Isaia 65

Ngai kũherithia andũ arĩa aremi

1 MWATHANI ekuuga atĩrĩ,

“Niĩ njikaraga ndĩhaarĩirie gũcookia mahooya ma andũ aakwa,

na matihooyaga.

Njikaraga ndĩhaarĩirie kuonwo nĩ arĩa matanjaragia,

no matĩrũmbũyagia kũnjaria.

Rũũrĩrĩ rũũrũ rũtihooya,

o na gũtuĩka njikaraga hingo ciothe ndĩhaarĩirie kũrwĩra atĩrĩ,

‘Niĩ ũyũ haaha! Nĩngũmũteithia.’

2 Mũthenya o mũthenya ndambũrũkagĩria andũ acio aremi guoko,

no nao magathiĩ na njĩra ciao itarĩ nũngĩrĩru,

na makarũmĩrĩra mĩbango yao eene.

3 Andũ aya maikaraga mbere yakwa maathirĩkagie,

tondũ marutagĩra magongoona tũtitũinĩ twa magoongona;

na magacinagĩra ũbaani maturubarĩ igũrũ.

4 Matindaga mbĩĩrĩrainĩ,

makaraaraga ngurungainĩ,

makarĩaga nyama cia ngũrũe,

na makanyuaga thubu wa nyamũ irĩ mũgiro.

5 Ningĩ meeraga andũ arĩa angĩ atĩrĩ,

‘Mũtigatũkuhĩrĩrie;

ithuĩ tũrĩ andũ atheru kũmũkĩra, mũtigatũhuutie!’

Andũ ta acio ndingĩhota kũmakirĩrĩria,

maraakara maakwa harĩ o mahaana ta mwaki ũtangĩhoreka o na atĩa.

6 “Nĩndĩkĩĩtie gũtua atĩ nĩngũmaherithia,

na ndingĩkirĩrĩria rĩngĩ.

Ngũmaherithia o biũ

7 nĩ ũndũ wa meehia maao,

o na ndĩmaherithĩrie marĩa ma maithe maao.

Tondũ nĩmacinagĩra ũbaani irĩmainĩ igũrũ,

na makaamenagĩrĩria marĩ tũthũngũri igũrũ.

Ngũmaherithia o biũ

nĩ ũndũ wa ciĩko ciao iria meekĩĩte.”

8 MWATHANI egũkiuga atĩrĩ,

“Andũ moona atĩ kĩmanjĩka gĩa thabibũ no kĩega-rĩ,

meeranaga matigagĩthũũkie amu no kiume ndibei.

Ũguo noguo na niĩ ngwĩka nĩ ũndũ wa andũ aakwa arĩa mandungatagĩra,

ndikũmaniina oothe hamwe.

9 Nĩngaagĩa na mbeũ thĩinĩ wa Isiraeli,

na thĩinĩ wa Juda ndute andũ a kũgaya bũrũri wakwa wa irĩmainĩ.

Andũ arĩa thuurĩĩte nĩ o makaaũgaya,

na arĩa mandungatagĩra nĩ o magaatũũra kuo.

10 Cianda cia Sharoni igaatuĩka cia kũrĩithagio ng’ondu,

nacio cia Akori cia kwarahagio ng’ombe nĩ andũ arĩa maathaathayagia.

11 “No rĩĩrĩ, inyuĩ arĩa mwandiganĩirie,

na mũkĩriganĩrwo nĩ Zayuni, kĩrĩma kĩrĩa gĩakwa gĩtheru,

inyuĩ mũthaathayagia ngai iria ciĩtagwo Gadi na Meni,

ngai iria ciĩtanagio na mũnyaka na mũtino,

12 marigĩrĩrioinĩ, ngamũneana mũũragwo na rũhiũ rwa njora.

Ngaamwĩka ũguo tondũ ndeetana mũtiananjĩtĩka,

na ndaaria mũtianathikĩrĩria.

Ningĩ nĩmwathiire o na mbere kũũnemera,

na gwĩka maũndũ mooru.

13 Kwoguo-rĩ, ngũkiuga atĩrĩ,

‘Arĩa mandungatagĩra marĩrĩaga makahũũna,

no inyuĩ mũrĩtũũraga na ng’aragu.

Arĩa mandungatagĩra marĩkoragwo na indo cia kũnyua,

no inyuĩ mũrĩtũũraga na nyoota.

Arĩa mandungatagĩra marĩiyũragwo nĩ gĩkeno

no inyuĩ mũrĩikaraga na gĩconoko.

14 Arĩa mandungatagĩra marĩinaga makĩrũũhagia,

no inyuĩ mũrĩrĩraga na mũgeethikĩra.

15 Andũ aakwa arĩa aamũre marĩhũthagĩra rĩĩtwa rĩanyu

rĩrĩa mekwenda mũnyiitwo nĩ kĩrumi.

Niĩ MWATHANI Ngai ndĩrĩmũũragaga,

no andũ arĩa manjathĩkagĩra nĩngaamahe rĩĩtwa rĩerũ.

16 Mũndũ o wothe thĩinĩ wa bũrũri eenda kũraathimwo,

arĩthiaga harĩ Ngai ũrĩa wa ma,

ũrĩa wothe naake ũrĩĩhĩtaga,

arĩĩhĩtaga akĩgwetaga rĩĩtwa rĩa Ngai ũrĩa wa ma.

Amu mathĩĩna ma mahinda ma tene nĩmagaakorwo mariganĩire

na magathengio ndikaamoonage.’ ”

Ũũmbi Mwerũ

17 MWATHANI egũkiuga atĩrĩ,

“Nĩngũũmba igũrũ rĩerũ o na thĩ njerũ.

