Ngai na andũ aake a Isiraeli#
1 Andũ aakwa thikĩrĩriai ũrutani wakwa,
na mũigue ũrĩa ndĩroiga.
2 Ngwaria na thimo,
ndaaririe maũndũ ma hitho ma hĩndĩ ya tene
3 marĩa tũiguĩte na tũkamenya,
marĩa twĩrĩĩtwo nĩ maithe maitũ.
4 Tũtirĩmahithaga ciana ciitũ;
nĩtũrĩĩraga rũciaro rũrĩa rwĩ thuutha ũrĩa Ngai arĩ hinya,
na tũrwĩrage ũhoro wa ciĩko ciake nene,
na maũndũ ma magegania marĩa aaneeka.
5 Aaheire andũ a Isiraeli mawatho
na akĩhe njiarwa cia Jakubu maathani.
Aathire maithe maitũ marute ciana ciao mawatho maake,
6 nĩguo rũciaro rũrĩa rũgooka thuutha rũkaameeruta,
rũcooke rũmeere ciana ciaruo.
7 Na njĩra ĩyo o nacio cikĩige mwĩhoko wacio harĩ Ngai
na ciage kũriganĩrwo nĩ ciĩko ciake nene,
ciathĩkagĩre maathani maake hingo ciothe.
8 O na ningĩ itikaahaane ta maithe maacio,
andũ maarĩ aremi na mataathĩkaga,
arĩa mwĩhoko wao harĩ Ngai ũtaarĩ mũrũmu
na maikaraga matamwĩtĩkĩĩtie.
9 Andũ a mũhĩrĩga wa Efiraimu o na marĩ na moota na mĩguĩ,
nĩmoorire mũthenya wa mbaara.
10 Matiigana kũiga kĩrĩĩkanĩro kĩao na Ngai;
nĩmaaregire kũrũmĩrĩra watho wake.
11 Maariganĩirwo nĩ ũrĩa eekĩĩte,
na makĩriganĩrwo nĩ ciama iria aamaringĩire.
12 Ngai aaringire ciama maithe maao makĩyonagĩra
rĩrĩa maarĩ werũinĩ wa Zoani
ũrĩa ũrĩ bũrũriinĩ wa Misiri.
13 Aagayanirie iria akĩmaringia
na agĩtũma maaĩ marũũgame ta thingo.
14 Mũthenya aamatongoragia na itu,
na ũtukũ wothe akamatongoria na ũtheri wa mwaki.
15 Aatũranirie mahiga werũinĩ,
akĩmahe maaĩ moimĩĩte kũndũ kũrĩa kũriku mũno.
16 Aatũmire tũrũũĩ tuume rwaroinĩ rwa ihiga,
maaĩ magĩtherera ta njũũĩ.
17 No o-rĩ, magĩthiĩ o na mbere kũhĩtĩria Ngai,
makĩremera Ũrĩa Ũrĩ Igũrũ Mũno marĩ kũu werũinĩ.
18 Makĩgeria Ngai makĩendaga
na ũndũ wa gwĩtia irio iria meeriragĩria kũrĩa.
19 Mookĩrĩire Ngai na mĩario makĩũria atĩrĩ,
“Ngai no ahote kũheana irio werũinĩ?
20 Nĩ ma nĩagũthire ihiga maaĩ magĩitĩka boo, magĩtherera ta rũũĩ;
no rĩĩrĩ, no ahote gũtũhe o na irio?
No ahote kũhe andũ aake nyama?”
21 Naake MWATHANI rĩrĩa aiguire ũguo akĩng’ũrĩka
agĩtharĩkĩra andũ aake na mwaki,
na akĩraakara mũno nĩ ũndũ wao,
22 tondũ nĩmaagire kũmwĩtĩkia,
na makĩaga kwĩhoka hinya wake wa kũhonokania.
23 No o na kũhaana ũguo-rĩ, agĩatha igũrũ,
na akĩhingũra mĩrango yakuo,
24 akĩmahe irio kuuma kuo,
akĩmaikũrũkĩria mana marĩe.
25 Magĩkĩrĩa irio cia araika,
naake Ngai akĩmahe irio kwa ũingĩ.
