1 Timotheo 5

Kwĩrutĩra nĩ ũndũ wa andũ arĩa meetĩkĩĩtie

1 Atĩrĩĩrĩ, ndũkaanakũũme mũndũ ũrĩa mũkũrũ, kaba ũmũthaithage ta arĩ thooguo, nao andũ arĩa anyiinyi ũmoonage ta arĩ ciana cia maitũguo.

2 Atumia arĩa akũrũ nao ũmoonage ta aamaitũguo, nao arĩa anyiinyi ũmoonage ta aarĩ a maitũguo na ũikarage na mĩtugo yothe ya ũthingu.

3 Atumia arĩa a ndigwa kũna-rĩ, matĩĩage.

4 Mũtumia wa ndigwa angĩkorwo e na ciana kana akorwo e na ciana cia ciana ciake-rĩ, ciana icio nĩirekwo ciĩrute ũrĩa ciagĩrĩirwo nĩgũteithia mĩciĩ ĩrĩa ciumĩĩte kũringana na wĩtĩkio wacio. Cieka ũguo nĩikũrĩha thiirĩ wa aciari acio, tondũ ũguo nĩguo Ngai eendeete.

5 Mũtumia wa ndigwa ũrĩa wĩ wiki biũ na ndarĩ na mũndũ wa kũmũteithia-rĩ, akoragwo erĩgĩrĩire gũteithio nĩ Ngai, na akoragwo agĩthaitha na akĩhooya Ngai ũtukũ na mũthenya.

6 No mũtumia wa ndigwa ũrĩa ũthiaga gwĩkenia na maũndũ mataagĩrĩire akoragwo e mũkuũ, o na angĩkorwo nĩaroneka ta e muoyo.

7 Atĩrĩĩrĩ, athanaga atĩ maũndũ macio meekagwo nĩguo gũtikaanagĩe mũndũ ũkuona me mooru.

8 Mũndũ angĩaga gũteithia andũ aao, na makĩria andũ a mũciĩ kũrĩa oimĩĩte, nĩareganĩĩte na wĩtĩkio, na nĩ mũũru gũkĩra mũndũ ũrĩa ũteetĩkĩĩtie.

9 Mũtumia wa ndigwa ũrĩa wagĩrĩirwo nĩkwandĩkwo mũtaratarainĩ wa atumia a ndigwa nĩ ũrĩa wĩ na mĩaka makĩria ya mĩrongo ĩtandatũ, na akorwo aarĩ mũtumia wa mũthuuri ũmwe,

10 na gũkorwo kwĩ na ũndũ wa kuonania atĩ nĩarĩ na ciĩko njega: ta cia kũrera ciana ciake ũrĩa kwagĩrĩire, kũnyiita andũ ũgeni, kũhooreria andũ arĩa me na kĩeha, o na kwĩrutanagĩria gwĩka gĩĩko o gĩothe kĩega.

11 Atumia a ndigwa arĩa me na mĩaka ĩnyiihĩire mĩrongo ĩtandatũ matiagĩrĩirwo nĩkwandĩkwo mũtaratarainĩ wa atumia a ndigwa, tondũ hĩndĩ ĩrĩa makaagĩa na merirĩria nĩmakeenda kũhika, magĩtigane na Kristũ;

12 hĩndĩ ĩyo nĩmagaatuĩrwo nĩ ũndũ wa kũregana na kĩĩranĩro kĩao kĩrĩa meeranĩire.

13 Ningĩ mangĩandĩkwo mũtaratarainĩ ũcio nĩmegũtuĩka igũũta, andũ a kũũrũũraga mĩciĩ yene, a njuukũ, mũhuuhu, na andũ a kwaragia maũndũ marĩa mataagĩrĩirwo nĩkwaria.

14 Wendi wakwa-rĩ, nĩ atumia acio anyiinyi a ndigwa mahikage, magĩage na ciana, na marorage mĩciĩ yao nĩguo matikaahe thũ ciitũ ihinda rĩa kwaria ũũru igũrũ riitũ.

15 Amu atumia aingĩ a ndigwa nĩmatigĩĩte njĩra ĩrĩa yagĩrĩire, makarũmĩrĩra Caitaani.

16 Na rĩĩrĩ, angĩkorwo mũtumiamwĩtĩkia e na atumia a ndigwa gwake mũciĩ nĩamateithagie. Kanitha nĩũtige kũnengerwo mũrigo ũcio wao, nĩguo ũhote gũteithagia atumia a ndigwa arĩa matarĩ na andũ aao.

17 Nĩkwagĩrĩire atĩ athuuri arĩa matongoragia na njĩra ĩrĩa yagĩrĩire maheagwo mũcaara maita meerĩ, na makĩria arĩa marutaga wĩra na kĩyo wa kũhunjia o na wa kũrutana.

18 Nĩ gũkorwo maandĩko moigaga atĩrĩ, “Ndũkoohe ndeegwa kanua hĩndĩ ĩrĩa ĩkũhũũra ngano” na “Mũruti wa wĩra no mũhaka aheagwo mũcaara wake.”

19 Ndũkaaneetĩkĩre mũthuuri wa kanitha athitangwo tiga o hakorirwo he na aira eerĩ kana atatũ.

20 Andũ arĩa meekaga meehia-rĩ, makaanagie andũ oothe makĩiguaga, nĩguo andũ acio nao metigagĩre.

21 Ndakwĩra na ma ndĩ mbere ya Ngai na ya Kristũ Jesũ na ya araika atheru, atĩ ũhingagie mawatho macio ũtegũthuutũkania na ũtegwĩka ũndũ nĩ ũndũ wa kwenda mũndũ.

22 Ndũkaae kũigagĩrĩra mũndũ mooko na ihenya ũkĩmũtoonyia wĩrainĩ wa kanitha. Ndũkaanegwatanie na meehia ma andũ arĩa angĩ; wĩikaragie wĩ mũtheru.

23 Atĩrĩĩrĩ Timotheo, tiga kũnyuaga o maaĩ moiki, nyuaga ndibei niini nĩ ũndũ wa nda yaku, o na nĩ ũndũ wa ũrĩa ũrũaraga kaingĩ.

