IBUKU RฤจA ลจHORO ลจRฤจA MWEGA (GIKCL)

Ngai gũtugana

1 MWATHANI aroiga atĩrĩ,

“Haaha harĩ na maaĩ,

mũndũ o wothe ũnyootiĩ nĩoke.

Inyuĩ na inyuĩ mũtarĩ na mbeeca,

ũkaai mũgũre irio mũrĩe.

Ũkaai mũgũre ndibei na iria,

gũtirĩ mbeeca mũgwĩtio.

2 Atĩrĩĩrĩ, mũhũthagĩra mbeeca cianyu

na indo itangĩmũhũũnia nĩkĩ?

Mũhũthagĩra mĩcaara yanyu

na mũgatigwo mũtaiganĩĩtie nĩkĩ?

Thikĩrĩriai na mwĩke ũrĩa nguuga,

na nĩmũrĩrĩaga irio iria njega mũno.

3 “Tegaai matũ mũthikĩrĩrie

na mũũke harĩ niĩ.

Ũkaai harĩ niĩ na nĩmũgũtũũra muoyo.

Nĩngũthondeka kĩrĩĩkanĩro gĩa gũtũũra na inyuĩ

na ndĩmũhe iraathimo iria ndeerĩire Daudi.

4 Nĩndatuire Daudi mũtongoria na mũnene wa ndũũrĩrĩ,

na nĩndamũhũthĩrire ngĩonia

ndũũrĩrĩ ũhoti wakwa.

5 Nĩmũgaatũmanĩra ndũũrĩrĩ ng’eni,

na ndũũrĩrĩ icio itamũũĩ igooka kũrĩ inyuĩ iteng’ereete.

Niĩ MWATHANI Ngai wanyu,

o niĩ Ũrĩa Mũtheru wa Isiraeli,

nĩ niĩ ngaatũma ũndũ ũcio ũtuĩkĩke,

na nĩngaamũheithia gĩtĩĩo na riiri.”

6 Atĩrĩĩrĩ, cariai MWATHANI rĩrĩa angĩoneka;

mũhooei rĩu e hakuhĩ.

7 Andũ arĩa imaramari nĩmatigane na mĩtugo yao;

na arĩa matarĩ athingu magarũrĩre mĩciirĩrie yao.

Nĩmacookerere MWATHANI Ngai witũ,

nĩekũmaiguĩra tha na amoohere.

8 Tondũ-rĩ, niĩ MWATHANI ndĩroiga atĩrĩ,

“Meciiria maakwa matihaanaine na maanyu

na njĩra ciakwa itiringaine na cianyu.

9 Ta ũrĩa igũrũ rĩraihanĩrĩirie na thĩ,

noguo njĩra ciakwa iraihanĩrĩirie na cianyu,

na noguo meciiria maakwa matiganĩĩte na maanyu.

10 “Atĩrĩĩrĩ, mbura na mbarabu ciumaga igũrũ

na iticookaga na kũu igũrũ itaihũgĩĩtie thĩ.

Igagĩtũma mĩmera ĩmere na ĩkũre,

nacio irio cia kũrĩa na mbegũ cia kũhanda ikooneka.

11 Ũguo noguo mũgambo ũrĩa njaragia,

ũtarĩnjookagĩrĩra ũtahingĩĩtie ũrĩa ndĩũbangĩire.

Ndũkaaga kũhingia mũbango ũrĩa ndĩũbangĩire

na nĩũrĩĩkaga ũrĩa wothe ndĩũtũmĩĩte ũgeeke.

12 “Atĩrĩĩrĩ, mũkoima Babiloni mũkeneete

na mũrekererio muume kuo na njĩra ya thaayũ.

Irĩma na tũthũngũri nĩikaanũka ikĩinaga mbere yanyu:

nayo mĩtĩ yothe ya mũtitũ yanĩrĩre nĩgũkena.

13 Mĩthengera nĩyo ĩgakũra kũrĩa rĩu kũrakũra mĩtare.

Mĩhandathi nayo ĩkũre kũrĩa rĩu kũrakũra cong’e.

Ũndũ ũcio ũgĩtuĩke rũũri rwa gũtũũra tene na tene rwakũririkananagia

ũrĩa niĩ MWATHANI njĩkĩĩte.”

Ndũũrĩrĩ ciothe nĩigaturanĩrwo hamwe na andũ a Ngai

1 MWATHANI aroiga atĩrĩ,

“Ĩkagaai maũndũ ma waragania na ma ũthingu,

nĩ gũkorwo nĩngũũka o na ihenya ndĩmũhonokie.

2 Kũraathimwo nĩ mũndũ wothe

wĩkaga na akarũmia maũndũ maya:

ũhingagia wega mũthenya wa Thabatũ

akaaga kũmĩthaahia;

na ũrĩa wĩrigagĩrĩria gwĩka ũndũ o ũrĩkũ mũũru.

3 “Mũtikaanareke mũrũũrĩrĩ ũrĩa wĩnyiitithanĩĩtie na andũ a MWATHANI, oige,

‘MWATHANI nĩekũnyamũrania na andũ aake.’

Mũndũ mũrũme mũhakũre ndakaanarekwo ecookie akiugaga,

‘Niĩ ndirĩ kĩene, tondũ ndingĩhota gũciara.’

4 MWATHANI areera mũndũ ta ũcio atĩrĩ,

‘Ũngĩhingagia mĩthenya ya Thabatũ,

ũgeekaga maũndũ marĩa makenagia MWATHANI

ũkarũmagia kĩrĩĩkanĩro gĩakwa,

5 nĩngaatũma ũririkanagwo Hekaarũinĩ yakwa na gatagatĩinĩ ka andũ aakwa,

gũkĩra rĩrĩa ũngĩagĩire na ciana cia aanake na cia airĩĩtu.

Nĩngaakũheithia ngumo ĩtagaathira.’ ”

6 Andũ a ndũũrĩrĩ arĩa menyiitithanĩĩtie na andũ a MWATHANI,

nĩguo matungatagĩre na meendage MWATHANI,

mahingagia mĩthenya ya thabatũ, matekũmĩthaahia,

o na marũmagia kĩrĩĩkanĩro,

MWATHANI arameera atĩrĩ,

7 “Nĩngũmũreehe Zayuni, kĩrĩma kĩrĩa gĩakwa gĩtheru,

ndeke mũkene mũrĩ nyũmbainĩ yakwa ya kũhoera,

na nyamũkagĩre magongoona marĩa mũrĩrutagĩra kĩgongoonainĩ gĩakwa.