26 O na ningĩ nĩatũmire rũhuuho
rũrĩa ruumaga mwena wa irathĩro rũhuruutane,
na akĩreehithia rũhuuho
rwa kuuma mwena wa kĩanda na hinya wake.
27 Agĩkĩreehithĩria andũ aake nyoni kuuma igũrũ
ciaingĩhĩĩte ta mũthanga wa iria
28 akĩreka igũe gatagatĩ ga kambĩ yao,
gũkuhĩ na hema ciao ciothe.
29 Nao magĩkĩrĩa, nginya makĩhũũna,
tondũ Ngai nĩamaheete kĩrĩa meeriragĩria kũrĩa.
30 No rĩĩrĩ, o na thuti yao ĩtathirĩĩte,
marĩ o na irio icio tũnuainĩ twao-rĩ,
31 Ngai akĩnyiitwo nĩ maraakara nĩ ũndũ wao,
akĩũraga andũ aao arĩa maarĩ na hinya mũno;
o aanake a Isiraeli arĩa maarĩ a bata mũno.
32 No o na ameekĩĩte ũguo wothe-rĩ,
matiigana gũtiga kwĩhia;
matietĩkirie ciama iria aamaringĩire.
33 Kwoguo agĩtũma matukũ maao mathire ta ihũũmũka rĩa ngoro,
nayo mĩoyo yao ĩniinwo nĩ mũthiro wa hi na hi.
34 Rĩrĩa rĩothe angĩoragire amwe aao, acio angĩ makamũcookerera,
makahera meehia maao na makamũhooya magwatĩirie.
35 Makaririkana atĩ Ngai nĩ we wamamenyagĩrĩra
Ngai Ũrĩa Ũrĩ Igũrũ Mũno nĩ we wamateithagia.
36 No rĩĩrĩ, nĩkũmũheenia maamũheenagia na tũnua twao,
ũrĩa wothe moigaga ndwarĩ wa ma.
37 Matiamwĩtĩkĩĩtie na ngoro ciao,
o na kana makeehoka kĩrĩĩkanĩro kĩrĩa aarĩĩkanĩrĩĩte nao.
38 No Ngai, tondũ wa ũrĩa arĩ tha,
nĩoheire andũ aake meehia maao,
na ndaigana kũmaniina.
Kaingĩ na kaingĩ nĩegiragĩrĩria kũraakara
na akaaga kũng’ũrĩka ta ũrĩa aagĩrĩirwo.
39 Tondũ nĩaririkanaga atĩ o maarĩ o andũ tu;
maatariĩ o ta rũhuuho rũrĩa rũhuruutanaga rũgacooka rũgathira.
40 Kaingĩ na kaingĩ nĩmaamũremagĩra me kũu werũinĩ,
na makamũiguithagia kĩeha maita maingĩ.
41 Matiaikaraga matekũgeria Ngai
na mategũtuuria ngoro Ũrĩa Mũtheru wa Isiraeli.
42 Matiigana kũririkana hinya wake mũnene,
o na mũthenya ũrĩa aamahonokirie kuuma gwĩ thũ ciao,
43 na agĩĩka ciĩko ciake cia hinya o hamwe na ciama
werũinĩ wa Zoani ũrĩa ũrĩ bũrũriinĩ wa Misiri.
44 Aagarũrire njũũĩ igĩtuĩka thakame,
nao Amisiri magĩkĩaga maaĩ ma kũnyua.
45 Aamarekeirie ngi nyingĩ mũno ikĩmathĩĩnia,
nacio ciũra ikĩananga bũrũri wao.
46 Aarekereirie mĩgũnda yao irĩĩo nĩ igunyũ,
namo maciaro maayo makĩanangwo nĩ ngigĩ.
47 Aanangire mĩthabibũ yao na mbura ya mbembe,
nayo mĩkũyũ yao akĩmĩcina na mbaa.
48 Ooragire mahiũ maao na mbura ya mbembe,
namo ng’ombe ciao akĩmahũũra na ngwa.
49 Aamahũũrire na maraakara maakanaga ta mwaki,
matũkũya, mang’ũrĩ, na mathĩĩna
marĩa mahaanaga ta arekio marareehe ndũmĩrĩri ya gĩkuũ.