Maũndũ marĩa makũrũ matigaacooka kũririkanagwo

kana meciiragio ũhoro wamo.

18 Ikaragaai mũkeneete hĩndĩ ciothe,

o na mũcanjamũkage nĩ ũndũ wa indo iria ngũũmba.

Itũũra rĩa Jerusalemu rĩrĩa ngũũmba rĩrĩkoragwo rĩrĩ rĩa gĩkeno,

andũ aarĩo marĩikaraga makeneete.

19 Niĩ na niĩ ndĩrĩkenagĩra Jerusalemu,

o na ngenagĩre andũ aakwa.

Itũũrainĩ rĩa Jerusalemu gũtigaacooka kũiguuo

mũgambo wa kĩrĩro o na wa macakaya.

20 Gũtirĩonekaga ciana igũkua irĩ ngeenge;

arĩa akũrũ nao gũtirĩ ũrĩkuaga atahingĩĩtie matukũ maake.

Mũndũ angĩkua akinyĩĩtie mĩaka igana,

arĩonagwo arĩ o mwĩthĩ.

Mũndũ aaga gũkinyia mĩaka igana,

arĩonaga ta e mũmene.

21 Andũ marĩakaga nyũmba na magacitũũra;

marĩhandaga mĩthabibũ na makamĩgetha arĩ o.

22 Matirĩakaga nyũmba igatũũrwo nĩ andũ angĩ;

matirĩhandaga mĩthabibũ ĩkagethwo nĩ andũ angĩ.

Andũ aakwa marĩtũũraga matukũ maingĩ o ta mĩtĩ;

na nĩmarĩkenagĩra wĩra wa mooko maao ihinda iraaya.

23 Matirĩrutaga wĩra ũtarĩ na uumithio,

kana magĩe na ciana ingĩmaconorithia,

tondũ o eene na ciana ciao nĩndĩrĩmaraathimaga

24 Ndĩrĩtĩkaga mahooya maao mbere ya mangaĩre,

na maahooya, nĩndĩrĩiguaga mahooya maao.

25 Hiti na ng’ondu irĩrĩaga hamwe,

mĩrũũthi ĩrĩage nyeki ta ndeegwa,

na nyamũ cia thĩ ikarĩaga tĩĩri.

Kũu kĩrĩmainĩ gĩakwa kĩrĩa gĩtheru,

gũtigaacooka gũtiihanio kana kũũnũhanwo.”

Isaia 66

MWATHANI gũtuĩra ndũũrĩrĩ

1 MWATHANI ekuuga atĩrĩ,

“Igũrũ nĩkuo gĩtĩ gĩakwa kĩa ũnene,

nayo thĩ nĩ gaturwa ga kũigĩrĩra magũrũ maakwa.

Nĩ nyũmba ya mũthemba ũrĩkũ mũngĩkĩnjakĩra,

na nĩ ta ha hangĩtuĩka haakwa ha kũhuurũkaga?

2 Nĩ niĩ ndoombire indo ici ciothe na mooko maakwa,

o na kĩrĩa gĩothe kĩrĩ muoyo nĩ gĩakwa.

No rĩĩrĩ, mũndũ ũrĩa ũngenagia-rĩ,

nĩ mũndũ ũrĩa wĩnyiihagia na wĩrirĩĩte,

o ũrĩa ũndĩĩĩte na ũnjathĩkagĩra.

3 “Andũ meekaga o ũrĩa mekwenda,

harĩ o, kũruta ndeegwa igoongona,

no ũndũ ũmwe na kũruta mũndũ igongoona.

Gũthĩnja ndũrũme na gũthĩnja ngui

macirute igongoona nĩ ũndũ ũmwe.

Kũruta magongoona ma irio cia mũgũnda,

kana kũruta magongoona ma thakame ya ngũrũe mationaga harĩ na ũtiganu.

Gũcina ũbaani kana gũthaathaiya mĩhianano moonaga o kũhaanaine.

Makenagĩra gũthaathaiya Ngai na njĩra ĩrĩ thaahu.

4 Kwoguo nĩngũmareehithĩria mathĩĩna,

o indo iria metigĩrĩĩte nĩcio ikũmakorerera,

tondũ ndeetana gũtirĩ wanjĩtĩkire,

o na kana ndaaria magĩthikĩrĩria.

O maathiire o na mbere kũũnemera,

na gwĩka maũndũ mooru.”

5 Inyuĩ andũ arĩa mũtĩĩĩte MWATHANI na mũmwathĩkagĩra

taiguai ũrĩa egũkiuga,

“Atĩrĩĩrĩ, aariũ a thooguo arĩa mamũmeneete

o na mamũnyararĩĩte nĩ ũndũ wakwa maroiga atĩrĩ,

‘MWATHANI nĩakĩonanie ũnene wake amũhonokie,

nĩ geetha tuone mũgĩkena.’

No-rĩ, marĩkorererwo no gĩconoko!

6 Tathikĩrĩriai mũigue mbugĩrĩrio ĩyo ĩrĩ itũũra thĩinĩ,

inegene rĩu rĩrĩ Hekaarũ thĩinĩ!

Nĩ mũgambo wa MWATHANI akĩherithia thũ ciake!

7 “Atĩrĩĩrĩ, itũũra rĩakwa rĩrĩa rĩtheru

rĩhaana o ta mũtumia ũheetwo mwana na ihenya, o na ataiguĩte ruwo rwa gũciara.

8 Nĩgũkĩrĩ mũndũ ũrĩ waigua ũndũ ta ũcio,

kana akĩona ũndũ ta ũcio?

Rũũrĩrĩ rũgima no rũgĩe kuo na mũthenya ũmwe?

Bũrũri ũrĩ waciarwo na mũthenya o ũmwe?

