Jakubu 1

1 Kuuma kũrĩ niĩ Jakubu, ndungata ya Ngai na ya Mwathani Jesũ Kristũ:

Nĩndamũgeithia inyuothe andũ a Ngai inyuĩ mũhurunjũkĩĩte thĩ yothe.

Wĩtĩkio na ũũgĩ

2 Aariũ na aarĩ a Ithe witũ, kenagaai hingo ciothe rĩrĩa mwakorwo nĩ magerio mwanya mwanya,

3 nĩ ũndũ nĩmũũĩ wega atĩ wona wĩtĩkio wanyu wahoota magerio macio, maciaro nĩ atĩ nĩmũrĩhotaga gũkirĩrĩria.

4 Rekeei gũkirĩrĩria kwanyu kũmũtongoragie maũndũinĩ moothe mũtekũgwa, nĩ geetha mũkoragwo mũrĩ andũ aagĩrĩru kũna, mũrĩ agima, na mũtarĩ na ũndũ o na ũmwe mwagĩĩte.

5 Gatagatĩinĩ kaanyu hangĩkorwo harĩ mũndũ ũtarĩ na ũũgĩ, nĩahooe Ngai, na nĩekũheeo, tondũ Ngai aheaga andũ oothe e na ũtaana na ũtugi.

6 Hingo ĩrĩa ekũhooya, no mũhaka eetĩkie biũ na ndagaakorwo arĩ na nganja, tondũ mũndũ ũrĩa ũhooyaga e na nganja ahaana ta ikũmbĩ rĩa maaĩ ma iria rĩrĩa rĩhũũrithanagio nĩ rũhuuho o kũrĩa rũkwenda.

7-8 Mũndũ ta ũcio, ũkoragwo na meciiria matukanu na ũtakindĩirie maũndũinĩ moothe marĩa eekaga, ndaagĩrĩirwo nĩgwĩciiria atĩ nĩharĩ kĩndũ akngĩheeo nĩ Mwathani.

Thĩĩna na ũtonga

9 Mũkristiano ũrĩa mũthĩĩni nĩakenage rĩrĩa Ngai amũtũũgĩria,

10 naake Mũkristiano ũrĩa mũtongu nĩakenage rĩrĩa Ngai amũnyiihia, tondũ mũndũ ũrĩa mũtongu agaathira ta mahũa ma gĩthaka.

11 Riũa rĩrathaga na rĩaikaranga rĩkahiũha mũno o kinya rĩkahoohia mũmera, namo mahũa maaguo makagũa thĩ, naguo ũthaka waguo ũkaniinwo. Ũguo noguo o naake mũndũ ũrĩa mũtongu akaaniinwo e mĩhang’oinĩ ya ũtonga wake.

Kũũmĩrĩria magerio

12 Kũraathimwo-rĩ, nĩ mũndũ ũrĩa ũkiragĩrĩria rĩrĩa ekũgerio, nĩ ũndũ wona ahootana na kũhĩtũka kũgerio kũu nĩakaaheeo kĩheeo kĩa muoyo kĩrĩa Ngai eerĩire arĩa mamwendeete.

13 Mũndũ angĩgerio ndakaae kuuga atĩ “magerio maya nĩ ma kuuma kũrĩ Ngai,” nĩ amu Ngai ndageragio nĩ ũrĩa mũũru, o naake we mwene ndarĩ mũndũ ageragia.

14 Mũndũ ageragio hĩndĩ ĩrĩa aguucĩrĩrio na anyiitwo nĩ merirĩria maake mooru.

15 Merirĩria macio magakĩgĩa ihu, na magaciara meehia, namo meehia makũra magaciara gĩkuũ.

16 Aariũ na aarĩ a Ithe witũ o inyuĩ nyendeete mũno-rĩ, mũtigeetĩkĩre kũheenio!

17 Ũheani o wothe mwega, o na kĩheeo o gĩothe kĩagĩrĩru gĩũkaga kiumĩĩte na igũrũ kwĩ Ngai ũrĩa wombire mootheri ma igũrũ, ũrĩa ũtagarũrũkaga ta kĩĩruru.

18 Aatũũmbire na kwenda gwake ahũthĩrĩĩte kiugo kĩrĩa kĩa ma, nĩ geetha tũkoragwo tũrĩ a mbere ciũmbeinĩ ciake ciothe.

Kũigua na gwĩka

19 Ririkanagaai ũhoro ũcio inyuĩ aariũ na aarĩ a Ithe witũ, o inyuĩ nyendeete! Atĩrĩĩrĩ, mũndũ o ro wothe ndakaahiũhage kwaria kana kũraakara, no nĩahiũhage gũthikĩrĩria.

20 Nĩ ũndũ maraakara ma mũndũ matingĩmũhotithia kũgĩa na ũthingu wa Ngai.

21 Kwoguo tiganaai na mĩtugo ĩrĩa mĩbuthu na ĩrĩa mĩũru. Heyagaai Ngai gĩtĩĩo na mwĩtĩkagĩre ũhoro ũrĩa Ngai ahandaga ngoroinĩ cianyu, o ũrĩa wĩ na hinya wa kũmũhonokia.

22 Tigagaai kwĩheenia na ũndũ wa gũthikĩrĩria ũhoro wake guo wiki; wega no gwĩkaga ũrĩa mũiguĩte.

23 Mũndũ ũrĩa ũthikagĩrĩria ũhoro na akaaga gwĩka ũrĩa uugĩĩte, ahaana ta mũndũ ũrĩa wĩroraga na gĩciicio akeyona ũrĩa ahaana,

24 no arĩĩkia kwehera hau gĩciicioinĩ, akariganĩrwo nĩ ũrĩa ekũhaanaga.

