1 Kuuma kũrĩ niĩ, Paũlũ, ndungata ya Kristũ Jesũ, o niĩ njĩtĩĩtwo nduĩke mũtũmwo na ngaamũrwo heanage Ũhoro ũrĩa Mwega wa Ngai.
2 Ũhoro ũrĩa Mwega weranĩirwo o tene nĩ Ngai na tũnua twa anabii thĩinĩ wa Maandĩko Matheru.
3 Ũhoro ũcio nĩ wa Mũrũ wa Ngai, Jesũ Kristũ Mwathani witũ, ũrĩa ta mũndũ waciarĩĩtwo kuuma njiarwainĩ cia Daudi.
4 Nĩacookire akĩonanio na hinya mũnene atĩ aarĩ Mũrũ wa Ngai na ũndũ wa kũriũkio kuuma kũrĩ arĩa akuũ.
5 Nĩ ũndũ wake Ngai nĩandaanahĩire akĩĩndua mũtũmwo wa gũtungatĩra Kristũ nĩ geetha ndũme andũ a ndũũrĩrĩ ciothe meetĩkie na maathĩke.
6 O na inyuĩ mũrĩ amwe a andũ acio, arĩa Ngai eetĩĩte matuĩke a Jesũ Kristũ.
7 Ndĩramwandĩkĩra marũa maya inyuothe mwĩ kũu Roma, o inyuĩ mwendeetwo mũno nĩ Ngai, akamwĩta mũtuĩke andũ aake kĩũmbe.
Wega na thaayũ wa Ngai Ithe witũ o na wa Mwathani Jesũ Kristũ irogĩa na inyuĩ.
Paũlũ kwĩrirĩria gũceera Roma
8 Atĩrĩĩrĩ, nĩngũcookeria Ngai wakwa ngaatho ndĩ thĩinĩ wa Jesũ Kristũ nĩ ũndũ wanyu inyuothe, tondũ ũhoro wa wĩtĩkio wanyu nĩũkinyĩire andũ oothe.
9 Ngai ũrĩa ndungatagĩra na ngoro yakwa yothe na ũndũ wa kũhunjia Ũhoro ũrĩa Mwega wa Mũũrũwe nĩ mũira wakwa atĩ nĩndĩmũririkanaga hĩndĩ ciothe mahooyainĩ maakwa.
10 Nĩnjũũragia Ngai atĩ angĩtĩkĩra ahotithie njũke ndĩmũceerere kũu kwanyu
11 nĩ ũndũ nĩngoragwo ndĩrirĩirie mũno tuonane, ndĩmũgaĩre kĩheeo gĩa kĩĩroho nĩguo mũgĩe na hinya.
12 Ũrĩa ndĩrenda kuuga nĩtũteithanie; inyuĩ mũteithio nĩ wĩtĩkio wakwa, na niĩ ndeithio nĩ wĩtĩkio wanyu.
13 Aariũ na aarĩ a Ithe witũ, nĩngwenda mũmenye atĩ ndaneenda kũmũceerera kaingĩ, no harĩ ũndũ ũtũire ũngiragĩrĩria gwĩka ũguo. Nyendaga kũmũceerera nĩguo ngĩe na arũmĩrĩri gatagatĩinĩ kaanyu, o ta ũrĩa ngĩĩte nao gatagatĩinĩ ka andũ arĩa angĩ a Ndũũrĩrĩ.
14 Atĩrĩĩrĩ, nĩngũigua ndĩ na thiirĩ harĩ andũ oothe; arĩa mathiĩte na mbere na arĩa matathiĩte na mbere, arĩa athoomu na arĩa ahũhũũtĩki.
15 Nĩ ũndũ ũcio nĩndĩriragĩria kũhunjia Ũhoro ũrĩa Mwega kũrĩ o na inyuĩ arĩa mũtũũraga Roma.
Hinya wa Ũhoro ũrĩa Mwega
16 Nĩndĩhokeete o biũ Ũhoro ũrĩa Mwega; amu nĩguo hinya wa Ngai wa kũhonokia arĩa oothe meetĩkĩĩtie, Ayahudi o na andũ a Ndũũrĩrĩ.