No rĩĩrĩ, itũũra rĩa Zayuni rĩaciarire ciana ciarĩo mũthenya ũmwe cono,

rĩaigua ruwo rwa gũciara o ũguo.

9 Mũgwĩciria no ndeke andũ aakwa makinyĩrĩrwo

nĩ hĩndĩ yao ya gũciarwo na ngirie maciarwo?”

Nĩ niĩ MWATHANI ndoiga ũguo.

10 Kenanĩraai na ĩtũũra rĩa Jerusalemu,

na mũcanjamũke hamwe narĩo,

inyuothe mũrĩendeete.

Kenanĩraai narĩo inyuothe mũkoreetwo mũkĩrĩcakaĩra,

11 nĩguo mũkenere ũtonga warĩo,

ta ũrĩa kaana gakenaga karĩ nyondoinĩ cia nyina.

12 Amu MWATHANI ekuuga atĩrĩ,

“Ndĩĩhe itũũra rĩa Jerusalemu ũtonga mũingĩ o ta maaĩ,

na ũtonga wa ndũũrĩrĩ ũrĩtherera kuo o ta rũũĩ rũiyũrĩĩte.

Inyuĩ na inyuĩ mũrĩhaana o ta kaana karĩa kongithagio nĩ nyina,

gagakuuo na mũgongo na gagakirio na wendo.

13 O ta ũrĩa mwana oomagĩrĩrio nĩ nyina,

noguo na niĩ ndĩmũũmĩrĩria.

Ndĩrĩmũũmĩrĩria mũrĩ o kũu Jerusalemu.

14 Mũrĩonaga maũndũ macio magĩĩkĩka mũgakena,

mũgaikara mũrĩ na hinya na mũrĩ agima.

Nĩmũrĩmenyaga atĩ nĩndeithagia arĩa mandungataga,

na ngaherithia thũ ciakwa.”

15 Atĩrĩĩrĩ, MWATHANI agooka arĩ na mwaki,

agooka akuuĩĩtwo nĩ kĩhuuhũkanio,

nĩguo erĩhĩrie kũrĩ arĩa mamũraakarĩĩtie.

16 Amu Ngai agaatuĩra andũ oothe

na mwaki na rũhiũ rwake rwa njora,

na arĩa agaatuĩra kũũragwo nĩ aingĩ.

17 Andũ arĩa metheragia na magethaamba magaathiĩ marũmanĩrĩire mĩtitũinĩ ĩrĩa ĩrutagĩrwo magongoona, arĩa marĩaga nyama cia ngũrũe o na mbĩa, na nĩ nyama irĩ thaahu, MWATHANI ekuuga atĩ acio oothe makaaniinanĩrio hamwe.

18 Nĩnjũũĩ maũndũ maao o na meciiria maao. Ngooka gũcookanĩrĩria andũ a ndũũrĩrĩ ciothe na thiomi ciothe. Nao magooka meyonere ũrĩa ngwĩka na hinya wakwa,

19 na nĩmakaamenya atĩ nĩ niĩ ndĩmaherithagia.

Arĩa aao magaatigara nĩngaamatũma mathiĩ mabũrũri ma kũraaya ma Sipania, Libia na Ludia, andũ mooĩ mũno gũtũmĩra ũta na mĩguĩ. O na nĩngaamatũma mathiĩ mabũrũri ma Tubali na Ngiriki o na mabũrũri mangĩ ma kũraaya marĩa matarĩ maigua ngumo ya rĩĩtwa rĩakwa o na kana makĩona hinya na ũnene wakwa. Matigari macio nĩmakaanĩrĩra ũhoro wa ũnene wakwa ndũũrĩrĩinĩ icio.

20 Ningĩ nĩmakoongania andũ oothe a rũũrĩrĩ rwanyu kuuma ndũũrĩrĩinĩ ciothe mamareehe marĩ ta kĩheeo harĩ MWATHANI. Makaamareehe makuuĩĩtwo na mbarathi, ngaari cia mbarathi, na itanda cia gũkuuo na ciande. Angĩ magaakuuo nĩ nyũmbũ na ngamĩĩra iria ndeng’eri mũno. Acio oothe makaareehwo o kĩrĩmainĩ gĩakwa kĩrĩa gĩtheru, kũu Jerusalemu. Makaareehwo o ta ũrĩa Aisiraeli mareehage iheeo ciao cia irio cia mĩgũnda Hekaarũinĩ, maciĩkĩrĩĩte ciondoinĩ itarĩ na gĩko.

21 Ngooya amwe aao ndĩmatue athĩnjĩri Ngai na Alawii. Ũguo nĩguo niĩ MWATHANI ndoiga.

22 MWATHANI ekuuga atĩrĩ,

“O ta ũrĩa igũrũ rĩu rĩerũ na thĩ ĩyo njerũ iria ngũũmba, igaatũũra harĩ niĩ-rĩ,

noguo njiarwa cianyu na ngumo yanyu igaatũũra.

23 Hĩndĩ ĩyo-rĩ, andũ oothe magookaga magaathaathayagia

kuuma Thabatũ ĩmwe kinya ĩrĩa ĩngĩ,

na kuuma mweri ũmwe kinya ũrĩa ũngĩ.

24 “Makiuma gũũthaathaiya nĩmakoonaga ciimba cia andũ arĩa maagire kũnjathĩkĩra; igunyũ iria igaacirĩaga itigaakuaga, na mwaki ũrĩa ũgaacicinaga ndũrĩ hingo ũkaahorekaga, na ciimba cia andũ acio igaatuĩka indo irĩ magigi harĩ andũ oothe.”

