Njiarwa cia Juda
1 Ici nĩcio njiarwa imwe cia Juda: Perezu, Hezironi, Karimi, Huru na Shobali.
2 Shobali aarĩ ithe wa Reaia, Reaia aarĩ ithe wa Jahathu, Jahathu aarĩ ithe wa Ahumai na Lahadi, arĩa maarĩ maithe ma andũ arĩa maatũũraga Zora.
3-4 Huru aarĩ irigithaathi rĩa mũtumia wa Kalebu ũrĩa wetagwo Efiratha. Huru aarĩ ithe wa aariũ atatũ: Etamu, Penueli na Ezeri. Acio nĩ o maambĩrĩirie itũũra rĩa Bethilehemu. Naake Atamu aarĩ ithe wa aariũ atatũ: Jezireeli, Ishima na Idibasha. Ningĩ nĩarĩ na mũirĩĩtu wetagwo Hazeleliponi. Penueli nĩ we wambĩrĩirie itũũra rĩa Gedori, naake Ezeri akĩambĩrĩria itũũra rĩa Husha.
5 Naake Ashuru, ũrĩa wambĩrĩirie itũũra rĩa Tekoa, aarĩ na atumia eerĩ, Hela na Naara.
6 Aariũ arĩa aaciarire me na Naara maarĩ ana: Ahuzamu, Heferi, Temeni, na Haahashatari.
7 Nao aariũ arĩa aaciarire me na Hela maarĩ atatũ: Zerethu, Iziharu, na Ethinani.
8 Kozu aarĩ ithe wa Anubu na Zobeba, na no we warĩ kĩhumo kĩa mbarĩ cia Ahariheli mũrũ wa Harumu.
9 Na rĩĩrĩ, kwarĩ mũndũ wetagwo Jabezu waheetwo gĩtĩĩo gũkĩra andũ arĩa angĩ a mũciĩ wao. Nyina aamũheire rĩĩtwa rĩu tondũ aamũciarire na ruwo rũnene mũno.
10 Na rĩĩrĩ, Jabezu akĩhooya Ngai wa Isiraeli atĩrĩ, “Ndagũthaitha Ngai ũndaathime na ũhe bũrũri mũnene. Ikaranagia na niĩ na ũngitagĩre ndikaanoone ũndũ o na ũrĩkũ ũngĩnjiguithia ruwo.” Naake MWATHANI akĩmũcookeria mahooya maake akĩmũhe kĩrĩa aahoeete.
Mĩtaratara ya mbarĩ ingĩ
11 Na rĩĩrĩ, Kalebu mũrũ wa nyina na Shuha aarĩ ithe wa Mehiru, naake Mehiru aarĩ ithe wa Eshitoni.
12 Eshitoni aarĩ ithe wa aariũ atatũ: Bethirafa, Pasea, na Tehina. Tehina nĩ we wambĩrĩirie itũũra rĩa Nahashu. Njiarwa cia andũ acio ciatũũraga Reka.
13 Kenazi aarĩ ithe wa Othinieli na Seraia. Naake Othinieli aarĩ ithe wa Hathathu na Meonothai
14 Naake Meonothai aarĩ ithe wa Ofira.
Naake Seraia aarĩ ithe wa Joabu, ũrĩa wambĩrĩirie gĩtuamba gĩa Aturi, na andũ aakĩo oothe maarĩ njoorua cia gũtura.
15 Kalebu mũrũ wa Jefune aarĩ ithe wa aariũ atatũ: Iru, Ela, na Naamu. Naake Ela aarĩ ithe wa Kenazi.
16 Naake Jehaleleli aarĩ ithe wa aariũ ana: Zifu, Zifa, Tiria, na Asareli.
17-18 Ezira aarĩ ithe wa aariũ ana: Jetheru, Meredi, Eferi na Jaloni. Naake Meredi akĩhikia mwarĩ wa mũthamaki wa Misiri wetagwo Bithia magĩciara mũirĩĩtu wetagwo Miriamu na aanake eerĩ, Shamai na Ishiba. Naake Ishiba nĩ we wambĩrĩirie itũũra rĩa Eshitemoa. Ningĩ Meredi akĩhikia mũtumia ũngĩ wa kuuma mũhĩrĩga wa Juda na magĩciara aariũ atatũ: Jeredi, ũrĩa wambĩrĩirie itũũra rĩa Gedori, Heberi, ũrĩa wambĩrĩrie itũũra rĩa Soko, na Jekuthieli ũrĩa wambĩrĩirie itũũra rĩa Zanoa.
19 Naake Hodia akĩhikia mwarĩ wa nyina na Nahamu. Acio nĩ o maarĩ kĩhumo kĩa njiarwa cia mbarĩ ya Agarimu arĩa maatũũraga itũũra rĩa Keila, na mbarĩ ya Amaakathi arĩa matũũraga itũũra rĩa Eshitemoa.