Nĩ gũkorwo Hekaarũ yakwa ĩrĩĩtagwo

‘Nyũmba ya kũhoerwo nĩ ndũũrĩrĩ ciothe.’ ”

8 MWATHANI Ngai, ũrĩa ũcookeetie andũ aake a Isiraeli kuuma ithaamĩrio,

aroiga atĩrĩ, “Nĩngaareehe andũ angĩ

ndĩmaturanĩre na acio ndĩkĩĩtie gũcookia.”

Ngai kũmenereria atongoria a Isiraeli

9 MWATHANI eerĩĩte ndũũrĩrĩ ng’eni

ciũke irĩ na ũũru mũingĩ o ta wa nyamũ cia gĩthaka,

itambururange andũ aake.

10 Tondũ aroiga atĩrĩ,

“Atongoria a Isiraeli arĩa maagĩrĩirwo nĩgũkaania andũ nĩ itumuumu.

Nĩ andũ matarĩ na ũũgĩ o na atĩa,

oothe no ta ngui iria itakũgaga.

Meendeete o gũkoma marootage makĩng’orotaga.

11 Nĩ ngui ngoroki itarĩ kĩndũ kĩngĩihũũnia.

Arĩithi nao matirĩ na ũũgĩ o na atĩa.

Mũndũ o mũndũ arathiĩ na njĩra yake,

ageecarĩrie indo cia kwĩguna nacio.

12 Maikaraga makĩĩranaga ‘Ũkaai tũnyue ndibei tũrĩĩo.

Rũũciũ rũgaakorwo rũrĩ rwega gũkĩra ũũmũũthĩ.’ ”

Ngai kũmenereria mĩhianano ya Aisiraeli

1 Atĩrĩĩrĩ, andũ arĩa athingu no gũthira marathira,

na gũtirĩ mũndũ ũrarũmbũyania nao.

Andũ arĩa ehokeku no gũkua marakua,

na gũtirĩ mũndũ ũramenya atĩ

andũ acio athingu nĩgũthengio marathengio thĩĩnainĩ,

2 matwarwo kũndũ kũrĩ na thaayũ.

Andũ arĩa matũũraga ũtũũro wa ũthingu,

makua matwaragwo makahuurũke.

3 Ũkaai haaha, inyuĩ maciaro ma mũtumia mũrogi,

o inyuĩ ciana cia itharia na maraaya.

4 Nũũ mũrathaaka naake?

Nũũ mũrathamĩria kanua mũkĩmũrutagĩra rũrĩmĩ?

Githĩ mũticiarĩirwo meehiainĩ na maheeniinĩ?

5 Inyuĩ mũhũũragĩra ũmaraaya

mĩgandiinĩ yanyu ĩrĩa mĩamũre na mũtĩinĩ o wothe mũruru.

Mũrutaga ciana cianyu magongoona,

mwĩ kũu ciandainĩ cia rũũĩ na ngurungainĩ cia mahiga.

6 Ningĩ muoyaga mahiga marĩa manyoroku ma kũu ciandainĩ icio,

mũkamatua ngai na mũgacithaathaiya.

Mũgacooka mũgacitwarĩra ndibei ta arĩ ihaki,

o na mũgacireehere irio cia mĩgũnda.

Mũragĩciiria atĩ nĩngenagio nĩ ũguo wothe?

7 Mũthiaga irĩmainĩ iria ndaaya,

o kũu mũkoragwo mũthiĩte kũruta magongoona maanyu,

mũgathondeka ũrĩrĩ wa gũkomania.

8 Mũigaga mĩhianano yanyu thuutha wa mĩrango ya nyũmba cianyu,

nĩ gũkorwo mwandiganĩria, mũrutaga nguo

mũkahaica ũrĩrĩ mũgakomanie,

na mũgakĩarĩrĩria mbeeca iria mũkũhe acio mũgũkoma nao.

Mũgakĩhũũra ũmaraaya o kũu

mũroreete mĩhianano ĩyo yanyu.

9 Mwĩhakaga maguta marĩa manungaga wega na ũingĩ,

mũgathiĩ gũthaathaiya ngai ĩrĩa ĩĩtagwo Moleku.

Nĩ geetha muone ngai cia gũthaathaiya

mũtũmaga andũ kũndũ kũraaya,

o na mũkamatũma nginya kwa arĩa akũu.

10 Na rĩĩrĩ, o na mwanogio nĩ kũũrũũra,

mũtiĩcookagĩra mũkoiga,

“Tũraruta wĩra wa tũhũ.”

Mwĩyonaga ta mwagĩa na hinya ũngĩ mwerũ,

na nĩkĩo mũtatiganagĩria ũhoro ũcio.

11 “Atĩrĩĩrĩ, nĩ ngai irĩkũ icio imũmakagia na mwĩtigagĩra ũguo

nĩ geetha mũũheenie, na mũndiganĩrie

na mwage gwĩciiria ũhoro wakwa o na haniini?

Hiihi mwagire kũũhe gĩtĩĩo tondũ nĩngirĩĩte ihinda iraaya?

12 Tondũ mwĩciiragia nĩmũreeka wega-rĩ,

nĩngũkiumbũrania ciĩko icio yanyu,

na ngai icio cianyu itimũteithia.

13 Rĩrĩa mũrĩkaya mũteithio-rĩ,

mũũnganio ũcio wa ngai cianyu ta nĩũrĩmũteithia!

Rũhuuho rũrĩcikuua ciothe,

rũcieherie ciothe na ihuruutana o rĩmwe.

Arĩa oothe maigaga mwĩhoko wao thĩinĩ wakwa

nĩ o makaagaya bũrũri

na maathaathayagĩrie Hekaarũinĩ yakwa.”

Ngai kwĩranĩra ũteithio na kũhonania

14 Hĩndĩ ĩyo nĩgũkaanĩrĩrwo atĩrĩ,

“Thikaai marima! Thikaai marima! Theriai njĩra.

