Tha cia Ngai kũrĩ andũ a Isiraeli
1 Ngũkĩũria atĩrĩ: Kaĩ Ngai aaregire andũ aake? Aaca o na haniini! Niĩ mwene ndĩ Mũisiraeli wa rũciaro rwa Aburahamu, na ndĩ wa mũhĩrĩga wa Benjamini.
2 Tondũ ũcio Ngai ndaregeete andũ aake arĩa aathuurĩre kuuma o mbere. Inyuĩ nĩmũũĩ ũrĩa maandĩko moigĩĩte harĩa Elija aathaithire Ngai nĩ ũndũ wa andũ a Isiraeli akiuga atĩrĩ,
3 “Mwathani, nĩmooragĩĩte anabii aaku, na magatharũria igongoona iria wakĩirwo; no niĩ nyiiki ndigarĩĩte, na nĩmaranjaria manjũrage.”
4 Ngai aamũcookeirie atĩa? Aamũcookeirie atĩrĩ, “Nĩndĩtigĩirie arũme ngiri mũgwanja matarĩ maathaathaiya Baali.”
5 Ũguo noguo kũhaana o na ũũmũũthĩ: kũrĩ na gakundi kaniini ka andũ Ngai ethuurĩire nĩ ũndũ wa wega wake.
6 Amathuurĩĩte nĩ ũndũ wa wega wake, no ti ũndũ wa ciĩko ciao. Amu korwo amathuurĩĩte nĩ ũndũ wa ciĩko ciao, wega wake ndũngĩtuĩka wega kũna.
7 Tũkiuge atĩa? Andũ a Isiraeli matiigana kuona kĩrĩa maatũire macaragia. Gakundi kaniini ka andũ arĩa Ngai aathuurire no ko gaakĩonire. Acio angĩ oothe nĩkũrema maaremeire Ngai,
8 o ta ũrĩa kwandĩkĩĩtwo atĩrĩ, “Ngai nĩatũmire meciiria na ngoro ciao iriite, na nginya ũũmũũthĩ maitho maao mationaga, na matũ maao matiiguaga.”
9 O naake Daudi nĩoigire atĩrĩ:
“Maruga maao marotuĩka mĩtego ya kũmanyiitaga;
marogũaga na maherithagio!
10 Maitho maao marogia nduma matige gũcooka kuona;
marotũũra mahinyĩrĩirio nĩ mathĩĩna matukũ maao moothe.”
11 Ngũkĩũria atĩrĩ: Ayahudi nĩkũhĩngwo maahĩngirwo nĩguo magũe? Aaca o na haniini! Ũrĩa kũhaana nĩ atĩrĩ, tondũ wa meehia maao, ũhonokio nĩwakinyĩire andũ a Ndũũrĩrĩ nĩ geetha ũndũ ũcio ũiguithie Ayahudi ũiru.
12 Meehia ma Ayahudi nĩmareehithĩirie andũ a thĩ yothe iraathimo nyingĩ, na gũthĩĩna ngoro kwao gũkareehere andũ a Ndũũrĩrĩ iraathimo nyingĩ. Angĩkorwo nĩ ũguo-rĩ, iraathimo igaagĩkorwo ciigana atĩa hiihi rĩrĩa Ayahudi oothe magaakorwo ho!
Kũhonokio kwa andũ a Ndũũrĩrĩ
13 Rĩu-rĩ, nĩ inyuĩ andũ a Ndũũrĩrĩ ndĩraarĩria: Rĩrĩa rĩothe ngũkorwo ndĩ mũtũmwo kũrĩ andũ a Ndũũrĩrĩ nĩndĩĩkagĩrĩra wĩra wakwa mũno
14 nĩ geetha ndũme andũ a rũũrĩrĩ rwakwa, nĩ o Ayahudi, maigue ũiru, na njĩra ĩyo ndĩkĩhonokie amwe aao.
15 Tondũ angĩkorwo kũregwo kwao nĩkuo gwatũmire andũ a thĩ yothe macookanwo na Ngai-rĩ, gwĩtĩkĩrwo kwao gwatuĩka kũriũka kuuma kwa arĩa akuũ!
16 Angĩkorwo kĩenyũ kĩa mbere kĩa mũgate kĩrĩa kĩrutĩirwo Ngai nĩ gĩtheru, o na mũgate wothe nĩ mũtheru; o naguo mũri wa mũtĩ ũngĩkorwo nĩ mũtheru, o na honge nacio no theru.
17 Atĩrĩĩrĩ, honge imwe cia mũtamaiyũ wa mũgũnda nĩitinĩĩtio, nacio thuuna cia mũtamaiyũ wa gĩthaka igaciarithanio naguo. Inyuĩ andũ a Ndũũrĩrĩ mũhaana mũtamaiyũ ũcio wa gĩthaka, na rĩu nĩmũnyiitanĩire na Ayahudi mũtũũrĩre wao wa goro wa kĩĩroho.