Rwĩmbo rwa Solomoni 1

1 Rũũrũ nĩruo rwĩmbo rwega gũkĩra nyĩmbo ciothe rũrĩa Solomoni ainire.

Irebeta rĩa mbere

2 Taamumunya na kanua gaaku;

wendo waku-rĩ, nĩ mwega gũkĩra ndibei.

3 Maguta macio wĩhakĩĩte me na mũtararĩko mwega;

rĩĩtwa rĩaku no ta maguta macio.

Hatirĩ mũirĩĩtu o na ũmwe ũtakwendeete.

4 Njoya ũũre na niĩ;

gĩtuĩke mũthamaki wakwa na ũndoonyie o nyũmba thĩinĩ.

Kũu nĩkuo tũgũthiĩ gwĩkeneria,

tũkĩrikĩrie wendo hatarĩ na itherũ.

Hatirĩ na nganja andũ a nja oothe nĩmakwendeete!

5 Atĩrĩĩrĩ, andũ aya a nja a Jerusalemu!

ndĩ mũirũ, no ndĩ o mũthaka,

njirĩĩte o ta hema cia Kedari

no ngathakara o ta mbathiya ĩrĩ mũciĩ gwa Solomoni.

6 Mũtikaamenere ũirũ wakwa,

atĩ nĩ ũndũ nĩnjinĩĩtwo nĩ riũa.

Nĩ aariũ a maitũ mandaakarĩire,

magĩkĩndutithia wĩra mũgũndainĩ wa mĩthabibũ,

ngĩkĩaga mahinda ma gwĩthakaria.

7 Tanjĩĩra atĩrĩ wee mwendwa wakwa,

ũrĩrĩithia ũhiũ waku kũ?

Ningĩ-rĩ, ũrĩarahia rũũru rwaku ha?

Nĩ kĩĩ gĩgũtũma njikare njagaagĩĩte

ngĩgũcaria gatagatĩinĩ ka ndũũru cia arĩithi angĩ?

8 Kaĩ ũtooĩ handũ hau nĩ ha,

o wee ũthakarĩĩte kũrĩ andũ a nja oothe?

Kiumagare ũrũmĩrĩre rũũru;

ũkarĩiithie mbũri ciaku hakuhĩ na hema cia arĩithi.

9 Atĩrĩĩrĩ we mwendwa wakwa, ũtũmaga arũme mahĩahĩe

o ta ũrĩa mbarathi ya mũgoma

ĩtũmaga mbarathi cia njamba cia kũguucia ngaari cia mũthamaki wa Misiri ihĩahĩe.

10 Njuĩrĩ ciaku nĩ thaka mũno igwĩrĩire makai maaku

na ikaagĩria ngingo yaku ta mĩgathĩ.

11 No ithuĩ na ithuĩ nĩtũgũgũthondekera

mĩgathĩ ya thahabu ĩgemeetio na tũbungo twa betha.

12 Mũthamaki wakwa nĩgũkoma arakomeete gĩtandainĩ gĩake.

Namo maraaci maakwa maragĩkĩĩyũria

kũu arakomeete mũtararĩko mwega.

13 Mwendwa wakwa e na mũtararĩko ta wa manemane,

akomeire nyondo ciakwa.

14 Mwendwa wakwa atariĩ o ta mahũa ma gĩthaka

macanũkĩĩte mĩgũndainĩ ya mĩthabibũ kũu Enigedi.

15 Mwendwa wakwa, ĩ ndũkĩrĩ mũthaka!

Maitho maaku maiyũire wendo!

16 Ĩ ndũkĩrĩ mũthaka mũraata wakwa;

nĩũngenagia mũno!

Nyeki nduru nĩ yo ĩgũtuĩka ũrĩrĩ witũ,

17 mĩtarakwa ĩtuĩke mĩratho ya nyũmba iitũ,

nayo mĩkarakaba ĩtuĩke mĩitĩrĩro.

Rwĩmbo rwa Solomoni 2

1 Niĩ ndĩ o ihũa rĩa gĩthaka rĩmereete Sharoni,

o gĩtooka kĩrĩ gĩtuambainĩ.

2 Ta gĩtooka gĩgĩkũra gatagatĩ ka mĩigua,

noguo mwendwa wakwa atariĩ

e gatagatĩ ka andũ a nja arĩa angĩ.

3 Ta mũcungwa ũgĩkũra gatagatĩ ka mĩtĩ ya gĩthaka,

no taguo mwendwa wakwa atariĩ

e gatagatĩ ka arũme arĩa angĩ.

Nĩnyendeete gũikara hakuhĩ naake

na nĩangenagia mũno.

4 Nĩ we wandeehire gũũkũ irugainĩ rĩake

naguo wendo wake ũgĩkĩingĩha mũno harĩ niĩ.

5 Heei thabibũ cinjĩkĩre hinya,

na macungwa maanyootore

tondũ ndĩmũrũarie nĩ wendo.

6 Guoko gwake kwa ũmotho ta nĩkũũnyiite igoti,

nakuo kwa ũrĩo gũkĩĩhĩmbĩrie.

7 Inyuĩ andũ a nja a Jerusalemu, mwĩhĩteei,

na thiiya na thwariga cia werũ,

atĩ mũtigũtoonyerera wendo witũ.

Irebeta rĩa keerĩ

8 Nĩndĩraigua mũgambo wa mwendwa wakwa!

Nĩgũũka arooka

ookĩĩte akĩrũũgarũũgaga irĩmainĩ,

o na agĩcimbicaga ithũngũriinĩ.

9 Mwendwa wakwa atariĩ ta thwariga,

o na ta thiiya ya njamba.

Nĩ ũcio wĩhithĩĩte na hau rũthingoinĩ rwa na nja

nĩkũrorereria ararorereria na ndirica

na agacũũthĩrĩria na mwanya.

