowe warĩ na andũ a Isiraeli kũu werũinĩ rĩrĩa aarĩirio nĩ mũraika kĩrĩmainĩ gĩa Sinai e hamwe na maithe maitũ, na akĩamũkĩra ciugo irĩ muoyo nĩguo atũhe.
39 “Ũcio nowe maithe maitũ maaregire gwathĩkĩra; makĩmũthinĩkania na makĩĩrirĩria gũcooka Misiri.
40 Nao magĩkĩĩra Harũni atĩrĩ, ‘Tũthondekere ngai cia gũtũtongoria, amu Musa ũcio watũrutire Misiri tũtiũĩ ũrĩa ooneete.’
41 Namo matukũinĩ macio magĩthondeka mũhianano wa ndeegwa, makĩũrutĩra magongoona, na magĩkũngũĩra wĩra wa mooko maao.
42 Naake Ngai akĩmatiganĩria, akĩmarekereria mathaathayagie ciũmbe cia igũrũ, o ta ũrĩa kwandĩkĩĩtwo thĩinĩ wa Ibuku rĩa anabii atĩrĩ:
‘Andũ aya a Isiraeli!
Hiihi nĩ niĩ mwathĩnjagĩra na mũkarutĩra magongoona werũinĩ
mĩaka mĩrongo ĩna?
43 Nĩkuoya muoire hema ya Moloku
na mũhianano wa Refani njata ĩrĩa mũtuĩte Ngai yanyu,
mĩhianano ĩrĩa mwethondekeire mũmĩthaathayagie.
Na kwoguo nĩngaamũthaamia
ndĩmũtware kũraaya mbere ya Babiloni.’
44 “Maithe maitũ maarĩ na Hema ya kuonania atĩ Ngai aarĩ hamwe nao werũinĩ. Nayo yakĩĩtwo o ta ũrĩa Ngai eerĩĩte Musa, kũringana na mũcoro ũrĩa Musa ooneetio.
45 Na thuutha ũcio, maithe maitũ arĩa maatigĩirwo hema ĩyo nĩ maithe maao nĩmaamĩkuuaga rĩrĩa maarĩ na Joshua magĩtuunyana bũrũri kuuma kũrĩ ndũũrĩrĩ iria ciaingatirwo nĩ Ngai. Nayo ĩgĩgĩikara kũu kinya hĩndĩ ya Daudi.
46 Naake Daudi agĩkĩonwo arĩ mwagĩrĩru nĩ Ngai, naake agĩkĩmũhooya amwĩtĩkĩrie aakĩre Ngai wa Jakubuũikaro.
47 No nĩ Solomoni wamwakĩire nyũmba.
48 “No rĩĩrĩ, Ngai ũcio wĩ igũrũ mũno-rĩ, ndatũũraga nyũmba ciakĩĩtwo na mooko ma andũ o ta ũrĩa mũnabii oigĩĩte ũũ:
49 Mwathani ekuuga atĩrĩ,
‘Igũrũ nĩkuo gĩtĩ gĩakwa kĩa ũnene,
nayo thĩ nĩ gaturwa ga kũigĩrĩra magũrũ maakwa.
Nĩ nyũmba ĩrĩkũ ũngĩkĩnjakĩra?
He ha handũ harĩa ingĩkĩhuurũka?
50 Anga ti niĩ ndathondekire indo ici ciothe?’
51 “Andũ aya aremi! Inyuĩ ngoro cianyu iteetĩkĩĩtie. O inyuĩ mũtaiguaga ũhoro wa Ngai! Ũguo noguo maithe maanyu meekire: o na inyuĩ noguo mũtũũraga mũreganĩĩte na Roho Mũtheru.
52 Kũrĩ mũnabii maithe maanyu mataanyariirire? Mooragire o na arĩa maamenyithanĩĩtie o mbere gũũka kwa ũrĩa mũthingu, ũrĩa rĩu o na inyuĩ mũkunyanĩire na mũkamũũraga.
53 Nĩ inyuĩ mwanengerirwo Watho nĩ araika na mũkĩaga kũwathĩkĩra!”
Sitefano kũhũũrwo na mahiga
54 Nao athuuri a Kĩama maigua maũndũ macio makĩng’ũrĩka mũno na makĩharagania magego nĩ ũndũ wake.
55 No Sitefano aiyũrĩĩtwo nĩ Roho Mũtheru, akĩrora igũrũ akĩona riiri wa Ngai, na akĩona Jesũ Kristũ arũngiĩ mwena wa ũrĩo wa Ngai.
56 Naake akiuga atĩrĩ, “Oneei! Nĩndĩrona igũrũ rĩhingũkĩĩte, na Mũrũ wa Mũndũ aikaire mwena wa ũrĩo wa Ngai!”
57 Hĩndĩ ĩyo andũ makĩanĩrĩra na mũgambo mũnene mahingĩĩte matũ maao makĩmũguthũkĩra oothe me hamwe,
58 makĩmuumia nja ya itũũra, makĩmũhũũra na mahiga. Nao aira makĩiga nguo ciao magũrũinĩ ma mwanake wetagwo Saũlũ.
59 Nao rĩrĩa maamũhũũraga na mahiga, Sitefano akĩhooya akiuga atĩrĩ, “Mwathani Jesũ amũkĩra roho wakwa!”
60 Agĩcooka agĩturia ndu, akĩanĩrĩra na mũgambo mũnene akiuga atĩrĩ, “Mwathani ndũkaamoorie rĩĩhia rĩĩrĩ!” Naake arĩĩkia kuuga ũguo agĩtuĩkana.