Ũrĩa Ngai athaathayagio gũũkũ thĩ na igũrũ
1 Rĩu-rĩ, kĩrĩĩkanĩro kĩrĩa kĩa mbere nĩkĩarĩ na mawatho maakoniĩ ũrĩa kũrĩthaathayagio o hamwe na handũ haakĩĩtwo nĩ andũ ha gũthaathaĩria Ngai.
2 Amu nĩkwarĩ na Hema, na mwena wa nja ya yo nĩhathondekeetwo wega handũ harĩa haigagwo mũtĩ wa gũcuuria mataawa o na meetha ya mĩgate ya kũrutĩrwo Ngai, na hau nĩ ho heetagwo Handũ Harĩa Hatheru.
3 Na ho thuutha wa gĩtambaya gĩa keerĩ, o kũu Hema thĩinĩ, nĩhaarĩ Hema ĩĩtagwo, “Handũ Harĩa Hatheru Mũno.”
4 Hau thĩinĩ nĩ ho haarĩ kĩgongoona gĩa thahabu na nĩ ho haacinagĩrwo ũbaani, na no ho haarĩ Ithandũkũ rĩa Kĩrĩĩkanĩro rĩrĩa rĩahumbĩrĩĩtwo na thahabu mĩena yothe. Thĩinĩ wa Ithandũkũ rĩu gwakoragwo kanyũngũ ga thahabu gekĩrĩĩtwo mana, mũthĩĩgi wa Harũni ũrĩa wathundũkĩĩte mathangũ, na ihengere iria igĩrĩ ciandĩkĩĩtwo maathani.
5 Igũrũ wa Ithandũkũ rĩu nĩhaarĩ ciũmbe iria irĩ mathagu cia kuonania riiri wa Ngai, namo mathagu maacio maahumbĩrĩĩte handũ harĩa meehia moohanagĩrwo. Rĩu-rĩ, tũtiihota gũtaarĩria wega wa kĩndũ o kĩndũ.
6 Ũguo nĩguo indo ciakoragwo ciigĩĩtwo. Nao athĩnjĩri Ngai nĩmaakĩingĩraga Hemainĩ ĩyo ya na nja mũthenya o mũthenya makaruta wĩra wao wa ũtungatĩri.
7 Ĩndĩ no Mũthĩnjĩri Ngai Ũrĩa Mũnene watoonyaga Hemainĩ ĩyo ĩngĩ ya keerĩ, na aatoonyaga kuo riita o rĩmwe mwaka. Akĩingĩra kuo aathiaga akuuĩĩte thakame akamĩruta igongoona nĩ ũndũ wa meehia maake we mwene o na ma andũ.
8 Ũndũ ũyũ nĩguo Roho Mũtheru aamenyithanagia naguo atĩ rĩrĩa rĩothe Hema ĩyo ya na nja ĩ ho, njĩra ya kũingĩra Handũ Harĩa Hatheru Mũno ndĩarĩ hingũre.
9 Ĩyo nĩ ngerekano ya mahinda maya tũrĩ, na ĩkuonania atĩ iheeo na magongoona ma nyamũ marĩa maarutagĩrwo Ngai matingĩhota gũtũma thamiri ya mũndũ ũrĩa ũthaathayagia Ngai ĩkorwo ĩtarĩ na ũcuuke.
10 Tondũ magongoona macio makoragwo makonainie na ũhoro wa indo cia kũrĩa na kũnyua, o na magongoona ma gwĩtheria. Maũndũ macio makoniĩ o ũhoro wa mwĩrĩ na maathanĩĩtwo meekagwo nginya hĩndĩ ĩrĩa Ngai akeerũhia maũndũ moothe.
11 Ĩndĩ Kristũ ookire arĩ Mũthĩnjĩri Ngai Ũrĩa Mũnene wa maũndũ meega marĩa tũkoreetwo twĩ namo rĩu. Hema ĩrĩa atungataga nĩ nene o na njagĩrĩru mũno makĩria. Hema ĩyo ndĩthondekeetwo na mooko ma andũ, na ũguo nĩkuuga atĩ ti ya mũũmbĩre wa gũũkũ thĩ.
12 Kristũ aatoonyire hemainĩ ĩyo nginya Handũ Harĩa Hatheru Mũno riita o rĩmwe rĩa kũigana. We ndatoonyire akuuĩĩte thakame ya thenge na ya ndeegwa, no aatoonyire akuuĩĩte thakame yake we mwene, na kwoguo agĩtũma tũgĩe na gũkũũrwo gwa tene na tene.