Thengiai mĩhĩnga yothe njĩrainĩ iria andũ aakwa mekũgerera.”

15 Nĩ gũkorwo Ngai Ũrĩa Ũrĩ Igũrũ,

o we ũtũũraga tene na tene, na rĩĩtwa rĩake nĩ rĩtheru,

aroiga atĩrĩ,

“Niĩ ndũũraga igũrũ kũrĩa gũtheru

no ningĩ nĩngoragwo hamwe na andũ arĩa enyiihia na arĩa merirĩĩte,

nĩ geetha njookerie mĩoyo na ngoro ciao hinya.

16 Amu hĩndĩ ciothe ndirĩikaraga

ngĩmatetagia kana ndĩmaraakarĩire.

Ingĩĩka ũguo, mĩoyo yao na ngoro ciao iria ndoombire, no ciage hinya.

17 Nĩndaraakaririo nĩ waganu na ũkoroku wao

ngĩmaherithia na ngĩmatiganĩria.

Nao makĩũmia ciongo, magĩthiĩ

na mbere kũrũmĩrĩra mĩtugo ĩyo yao.

18 “Nĩnyoneete ũrĩa meekĩĩte,

no nĩngũmahonia.

Nĩngũmatongoria na ndĩmateithie

na nyũmĩrĩrie arĩa maramacakaĩra.

19 Nĩngũhe andũ oothe, a gũkuhĩ na a kũraaya, thaayũ!

Na nĩngũmahonia.

20 No rĩĩrĩ, andũ arĩa aaganu mahaana

o ta iria rĩrĩa rĩtahooragĩra, na rĩtangĩhoorereka,

makũmbĩ maarĩo mahũũrahũũranaga

makĩminjaga na igũrũ ndooro na gĩko.

21 Andũ arĩa aaganu mationaga thaayũ.”

Ũguo nĩguo MWATHANI oiga.

Kwĩhinga kũrĩa kwa ma

1 MWATHANI aroiga atĩrĩ,

“Anĩrĩra mũno, na ndũgeetĩkĩre gũkĩrio!

Menyithia Isiraeli, andũ aakwa meehia maao.

2 Maathaathayagia mũthenya o mũthenya,

na makeendaga kũmenya njĩra ciakwa,

ta marĩ rũũrĩrĩ rũtũire rũrũmagĩrĩra ũthingu,

na rũtarĩ rwatiganĩria maathani ma Ngai wao.

Manjũũragia ndĩmahe matua ma kĩhooto,

na makeerahaga atĩ nĩmaathaathayagia.”

3 Andũ marooria atĩrĩ,

“Twĩimaga irio, nawe MWATHANI ũkaaga kũrũmbũiya nĩkĩ?

Twĩnyeerekagia ũkaaga kũbaara ũndũ ũcio nĩkĩ?”

Naake MWATHANI akamacookeria atĩrĩ,

“Mũthenya ũrĩa mweima irio-rĩ,

mũrũmagĩrĩra wendi wanyu,

na mũkahinyĩrĩria aruti aanyu a wĩra.

4 Mwĩimaga irio, no geetha mũtetanie na mũrũe,

na mũhũũrane na ngundi.

Kwĩima irio kwa mũthemba ũcio,

gũtigaatũma ndĩmũthikĩrĩrie mũkĩĩhooya.

5 Mũthenya ũrĩa mwehinga kũrĩa,

mwĩherithagia, mũkainamia ciongo cianyu ta nyeki hoohu.

Mũkaara nguo cia ikũnia na mũgakoma mũhuinĩ.

Kũu nĩkuo mwĩtaga kwĩhinga?

Mwĩciiragia no ngenio nĩ ũndũ ta ũcio?

6 “Kwĩhinga kũrĩa kũngenagia nĩ gũũkũ:

gũthengia mĩnyororo ya kũhinyanĩrĩria na ya kũimana kĩhooto;

kũrekereria andũ arĩa ahinyĩrĩrie,

na gũthengia mĩnyororo ya mũthemba o wothe.

7 Ningĩ nĩkũhe arĩa matarĩ, irio;

kwamũkĩra athĩĩni arĩa marongũtũka mĩciĩinĩ yanyu;

muona mũndũ ũtarĩ na nguo, mũkamũhe;

o na gũteithĩrĩria andũ aanyu.

8 “Mweka maũndũ macio,

wega wakwa ũrĩmwaragĩra o ta riũa rĩkĩratha,

na ironda cianyu irĩhonagio o na ihenya.

Ũthingu wanyu nĩguo ũrĩmũtongoragia

naguo riiri wa MWATHANI ũmũgitagĩre mĩena yothe.

9 Hĩndĩ ĩyo mũrĩhooyaga ngaigua mahooya maanyu;

mũrĩnjĩtaga na niĩ ngamwĩtĩka.

“Mũngĩniina kũhinyanĩrĩria o guothe,

mũtigane na rũthũũro rwa mĩthemba yothe,

mũtigane na mĩario yothe mĩũru,

10 ningĩ mũngĩheaga arĩa matarĩ na irio, irio,

na mũhingagĩrie arĩa marĩ na mathĩĩna, mabata maao,

ũtheri wanyu ũrĩaraga kũrĩa kũrĩ nduma,

nakĩo kĩeha kĩanyu kĩgarũrwo gĩtuĩke ta gĩkeno.

11 Ningĩ nĩndĩmũtongoragia hĩndĩ ciothe,

ndĩmũhingagĩrie mabata maanyu hĩndĩ ya thĩĩna,

na ndĩmũigage mũrĩ na hinya na ũgima mwega.

Mũrĩhaanaga o ta mũgũnda ũitagĩrĩrio maaĩ

na ta gĩthima kĩa maaĩ kĩrĩa gĩtahũaga rĩ kana rĩ.

12 Andũ aanyu nĩmagaaka rĩngĩ nyũmba iria ciamomoreetwo tene,

maciake rĩngĩ mĩthingiinĩ ĩrĩa mĩkũrũ.

Inyuĩ na inyuĩ mũgeetagwo

andũ arĩa maakaga rĩngĩ thingo iria ciamomoreetwo,

na nyũmba iria ciaharaganĩĩtio.”