20 Shimoni aarĩ ithe wa aariũ ana: Amunoni, Rina, Benihanani, na Tiloni.
Ishi aarĩ ithe wa aariũ eerĩ: Zohethu na Benizohethu.
Njiarwa cia Shela
21 Njiarwa cia Shela mũrũ wa Juda nĩ: Eri ũrĩa wambĩrĩirie itũũra rĩa Leka, na Laada ũrĩa wambĩrĩirie itũũra rĩa Maresha o na mbarĩ ya arĩa maathondekaga nguo cia gataani arĩa maatũũraga itũũra rĩa Bethi Ashibea;
22 Jokimu na andũ arĩa maatũũraga itũũra rĩa Kozeba, Joashu, na Sarafi ũrĩa wahikirie atumia Amoabi na agĩcooka agĩtũũra Bethilehemu. (Maũndũ maya nĩ ma tene mũno.)
23 Andũ acio moombagĩra mũthamaki indo cia rĩũmba na maikaraga Netaimu na Gedera.
Njiarwa cia Simeoni
24 Simeoni aarĩ ithe wa aariũ ataano: Nemueli, Jamini, Jaribu, Zera, na Shaulu.
25 Shaulu aarĩ ithe wa Shalumu, naake Shalumu aarĩ ithe wa Mibisamu, naake Mibisamu aarĩ ithe wa Mishima.
26 Naake Mishima aarĩ ithe wa Hamueli, naake Hamueli aarĩ ithe wa Zakuru, naake Zakuru aarĩ ithe wa Shimei.
27 Naake Shimei aarĩ ithe wa aariũ ikũmi na atandatũ na airĩĩtu atandatũ. No rĩĩrĩ, andũ a nyũmba yao matiaciarire ciana nyingĩ, naguo mũhĩrĩga wa Simeoni ndũigana kuongerereka ta wa Juda.
28 Nacio njiarwa icio o nginyagia matukũinĩ ma mũthamaki Daudi ciatũũraga matũũrainĩ maya: Beerisheba, Molada, Hazarishuali,
29 Biliha, Ezemu, Toladi,
30 Bethueli, Horima, Zikilagi,
31 Bethi Marikabothu, Hazarisusimu, Bethibiri, na Shaaraimu.
32 Hamwe na matũũra macio nĩkwarĩ na mangĩ mataano kũrĩa ciatũũraga, namo nĩ: Etamu, Aini, Rimoni, Tokeni, na Ashani,
33 na tũtũũra tũrĩa twathiũrũrũkĩirie mĩciĩ ĩyo o nginya Baalathu. Macio nĩ mo matũũra marĩa ciatũũraga na maandĩkĩĩtwo o hamwe na mĩciĩ yao.
34-38 Aya nao nĩ o atongoria a mbarĩ ciao: Meshobabu, Jamuleki, Joshahu mũrũ wa Amazia, Joeli na Jehu (mũrũ wa Joshibia, mũrũ wa Seraia, mũrũ wa Asieli), Elioenai, Jaakoba, Jeshohaia, Asaia, Adieli, Jesimieli, Benaia na Ziza (mũrũ wa Shifi mũrũ wa Aloni, mũrũ wa Jedaia, mũrũ wa Shimuri, mũrũ wa Shemaia.) Tondũ wa ũrĩa andũ aya mathiaga magĩthegeyaga,
39 magĩkĩhurunjũka na mwena wa ithũĩro magĩkinya hakuhĩ na itũũra rĩa Gerari, nĩguo makarĩithagie ũhiũ wao na mwena wa irathĩro wa gĩtuamba kĩrĩa itũũra rĩu rĩakĩĩtwo.
40 Nao magĩkĩona kũndũ kwarĩ kũnoru gwa kũrĩithio kũu gĩtuambainĩ kĩu, na bũrũri warĩ mwaraganu, ũkahoorera na ũkagĩa na thaayũ. Na rĩĩrĩ, andũ arĩa maatũũraga kuo tene maarĩ njiarwa cia Hamu.
41 Matukũinĩ ma Hezekia mũthamaki wa Juda, andũ acio magweteetwo hau igũrũ, maathiire Gerari, magĩthũũkangia hema na nyũmbacia andũ arĩa maatũũraga kuo. Magĩkĩingata andũ acio, magĩgĩtũũra kuo tondũ kwarĩ kwega gwa kũrĩithagia.
42 Na rĩĩrĩ, andũ angĩ magana mataano (500) a mũhĩrĩga wa Simeoni magĩthiĩ na mwena wa irathĩro magĩkinya Edomu. Nao maatongoreetio nĩ Pelatia, Nearia, Refaia, na Uzieli aariũ a Ishi.
43 Nao makinya kuo makĩuraga Aamaleki arĩa maatigarĩĩte, magĩgĩtũũra kuo, nao matũũraga kuo kinyagia ũũmũũthĩ.