Kũhoota thĩ
1 Mũndũ o wothe wĩtĩkĩĩtie atĩ Jesũ nĩ we Kristũ nĩ mwana wa Ngai; na ũrĩa wendeete mũciari, nĩendeete o na mwana wake.
2 Ũũ nĩguo tũngĩhota kũmenya atĩ nĩtwendeete ciana cia Ngai: nĩkwenda Ngai na gwathĩkagĩra maathani maake.
3 Nĩ amu kwenda Ngai nĩgwathĩkĩra maathani maake, namo maathani maake ti maritũ.
4 Mwana o wothe wa Ngai nĩahootaga thĩ; tũhootaga thĩ na njĩra ya wĩtĩkio witũ.
5 Nũũ ũngĩhoota thĩ? No mũndũ ũrĩa wĩtĩkĩĩtie atĩ Jesũ Kristũ nĩ we Mũrũ wa Ngai.
Ũira ũkoniĩ Jesũ Kristũ
6 Jesũ Kristũ nĩwe mwene wokire na maaĩ ma kĩbatithio gĩake na thakame ya gĩkuũ gĩake. We ndookire na maaĩ me moiki, no ookire na maaĩ na thakame. Roho we mwene nĩ mũira, amu Roho nĩ we ũhoro wa ma.
7 Ũhoro ũyũ ũkoragwo wĩ na aira atatũ, nĩ o:
8 Roho, maaĩ, na thakame. Aira acio atatũ marutaga ũira ũhaanaine.
9 Nĩtwĩtĩkagia ũira wa andũ, no ũira wa Ngai nĩũkoragwo wĩ na hinya mũno makĩria, naake nĩarutĩĩte ũira ũyũ ũkoniĩ Mũũriũ.
10 Kwoguo mũndũ o wothe wĩtĩkagia Mũrũ wa Ngai, nĩakoragwo e na ũira ũcio thĩinĩ wake, no mũndũ o wothe ũteetĩkĩĩtie Ngai nĩamũtuĩte wa maheeni, nĩ amu nĩareganĩĩte na ũira ũrĩa Ngai arutaga wa Mũũriũ wake.
11 Ũira ũcio nĩguo ũyũ: Ngai nĩatũheire muoyo wa tene na tene, na muoyo ũcio ũkoragwo thĩinĩ wa Mũũriũ.
12 Mũndũ o wothe wĩ na Mũũriũ e na muoyo, no mũndũ o wothe ũtarĩ na Mũrũ wa Ngai ndarĩ na muoyo.
Muoyo wa tene na tene
13 Nĩ inyuĩ mwĩtĩkĩĩtie Mũrũ wa Ngai ndĩrandĩkĩra ũhoro ũyũ nĩ geetha mũmenye atĩ mwĩ na muoyo wa tene na tene.
14 Ithuĩ nĩtũkoragwo twĩ na ũũmĩrĩru harĩ Ngai, nĩ ũndũ twĩ na ma atĩ nĩatũiguaga tũngĩmũhooya kũringana na wendi wake.
15 Angĩkorwo nĩtũũĩ na ma atĩ nĩatũiguaga rĩrĩa twamũhooya, nĩtũkĩũĩ atĩ nĩatũheaga kĩrĩa gĩothe twamũhooya.
16 Mũndũ angĩona mũrũ kana mwarĩ wa ithe agĩĩka rĩĩhia rĩtangĩtũma akue, nĩamũhoere na Ngai nĩekũhe mũrũ kana mwarĩ wa ithe ũcio muoyo. Ũndũ ũcio wĩkĩkaga kũrĩ andũ arĩa meehia maao matangĩtũma makue. No nĩkũrĩ rĩĩhia rĩngĩtũma mũndũ akue, na ndinoiga atĩ mũndũ no ahooe nĩ ũndũ wa rĩĩhia ta rĩu.
17 Gwĩka ũndũ o wothe mũũru nĩ meehia, no nĩkũrĩ meehia matangĩtũma mũndũ akue.
18 Nĩtũũĩ atĩ gũtirĩ mwana o na ũmwe wa Ngai ũtũũraga eehagia nĩ tondũ nĩamenyagĩrĩrwo nĩ Mũrũ wa Ngai, na ũrĩa mũũru ndangĩkĩmũhuutia.
19 Ithuĩ nĩtũũĩ atĩ tũrĩ a Ngai, o na akorwo thĩ yothe yathagwo nĩ Ũrĩa Mũũru.
20 Nĩtũũĩ atĩ Mũrũ wa Ngai nĩokĩĩte, na nĩatũheete ũũgĩ wa kũmenya Ngai ũrĩa wa ma. Ithuĩ tũikaraga twĩ thĩinĩ wa Ngai ũrĩa wa ma, o na tũrĩ thĩinĩ wa mũũrũwe Jesũ Kristũ. Ũcio nĩ we Ngai ũrĩa wa ma, na no we muoyo wa tene na tene.
21 Twana twakwa, mwĩmenyerereei ngai cia mĩhianano.