Gũtugwo nĩ ũndũ wa kũhingia Thabatũ

13 MWATHANI aroiga atĩrĩ,

“Ũngĩhingagia mũthenya wa Thabatũ, o ũcio mwamũre,

ũngĩaga kũrũmĩrĩra maũndũ ma gwĩkenia wee mwene,

ũngĩtuaga Thabatũ nĩ mũthenya wa gũkena na wa kũheeo gĩtĩĩo,

ũngĩheaga mũthenya ũcio mwamũre gĩtĩĩo,

ũngĩaga gũthiĩ gũcangacanga

ũngĩaga gũcaragia o maũndũ ma gwĩkenia,

na ũngĩaga kwaragia ndeereti cia tũhũ,

14 hĩndĩ ĩyo nĩũrĩgĩagĩra na ũkeni ũrĩa heaga arĩa mandungatagĩra,

nĩndĩrĩgũtũũgagĩria thĩinĩ wa thĩ,

na nĩndĩrekaga ũkenagĩre bũrũri ũrĩa ndagaĩire thooguo Jakubu.

Nĩ niĩ MWATHANI ndoiga ũguo.”

Mũnabii kũmenereria meehia ma andũ

1 Atĩrĩĩrĩ, tigaai gwĩciiria:

atĩ MWATHANI ndarĩ na hinya o na haniini wa kũmũhonokia,

kana atĩ ahingĩĩte matũ ũguo atĩ ndangĩhota kũigua mwamũkaĩra!

2 No rĩĩrĩ, mahĩtia maanyu nĩ mo meekĩrĩĩte mũhaka

gatagatĩ kaanyu na Ngai wanyu.

Meehia maanyu nĩ mo matũmĩĩte Ngai amwĩhithe,

akaaga kũmũigua mwamũhooya.

3 Nĩ gũkorwo mooko maanyu nĩmaitithĩĩtie thakame nyingĩ,

ciara cianyu ikagera ngero nyingĩ,

tũnua twanyu tũkaaria maheeni maingĩ,

na nĩmĩ cianyu nacio ikaaria waganu mũingĩ.

4 Mwatwarana igootiinĩ mũtithitanganagĩra maũndũ na kĩhooto,

ningĩ gũtirĩ wĩyaragĩrĩria arũmĩrĩire ũthingu.

Mwĩhokaga mĩgambo ĩtarĩ kĩene na mũkaaria maheeni,

gũgakĩonekaga mathĩĩna na maũũru maingĩ.

5 Mũgakĩhaana o ta mũkomereirie matumbĩ ma nyoka cia thumu,

kana andũ maroogotha ndigi cia rũrenda rwa mbũmbũĩ.

Mũndũ angĩrĩa itumbĩ rĩmwe, no gũkua angĩkua,

itumbĩ rĩu rĩngĩkomererio rĩtũrwo, riumaga o nyoka ya thumu.

6 Ta ũrĩa ndigi cia rũrenda rwa mbũmbũĩ

itangĩhota gũthondeka nguo cia kwĩhumbĩra,

no taguo mũtangĩhota kwĩhumbĩra na ikĩro cianyu,

tondũ ciĩko cianyu no cia waganu mũtheri.

7 Mũhanyũkagĩra gwĩka ũũru,

mũkehĩkahĩka kũũraga andũ arĩa matarĩ na mahĩtia.

Mũhiũhaga gwĩciiria o kũgera ngero,

na kũrĩa mwagerera mũgatiga

mwananga na mwatharia.

8 Mũtirũmbũyanagia na maũndũ ma thaayũ,

o na kana mũkarũmĩrĩra njĩra cia waragania.

Ningĩ mũrũmagĩrĩra njĩra cia ungumania,

na gũtirĩ mũndũ wĩiguaga arĩ na thaayũ acigerera.

Mũingĩ wothe kuumbũra meehia maguo

9 Atĩrĩĩrĩ, tũtĩrũmagĩrĩra njĩra cia waragania,

na tũtirũmagia ũhoro wa ũthingu.

Nĩkĩo twĩhokaga ũtheri, no tũkeyona o ndumainĩ,

twendaga gũthiĩra ũtheriinĩ, no tũthiagĩra o ndumainĩ.

10 Tũthiaga tũkĩhambahambataga ta itumuumu,

tũgagĩthiĩ tũkĩhĩngagwo mũthenya barigici o ta arĩ ũtukũ.

O na kana ta andũ marathiĩra kũndũ kũrĩ nduma o ta ya kwa arĩa akuũ.

11 Tũthiaga tũceemeete o ta nduba,

ithuĩ oothe tũcaayaga o ta ndutuura.

Twetagĩrĩra tuone waragania, no tũtiwonaga,

twetagĩrĩra ũhonokio, naguo ũgatwĩtheema.

12 MWATHANI, nĩtũkwĩhĩirie mũno,

mawĩhia maitũ nĩmaratũthitanga na nĩtũmooĩ moothe.

13 Nĩtũkũremeete na tũgagũkaana,

tũgagũtiganĩria na tũkaaga gũgwathĩkĩra.

Twaragia o ũhoro wa kũhinyanĩrĩria na gũũkanĩrĩra,

ngoro ciitũ igataranagia o ũhoro wa maheeni.

14 Nĩ ũndũ ũcio waragania nĩũthengeetio,

naguo ũthingu ũgagĩikara o haraaya.

Tũcĩrainĩ tuothe ũhoro wa ma nĩkũrangĩrĩrio ũrarangĩrĩrio,

na kĩhooto gĩtingĩonerwo handũ kuo.

15 Ũhoro wa ma wagĩĩte na njĩra nene ũguo atĩ

mũndũ wothe ũteekaga ũũru nĩkũherithio aherithagio.

MWATHANI kũhaarĩria kũhonokia andũ aake

MWATHANI nĩoneete ũguo wothe,

na nĩaraakarĩĩte tondũ gũtirĩ na waragania o na haniini,

16 Nĩamakĩĩte nĩkuona atĩ

gũtirĩ mũndũ wa gũteithĩrĩria andũ arĩa ahatĩrĩrie.

Nĩ ũndũ ũcio egũtũmĩra ũhoti wake,

amahonokie na amahe ũhootani.