24 Meehia ma andũ amwe nĩmeyonanagia wega na mamatongoragia o nginya ciirainĩ, no meehia ma andũ angĩ moonekaga thuuthainĩ.

25 Ũguo noguo o namo maũndũ marĩa meega meonanagia, amu o na angĩkorwo matarĩ meega biũ, matingĩhithĩka.

1 Timotheo 6

1 Ndungata ciothe no mũhaka iheage anene aacio gĩtĩĩo gĩothe kĩrĩa kĩmaagĩrĩire, nĩguo gũtikaagĩe mũndũ ũkwaria ũũru wa rĩĩtwa rĩa Ngai na wa ũrutani witũ.

2 Ndungata cia andũ arĩa meetĩkĩĩtie itiagĩrĩirwo nĩkũima aathani aacio gĩtĩĩo, nĩ gũkorwo oothe nĩ aariũ na aarĩ a Ithe ũmwe. Ciagĩrĩirwo nĩkũmatungatĩra wega makĩria, amu andũ arĩa magunagwo nĩ ũtungati ũcio wacio nĩ andũ meetĩkĩĩtie o acio ciendeete.

Ũrutani wa maheeni na ũtonga mũkinyanĩru

No mũhaka ũrutanage na ũhunjagie maũndũ macio.

3 Mũndũ ũrĩa ũrutanaga maũndũ mangĩ, na akaaga kũiguithania na ciugo cia ma cia Mwathani witũ Jesũ Kristũ, o na akaaga kũiguithania na maũndũ marĩa maringanĩĩte na ũhoro wa Ngai,

4 akoragwo aiyũrĩĩtwo nĩ mwĩtĩĩo na ndarĩ ũndũ ooĩ. Akoragwo ahaana ta e na mũrimũ wa ngarari, na inegene rĩtarĩ kĩene rĩrĩa rĩreehage ũiru, ngũĩ, gũciinũrana, gwĩciiranĩria ũũru,

5 na ngarari cia hingo ciothe gatagatĩinĩ ka andũ arĩa meciiria maao marĩ mathũũku, na arĩa ũhoro wa ma wathirire thĩinĩ wao. Andũ acio makoragwo magĩciiria atĩ ũhoro wa gwĩtĩkia ũkoragwo arĩ njĩra ĩmwe ya gũtũma mũndũ atonge.

6 Gwĩtĩkia kwa ma nĩ ũtonga mũnene mũno angĩkorwo mũndũ nĩekũigua aiganĩire na kĩrĩa e na kĩo.

7 Nĩ ũndũ gũtirĩ kĩndũ tuokire nakĩo gũũkũ thĩ, na gũtirĩ kĩndũ tũngĩhota kũruta kuo.

8 Nĩ ũndũ ũcio angĩkorwo twĩ na irio na nguo-rĩ, twagĩrĩirwo nĩkũigua tũiganĩire.

9 No andũ arĩa meendaga gũtonga nĩmagũaga magerioinĩ o na mũtegoinĩ wa merirĩria ma ũrimũ na ma ũgwati, marĩa mamagũithagia na makamaniina.

10 Tondũ kwenda mbeeca gũkoragwo arĩ kĩo kĩhumo kĩa maũndũ moothe mooru. Andũ amwe tondũ wa kwenda mbeeca mũno nĩmeehereete makoima wĩtĩkioinĩ, na nĩmooragĩĩte ngoro ciao na kĩeha kĩingĩ.

Mataaro

11 No wee mũndũ wa Ngai-rĩ, ehagĩrĩra maũndũ macio moothe. Rũmagĩrĩra maũndũ marĩa maagĩrĩire, na ma ũthingu, na ma wĩtĩkio, na ma wendani, gũkirĩrĩria, na kũhoorera.

12 Wĩrutanĩrie kũrũa mbaara ĩrĩa yagĩrĩire ya wĩtĩkio, nĩguo wĩgĩĩre na muoyo wa tene na tene; muoyo ũcio nĩguo wee wetĩirwo hĩndĩ ĩrĩa woimbũrire wĩtĩkio waku mbere ya aira aingĩ.

13 Nĩngũgwatha ndĩ mbere ya Ngai, ũrĩa ũheaga indo ciothe muoyo, na mbere ya Kristũ Jesũ, ũrĩa woimbũrire ũrĩa kwagĩrĩire mbere ya Ponitio Pilato,

14 atĩ ũrũmagĩrĩre Watho ũcio wathĩĩtwo ũtekũũgarũra kinya hĩndĩ ĩrĩa Mwathani witũ Jesũ Kristũ agooka.

15 Gũũka gwake nĩgũkoonanio hĩndĩ ĩrĩa yagĩrĩire nĩ ũrĩa Mũraathime na Mwene Hinya, na nĩ we Mũthamaki wa athamaki na no we Mwathani wa aathani.

16 We no we ũtakuaga; na ũtũũraga ũtheriinĩ ũrĩa gũtarĩ mũndũ ũngĩhota kũũkuhĩrĩria. Ndarĩ oonwo nĩ mũndũ o na ũrĩkũ, o na gũtirĩ mũndũ ũngĩhota kũmwona. Naake arotĩĩagwo na arogĩa na wathani ũrĩa ũtathiraga! Ameni.

17 Andũ a thĩ ĩno arĩa itonga ũmaathage atĩ matikaagĩe na mwĩtĩĩo, na matikaigage mwĩhoko wao harĩ ũtonga, no maũigage harĩ Ngai ũrĩa ũtũheaga indo ciothe cia gwĩkenia.

18 Andũ acio ũmaathage gwĩkaga ũrĩa kwagĩrĩire, gũkoragwo me itonga cia ciĩko njega, na gũkoragwo marĩ andũ a gũtugana na akũgayana indo ciao na andũ arĩa angĩ.

19 Meeka ũguo nĩmarĩkoragwo meigĩire mũthiithũ ũtariĩ ta mũthingi wa matukũ ma thuutha, nĩ geetha makaahota gũkaagaya muoyo ũrĩa wa ma.

20 Atĩrĩĩrĩ, Timotheo, menyagĩrĩra kĩrĩa wĩhokeirwo. Ehagĩrĩra mĩario ĩrĩa ĩtarĩ bata, na ngarari cia ũrimũ iria andũ amwe moigaga atĩ nĩ ũmenyo no ti ũmenyo kũrĩ.

