Wĩhia wa Nadabu na Abihu
1 Na rĩĩrĩ, Nadabu na Abihu, aariũ a Harũni, makĩoya o mũndũ kanyũngũ ga gũcinĩra ũbaani, magĩtwĩkĩra mwaki, makĩigĩrĩra ũbaani igũrũ waguo, makĩũtwara mbere ya MWATHANI. No rĩĩrĩ, mwaki ũcio ndwarĩ mũtheru nĩ ũndũ MWATHANI ndaamaathĩĩte meeke ũguo.
2 Tondũ ũcio MWATHANI akĩrekia mwaki o rĩmwe, ũkĩmacina, magĩgĩkuĩra o hau mbere ya MWATHANI.
3 Hĩndĩ ĩyo Musa akĩĩra Harũni atĩrĩ, “Ũndũ ũyũ nĩguo MWATHANI aaragia ũhoro waguo rĩrĩa oigire atĩrĩ, ‘Arĩa oothe maandungataga no nginya maheage ũtheru wakwa gĩtĩĩo; na nĩndĩrĩonagia andũ aakwa riiri wakwa.’ ”No Harũni ndaigana kuuga ũndũ o na ũmwe.
4 Naake Musa agĩĩta Mishaeli na Elizafani, aariũ a Uzieli, ithe mũnyiinyi wa Harũni, akĩmeera atĩrĩ, “Ũkaai haaha muoe ciimba ici cia aariũ a ithe wanyu mũcieherie Hemainĩ ĩno nyamũre, mũcitware na nja ya kambĩ.”
5 Tondũ ũcio magĩũka magĩcioya irĩ o na nguo ikinyĩĩte maruinĩ maacio, magĩcitwara na nja ya kambĩ, o ta ũrĩa Musa aathanĩĩte.
6 Musa agĩcooka akĩĩra Harũni na aariũ aake Eleazaru na Ithamaru atĩrĩ, “Mũtikaareke njuĩrĩ cianyu ciikare ihumbũrĩĩtio, kana mũtembũrange nguo cianyu nĩguo muonanie atĩ nĩgũcakaya mũracakaya. Mũngĩĩka ũguo, no mũgũkua, na MWATHANI nĩekũraakarĩra andũ aya oothe. No rĩĩrĩ, Aisiraeli arĩa angĩ oothe nĩmeetĩkĩrĩĩtio gũcakaĩra ikuũ ici cionekeete na ũndũ wa mwaki ũrĩa MWATHANI arekeetie.
7 Na mũtigaakĩre mũromo wa Hema ya gũtũnganwo muume na nja; mweka ũguo no mũgũkua, nĩ ũndũ nĩmũrĩkĩĩtie gũitĩrĩrio maguta ma MWATHANI mũkaamũrwo.” Nao magĩgĩĩka o ta ũrĩa Musa oigire.
Mawatho ma kũrũmĩrĩrwo nĩ athĩnjĩri Ngai
8 Naake MWATHANI akĩĩra Harũni atĩrĩ,
9 “Wee mwene o na aariũ aaku mũtikaanatoonye Hemainĩ ya gũtũnganwo mũnyuĩte ndibei kana njoohi; mũngĩgeeka ũguo no mũgaakua. Ũndũ ũcio nĩ watho ũrĩa njiarwa cianyu ciothe ciagĩrĩirwo nĩkũrũmagĩrĩra hĩndĩ ciothe.
10 No nginya mũkũũranage indo iria ciamũrĩirwo MWATHANI na iria cia kũhũthĩrwo nĩ mũndũ o wothe, o na iria itarĩ mũgiro na iria irĩ mũgiro.
11 Ningĩ no mũhaka mũrutage andũ a Isiraeli mawatho moothe marĩa ndĩmũheete hũthĩrĩĩte Musa.”
12 Naake Musa akĩĩra Harũni, na aariũ aake Eleazaru na Ithamaru arĩa maatigarĩĩte atĩrĩ, “Oyai mũtu ũrĩa ũtigarĩĩte wa igongoona rĩu rĩa mũtu rĩrĩa rĩrutĩirwo MWATHANI na ũndũ wa gũcinwo, mũthondeke mĩgate ĩtarĩ mĩĩkĩre ndaawa ya kũimbia, mũmĩrĩĩre hakuhĩ na kĩgongoona, nĩ ũndũ mĩgate ĩyo nĩ mĩtheru mũno.
13 Mĩrĩreei handũ hatheru nĩ gũkorwo nĩ yo wee mwene o na aariũ aaku mwagĩrĩirwo nĩkũheagwo kuuma magongoonainĩ marĩa marutĩirwo MWATHANI na ũndũ wa gũcinwo. Ũguo nĩguo MWATHANI anjathĩĩte.
14 No rĩĩrĩ, wee mwene o hamwe na andũ a mũciĩ waku no mũrĩe gĩthũri o na kũgũrũ gwa thuutha iria irutĩirwo MWATHANI irĩ igongoona rĩa mwanya o na kĩheeo kĩa mwanya kũrĩ MWATHANI, o iria irĩheagwo athĩnjĩri Ngai. Mwahota kũrĩĩra nyama icio handũ o hoothe hatarĩ na thaahu. Indo icio nĩcio ũheetwo wee mwene o hamwe na mũciĩ waku ituĩke igai rĩaku kuuma magongoonainĩ ma thaayũ ma andũ a Isiraeli.
15 Marĩreehage kũgũrũ kũu gwa thuutha na gĩthũri hĩndĩ ĩrĩa maguta mararutwo marĩ kĩheeo kĩa mwanya kũrĩ MWATHANI. Icunjĩ icio cia nyama igũtũũra irĩ ciaku na ciana ciaku hĩndĩ ciothe, o ta ũrĩa MWATHANI aathanĩĩte.”
16 Musa agĩcooka akĩũria ũhoro wa mbũri ya igongoona rĩa meehia, akĩmenya atĩ nĩyarĩĩkĩĩtie gũcinwo. Ũndũ ũcio ũgĩgĩtũma araakarĩre Eleazaru na Ithamaru, akĩmooria atĩrĩ,
17 “Nĩkĩ kĩgiririe mũrĩĩre igongoona rĩa meehia handũ haamũre? Igongoona rĩu nĩ rĩtheru mũno, narĩheanĩĩtwo kũrĩ inyuĩ nĩ MWATHANI nĩ geetha mũkuuage meehia ma andũ oothe namũhorohagĩrie meehia maao.
18 Thakame yarĩo ndĩnatwarwo thĩinĩ wa Hema ĩrĩa nyamũre; nĩ ũndũ ũcio, mũkwagĩrĩirwo nĩkũrĩĩra igongoona rĩu o handũ hau haamũre, o ta ũrĩa ndaathanire.”
19 Naake Harũni agĩcookeria Musa atĩrĩ, “Ũũmũũthĩ nĩguo andũ marutĩire MWATHANI igongoona rĩao rĩa meehia, o na mamũrutĩra igongoona rĩao rĩa njino; o na kũhaana ũguo-rĩ, maũndũ macio mooru ũguo no mangoreete. Rĩu-rĩ, korwo nĩngũkĩrĩĩte igongoona rĩa meehia ũũmũũthĩ-rĩ, ũndũ ũcio nĩũngĩgĩkenirie MWATHANI?”
20 Rĩrĩa Musa aiguire ũhoro ũcio-rĩ, akĩiganĩra.