10 Mwendwa wakwa nĩkũnjarĩria aranjarĩria.

Mũraata wakwa, o we mwendwa wakwa,

gĩũkĩre tũthiĩ.

11 Hĩndĩ ya heho nĩ rĩthiru,

mbura nĩtigĩĩte kuura;

12 thĩ nĩĩrakunũka mahũa,

hĩndĩ ya magetha nĩ nginyu,

nacio ndutuura nĩiraiguĩka ikĩina.

13 Ngũyũ-rĩ, nĩciambĩrĩirie kwĩrua,

o na ningĩ kwĩ na mũtararĩko mwega wa kĩro kĩa mĩthabibũ.

Mũraata wakwa, o wee mwendwa wakwa, gĩũkĩre tũthiĩ.

14 Wee ũhaana ndutuura ĩhithĩĩte

ndwaroinĩ cia mahiga.

Takĩreke nyone ũthiũ ũcio waku mũthaka ũguo,

o na njigue mũgambo ũcio waku mũnyoroku ũguo.

15 Nyiita mbwe o na ciana ciacio,

itigathũũkie kĩro kĩa mĩthabibũ iitũ.

16 Mwendwa nĩ wakwa, na niĩ ndĩ wake;

arĩithagia ũhiũ wake itookainĩ

17 o nginya rĩrĩa kũrĩrura

nacio ciĩruru ikorwo ithirĩĩte.

Hũndũka mwendwa wakwa, o ta thwariga

o na ta thiiya ya njamba ĩrĩ irĩmainĩ cia Betheli.

Rwĩmbo rwa Solomoni 3

1 Ũtukũ o ũtukũ, ndĩ toro, njethaga ũcio mwendwa wakwa,

ndĩmũcaragia ngamwaga.

# ndĩmwĩtaga na ndanjĩtĩkaga

2 Njũkagĩra ngacangacanga itũũrainĩ,

ngoorũũra barabarainĩ o na njĩrainĩ,

ngĩcaria ũcio mwendwa wakwa,

ndĩmũcaragia o nakuo ngamwaga.

3 Arangĩri makĩrangĩra itũũra makangora,

ngamooria atĩrĩ, “Nĩmuoneete mwendwa wakwa?”

4 Ndatigana nao o ro ũguo, ngamuona,

ngamũhĩmbĩria na ndĩmũrekie,

o nginya ngamũtoonyia kwa maitũ nyũmba.

Ngakĩmũtoonyia o nyũmba ya thĩinĩ harĩa ndaciarĩirwo.

5 Inyuĩ andũ a nja a Jerusalemu, mwĩhĩteei

na thiiya na thwariga cia werũ,

atĩ mũtigũtoonyerera wendo witũ.

Irebeta rĩa gatatũ

6 Nũũ ũrĩa ũrambata akiuma na werũinĩ

acomokeete ta ndoogo ĩgĩthiĩ na igũrũ,

arĩ na mũtararĩko wa manenane na ũbaani,

o na wa maraaci marĩa meendagio nĩ ahũũri a mbiacara?

7 Nĩ Solomoni ũrooka akuuĩĩtwo na gĩtĩ gĩake,

arangĩirwo nĩ njamba mĩrongo ĩtandatũ,

njamba iria cia bata mũno thĩinĩ wa Isiraeli.

8 Ciothe nĩciũũĩ kũhũthĩra hiũ cia njora wega,

ciothe nĩ njoorua cia mbaara,

o njamba ĩhotoreete rũhiũ rwayo njohero,

ĩhaarĩirie kũrũa kũngĩoneka ũgwati ũtukũ.

9 Mũthamaki Solomoni nĩatumithĩĩtie gĩtĩ gĩa gũkuuagwo nakĩo.

Agĩthondekithĩĩtie na mbaaũ iria njega mũno cia Lebanoni.

10 Magũrũ maakĩo magemeetio na betha,

na mwĩtiiro wa kĩo ũgemeetio na thahabu.

Harĩa haikaragĩrwo hagemeetio na gĩtambaya kĩa rangi wa babũ,

kĩgemeetio na wendo nĩ andũ a nja a Jerusalemu.

11 Andũ a nja a Zayuni, gĩũkeei

mwĩrorere mũthamaki Solomoni.

Ehumbĩĩte thũmbĩ ĩrĩa nyina aamwĩkĩrire

mũthenya wa kũhikania, o mũthenya ũrĩa aiyũrĩĩtwo nĩ gĩkeno.

Rwĩmbo rwa Solomoni 4

1 Ĩ mwendwa wakwa ndũkĩrĩ mũthaka;

kaĩ wĩ mũthaka-ĩ!

Maitho maaku maiyũire wendo

ngĩmoonera gĩtambayainĩ kĩu gĩa gĩcungi wĩhumbĩire nakĩo mũtwe.

Ũracimbicia njuĩrĩ yaku o ta rũũru rwa mbũri,

rũgĩcimbica ruumĩĩte irĩmainĩ cia Gileadi.

2 Magego maaku merũhĩĩte o ta guoya wa ng’ondu

warĩĩkia gũthambio na gũcanũrwo.

Hatirĩ o na rĩmwe rĩmunye,

moothe maiyũire kanua.

3 Iromo ciaku nĩ nduune wega;

ĩ itionekaga irĩ thaka rĩrĩa ũkwaria!

Makai maaku marakenga wega makĩonekera,

gĩtambayainĩ kĩu gĩa gĩcungi wĩhumbĩire nakĩo mũtwe.

4 Ngingo yaku ĩtendereete na ikanyoroka ta mũnaara wa Daudi;

mũgathĩ ũrĩa wĩkĩrĩĩte no ta ngo ngiri imĩthiũrũrũkĩirie.