17 Akwĩhumba ũthingu ta arĩ gako ga kwĩgitĩra gĩthũri,

egwĩkĩra ũhootani mũtwe ta arĩ ngobia,

akĩĩhumbe wendi mũnene wa gũthondeka maũndũ wega,

na wa kũherithia na kũrĩhanĩria maũũru marĩa andũ meekĩĩtwo.

18 Ekũrĩha mũndũ o mũndũ kũringana na ikĩro ciake,

thũ ciake, o na iria irĩ bũrũri wa kũraaya, aciherithie araakarĩĩte.

19 Kuuma mwena wa irathĩro kinya wa ithũĩro,

gũtirĩ ũtakaahe rĩĩtwa na riiri wake gĩtĩĩo.

Naake agooka o ta rũũĩ rũraikania nĩ kũiyũra,

na o ta kĩhuuhũkanio kĩa rũhuuho.

20 MWATHANI arakĩĩra andũ aake atĩrĩ, “Nĩngũũka Jerusalemu ndĩmũgitĩre, na ndĩmũhonokie inyuothe mũtiganĩirie meehia maanyu.

21 Njooke thondeke kĩrĩĩkanĩro na inyuĩ ta ũũ: ndĩmũhe hinya wakwa na mataaro maakwa mũtũũre nacio aagu na aagu. Inyuĩ na inyuĩ kuuma rĩu mũtũũre mũnjathĩkagĩra na mũrutaga ciana cianyu kũnjathĩkagĩra hingo ciothe.”

Riiri ũrĩa ũgooka wa Jerusalemu

1 Jerusalemu, arahũka ũkenge o ta riũa,

riiri wa MWATHANI nĩũkũmũrĩkĩĩte!

2 Atĩrĩĩrĩ, nduma ndumanu nĩkaahumbĩra thĩ,

o na ĩhumbĩre andũ;

no MWATHANI nĩagaakũmũrĩka,

na riiri wake nĩũkooneka igũrũ rĩaku.

3 Ndũũrĩrĩ igooka ũtheriinĩ ũcio waku,

nao athamaki mooke ũkenguinĩ waku ũrĩa ũgaakorwo ũhaana ta wa riũa rĩkĩratha.

4 Rora mĩena yothe wĩyonere;

andũ oothe marongana mookĩĩte na kũrĩ we.

Aanake aaku mekuuma kũndũ kũraaya,

nao airĩĩtu aaku mooke makuuĩĩtwo na mũgongo ta ciana.

5 Ũrĩona ũguo, gĩthiithi gĩaku gĩthere,

ũrũũgarũũge nĩgũkena.

Nĩ gũkorwo ũtonga wa ndũũrĩrĩ

ũrĩreehwo na kũrĩ we;

ũrĩreehwo na kũrĩ we ũgereirio iriainĩ rĩrĩa inene.

6 Ndũũru cia ngamĩĩra,

o na njaũ cia ngamĩĩra cia kuuma Midiani na Efa,

ikaaraha ihaaroinĩ ciaku.

Ciothe ikoima Sheba ikuuĩĩte thahabu na ũbaani,

andũ nao makaaragia ndeto njega cia ũrĩa MWATHANI eekĩĩte.

7 Ndũũru ciothe cia ng’ondu cia Kedari ikaahũũrwo cierekeirio na kũrĩ we;

ndũrũme cia Nebaiothi ũcirutage magongoona;

ciathĩnjwo na ciaigĩrĩrwo kĩgongoona gĩakwa nĩngaaciamũkĩra,

na thakarie Hekaarũ yakwa gũkĩra mbere.

8 Atĩrĩĩrĩ, aarĩa nĩ a marooka moombũkĩĩte ta matu,

kana ta ndutuura ikĩinũka gwacio?

9 Nĩ andũ a kũraaya arĩa maigĩĩte mwĩhoko wao thĩinĩ wakwa,

meeri cia Sipania nĩcio itongoreetie.

Irooka ikuuĩĩte andũ aaku kuuma kũndũ kũraaya,

irĩ na betha na thahabu ciacio,

nĩ ũndũ wa rĩĩtwa rĩa MWATHANI Ngai waku,

o we ũrĩa Mũtheru wa Isiraeli,

tondũ nĩ we ũkũheete riiri ũcio.

10 Atĩrĩĩrĩ, andũ ageni nĩ o magaaka thingo ciaku;

nao athamaki aao nĩmagooka gũgũtungatĩra.

Tondũ o na akorwo nĩndakũherithirie nĩkũraakara,

rĩu nĩngũkũiguĩra tha na nĩngũgũtuga.

11 Ihingo ciaku igaikaraga irĩ hingũre,

itikaahingagwo mũthenya na ũtukũ,

nĩguo ũkaareehagĩrwo ũtonga wa ndũũrĩrĩ,

nao athamaki mooka magatoonya.

12 No rĩĩrĩ, ndũũrĩrĩ iria itagaagũtungatagĩra,

nĩkũniinwo ikaaniinwo biũ.

13 Ũthaka wothe wa Lebanoni nĩũkaareehwo gwaku,

mĩtĩ ĩrĩa mĩthaka mũno ya mĩcindanũgũ, mĩthengera na mĩkarakaba,

yothe ĩkaareehwo ĩgemie Hekaarũ yakwa,

na ĩthakarie harĩa ndĩrĩrũũgamaga.

14 Ciana cia andũ arĩa maanakũhinyĩrĩria,

igooka ikĩũinamĩrĩre ikũhe gĩtĩĩo.

Arĩa maanakũmenereria,

magooka megũithie magũrũinĩ maaku.

Oothe magaagwĩtaga “Itũũra rĩa MWATHANI,”

na magwĩtage “Zayuni, Mũciĩ wa Ngai Ũrĩa Mũtheru wa Isiraeli.”

15 Ndũgaacooka gũtiganĩrio na kũmenwo,

kana kũũragĩrwo nĩ mũndũ o wothe.

Handũ ha ũguo, ngaagũtua kũndũ gwa gwĩtĩĩagwo nakuo tene na tene

na gwa gũkenagĩrwo nĩ njiarwa na njiarwa.

16 Nĩ we ũkaarigia na ũtonga wa ndũũrĩrĩ na wa athamaki.

Na nĩũkaamenya atĩ niĩ MWATHANI,

o niĩ Ngai Mwene Hinya wothe, Ngai wa Isiraeli,

nĩ niĩ ngũhonokeetie na ngagũkũũra.