21 Amu andũ amwe nĩmoigaga atĩ me na ũmenyo ũcio, nao magakĩhĩtia njĩra ya wĩtĩkio.

Wega wa Ngai ũrogĩa na inyuĩ inyuothe.

2 Athesalonike 1

1 Kuuma kũrĩ ithuĩ Paũlũ, Silivano, na Timotheo.

Kũrĩ andũ a kanitha ũrĩa wĩ Thesalonike, arĩa makoragwo marĩ a Ngai Ithe witũ, o na Mwathani witũ Jesũ Kristũ:

2 Wega na thaayũ wa Ngai Ithe witũ o na wa Mwathani Jesũ Kristũ irogĩa na inyuĩ.

Ituĩro rĩa ciira hĩndĩ ya gũũka gwa Kristũ

3 Aariũ na aarĩ a Ithe witũ, no mũhaka tũcookagĩrie Ngai ngaatho hingo ciothe nĩ ũndũ wanyu. Amu ũguo nĩguo twagĩrĩirwo nĩgwĩka, tondũ wĩtĩkio wanyu o na wendani gatagatĩinĩ kaanyu o mũndũ na ũrĩa ũngĩ nĩwongererekeete.

4 Atĩrĩĩrĩ, ũhoro ũcio nĩguo ũtũmaga twĩtĩĩe nĩ ũndũ wanyu kũrĩ andũ a makanitha marĩa mangĩ ma Ngai. Nĩ tondũ o na mwanyariirwo kana mũthĩĩnio ũrĩa mũthĩĩnagio, no mũkiragĩrĩria na mũgeetĩkia.

5 Maũndũ maya moothe matuonagĩrĩria atĩ Ngai atuanagĩra ciira na kĩhooto, na kwoguo inyuĩ nĩmũgaatuĩka aagĩrĩru a gũtoonya Ũthamakiinĩ wake, ũrĩa ũtũmaga mũthĩĩnio.

6 Ngai nĩageeka ũrĩa kwagĩrĩire; nĩagaatũma arĩa mamũthĩĩnagia mathĩĩnio,

7 na inyuĩ mũnyariiragwo nĩakaamũniinĩra mĩnyamaaro o hamwe na ithuĩ. Ngai ageeka ũguo rĩrĩa Mwathani Jesũ agaatuumĩrĩra oimĩĩte na igũrũ e na araika aake arĩa me hinya mũno,

8 me na mwaki wa rũrĩrĩmbĩ. Naake nĩakaaherithia arĩa maregeete Ngai, na arĩa mataathĩkagĩra Ũhoro ũrĩa Mwega wa Mwathani witũ Jesũ Kristũ.

9 Andũ acio nĩmakaaherithio na kwanangwo kũrĩa gwa tene na tene, na matigaakorwo me hakuhĩ na Mwathani, o na matigaakorwo me riiriinĩ wake ũrĩa mũnene,

10 hĩndĩ ĩrĩa agooka nĩguo agoocwo nĩ andũ aake arĩa aamũre. Ningĩ ũnene wake nĩũkoonanio nĩ arĩa mamwĩtĩkĩĩtie, o na inyuĩ Mũthenya ũcio mũgaakorwo mwĩ hamwe nao, amu nĩmwetĩkĩrire ũhoro ũrĩa twamũheire.

11 Kĩu nĩkĩo gĩtũmaga tũmũhooyagĩre hingo ciothe. Ningĩ nĩtũhooyaga Ngai witũ amũtue aagĩrĩru nĩguo mũtũũre na mũtũũrĩre ũrĩa ũringaine na gwĩtwo kwanyu. O na arotũma wendi wanyu wa maũndũ meega ũhinge, na ahingie wĩra wanyu ũrĩa uumanĩĩte na wĩtĩkio.

12 Naguo ũndũ ũcio nĩũrĩgoocithagia rĩĩtwa rĩa Mwathani witũ Jesũ thĩinĩ wanyu, o na inyuĩ mũgoocagwo thĩinĩ wake, na ũndũ wa wega wa Ngai witũ na wa Mwathani Jesũ Kristũ.

2 Athesalonike 2

Mũndũ ũrĩa Mwaganu

1 Aariũ na aarĩ a Ithe witũ, ha ũhoro wa gũũka kwa Mwathani witũ Jesũ Kristũ, na kũũngana gwitũ, nĩguo tũkorwo twĩ hamwe naake-rĩ, nĩndamũthaitha

2 mũtikaahĩtithio meciiriainĩ maanyu, kana mũhahũrwo na maũndũ ma kĩĩroho, kana mwĩrwo ciugo, kana mũreeherwo marũa mwĩrwo atĩ nĩ ithuĩ tũmwandĩkĩire tũkamwĩra atĩ Mũthenya wa Mwathani nĩũkinyĩĩte.

3 Menyereraai mũtikaaheenio nĩ mũndũ na ũndũ o na ũrĩkũ. Amu Mũthenya ũcio ndũgaakinya mbũkĩrĩra ya mũthia ĩtaambĩĩte gũũka, naake Mũndũ ũrĩa Mwaganu oonanio, tondũ we nĩ wa kũniinwo o biũ.

4 Mũndũ ũcio nĩagaakararia kĩndũ o gĩothe gĩĩtagwo ngai kana kĩrĩa gĩthaathayagio, na nĩageetũũgĩria mũno. O na nĩagaikara Hekaarũinĩ ya Ngai etuĩte atĩ we nĩ we Ngai.

5 Kaĩ mũtekũririkana atĩ hĩndĩ ĩrĩa twarĩ na inyuĩ nĩndamwĩrire ũhoro ũcio?

6 O na nĩmũũĩ gĩtũmi kĩrĩa kĩragiria Mũndũ ũcio Mwaganu oonanio mbere ya mahinda maake gũkinya.

7 Amu hitho ya kũrega Watho nĩraruta wĩra o na rĩu, no ũrĩa gũgwĩkĩka gũtiihinga kinya hĩndĩ ĩrĩa Ngai akeeheria mũndũ ũrĩa ũmĩrigagĩrĩria.