5 Nyondo ciaku itariĩ ta mahatha ma thwariga

o na kana mahatha ma thiiya makĩrĩa itookainĩ.

6 Ngũikara kĩrĩmainĩ kĩa manemane,

o kĩu kĩ na mũtararĩko mwega wa ũbaani,

o nginya gũkĩe na nduma ithire.

7 Ĩ mwendwa wakwa ndũkĩrĩ mũthaka;

kaĩ wĩ mũthaka-ĩ!

8 Ũka, mũhiki wakwa, tũikũrũke kuuma irĩmainĩ cia Lebanoni,

ũka tũikũrũke kuuma Lebanoni.

Ũka tũikũrũke tuume gacũmbĩrĩ ga kĩrĩma kĩa Amana,

na tuume gacũmbĩrĩ ga kĩrĩma gĩa Seniru na kĩa Herimoni,

kũrĩa mĩrũũthi na ngarĩ itũũraga.

9 Atĩrĩĩrĩ, wee mwendwa wakwa,

o we mũhiki wakwa,

ndoona maitho maaku o na mũgathĩ ũrĩa wĩkĩrĩĩte,

ndoorwo nĩ hinya.

10 Atĩrĩĩrĩ, wee mwendwa wakwa, o wee mũhiki wakwa,

wendo waku nĩũnjanjamũraga.

Wendo waku wĩ cama gũkĩra ndibei,

maraaci maaku maratararĩka wega gũkĩra indo ciothe nungi wega.

11 Mĩromo yaku ĩtaataga ũũkĩ, wee mwendwa wakwa,

rũrĩmĩ rwaku no ta iria na ũũkĩ harĩ niĩ;

nguo ciaku irĩ na mũtararĩko o ta wa Lebanoni.

12 Atĩrĩĩrĩ, wee mwendwa wakwa, o we mũhiki wakwa,

ũhaana ta mũgũnda mũirĩgĩre,

o ta mũgũnda mũgitĩre,

o na ta gĩthima kĩirĩgĩre

13 kũrĩa mĩmera ĩkũraga wega.

Ĩkũraga ĩkahaana o ta mũgũnda wa mĩkongomanga

ĩgaciaraga matunda meega mũno.

Kũu nĩkũrĩ mĩhanuni, o na mĩmera ĩrĩa yumaga undi,

14 manjano, irago, mĩndarathini, mĩmera yothe ĩrĩa yumaga ũbaani;

manemane na thubiri, hamwe na mĩmera ĩrĩa ĩkĩrĩĩtie ĩrĩa ĩngĩ kũnunga wega.

15 Ũhaana o ta mũgũnda ũraitĩrĩrio maaĩ nĩ ithima,

ithima cia maaĩ maratherera,

o tũrũũĩ tũrathothoka irĩmainĩ cia Lebanoni.

16 Arahũka, wee rũhuuho rwa na rũgongo,

nawe rũhuuho rwa na kĩanda huruutana mũgũndainĩ wakwa,

nĩguo ũtararĩke wega mũno.

Kĩreke mwendwa wakwa ooke mũgũndainĩ wake

nĩ geetha ekenie na matunda maaguo marĩ mũrĩo mũno.

Rwĩmbo rwa Solomoni 5

1 Atĩrĩĩrĩ, wee mwendwa wakwa, o wee mũhiki wakwa,

nĩndĩratoonya mũgũnda wakwa,

ndĩramaatha indo nungi wega o na manemane,

ngarĩa magua maakwa marĩa me na ũũkĩ,

na nganyua ndibei yakwa o na iria.

Rĩai na mũnyue, inyuĩ mwendaine,

o nginya mũrĩĩo nĩ wendo!

Irebeta rĩa kana

2 Ndĩrakomeete, no nĩndĩreiguaga.

Ndĩraroota mwendwa wakwa akĩringaringa mũrango.

Hingũrĩra wee mwendwa wakwa, o wee wakwa marirũ,

wĩ wakwa wa ngoro.

Ndĩmũhehere mũno na nĩndĩrainaina nĩ heho.

3 Nĩndutĩĩte nguo, na ndigũcicookia;

nĩndĩthambĩĩte magũrũ na ndigũkinya thĩ rĩngĩ.

4 Mwendwa wakwa aragĩthukia mũrango,

na niĩ ndĩrethithimũkwo.

5 Ndĩragĩũkĩra hingũrĩre mwendwa wakwa,

ndĩrakĩnyiita karĩnga ka mũrango,

na mooko maakwa maiyũire manemane,

na ciara irataata manemane o ĩrĩa ndweku.

6 Ndĩrakĩhingũrĩra mwendwa wakwa,

no nĩararĩĩkĩĩtie gũthiĩ.

Ĩ ndigũkeneete ndaigwa akĩaria!

Ndakĩmũcaria no ndinamuona;

ndakĩmwĩta no ndananjĩtĩka.

7 Arangĩri a itũũra makĩrangĩra itũũra mangora,

mahũũra mandiihangia,

arangĩri arĩa moima hakuhĩ

na rũthingo manduta nguo yakwa.

8 Inyuĩ andũ a nja a Jerusalemu ndamũthaitha

mũngĩona ũcio mwendwa wakwa,

mwĩreei atĩ ndĩmũrũarie nĩ wendo.

9 Wee nyarari ĩno, kaĩ mwendwa waku akĩrĩĩte arũme arĩa angĩ na kĩ?

Amakĩrĩĩtie kĩ nĩguo ũtwĩhĩtithie?

10 Mwendwa wakwa nĩ mũthaka na mũrũngarũ,

nĩ mwega gũkĩra arũme oothe.

11 Ũthiũ wake ũkengaga ta thahabu,

njuĩrĩ yake nĩ yakĩgondoka

nĩ njirũ ciri.