17 Nĩ ũndũ Ũhoro Mwega nĩwonanĩĩtie ũrĩa Ngai areehage ũiguano gatagatĩ gaake na andũ, na nĩ ũndũ wa wĩtĩkio kuuma kĩambĩrĩria nginya kĩrĩĩkĩro, o ta ũrĩa kwandĩkĩĩtwo atĩrĩ, “Mũndũ ũrĩa ũiguithanĩĩtio egũtũũra muoyo nĩ ũndũ wa gwĩtĩkia.”
Wĩhia wa andũ
18 Maraakara ma Ngai nĩmaguũrie kuuma igũrũ mookĩrĩre wĩhia wothe na waganu wa andũ arĩa mĩtugo yao mĩũru ĩgiragia ũhoro wa ma ũmenyeke.
19 Mekũherithio nĩ Ngai nĩ ũndũ nĩmooĩ wega maũndũ marĩa maagĩrĩirwo nĩkũmenya makoniĩ Ngai; Ngai we mwene nĩ we ũmamenyithĩĩtie.
20 Kuuma o rĩrĩa thĩ yombirwo mũhianĩre wake ũrĩa ũtoonekaga, na nĩguo hinya wake mũnene ũrĩa ũtathiraga o na ũngai wake, nĩcionanĩĩtio wega thĩinĩ wa indo iria oombire. Nĩ ũndũ ũcio gũtirĩ mũndũ wĩ na kĩĩgwatio!
21 O na gũtuĩka nĩmooĩ Ngai, matimũheaga gĩtĩĩo kĩrĩa aagĩrĩirwo nĩkũheeo, kana makamũcookeria ngaatho. Handũ ha gwĩka ũguo-rĩ, gwĩciiria na gwĩcũũrania kwao gũtuĩkĩĩte gwa tũhũ, nacio ngoro ciao ikaiyũra nduma.
22 Meĩraga atĩ nĩ oogĩ no matuĩkĩĩte o irimũ,
23 na handũ ha gũthaathaiya Ngai ũrĩa mũtũũra muoyo, mathaathayagia mĩhianano ĩthondekeetwo ĩhaana andũ arĩa makuaga, kana nyoni, kana nyamũ cia magũrũ mana, o na kana nyamũ iria itambaga.
24 Nĩ ũndũ ũcio Ngai nĩamatiganĩirie meekage maũndũ mooru marĩa ngoro ciao ciĩriragĩria, o na meekage mũndũ na ũrĩa ũngĩ maũndũ ma ũũra thoni.
25 Makũũranagia ũhoro wa ma wa Ngai na maheeni; mathaathayagia na magatungata indo iria Ngai oombire handũ ha mũciũmbi we mwene, ũrĩa wagĩrĩirwo nĩkũgoocagwo nginya tene na tene! Ameni!
26 Kwoguo Ngai nĩamatiganĩirie meekage ciĩko cia ũũra thoni. Atumia aao magarũraga mĩtugo ya ndũire ũhoroinĩ wao wa gũkoma na athuuri aao, mageekaga maũndũ matarĩ ma ndũire.
27 O nao arũme matigaga mĩtugo yao ya ndũire ũhoroinĩ wao wa gũkoma na atumia aao makahĩahĩaga gũkomania o eene. Arũme meekaga maũndũ ma ũũra thoni, mũndũ na ũrĩa ũngĩ naguo waganu ũcio ũkamareehere iherithia rĩrĩa rĩmaagĩrĩire nĩ ũndũ wa kwagana ta ũguo.
28 Ngai nĩarekereirie andũ acio meciiriainĩ mooru na mĩtugoinĩ mĩũru tondũ matiendaga kũmũmenya.
29 Maiyũirwo nĩ waganu wa mĩthemba yothe, ũũru, ũkoroku, ngũĩ, ũiru, ũũragani, haaro, maheeni, na wĩĩ. Nĩ acuukani
30 na acambania; nĩmathũire Ngai, nĩ arumani, etĩĩi, na egaathi; meciiragia o ũrĩa mangĩĩka ũũru; matiathĩkagĩra aciari aao;
31 nĩ akĩĩgu; ti ehokeku, matiihingagia ũrĩa marĩĩkanĩire na andũ arĩa angĩ, na matirĩ tha.
32 Nĩmooĩ o wega atĩ watho wa Ngai uugĩĩte arĩa meekaga maũndũ ta macio maagĩrĩirwo no kũũragwo; no rĩĩrĩ, o mathiaga o na mbere kũmeeka, o na makagaathĩrĩria arĩa angĩ meekaga maũndũ ta macio.