8 Na rĩĩrĩ, hĩndĩ ĩyo Mũndũ ũcio Mwaganu nĩakoonanio, no Mwathani Jesũ rĩrĩa agooka nĩakaamũũraga na mĩhũũmũ ya kanua gaake, na amũniine na ũkengi ũrĩa ũkoonanio wa gũũka gwake.

9 Mũndũ Mwaganu nĩagooka na hinya wa Caitaani, na nĩagaakorwo e na hinya wothe wa kũringa ciama cia maheeni, na gwĩka maũndũ ma magegania ma maheeni,

10 na ahũthĩre maũndũ moothe ma waganu kũrĩ andũ arĩa a kũniinwo. Makaaniinwo tondũ nĩmaaregire kwamũkĩra na kwenda ũũma nĩguo mahonokio.

11 Tondũ ũcio Ngai nĩamareehithagĩria hinya wa kũmahĩtithia ũrutage wĩra thĩinĩ wao nĩguo meetĩkagie o ũhoro wa maheeni.

12 Marigĩrĩrio nĩ atĩ andũ oothe arĩa maaregire ũhoro wa ma magakenagĩra o kwĩhia nĩmagaatuĩrwo.

Inyuĩ nĩmũthuurĩĩtwo a kũhonoka

13 Ithuĩ no mũhaka tũcookagĩrie Ngai ngaatho hingo ciothe nĩ ũndũ wanyu, aariũ na aarĩ a Ithe witũ, o inyuĩ mwendeetwo nĩ Mwathani. Amu o mbereNgai nĩamũthuurire amũhonokie, nĩ ũndũ wa hinya wa Roho, agĩkĩmũtua andũ aake atheru nĩ ũndũ wa gwĩtĩkia ũhoro wa ma.

14 Ngai nĩamwĩtĩire ũhonokio ũcio na ũndũ wa Ũhoro ũrĩa Mwega twamũhunjĩirie, nĩguo amũhe igai rĩa riiri wa Mwathani witũ Jesũ Kristũ.

15 Atĩrĩĩrĩ, aariũ na aarĩ a Ithe witũ, mwĩhandeei wega, na mũrũmie maũndũ marĩa twamũrutire hĩndĩ ĩrĩa twamũhunjĩirie na marĩa twamwandĩkĩire marũainĩ.

16 Na rĩu Mwathani witũ Jesũ Kristũ we mwene, na Ngai Ithe witũ ũrĩa watwendire na agĩtũhe ũũmĩrĩru wa tene na tene, na mwĩhoko wa wega wake,

17 aromũũmĩrĩria na amũhe hinya wa gwĩkaga na kwaragia ũrĩa kwagĩrĩire hingo ciothe.

2 Athesalonike 3

Tũhooyagĩreei

1 Ngĩrĩĩkia aariũ na aarĩ a Ithe witũ-rĩ, ndamũthaitha mũtũhooyagĩre, nĩguo ũhoro wa Ngai ũhunje na ihenya, na andũ maũnyiite na gĩtĩĩo o ta ũrĩa inyuĩ mwaũnyiitire.

2 O na ningĩ tũhooyagĩreei Ngai atũhonokie kuuma kũrĩ andũ arĩa aaganu na arĩa ooru, amu ti andũ oothe meetĩkĩĩtie.

3 No Mwathani nĩwakwĩhokwo, na nĩekũmũhe hinya na amũgitĩre kuuma kũrĩ Ũrĩa Mũũru.

4 Twĩ na ma thĩinĩ wa Mwathani atĩ maũndũ marĩa twamwĩrire mwĩkage nĩmũgũthiĩ na mbere na kũmeeka.

5 Mwathani aromũtongoria nĩguo mũgĩe na wendani wa Ngai na mũgĩe na ũkirĩrĩria ũrĩa ũheanagwo nĩ Kristũ.

Gwathwo ũhoroinĩ wa kũruta wĩra

6 Aariũ na aarĩ a Ithe witũ, rĩu nĩtũkũmwatha thĩinĩ wa rĩĩtwa rĩa Mwathani witũ Jesũ Kristũ. Tũkũmwatha atĩ mũtigatwaranage na aariũ na aarĩ a Ithe witũ arĩa igũũta na arĩa matarũmagĩrĩra maũndũ marĩa twamũrutire.

7 Amu inyuĩ eene nĩmũũĩ wega ũrĩa mwagĩrĩirwo nĩkwĩgerekanagia na ithuĩ, tondũ hĩndĩ ĩrĩa twatũũraga na inyuĩ tũtiaikaraga tũtekũruta wĩra.

8 O na tũtietĩkagĩra kũheeo kĩndũ gĩa kũrĩa o ro ũguo tũhũ nĩ mũndũ o na ũrĩkũ. Twarutaga wĩra ũtukũ na mũthenya nĩguo tũtigaatuĩke mũrigo kũrĩ mũndũ o na ũmwe wanyu.

9 Maũndũ macio tũtiameekaga atĩ tondũ tũtiarĩ na kĩhooto gĩa gwĩtia ũteithio witũ; twameekaga nĩguo matuĩke ma kũmuonereria ũrĩa mwagĩrĩirwo nĩgwĩkaga.

10 Hĩndĩ ĩrĩa twatũũraga na inyuĩ nĩtwamwĩraga kaingĩ atĩrĩ, “Mũndũ ũrĩa ũtarutaga wĩra ndaagĩrĩirwo nĩ kũrĩa.”

11 Rĩu nĩtũraigua atĩ andũ amwe aanyu nĩ igũũta, na matirĩ ũndũ meekaga tiga o gũcuukana.

12 Thĩinĩ wa rĩĩtwa rĩa Mwathani Jesũ Kristũ nĩtwamaatha na twamakaania atĩ magĩe na mĩtugo mĩega, na marutage wĩra mahooreire nĩguo meyonagĩre kĩndũ gĩa kũrĩa.

13 No inyuĩ aariũ na aarĩ a Ithe witũ, mũtikaanogio nĩgwĩka wega.

14 Mũndũ angĩrega gwĩka ũrĩa tũmwĩrĩĩte marũainĩ maya-rĩ, mũmenyeei na mũtigathiage thiritũ naake, nĩguo aikarage aconokeete.