12 Maitho maake mathakarĩĩte o ta ndutuura

ciikaire rũteereinĩ rwa karũũĩ,

ihaana ta ithambĩĩtio na iria igathera cua.

13 Makai maake nĩ mathaka ta mũgũnda ũiyũire indo nungi wega.

Mĩromo yake nĩ ta itooka;

yororoetio nĩ manemane ndweku.

14 Mooko maake moombĩĩtwo o ũũ wega,

eekĩrĩĩte mbete igemeetio na tũhiga twa goro.

Mwĩrĩ wake ũtendereete ta mũguongo,

na ũkagemio na mĩgathĩ ya tũhiga twa goro twa rangi wa mburuu.

15 Magũrũ maake nĩ marũngarũ

na matirĩ mbogoro.

Maũũthĩ maake mathakarĩĩte ta irĩma cia Lebanoni

agakĩrũngara ta mĩtarakwa yakuo.

16 Mũgambo wake nĩ mũnyoroku mũno,

naake nĩ wa kwendeka mũno.

Atĩrĩĩrĩ, andũ a nja a Jerusalemu,

ũguo nĩguo mwendwa wakwa ahaana.

Rwĩmbo rwa Solomoni 6

1 We nyarari ĩno, kaĩ mwendwa waku agĩthiĩte kũ?

Agerire njĩra ĩrĩkũ nĩguo tũgũteithie kũmũcaria?

2 Mwendwa wakwa nĩathiĩte mũgũnda gwake,

kũrĩa akũragia indo nungi wega.

Nĩkũrĩithia ararĩithia kuo agĩtuaga itooka.

3 Mwendwa wakwa nĩ wakwa ki, na niĩ ndĩ wake;

nĩkũrĩithia ararĩithia itookainĩ.

Irebeta rĩa gataano

4 Atĩrĩĩrĩ, mwendwa wakwa, ũthakarĩĩte o ta itũũra rĩa Jerusalemu,

ningĩ ũkaagĩrĩra o ta itũũra rĩa Tiriza,

ũgakĩgĩa itua nda o ta matũũra maya manene.

5 Tiga kũndora, nĩũranguucĩrĩria mũno.

Ũracimbicia njuĩrĩ yaku o ta rũũru rwa mbũri

rũgĩcimbica ruumĩĩte irĩmainĩ cia Gileadi.

6 Magego maaku merũhĩĩte o ta rũũru rwa ng’ondu rwathambio o ro ũguo.

Hatirĩ o na rĩmwe rĩmunye;

moothe maiyũire kanua.

7 Makai maaku marakenga wega makĩonekera gĩtambayainĩ kĩu wĩhumbĩire nakĩo mũtwe.

8 Mũthamaki e na ngatha mĩrongo ĩtandatũ

na atumia a kũigwo mĩrongo ĩnaana

o na airĩĩtu matangĩtarĩka!

9 No rĩĩrĩ, no ũmwe nyendeete.

Ũcio nĩwe ngatha yakwa.

Nyina ndarĩ mũirĩĩtu ũngĩ,

na no ko kaana karĩa nyina eendeete.

Andũ a nja mamuona, no kũmũgaathĩrĩria mamũgaathĩrĩria.

Naake kwini na atumia a kũigwo a mũthamaki no kũmuugĩra maamuugagĩra ngemi.

10 Mwarĩ ũyũ nĩ ũrĩkũ ũthakarĩĩte ta ruoro rũgĩtema?

Nĩ mũthaka na nĩarakenga;

arametameta o ta riũa kana ta mweri.

11 Ndaikũrũkire mũgũnda wa mĩroothi,

ngarore tũmĩtĩ tũrĩa tũmereete kũu kĩandainĩ,

ngoone kana mĩthabibũ nĩthundũrĩĩte,

na kana mĩkongomanga nĩ mĩrutu kĩro.

12 Nĩndĩrainaina, ũtũmĩĩte nyootere wendo

o ta ũrĩa ndereba wa ngaari ya mbarathi ya ita anyootagĩra mbaara.

13 Kĩrũũgarũũge ũkĩinaga;

kĩrũũgarũũge ũkĩinaga, wee mwarĩ wa Shulamu;

kĩrũũgarũũge ũkĩinaga tũkwĩroreire.

Mũgũkĩenda nyine mwĩĩndoreire mũrĩ gĩcĩgĩ nĩkĩ?

Rwĩmbo rwa Solomoni 7

1 Ĩ magũrũ maaku, mwarĩ ũyũ wa mũnene,

wĩkĩrĩĩte nyamũga ti mathaka!

Ciero ciaku ihaana ta ici ithondekeetwo nĩ mũthondeki njoorua.

2 Mũkonyo waku no ta kanya

gataniaraga ndibei nungĩrĩrie indo nungi wega.

Nda yaku na yo ĩhaana ta kĩhumbu kĩa ngano ngonyore

gĩthiũrũrũkĩirio nĩ itooka.

3 Nyondo ciaku itariĩ ta mahatha ma thwariga

kana mahatha ma thiiya.

4 Ngingo yaku ĩcomookeete ta mũnaara wa mũguongo.

Namo maitho maaku no ta maaĩ marĩ itũũrainĩ rĩa Heshiboni,

o hakuhĩ na kĩhingo gĩa itũũra rĩu inene.

Iniũrũ rĩaku narĩo rĩthakarĩĩte

o ta mũnaara wa Lebanoni ũrĩa ũrorereirie Damasiki.

5 Mũtwe waku ũgũthakarĩĩtie o ta kĩrĩma gĩa Karimeli,

makundo ma njuĩrĩ ciaku mairĩĩte kiri,

ũirũ wamo ũgakĩguucĩrĩria mũthamaki.