17 Handũ ha gĩcango, ngaakũreehithĩria thahabu,

handũ ha cuuma ngũreehithĩrie betha,

handũ ha mĩtĩ ngaakũreehithĩria gĩcango,

na handũ ha mahiga ngũreehithĩrie cuuma.

Nĩngaatũma wathagwo na thaayũ,

na ũtuagĩrwo na njĩra ya kĩhooto.

18 Haaro itigaacooka kũiguuo thĩinĩ wa bũrũri waku,

na ng’aragu kana mwanangĩko itikaiguĩke mĩhakainĩ yaku.

Nĩngaakũmenyagĩrĩra na ngũgitagĩre o ta rũthingo,

nawe nĩũkangoocaga tondũ nĩngũhonokeetie.

19 Riũa tirĩo rĩgaacooka gũkũmũrĩkaga mathaa ma mũthenya,

o na kana mweri mathaa ma ũtukũ.

No rĩĩrĩ, niĩ MWATHANI, nĩ niĩ ngaatuĩka ũtheri waku wa tene na tene,

na nduĩke riiri waku.

20 Riũa rĩaku na mweri waku itigaacooka gũthũa,

nĩ gũkorwo, niĩ MWATHANI ngaakorwo ndĩ ũtheri waku wa tene na tene.

Ningĩ matukũ maaku ma kĩeha nĩmagaathira.

21 Andũ aaku oothe magaakoragwo marĩ athingu,

na nĩmakeegwatĩra bũrũri ũyũ ũtuĩke wao tene na tene.

Magaatuĩka mũtĩ ũrĩa handĩĩte na mooko maakwa;

maũndũ macio ngaameeka nĩguo ngoocagwo.

22 Ũrĩa mũniini wanyu agaakũra atuĩke mũhĩrĩga,

naake ũrĩa ũtarĩ na hinya atuĩke rũũrĩrĩ rwĩ na hinya mũno.

Hĩndĩ ĩrĩa njagĩrĩru yakinya,

ngeeka ũguo na ihenya mũno.

Nĩ niĩ MWATHANI!

Ũhoro mwega wa ũhonokio

1 Atĩrĩĩrĩ, Roho wa MWATHANI Ngai arĩ hamwe na niĩ,

nĩ ũndũ MWATHANI anjitĩrĩirie maguta agaathuura;

Andũmĩĩte ndwarĩre athĩĩni ũhoro mwega;

ngoomĩrĩrie arĩa makuĩte ngoro,

ngamenyithie andũ arĩa manyiitĩĩtwo atĩ nĩmarekererio,

na arĩa me njeera ndĩmamenyithie atĩ nĩmoohorwo.

2 Andũmĩĩte ngamenyithanie atĩ mwaka ũrĩa MWATHANI egũtugana

na mũthenya ũrĩa ekũherithania nĩũkinyĩĩte,

na ngoomĩrĩrie arĩa oothe maracakaya.

3 Andũmĩĩte ngahaarĩrĩrie arĩa maanacakaya marĩ Zayuni;

ndĩmahuure mũhu mũtwe, ndĩmeekĩre mahũa.

Ndĩmahake maguta ma ũkeni handũ ha ma kĩeha,

ningĩ ndĩmahe rwĩmbo rwa ũgooci handũ rwa ihooru;

nĩguo meetagwo mĩtĩ ĩrĩa MWATHANI ahandĩĩte nĩguo agoocagwo.

4 Nao magĩcooke maake nyũmba iria ciamomoreetwo tene, o na iria ciatiganĩirio;

mariũkie matũũra marĩa maanangĩĩtwo, magatigwo matarĩ andũ mĩaka na mĩaka.

5 Ageni-rĩ, nĩ o marĩmũrĩithagĩria ndũũru cianyu,

na no o marĩmũrĩmagĩra mĩgũnda,

na mamenyagĩrĩre mĩthabibũ yanyu.

6 No inyuĩ mũrĩĩtagwo athĩnjĩri Ngai a MWATHANI na atungatĩri Ngai witũ;

mũrĩrĩaga ũnoru wa ndũũrĩrĩ

na mwĩkenagie na ũtonga wacio.

7 Nĩ ũndũ wa ũrĩa mwanaconorithio,

mũkaarĩhwo maita meerĩ:

handũ ha kwagĩrwo gĩtĩĩo nĩgũkenera mũgaakenera ũgai wanyu.

Ningĩ nĩmũgaatũũra bũrũri wanyu,

ũtonga wanyu wongerereke keerĩ na mũtũũre mũkenaga.

8 MWATHANI aroiga atĩrĩ,

“Niĩ MWATHANI nyendeete waragania;

ngathũũra ũtuunyani na ũhinyanĩrĩria.

Nĩngaatuga andũ aakwa hatarĩ na itherũ,

na thondeke nao kĩrĩĩkanĩro gĩa gũtũũra tene na tene.

9 Andũ acio aakwa nĩmakaagĩa igweta thĩinĩ wa ndũũrĩrĩ.

Arĩa oothe makaamoonaga nĩmakaamenya

atĩ nĩ andũ a rũũrĩrĩ arĩa niĩ MWATHANI ndaathimĩĩte.”

10 Nĩndĩrĩkenagĩra MWATHANI Ngai wakwa na njanjamũkage,

tondũ nĩanjĩkĩrĩĩte nguo ya ũhonokio na ya ũthingu,

o ta ũrĩa mũhikania egemagia na mahũa,

kana mũhiki na mathaga maake ma goro.

11 Nĩ gũkorwo o ta ũrĩa mbegũ imeraga tĩĩriinĩ,

na o ta ũrĩa irio ikũraga mĩgũndainĩ,

ũguo noguo MWATHANI Ngai agaatũma ũgooci na ũthingu

cionekane ndũũrĩrĩinĩ ciothe.

1 Atĩrĩĩrĩ, nĩ ũndũ wa Jerusalemu, ndigaakira

na nĩ ũndũ wa Zayuni ndikaahuurũka,

itooneete waragania warĩĩte kuo o ta ũtheri.

na ũhonokania wakanĩĩte kuo o ta tooci.