15 Ĩndĩ mũtikamũtue ta arĩ thũ, no mũkaanagiei ta arĩ mũrũ kana mwarĩ wa Ithe witũ.

Ciugo cia mũthia

16 Na rĩu Mwathani, o we mwene thaayũ, aromũhe thaayũ hingo ciothe na maũndũinĩ moothe. Mwathani aroikara na inyuĩ inyuothe.

17 Nĩ niĩ Paũlũ ndaandĩka ũũ na guoko gwakwa: “Niĩ Paũlũ nĩndamũgeithia.” Ũguo nĩguo njĩkĩraga thaĩri marũa maakwa moothe; ũguo nĩguo nyandĩkaga.

18 Na rĩu Wega wa Mwathani witũ Jesũ Kristũ ũrogĩa na inyuĩ inyuothe.

1 Athesalonike 1

1 Kuuma kũrĩ ithuĩ Paũlũ, Silivano, na Timotheo.

Kũrĩ andũ a kanitha wa Thesalonike arĩa me thĩinĩ wa Ngai Ithe na thĩinĩ wa Mwathani Jesũ Kristũ:

Wega na thaayũ irogĩa na inyuĩ.

Mũtũũrĩre wa andũ a Thesalonike o na wĩtĩkio wao

2 Nĩtũcookagĩria Ngai ngaatho hingo ciothe nĩ ũndũ wanyu inyuothe, na nĩtũmũgwetaga mahooyainĩ maitũ tũtegũtigithĩria.

3 Hĩndĩ ĩrĩa twĩ mbere ya Ngai o we ithe witũ-rĩ, nĩtũririkanaga wĩra ũrĩa mũrutĩĩte nĩ ũndũ wa gwĩtĩkia, na tũkaririkana ũrĩa wendo wanyu ũtũmĩĩte mũrute wĩra ũcio na kĩyo, o na nĩtũririkanaga kũũmĩrĩria kwanyu nĩ ũndũ wa kĩĩrĩgĩrĩro thĩinĩ wa Mwathani witũ Jesũ Kristũ.

4 Aariũ na aarĩ a Ithe witũ, nĩtũũĩ atĩ Ngai nĩamwendeete, na nĩamũthuurĩĩte mũtuĩke andũ aake.

5 Amu Ũhoro ũrĩa Mwega twamũhunjĩirie tũtiamũreeheire na ciugo ciiki, no twamũreeheire wĩ na hinya na Roho Mũtheru, na wĩ na ihooto cia ma. Ningĩ nĩmũkũririkana ũrĩa twaikaraga na inyuĩ nĩ ũndũ wa kũmũguna.

6 Inyuĩ nĩmwakĩĩgerekanirie na ithuĩ, o na mũkĩĩgerekania na Mwathani, tondũ o na angĩkorwo nĩmwathĩĩnĩkire mũno, nĩmwanyiitire ũhoro wa gĩkeno kĩrĩa kĩheanagwo nĩ Roho Mũtheru.

7 Kwoguo nĩmwatuĩkire kĩonereria kũrĩ andũ oothe arĩa meetĩkĩĩtie arĩa makoragwo Makedonia na Akaia.

8 Amu ũhoro wa ũrĩa mwĩtĩkĩĩtie Mwathani-rĩ, to andũ a Makedonia na Akaia wakinyĩire, wakinyĩire thĩ yothe. Ithuĩ-rĩ, tũtirĩ ũndũ tũngĩhota kuongerera.

9 Andũ oothe nĩmaaragia ũhoro wa ũrĩa mwatũnyiitire ũgeni, na ũrĩa mwatiganire na mĩhianano mũkĩrũmĩrĩra Ngai, nĩguo mũtungatagĩre Ngai ũrĩa wĩ muoyo na wa ma.

10 Ningĩ nĩmakoragwo makĩaria ũrĩa mwetereire Mũũriũ Jesũ Kristũ ũrĩa ũgooka kuuma igũrũ, o ũcio aariũkirie akĩmũruta kuuma kũrĩ akuũ, na no we ũtũhonokagia kuuma kwĩ maraakara ma Ngai marĩa marooka.

1 Athesalonike 2

Wĩra ũrĩa Paũlũ aarutire Thesalonike

1 Aariũ na aarĩ a Ithe witũ, inyuĩ nĩmũũĩ inyuĩ eene atĩ gũũka kũrĩa twokire kũrĩ inyuĩ gũtiarĩ gwa tũhũ.

2 Ningĩ nĩmũũĩ ũrĩa twanyariirirwo na tũgĩĩkwo maũndũ ma thoni hĩndĩ ĩrĩa twarĩ Filipi. O na gwatuĩka nĩkwarĩ na ngarari nyingĩ-rĩ, Ngai witũ nĩatũheire ũũmĩrĩru, tũkĩmũhunjĩria Ũhoro ũrĩa Mwega wa Ngai.

3 Ũhoro ũyũ ndĩmũthaithaga naguo nduumanĩĩte na mahĩtia kana kwaga kwagĩrĩra, o na kana mawara.

4 Ithuĩ-rĩ, twaragia hingo ciothe ũrĩa Ngai eendeete, tondũ nĩonire atĩ nĩtwagĩrĩire, agĩgĩtwĩhokera Ũhoro ũrĩa Mwega. Nĩ ũndũ ũcio, ithuĩ tũtiaragia atĩ nĩguo tũkenie andũ, no twaragia nĩguo tũkenie Ngai tondũ nĩ we wonaga ngoro ciitũ.

5 Inyuĩ nĩmũũĩ atĩ ithuĩ tũtiaragia ciugo cia kũmũheenereria o na kana cia kũhumbĩra mwĩyendo; Ngai nĩ mũira.

6 O na tũtiageririe kwĩganithia kũrĩ inyuĩ kana kũrĩ andũ arĩa angĩ,

7 o na angĩkorwo nĩtũngĩahotire kwĩganithia na hinya tondũ tũrĩ atũmwo a Kristũ. No rĩĩrĩ twaikaranirie na inyuĩ na ũhooreri ta ũrĩa mũciari aroraga ciana ciake.

8 Tondũ wa ũrĩa twakenagio mũno nĩ inyuĩ, to Ũhoro ũrĩa Mwega wa Ngai wiki twagayanire na inyuĩ, no nĩtwagayanire na inyuĩ kinya mĩoyo iitũ, nĩ ũndũ wa kũmwenda.