18 Kwoguo gĩtigeei kũnyarara acio maatinirio ta honge. Mũngĩgĩĩtĩĩa atĩa? Inyuĩ mũrĩ o honge; ti inyuĩ mũnyiitĩrĩire mĩri, mĩri nĩ yo ĩmũnyiitĩrĩire.
19 No inyuĩ no muuge atĩrĩ, “Honge nĩciatinirio nĩ geetha niĩ njiarithanio na mũtĩ.”
20 Ũguo noguo; honge icio ciatinirio nĩ ũndũ wacio kwaga gwĩtĩkia, no wee ũrũmĩĩtio ho nĩ ũndũ wa gwĩtĩkia. Ndũgaagĩĩtĩĩe; wĩtigĩre arĩ guo.
21 Amu angĩkorwo Ngai ndacaaĩire honge cia mbere cia mũtĩ ũcio, o nawe ndagaagũcaaĩra.
22 Ũndũ ũyũ ũgũtuonia ũrĩa Ngai arĩ tha na ũrĩa araakaraga. Araakarĩire arĩa magũĩte agakũiguĩra tha wee, angĩkorwo nĩũgũikara wegainĩ wake. Ũngĩaga gwĩka ũguo, o nawe no ũgũtinio.
23 O nao Ayahudi mangĩtiga gũthiĩ na mbere na ũhoro ũcio wao wa kwaga gwĩtĩkia, no maciarithanio o rĩngĩ; nĩ gũkorwo Ngai arĩ na hinya wa gwĩka ũguo.
24 Inyuĩ andũ a Ndũũrĩrĩ mũhaana rũhonge rwa mũtamaiyũ wa gĩthaka rũtinĩĩtio, rũgacooka rũgaciarithanio na njĩra ĩtarĩ ya ndũire na mũtamaiyũ wa mũgũnda. Ayahudi nao mahaana mũtamaiyũ ũcio wa mũgũnda, na no ũgĩkorwo ũrĩ ũndũ mũhũthũ mũno harĩ Ngai gũciarithania honge ici ndinie na mũtĩ kĩũmbe o rĩngĩ.
Tha cia Ngai kũrĩ andũ oothe
25 Aariũ na aarĩ a Ithe witũ, nĩngwenda kũmũmenyithia hitho ya ma, nĩguo mũtikeyone ta mũrĩ oogĩ. Hitho ĩyo nĩ atĩ, ũremi wa andũ amwe a Isiraeli ũgũtũũra nginya rĩrĩa andũ a Ndũũrĩrĩ ciothe magooka kũrĩ Ngai.
26 Ũguo nĩguo Aisiraeli oothe makaahonokio, o ta ũrĩa kwandĩkĩĩtwo atĩrĩ:
“Mũhonokia nĩakoima Zayuni,
naake nĩagaathengia waganu wothe njiarwainĩ cia Jakubu.
27 Kĩu nĩkĩo gĩgaatuĩka kĩrĩĩkanĩro gĩakwa nao,
ndarĩĩkia kweheria meehia maao.”
28 Tondũ wa kũrega Ũhoro ũrĩa Mwega Ayahudi nĩmaagĩire ũthũ na Ngai nĩ ũndũ wanyu inyuĩ andũ a Ndũũrĩrĩ. No rĩĩrĩ, tondũ nĩamathuurĩĩte-rĩ, nĩameendeete nĩ ũndũ wa maithe maao.
29 Amu Ngai arĩĩkia gũthuurana na kũraathimana ndacookaga kũgarũrũka.
30 O na inyuĩ andũ a ndũũrĩrĩ mwatũire mũremeire Ngai no rĩu nĩamũiguĩrĩire tha nĩ ũndũ Ayahudi nĩmamũremeire.
31 Ayahudi-rĩ, maremeire Ngai nĩ geetha o nao maiguĩrwo tha o ta ũrĩa na inyuĩ mũiguĩrĩirwo tha.
32 Nĩ gũkorwo Ngai nĩatuĩte andũ oothe aremi, nĩ geetha acooke kũmaiguĩra tha oothe.
Ngai arogoocwo
33 Kaĩ ũtonga wa Ngai nĩ mũingĩ-ĩ! Ĩ ũũgĩ na ũmenyo wake ti mũnene! Nũũ ũngĩhota gũtaarĩria matuĩro maake? Nũũ ũngĩmenya njĩra ciake?
34 O ta ũrĩa kwandĩkĩĩtwo atĩrĩ:
“Nũũ ũũĩ meciiria ma Mwathani?
Nũũ ũngĩhota kũmũtaara?
35 Nũũ ũrĩ wamũhe kĩndũ atĩ nĩguo acooke arĩhwo nĩ we?”
36 Indo ciothe ciombirwo nĩ we, na nĩ we ũcitũũragia nĩ ũndũ wake mwene. Ngai arogoocagwo tene na tene! Ameni.