2 Hĩndĩ ĩyo ndũũrĩrĩ nĩikoona ũthingu waku,

nao athamaki oothe moone riiri waku,

nawe ũcooke ũheeo rĩĩtwa rĩngĩ rĩerũ,

rĩĩtwa o rĩrĩa MWATHANI we mwene agaagũthuurĩra.

3 Nawe ũgĩtuĩke thũmbĩ ya riiri ya MWATHANI Ngai.

na kĩraũni gĩa ũthamaki kĩa Ngai.

4 Ningĩ wee ndũgaacooka gwĩtwo “Mũtirike,”

kana bũrũri waku ũcooke gwĩtwo, “Mũtiganĩrie.”

Wee ũgeetagwo “Mwendwa wakwa,”

Naguo bũrũri wĩtagwo “Mũgũre.”

Tondũ MWATHANI nĩakeneetio nĩ we,

na egũtuĩka ta mũthuuri wa bũrũri waku.

5 Amu o ta ũrĩa mwanake ahikagia mũirĩĩtu thingi,

noguo ũrĩa wagwakire agaakũhikia.

o ta ũrĩa mũhikania akenagĩra mũhiki wake,

noguo Ngai waku agaagũkenera.

6 Jerusalemu, nĩnjigĩĩte arangĩri thingoinĩ ciaku,

mũthenya wothe na ũtukũ wothe matirĩkiraga.

Inyuĩ na inyuĩ mũririkanagia MWATHANI ciĩranĩro ciake, mũtikaananoge,

7 o na kana mũhe MWATHANI ũhuurũko,

atacookanĩrĩirie Jerusalemu,

na akamĩtua itũũra rĩa gwĩtĩĩagwo narĩo gũũkũ thĩ.

8 Atĩrĩĩrĩ, MWATHANI nĩehĩtĩĩte,

aambararĩĩtie guoko gwake kwa ũrĩo, kũrĩa kũrĩ hinya,

akoiga atĩ ndarĩ hingo akaareka

thũ cianyu ciĩkenie na irio cia mĩgũnda yanyu

o na kana andũ a ndũũrĩrĩ manyue ndibei ĩrĩa inyuĩ mũnogeire.

9 No rĩĩrĩ, arĩa marigethaga nĩ o marĩrĩaga magĩcookagĩria MWATHANI ngaatho,

arĩa marĩhihaga ndibei nĩ o marĩmĩnyuagĩra ithakuinĩ cia Hekaarũ yakwa.

10 Atĩrĩĩrĩ, andũ a Jerusalemu, taumagaraai, mũthiĩ mũhĩtũke ihingo,

thondekaai barabara nĩ ũndũ wa andũ aanyu magĩcooka.

Thikaai marima na mwaraganie barabara ĩyo!

Thengiai mahiga moothe!

Handaai ibaaũ ndũũrĩrĩ icione.

11 Atĩrĩĩrĩ, MWATHANI nĩanĩrĩire thĩ yothe akoiga atĩrĩ,

“Ĩraai andũ a Jerusalemu MWATHANI nĩarooka kũmũhonokia.

Arooka arĩ na iheeo ciake

atongoreetio nĩ andũ arĩa ahonokeetie.”

12 Acio nĩ o marĩĩtagwo

“Andũ arĩa atheru arĩa mahonokeetio nĩ MWATHANI.”

Nawe Jerusalemu ũrĩĩtagwo,

“Itũũra rĩrĩa rĩende”

no ti “Itũũra rĩrĩa rĩtiganĩrie.”

MWATHANI kũhoota ndũũrĩrĩ

1 Nũũ ũrooka oimĩĩte itũũra rĩa Bozira

rĩrĩa rĩrĩ bũrũri wa Edomu?

Nũũ ũyũ ũrooka ehumbĩĩte nguo cia rangi mũtuune,

na agathiĩ arĩ na hinya na ũhoti mũnene?

“Nĩ niĩ MWATHANI ũrĩa waragia ũhoro wa ũthingu

na wĩ na hinya wa kũhonokania.”

2 Nguo ciaku-rĩ, ironeka irĩ cia rangi mũtuune nĩkĩ?

Ihaana cia mũndũ ũkũrangarangaga kĩhihĩroinĩ gĩa thabibũ nĩkĩ?

3 Nĩkũrangaranga ngũrangarangaga kĩhihĩroinĩ gĩa thabibũ ndĩ nyiiki.

Gũtirĩ mũndũ o na ũmwe uuma ho no niĩ.

Nangarangire ndũũrĩrĩ na maraakara na mang’ũrĩ,

thakame yacio yagĩitĩkangĩra nguo ciakwa ciothe.

4 Nĩ gũkorwo nĩnduĩte na ngoro atĩ nĩngwĩrĩhĩria

na atĩ mwaka wa kũhonokia andũ aakwa nĩũrĩĩkĩĩtie gũkinya.

5 Atĩrĩĩrĩ, ndaroranga ndĩrona gũtiraarĩ o na ũmwe wa kũndeithia,

ndĩrakĩmaka, no ndĩnoona wa kũũnyũmĩrĩria.

Hĩndĩ ĩyo ndĩrakĩĩyũmĩrĩria,

na mang’ũrĩ maakwa maranjĩkĩra hinya.

6 Ndĩrakĩrangaranga ndũũrĩrĩ ndĩ na maraakara,

irakĩnyua mang’ũrĩ maakwa irarĩĩo,

na ndĩraitanga thakame yacio thĩ.

Ũtugi wa MWATHANI harĩ Aisiraeli

7 Nĩngũmenyithania mootugi ma MWATHANI, na ndĩmũgooce,

nĩ ũndũ wa maũndũ moothe marĩa atwĩkĩire,

o na nĩ ũndũ wa maũndũ meega na manene marĩa eekĩire nyũmba ya Isiraeli,

kũringana na ũingĩ wa ũtugi na tha ciake.

8 MWATHANI aroiga atĩrĩ,

“Aya nĩ andũ aakwa, nĩ andũ matangĩĩheenia.”

Agĩgĩtuĩka mũhonokia wao.

9 Mathĩĩnainĩ maao moothe matiahonokagio nĩ mũraika,

MWATHANI we mwene nĩ we wamahonokagia.