9 Aariũ na aarĩ a Ithe witũ, taririkanaai ũrĩa twenogagia tũkĩruta wĩra ũtukũ na mũthenya hĩndĩ ĩrĩa twamũhunjagĩria Ũhoro ũrĩa Mwega wa Ngai atĩ nĩguo tũtigaatuĩke mũrigo kũrĩ mũndũ wanyu o na ũmwe!

10 Inyuĩ mũrĩ aira, o na Ngai nĩ mũira, atĩ mĩtugo iitũ harĩ inyuĩ mwĩtĩkĩĩtie yarĩ mĩtheru na ya ũthingu, o na ndĩarĩ na mahĩtia.

11 Ningĩ nĩmũũĩ atĩ twekaga o ta ũrĩa mũciari eekaga ciana ciake.

12 Nĩtwamwĩkĩraga hinya, tũkamũũmĩrĩria, na tũkamwĩraga mũikarage na mĩikarĩre ĩrĩa ĩkenagia Ngai ũrĩa ũmwĩtaga mũthiĩ Ũthamakiinĩ wake o na riiriinĩ wake.

13 Nĩharĩ gĩtũmi kĩngĩ kĩrĩa gĩtũmaga tũcookerie Ngai ngaatho tũtegũtigithĩria: hĩndĩ ĩrĩa mwamũkĩrire Ũhoro wa Ngai ũrĩa twamũreeheire-rĩ, mũtiawamũkĩrire ta arĩ ũhoro wa andũ, no mwawamũkĩrire wĩ ũhoro wa Ngai, na ũguo nĩguo ũrĩ kũna. Amu Ngai nĩarutaga wĩra thĩinĩ wanyu inyuĩ mwĩtĩkĩĩtie.

14 Aariũ na aarĩ a Ithe witũ, inyuĩ mwekirwo o ta ũrĩa andũ arĩa marũmagĩrĩra Kristũ Jesũ a makanitha ma Judea meekirwo. Amu o na inyuĩ nĩmwathĩĩnirio nĩ andũ aanyu o ta ũrĩa o nao maathĩĩnirio nĩ Ayahudi,

15 arĩa mooragire Mwathani Jesũ na makĩũraga anabii, na magĩcooka na ithuĩ magĩtũthĩĩnia. Nĩmaraakaragia Ngai mũno! Na matirĩ mũndũ o na ũmwe macaayagĩra!

16 Nao nĩmageragia gũtũrigĩrĩria kũhunjĩria andũ a Ndũũrĩrĩ ũhoro ũrĩa ũngĩmareehere ũhonokio. Kwoguo magakĩiyũrĩrĩria meehia maao marĩa matũũraga meekaga hingo ciothe na mũthiainĩ maraakara ma Ngai nĩmamakinyĩire!

Wendi wa Paũlũ wa kũmaceerera rĩngĩ

17 Ha ũhoro witũ aariũ na aarĩ a Ithe witũ, twatiganire na inyuĩ kwa ihinda iniini, o na gũtuĩka twatiganĩĩte mĩĩrĩ no ti ngoro. Twatigana nĩtwamwĩriragĩria mũno na tũkaigua twĩ na wendo wa kũmuona rĩngĩ.

18 Ningĩ nĩtwaiguaga tũkĩenda gũcooka kũrĩ inyuĩ. Niĩ, Paũlũ, nĩngereetie gũcooka kũrĩ inyuĩ kaingĩ kaingĩ, no Caitaani ndatwĩtĩkagĩria.

19 Tondũ wa rĩĩrĩ, mwĩhoko witũ, kana gĩkeno giitũ, kana gĩtĩĩo kĩrĩa ithuĩ tũngĩĩtĩĩa nakĩo he Mwathani witũ Jesũ Kristũ rĩrĩa agooka, kĩngĩkorwo arĩ kĩrĩkũ angĩkorwo ti kĩo inyuĩ?

20 Nĩ ma atĩ inyuĩ nĩ inyuĩ mũtũmĩĩte twĩtĩĩe na tũgĩe na gĩkeno!

1 Athesalonike 3

1 Kwoguo hĩndĩ ĩrĩa twaremirwo nĩkũũmĩrĩria rĩngĩ tũkĩona arĩ wega tũikare Atheni tũrĩ ithuiki.

2 Tũgĩgĩtũma Timotheo mũrũ wa Ithe witũ, na ndungata ya Ngai ĩrĩa tũrutithanagia wĩra ũyũ nayo wa kũhunjia Ũhoro ũrĩa Mwega wa Kristũ. Twamũtũmire kũrĩ inyuĩ ooke nĩguo amuongerere hinya, na amũũmĩrĩrie wĩtĩkioinĩ wanyu,

3 nĩguo gũtikaagĩe mũndũ o na ũmwe wanyu ũgũcooka na thuutha nĩ ũndũ wa gũthĩĩnio kũu mũrathĩĩnio nakuo. Inyuĩ eene nĩmũũĩ atĩ nĩ Ngai ũkoragwo eendeete tũthĩĩnio.

4 Amu hĩndĩ ĩrĩa twarĩ na inyuĩ, nĩtwamwĩraga atĩ nĩtũrĩthĩĩnio, o ta ũrĩa mũũĩ atĩ ũguo nĩguo gwacookire gũgĩĩkĩka.

5 Kwoguo hĩndĩ ĩrĩa ndoonire ndingĩhota kũũmĩrĩria rĩngĩ, ngĩgĩtũma Timotheo ooke kũrĩ inyuĩ acooke ooke aamenyithie kana hiihi wĩtĩkio wanyu nĩwatoonyereirwo nĩ Caitaani, na kana wĩra witũ ũrĩa twarutire nĩwagĩtuĩkire o wa tũhũ.

6 Rĩu Timotheo nĩacookeete kuuma kũrĩ inyuĩ, na nĩatũheete ndũmĩrĩri njega ya wĩtĩkio na wendani wanyu. Nĩatwĩrĩĩte atĩ nĩmũtũririkanaga o wega hingo ciothe, na nĩmũkoragwo mũkĩĩrirĩria gũtuona rĩngĩ o ta ũrĩa na ithuĩ tũkoragwo tũkĩĩrirĩria kũmuona.