13 Amu angĩkorwo arĩa me na thaahu maaminjĩrio thakame ya thenge na ya ndeegwa o hamwe na mũhu wa moori ĩcinĩĩtwo nĩ cia matheragia na ĩgathaahũra mĩĩrĩ yao-rĩ,
14 githĩ thakame ya Kristũ ũrĩa ũtaarĩ na kaũũgũ na werutĩire Ngai ahotithĩĩtio nĩ Roho wa tene na tene wa Ngai, ndĩgĩgĩtheria thamiri ciitũ mawaganu igĩtuĩke cia gũtungatagĩra Ngai ũrĩa ũrĩ muoyo?
15 Kwoguo Kristũ nĩ we mũiguithania wa kĩrĩĩkanĩro kĩerũ, nĩ geetha arĩa oothe meetĩĩtwo nĩ Ngai makaamũkĩra iraathimo cia tene na tene iria Ngai aamerĩire. Ũndũ ũcio wĩkĩkaga nĩ tondũ nĩhakoreetwo na gĩkuũ kĩrĩa gĩkũũraga andũ kuuma meehiainĩ marĩa meekire hingo ĩrĩa maathagwo nĩ kĩrĩĩkanĩro kĩa mbere.
16 Ha ũhoro wa kwĩgaya, nĩkwagĩrĩire gũtuĩrio kũmenyeke wega atĩ ũrĩa wĩgaĩĩte nĩakuĩte.
17 Amu kwĩgaya gũtirĩ bata rĩrĩa rĩothe ũrĩa wĩgaĩĩte arĩ muoyo; ĩndĩ indo igayanagwo arĩĩkia gũkua.
18 Kwoguo o nakĩo kĩrĩĩkanĩro kĩa mbere gĩtingĩagĩire na hinya hatarĩ thakame.
19 Nĩ ũndũ-rĩ, Musa arĩĩkia kũhe andũ oothe maathani moothe marĩa marĩ ibukuinĩ rĩa Watho, aacookire akĩoya thakame ya ndeegwa na ya thenge, o hamwe na maaĩ, na guoya mũtuune, na kamũtĩ ka hithobu, akĩminjaminjĩria ibuku rĩa Watho, o na andũ oothe,
20 akiugaga atĩrĩ, “Ĩno nĩ yo thakame ya kũrũmia kĩrĩĩkanĩro kĩrĩa Ngai amwathĩĩte mwathĩkagĩre.”
21 Naake agĩcooka akĩminjaminjĩria Hema thakame ĩyo, o na indo ciothe iria itũmagĩrwo gũthaathaiya Ngai.
22 Kũringana na Watho, hakuhĩ indo ciothe ituagwo theru na thakame, na kũngĩaga gũitwo thakame gũtingĩgĩa na kuoherwo kwa meehia.
Igongoona rĩa Kristũ nĩrĩniinaga meehia
23 Kwoguo nĩkwarĩ na bata indo iria ciahuananĩĩtio na iria irĩ igũrũ itherio na magongoona o ta macio. No rĩĩrĩ, indo iria irĩ igũrũ cio nyene ciabataire gũtherio na magongoona meega gũkĩra macio.
24 Atĩrĩĩrĩ, handũ harĩa Kristũ aatoonyire ti Handũ Harĩa Hatheru hathondekeetwo na mooko ma andũ, harĩa haahaananĩĩtio na handũ harĩa ha ma. We aatoonyire Ikenero kuo kwene, kũrĩa rĩu arũũgamĩĩte handũ haitũ mbere ya Ngai.
25 Kristũ ndatoonyire Handũ Harĩa Hatheru Mũno kwĩĩruta maita maingĩ ta ũrĩa Mũthĩnjĩri Ngai Ũrĩa Mũnene hĩndĩ ya tene aatoonyaga kuo riita rĩmwe o mwaka akuuĩĩte thakame ĩtarĩ yake,
26 amu korwo ũguo nĩguo gwatariĩ angĩtũũraga anyariiragwo maita maingĩ kuuma rĩrĩa thĩ yombirwo. No rĩĩrĩ, ũrĩa kũrĩ nĩ atĩ mahindainĩ maya ma mũthia, Kristũ ookire hĩndĩ ĩmwe ya kũigana, agĩkĩĩruta igongoona we mwene rĩa gũtũma andũ mooherwo meehia maao.
27 O ta ũrĩa kũrĩ, mũndũ o wothe akuuaga riita o rĩmwe, na thuutha wa ũguo agatuĩrwo nĩ Ngai.
28 Ũguo no taguo o naake Kristũ aarutirwo igongoona riita o rĩmwe nĩguo athengie meehia ma andũ aingĩ. Na rĩĩrĩ, nĩagooka riita rĩa keerĩ, no ti gũtũma andũ mooherwo meehia, no nĩkũhonokia andũ arĩa matũũraga mamwetereire.