50 Ndahooragĩria maraakara maake o na kana agĩcaaĩra mĩoyo yao;
we-rĩ, nĩkũmooraga aamooragire na matũhũũhũ.
51 Nĩoragire aariũ oothe a marigithaathi
mĩciĩinĩ yothe ya andũ a Misiri.
52 Agĩcooka agĩtongoria andũ aake
ta ũrĩa mũrĩithi atongoragia ng’ondu ciake,
na akĩmoonereria njĩra werũinĩ.
53 Aamatongoririe hatarĩ na ũgwati mekuona, magĩkĩaga gwĩtigĩra;
no rĩĩrĩ, thũ ciao nĩkũhubĩkanio ciahubĩkanirio nĩ iria.
54 Naake agĩkĩmareehe bũrũriinĩ wake ũrĩa mũtheru,
o irĩmainĩ iria we mwene aatooririe.
55 Akĩingata ndũũrĩrĩ iria ciatũũraga kuo, igĩthenga mbere yao,
akĩgaĩra mĩhĩrĩga ya Asiraeli bũrũri wacio,
na akĩhe andũ aake mĩciĩ yacio.
56 No o makĩgeria Ngai Ũrĩa Ũrĩ Igũrũ Mũno, na makĩmũremera.
Matiigana gwathĩkĩra maathani maake.
57 Maaremire na makĩaga wĩtĩkio o ta maithe maao;
maatariĩ o ta ũta mũgaathũku ũrĩa ũtangĩhokwo.
58 Nĩ ũndũ nĩmaamũraakaririe
na ũndũ wa gũkorwo marĩ na kũndũ kwao gũtũũgĩru gwa gũthaathaĩria,
na makĩmũng’ũrĩkia na mĩhianano yao.
59 Ngai nĩaraakarire mũno rĩrĩa aamenyire ũndũ ũcio;
naake agĩkaana andũ aake a Isiraeli o biũ.
60 Agĩtiganĩria hema yake ĩrĩa yarĩ Shilo,
o gĩikaro kĩrĩa aathondekeete atũũranagie na andũ aake.
61 Akĩrekereria thũ ciake itahe Ithandũkũ rĩa Kĩrĩĩkanĩro
rĩrĩa rĩonanagia hinya o na riiri wake.
62 Nao andũ aake kĩũmbe akĩreka mooragwo nĩ thũ ciao na hiũ cia njora,
tondũ nĩmaamũraakarĩĩtie.
63 Aanake aao makĩũragĩrwo mbaarainĩ,
nao airĩĩtu aao makĩaga wakũmahikia.
64 Athĩnjĩri Ngai aao makĩũragwo na hiũ cia njora,
nao atumia aao a ndigwa matietĩkĩririo mamacakaĩre.
65 Hĩndĩ ĩyo MWATHANI akĩarahũka o ta oima toro,
aatariĩ ta njamba ya ita yanyuĩte ndibei ĩgacanjamũka.
66 Naake agĩcookithia thũ ciake na thuutha
agĩgĩciconorithia na agĩcitooria rĩmwe rĩa kũigana.
67 Akĩrega njiarwa cia Josefu;
ndathuurire mũhĩrĩga wa Efiraimu.
68 Handũ haaguo aathuurire mũhĩrĩga wa Juda
na kĩrĩma gĩa Zayuni, kĩrĩa eendeete mũno.
69 Agĩaka kuo Hekaarũ yake ĩhaana mũciĩ wake ũrĩa wĩ igũrũ,
akĩmĩhanda ĩkĩrũma o ta ũrĩa thĩ ĩikaraga ĩrũmĩĩte wega hĩndĩ ciothe.
70 Agĩthuura Daudi, ndungata yake;
akĩmũruta ũrĩithioinĩ,
71 kũrĩa aarĩithagia ng’ondu,
akĩmũtua mũthamaki wa Isiraeli,
mũrĩithi wa andũ a Ngai.
72 Naake Daudi akĩmatungata arĩ na ngoro theru,
na akĩmatongoria na ũũgĩ.