7 Kwoguo aariũ na aarĩ a Ithe witũ, nĩ ũndũ wa gwĩtĩkia kũu kwanyu nĩtũromĩrĩirio mathĩĩnainĩ maitũ moothe, o na kĩehainĩ giitũ gĩothe.

8 Amu ndĩ na ma atĩ rĩu nĩtũgũtũũra muoyo, angĩkorwo inyuĩ nĩmũgũtũũra mũrĩ arũmu wega thĩinĩ wa Mwathani.

9 Rĩu nĩtũgũcookeria Ngai witũ ngaatho nĩ ũndũ wanyu. Tũkũmũcookeria ngaatho nĩ tondũ wa gĩkeno kĩrĩa twĩ nakĩo mbere yake nĩ ũndũ wanyu.

10 Nĩtũkĩragĩrĩria kũhooya ũtukũ na mũthenya atĩ tũrĩonana na inyuĩ rĩngĩ, tũhote kũmũiyũrĩrĩria kĩrĩa kĩagĩĩte wĩtĩkioinĩ wanyu.

11 Na rĩu, Ngai we mwene o we Ithe witũ, arotũthondekera njĩra, e hamwe na Mwathani witũ Jesũ Kristũ tũũke kũrĩ inyuĩ.

12 Mwathani arotũma wendo wanyu o mũndũ na ũrĩa ũngĩ ũingĩhe, na mwende andũ arĩa angĩ oothe o ta ũrĩa na ithuĩ tũmwendeete.

13 Nĩguo eekĩre ngoro cianyu hinya, mũtuĩke aagĩrĩru na atheru mbere ya Ngai Ithe witũ kinya hĩndĩ ĩrĩa Mwathani Jesũ agooka hamwe na andũ aake oothe atheru.

1 Athesalonike 4

Mũikarĩre ũrĩa ũkenagia Ngai

1 Tũkĩrĩĩkia, aariũ na aarĩ a Ithe witũ, nĩtwamũrutire ũrĩa mwagĩrĩirwo nĩgũikaraga nĩguo mũkenagie Ngai, na ũguo noguo mũikaga. O rĩngĩ nĩtwamũthaitha na twamũringĩrĩria thĩinĩ wa rĩĩtwa rĩa Mwathani Jesũ atĩ mũthiĩ o na mbere gwĩka o ũguo o na mũgerie mũno makĩria.

2 Nĩmũũĩ maũndũ marĩa twamũtaarire namo na ũhoti wa Mwathani Jesũ.

3 Nĩ gũkorwo ũyũ nĩguo wendi wa Ngai, atĩ mũikarage mũrĩ atheru na mũtheemage ũmaraaya.

4 Ningĩ mũndũ mũrũme o wothe no mũhaka amenye ũrĩa aagĩrĩirwo nĩgũikarania na mũtumia wakena njĩra ya ũthingu na ya gĩtĩĩo,

5 no ti na njĩra ya merirĩria mooru ta ya andũ arĩa mateetĩkĩĩtie, o arĩa matooĩ Ngai.

6 Kwoguo gũtirĩ mũndũ wagĩrĩirwo nĩkũhĩtĩria mũndũ ũrĩa ũngĩ kana amũhũthĩre na njĩra njũru. Amu o ta ũrĩa twamũkaanagia tũkĩmwĩraga, Mwathani nĩ we ũkaaherithia kũringana na ũrĩa kwagĩrĩire andũ arĩa meekaga maũndũ ta macio.

7 Amu Ngai ndatwĩtĩire maũndũ ma waganu, no aatwĩtĩire maũndũ marĩa matheru.

8 Kwoguo mũndũ ũrĩa ũkararagia maũndũ maya ti mũndũ akararagia, akararagia Ngai ũrĩa ũmũheaga inyuĩ Roho wake Mũtheru.

9 Ha ũhoro wa kwendana mũndũ na ũrĩa ũngĩ-rĩ, ndikuona he na bata wa kũmwandĩkĩra, amu Ngai nĩamũrutire ũrĩa inyuĩ eene mwagĩrĩirwo nĩkwendana mũndũ na ũrĩa ũngĩ.

10 Nĩ gũkorwo ũguo noguo mwĩkaga aariũ na aarĩ a Ithe witũ oothe arĩa me Makedonia. No rĩĩrĩ, aariũ na aarĩ a Ithe witũ twamũthaitha mũthiĩ na mbere na kũmeenda makĩria.

11 Atĩrĩĩrĩ, ikaragaai mũtarĩ na inegene, mũtegũtoonyerera maũndũ ma arĩa angĩ, mũkĩrutaga wĩra na mooko maanyu nĩguo mwĩyonagĩre kĩndũ gĩa kũrĩa o ta ũrĩa twamũtaarire.

12 Mweka ũguo nĩmũrĩkoragwo mũtĩĩĩtwo nĩ andũ arĩa mateetĩkĩĩtie, na mũtirĩkoragwo mũkĩhooya mũndũ o na ũmwe kĩndũ kĩrĩa mũkwenda.

Gũũka kwa Mwathani

13 Atĩrĩĩrĩ, aariũ na aarĩ a Ithe witũ, nĩtũkwenda mũmenye ũhoro wa ma wa andũ arĩa makuĩte, nĩguo mũtigaikare mũrĩ na kĩeha ta andũ arĩa matarĩ na kĩĩrĩgĩrĩro.

14 Amu nĩtwĩtĩkĩĩtie atĩ Jesũ nĩakuire na agĩcooka akĩriũka, ũguo noguo twĩtĩkĩĩtie atĩ rĩrĩa Ngai akaareehe Jesũ rĩngĩ, nĩakaareehithanĩria hamwe naake arĩa makuĩte meetĩkĩĩtie Jesũ.

15 Ũhoro ũyũ tũkũmũhe rĩu ũringaine na ũrutani wa Mwathani: ithuĩ twĩ muoyo, o ithuĩ tũgaakorwo twĩ muoyo hĩndĩ ĩrĩa Mwathani agacooka-rĩ, tũtikaahĩta arĩa maakuire.