6 Kaĩ wĩ mwega na mũthaka-ĩ!

Kaĩ wendo waku nĩũkenagia mũndũ-ĩ!

7 Atĩrĩĩrĩ, ũrũngarĩĩte o ta mũkĩndũ

nacio nyondo ciaku ihaana ta tũmanjika twa ngĩndũ.

8 Nĩngũhaica o mũkĩndũ igũrũ,

ngeetuĩre ngĩndũ.

Nyondo ciaku ituĩkĩĩte harĩ niĩ ta tũmanjika twa thabibũ,

nayo mĩheehũ yaku ituĩkĩĩte ta mũtararĩko wa macungwa.

9 Kanua gaaku gatuĩkĩĩte ta ndibei ĩrĩa njega mũno.

Mwendwa wakwa tanĩakĩnyue ndibei ĩyo,

tanĩakĩmĩmerũkie na mũmero wake.

10 Niĩ-rĩ, ndĩ wa mwendwa wakwa,

naake nĩ niĩ eriragĩria.

11 Ũka, mwendwa wakwa, tuumagare tũthiĩ mĩgũndainĩ,

tũkaraarĩrĩre matũũrainĩ.

12 Tũkaarooka gũkĩra rũũciinĩ tene tũthiĩ mĩgũndainĩ ya mĩthabibũ,

tũkarore kana mĩthabibũ nĩthundũrĩĩte,

kana nĩyambĩrĩirie kũruta kĩro,

o na kana mĩkongomanga nĩrutĩĩte kĩro.

Kũu nĩkuo ngaakuoneria ũrĩa ngwendeete.

13 Nĩ hĩndĩ matunda marĩa mahaana nathi maratararĩka,

na mũrangoinĩ haitũ haiyũire matunda moothe marĩa meega.

Atĩrĩĩrĩ mwendwa wakwa, matunda marĩa ndatuire na marĩa ndatua moothe nĩwe njigĩire.

Rwĩmbo rwa Solomoni 8

1 Naarĩ korwo ũrĩ mũrũ wa maitũ,

ũrĩa maitũ oongithirie nyondo ciake!

Hĩndĩ ĩyo no ngũmumunye

o na ingĩcemania nawe njĩrainĩ,

na gũtirĩ mũndũ ũngĩnduĩra.

2 Ingĩgũtoonyia o nyũmba kwa maitũ,

kũu nĩkuo ũngĩnjiguithĩria ũhoro wa wendo.

Ingĩkũhe ndibei ĩrĩa njĩkĩre indo nungi wega,

ũkĩnyue ngogoyo ya ikongomanga rĩakwa.

3 Guoko gwaku kwa ũmotho gũkĩĩnyiite o igoti,

nakuo kwa ũrĩo gũkĩĩhĩmbĩrie.

4 Inyuĩ andũ a nja a Jerusalemu, ndamũthaitha mwĩhĩteei,

atĩ mũtigũtoonyera wendo witũ.

Irebeta rĩa gatandatũ

5 Nũũ ũyũ ũrambata akiuma na werũinĩ

anyiitanĩĩte mooko na mwendwa wake?

Hau rungu rwa mũtĩ wa mũcungwa,

o hau maitũguo aagũciarĩire-rĩ,

nĩ ho ndĩragũũkĩririe ũkomeete.

6 Wendo waku tanĩũtuĩke o wakwa nyiiki,

ndũkaanamumunye mũndũ wa nja ũngĩ o tiga niĩ.

Wendo-rĩ, wĩ hinya gwĩ gĩkuũ,

wendo wĩ hinya o ta gĩkuũ kĩo kĩnene.

Ũrĩrĩmbũkaga ta mwaki,

ũgaakana ta mwaki ũtangĩhoreka.

7 Wendo ndũngĩhorio nĩ maaĩ;

o na kana ũtwarwo nĩ kĩguũ.

O na mũndũ angĩruta ũtonga wake agũre wendo,

no gũconorwo angĩconorwo.

8 Tũrĩ na kairĩĩtu ka maitũ, nako gatiumĩĩtie nyondo.

Rĩu-rĩ, tũgaageeka atĩa rĩrĩa gagaakinya ga kwarĩrio nĩ arũme?

9 Kangĩgaatuĩka ta rũthingo,

tũgaagaakĩrĩra mũnaara wa betha.

Kangĩgaatuĩka ta mũrango,

tũgaakagitira na rũirigo rwa mbaaũ cia mĩtarakwa.

10 Niĩ ndĩ o rũthingo,

nacio nyondo ciakwa no ta tũmĩnaara

twa rũthingo rũu.

Mwendwa wakwa nĩoĩ atĩ tũrĩ naake,

nĩnjiguaga njiganĩire na ngoona thaayũ.

11 Solomoni-rĩ, arĩ na mũgũnda wake wa mĩthabibũ handũ heetagwo Baali Hamoni.

Mũgũnda ũcio aũkomborithĩĩtie andũ a kũrĩma,

na o mũndũ amũrĩhaga icunjĩ cia betha ngiri ĩmwe (1,000).

12 Solomoni arigagia na icunjĩ cia betha ngiri ĩmwe (1,000),

nao arĩmi acio makarigia na betha magana meerĩ (200);

no niĩ ndĩ na mũgũnda wakwa kĩũmbe wa mĩthabibũ.

13 Atĩrĩĩrĩ, wee mwendwa wakwa,

takĩreke njigue ũkĩnjarĩria ũrĩ mũgũnda;

araata aakwa nĩmeetereire kũigua mũgambo waku.

14 Hiũha, mwendwa wakwa,

o ta thiiya kana thwariga ya njamba,

yumĩĩte irĩmainĩ kũrĩa gũkũraga indo nungi wega.