Amaahonokagia nĩ ũrĩa aameendeete na aamaiguĩra tha,

aatũire amarũũgamagia na amakuaga hĩndĩ ciothe.

10 No rĩĩrĩ, nĩmaamũũkĩrĩire na makĩraakaria roho wake mũtheru,

naake agĩkĩmahutaatĩra agĩtuĩka thũ yao na akĩrũa nao.

11 Nao magĩcooka kũririkana mahinda ma tene,

matukũinĩ ma Musa, ndungata ya MWATHANI, makĩũria atĩrĩ,

“Kaĩ ũrĩa wahonokirie atongoria

a andũ aake kuuma iriainĩ akĩrĩ ha?

MWATHANI ũrĩa waheire Musa roho wake akĩrĩ ha?

12-13 MWATHANI ũrĩa wekire maũndũ manene

na hinya wake ahũthĩrĩĩte Musa,

akĩgayũkania maaĩ ma iria,

agĩtongoreria andũ aake maaĩinĩ macio mariku,

nĩguo egĩĩre na igweta tene na tene, akĩrĩ ha?”

Maatongoreetio nĩ MWATHANI magĩthiĩra kũu iriainĩ,

na matiigana kũhĩngwo.

14 Ta ũrĩa mahiũ matwaragwo ciandainĩ iria nduru,

noguo MWATHANI aaheire andũ aake ũhuurũko.

Aatongoririe andũ aake agĩkĩĩgĩĩra na igweta inene.

Kũhooya, kũiguĩrwo tha, na gũteithio

15 MWATHANI, ũrĩ kũu igũrũ, ikia maitho maaku na gũũkũ thĩ.

Ũrĩ gĩikaroinĩ gĩaku gĩtheru na gĩkaru, tũrore.

Atĩrĩĩrĩ, kaĩ ũtugi waku mũnene harĩ ithuĩ, ũkĩrĩ ha?

Ũhoti waku naguo-rĩ, ũrĩ ha?

Wendani na tha ciaku-rĩ, kaĩ ikĩrĩ ha?

Ndũkaanatũtiganĩrie!

16 Wee-rĩ, no we ithe witũ!

O na Aburahamu angĩtũkaana,

kana Isiraeli angiuga ndatũũĩ-rĩ,

wee, MWATHANI, no we ithe witũ na Mũtũũkũri kuuma tene na tene.

17 MWATHANI ũkĩrekeete tũregenyũke na ũkoomia ngoro ciitũ,

tũgakĩaga gũcooka gũkũhe gĩtĩĩo nĩkĩ?

Ririkana ndungata ciaku, o na rũũrĩrĩ rũrĩa arĩ ruo igai rĩaku,

na ũtũcookerere.

18 Andũ aaku atheru nĩmeegwatĩire gĩikaro gĩaku gĩtheru kwa ihinda,

no rĩu, thũ ciitũ nĩikĩmomoreete.

19 Kwa ihinda inene tũgĩkoreetwo tũhaana ta andũ matarĩ maathwo nĩ we,

o ta andũ matarĩ meetanio na rĩĩtwa rĩaku.

1 Naarĩ korwo wahingũrania matu ũikũrũke,

nĩguo irĩma ikuone ciinaine nĩ guoya!

2 Ingĩhĩa ta ũrĩa mwaki ũcinaga gĩthaka

na ũgatũma maaĩ matherũke mahiũha.

Ũka wĩyonanie kũrĩ thũ ciaku

na ũreke ndũũrĩrĩ ciinaine nĩ guoya irĩ mbere yaku.

3 Rĩrĩa wekire maũndũ ma kũguoyohia, o marĩa ithuĩ tũterĩgĩrĩire,

waikũrũkire ũkĩreka irĩma ciinaine nĩ guoya irĩ mbere yaku.

4 Kuuma tene na tene gũtirĩ mũndũ wanaigua,

o na kana akĩona Ngai ũngĩ tiga wee,

ũrĩa wĩkaga andũ arĩa mamwĩhokeete maũndũ ta macio.

5 Nĩwamũkagĩra andũ arĩa meekaga wega makeneete,

o arĩa makũririkanaga makĩrũmĩrĩra njĩra ciaku.

Wee nĩwatũraakarĩire, na ithuĩ tũkĩĩhia;

o na ũtũraakarĩire ũguo, ithuĩ tũtũire twĩhagia kuuma o tene.

6 Atĩrĩĩrĩ, ithuothe tũtuĩkĩĩte andũ eehia,

ikĩro ciitũ cia ũthingu igagĩtuĩka o ta nguo irĩ na gĩko,

meehia maitũ magagĩtũma tũhaane ta mathangũ marĩa moomaga

makoombũrwo nĩ rũhuuho.

7 Gũtirĩ ũrahooya na rĩĩtwa rĩaku,

o na kana ũreringĩrĩria gũkũũria ũmũteithie.

Nĩũtwĩhithĩĩte na ũgatũtiganĩria nĩ ũndũ wa meehia maitũ.

8 No rĩĩrĩ, we MWATHANI nĩ we Ithe witũ,

ithuĩ tũrĩ o ta rĩũmba,

nawe ũgakĩhaana o ta mũũmbi wa nyũngũ.

Wee nĩ we watũũmbire ithuothe.

9 Ndũgaatũraakarĩre We MWATHANI,

na ndũgaatũũre ũririkanaga mahĩtia maitũ tene na tene.

Atĩrĩĩrĩ, ririkana atĩ ithuothe tũrĩ andũ aaku.

10 Matũũra maaku marĩa matheru matuĩkĩĩte werũ;

Zayuni gũtuĩkĩĩte o werũ,

Jerusalemu gũgaatuĩka o maganjo

11 Hekaarũ iitũ ĩrĩa theru na ĩrĩ riiri,

kũrĩa maithe maitũ maramenyereete gũkũgoocagĩra,

nĩcinĩĩtwo ĩkahĩa biũ,

na kũrĩa guothe kũraarĩ gũthaka

gũtigĩĩtwo kwanangĩkĩĩte.

12 MWATHANI, no wone maũndũ macio moothe na wage kũringwo nĩ tha?

Ũgũgĩikara ũkirĩĩte ũguo,

ũtũme tũthĩĩnĩke gũkĩra ũrĩa tũngĩhota gũkĩrĩrĩria?