16 Amu Mwathani nĩagooka kuuma igũrũ agĩĩtanaga na mũgambo, naake mũraika mũnene nĩakaanĩrĩra, na karumbeeta ka Ngai nĩgakaahuuhwo. Hĩndĩ ĩyo andũ arĩa maakuire me thĩinĩ wa Kristũ nĩ o makaamba kũriũka,

17 na ithuĩ arĩa tũgaakorwo twĩ muoyo nĩtũgaacookanĩrĩra hamwe nao ituinĩ tũtũnge Mwathani rĩerainĩ. Kwoguo tũgaatũũraga na Mwathani hĩndĩ ciothe.

18 Nĩ ũndũ ũcio-rĩ, ũmanagĩrĩriai mũndũ na ũrĩa ũngĩ na ciugo icio.

1 Athesalonike 5

Ikaragaai mwĩhaarĩirie nĩ ũndũ wa gũũka kwa Mwathani

1 Aariũ na aarĩ a Ithe witũ, ndikuona he na bata wa kũmwandĩkĩra ũhoro wa mathaa kana mahinda marĩa ũhoro ũyũ ũkaahinga.

2 Amu o inyuĩ eene nĩmũũĩ wega atĩ Mũthenya wa Mwathani ũgooka ta ũrĩa mũici ookaga ũtukũ.

3 Hĩndĩ ĩrĩa andũ maroiga atĩ kwĩ na thaayũ na gũtirĩ inegene nĩ rĩo makaaniinwo o rĩmwe, o ta ũrĩa mũtumia wĩ na ihu akoragĩrĩrwo nĩ ruwo, rwa kũheeo mwana o ro rĩmwe, na matikaahota kũũra.

4 No inyuĩ aariũ na aarĩ a Ithe witũ, mũtirĩ ndumainĩ, na Mũthenya wa Mwathani ndũngĩmũkorerera ta mũici mũterĩgĩrĩire.

5 Amu inyuothe mũrĩ andũ a ũtheri na a mũthenya. Ithuĩ tũtirĩ a ũtukũ kana a nduma.

6 Kwoguo kĩrekeei tũtige gũkoma ta andũ acio angĩ, no tũkoragwo twĩiguĩte na tũterigĩĩtwo.

7 Amu andũ makomaga ũtukũ, na ũtukũ nĩguo andũ manyuaga njoohi makarĩĩo.

8 Tondũ ithuĩ tũrĩ andũ a mũthenya-rĩ, rekeei tũkoragwo twĩiguĩte, na twĩhumbe gako ga kũgitĩra gĩthũri, na nĩko wendo na wĩtĩkio. Rekeei kĩĩrĩgĩrĩro kĩa ũhonokio witũ gĩtuĩke ngobia ya kũgitĩra mũtwe.

9 Amu Ngai ndatũthuurire atũherithie na maraakara, no aatũthuurire nĩguo tũhonokio thĩinĩ wa Mwathani witũ Jesũ Kristũ,

10 o we wakuire nĩ ũndũ witũ nĩ geetha tũtũũrage muoyo hamwe naake, o na angĩkorwo twĩ muoyo kana tũkuĩte rĩrĩa agooka rĩngĩ.

11 Kwoguo ũmanagĩrĩriai o mũndũ na ũrĩa ũngĩ, na mũteithanie o ta ũrĩa mũreeka.

Gũtaarwo kwa mũthia na ngeithi

12 Na rĩĩrĩ, aariũ na aarĩ a Ithe witũ, nĩtwamũthaitha mũtĩĩage andũ arĩa marutaga wĩra gatagatĩinĩ kaanyu, arĩa mamũtongoragia makĩmũrutaga maũndũ ma mũtũũrĩre wa Mũkristiano.

13 Maheyageei gĩtĩĩo kĩnene, na makĩria mũmeendage nĩ ũndũ wa wĩra ũcio marutaga. Ningĩ mũkoragwo mwĩ na thaayũ gatagatĩinĩ kaanyu.

14 Ningĩ aariũ na aarĩ a Ithe witũ, twamũthaitha mwĩre andũ arĩa igũũta atĩ matiagĩrĩirwo kũhaana ũguo; ũmagĩrĩriai andũ arĩa me guoya, teithagiai arĩa matarĩ na hinya, na mũkiragĩrĩrie andũ oothe.

15 Menyagĩrĩraai hatikaagĩe mũndũ o na ũmwe wanyu wa kwĩrĩhĩria ũũru na ũũru, no mũkoragwo na muorooto wa gwĩkaga ũrĩa kwagĩrĩire mũndũ na ũrĩa ũngĩ o na kũrĩ andũ oothe.

16 Kenagaai hingo ciothe,

17 hooyagaai mũtegũtigithĩria,

18 na mũcookagie ngaatho maũndũinĩ moothe. Ũguo nĩguo Ngai ekwenda kuuma kũrĩ inyuĩ arĩa mwĩ thĩinĩ wa Kristũ Jesũ.

19 Mũtikaanahingĩrĩrie roho,

20 namo maũndũ marĩa marathagwo mũtikaanamararie.

21 Roranagiai maũndũ moothe: rũmagiai marĩa maagĩrĩire,

22 na mũtheemage ũndũ o wothe mũũru.

23 Naake Ngai mwene thaayũ, aromũikaragia mũrĩ athingu na mwĩ agima marohoinĩ maanyu, mĩoyoinĩ yanyu na mĩĩrĩinĩ yanyu, nĩguo mũgaakorwo mũtarĩ na ũcuuke hĩndĩ ya gũũka kwa Mwathani witũ Jesũ Kristũ.

24 Ũcio ũmwĩtaga nĩwakwĩhokwo na nĩakaahingia ciĩranĩro ciake.

25 Aariũ na aarĩ a Ithe witũ, tũhooyagĩreei.

26 Geithiai aariũ na aarĩ a Ithe witũ oothe na ngeithi iria theru cia kũmumunyana.

27 Atĩrĩĩrĩ, nĩndamwatha thĩinĩ wa rĩĩtwa rĩa Mwathani atĩ marũa maya mathoomerwo arĩa oothe meetĩkĩĩtie.

28 Wega wa Mwathani witũ Jesũ Kristũ ũrogĩa na inyuĩ.