25 Mũndũ ũrĩa wathĩkagĩra watho ũrĩa mwagĩrĩru ũrĩa ũrutaga andũ ũkomboinĩ, akaũrũmĩrĩra na akawĩka na ciĩko handũ ha kũũthikĩrĩria agacooka akariganĩrwo, nĩakaaraathimwo nĩ Ngai nĩ ũndũ wa ciĩko ciake.

26 Mũndũ ũrĩa wĩciiragia atĩ nĩ wa ndini no ndamenyagĩrĩra rũrĩmĩ rwake akĩaria, ũndini wake nĩ wa tũhũ, na nĩkũheenia aheenagia ngoro yake.

27 Ũndini ũrĩa Ngai Ithe witũ atuaga atĩ nĩ mũtheru na wa ma nĩ ũyũ: nĩgũteithagia ciana cia ngoriai o hamwe na atumia a ndigwa rĩrĩa me na mathĩĩna, na kwĩgitĩra maũndũ ma gũũkũ thĩ marĩa mathũũkagia mũndũ.

Jakubu 2

Gũkaanio ũhoro wa kwamũrania andũ

1 Aariũ na aarĩ a Ithe witũ, tondũ mũrĩ andũ meetĩkĩĩtie Mwathani witũ Jesũ Kristũ o Mwathani wa riiri, tuĩkaai andũ matarĩ agũthuutũkania andũ nĩ ũndũ wa ũrĩa makoragwo makĩoneka.

2 Nĩ ũndũ mũndũ mũtongu wĩhumbĩĩte nguo njega na ageekĩra gĩcũhĩ gĩa thahabu guoko angĩũka mũcemanio wanyu, na ũngĩ mũthĩĩni wĩhumbĩĩte nguo ndarũkangu o naake ooke,

3 na inyuĩ mũhe mũndũ ũrĩa wĩhumbĩĩte nguo njega gĩtĩĩo mũmwĩre atĩrĩ, “Ta ikarĩra gĩtĩ gĩĩkĩ.” Naake ũrĩa mũthĩĩni mũmwĩre atĩrĩ, “Rũũgama haarĩa kana ũikare thĩ haaha magũrũinĩ maakwa,”

4 githĩ mũtigũkĩona atĩ nĩmweyamũrania gatagatĩinĩ kaanyu na mwatuĩka atui ciira na meciiria mooru?

5 Tathikĩrĩriai inyuĩ aariũ na aarĩ a Ithe witũ nyendeete! Githĩ Ngai ndathuurire andũ arĩa athĩĩni a gũũkũ thĩ matuĩke itonga cia wĩtĩkio, na matuĩke agai a Ũthamaki ũrĩa eerĩire arĩa mamwendeete?

6 No inyuĩ nĩmũraima arĩa athĩĩni gĩtĩĩo! Atĩrĩĩrĩ, andũ arĩa mamũhinyagĩrĩria na makamũtwara kũrĩ aciirithania nĩ arĩkũ? Nĩ itonga!

7 Acio nĩ o macambagia rĩĩtwa rĩu rĩega rĩrĩa mwaheirwo.

8 No ũkorwo nĩwĩkaga wega angĩkorwo nĩũhingagia ũrĩa Watho wa mũthamaki uugaga kũringana na Maandĩko atĩ, “Enda mũndũ ũrĩa mũrigainie naake o ta ũrĩa wĩyendeete wee mwene.”

9 No rĩĩrĩ, angĩkorwo mwamũranagia andũ nĩ tondũ wa ũrĩa maroneka matariĩ nĩmwĩhagia, naguo Watho nĩũmũtuĩrĩire ta andũ eehia moinĩĩte watho.

10 Mũndũ ũrĩa wĩkaga ũrĩa maathani moothe moigaga no akoina rĩmwe tu, ũcio nĩatuĩrĩirwo ciira wa kuuna mawatho moothe.

11 Tondũ Ngai ũrĩa woigire, “Ndũkaanatharanie,” no we woigire, “Ndũkaanooragane.” Kwoguo ũngĩũragana nĩũgũtuĩka muuni Watho o na angĩkorwo ndũtharanĩĩtie.

12 Nĩ ũndũ ũcio aragiai na mwĩkage ciĩko cianyu ta andũ arĩa magaatuĩrwo kũringana na Watho ũrĩa ũtuohoraga kuuma ũkomboinĩ.

13 Tondũ Ngai ndakaigua tha agĩciirithia mũndũ ũrĩa ũtaiguagĩra andũ arĩa angĩ tha, no tha nĩcihootaga ituĩro.

Wĩtĩkio na ciĩko

14 Aariũ na aarĩ a Ithe witũ, bata wa mũndũ kuuga atĩ e na wĩtĩkio na ciĩko ciake itirawonania-rĩ, nĩ ũrĩkũ? Wĩtĩkio ta ũcio no ũmũhonokie?

15 Aariũ kana aarĩ a Ithe witũ mangĩkorwo matarĩ na nguo cia kwĩhumba kana irio cia kũrĩa,

16 naake ũmwe wanyu ameere atĩrĩ, “Thiĩi na wega mũgoote mwaki na mũrĩe mũhũũne!” na ndamahe indo irĩa mabataire nĩ wega ũrĩkũ ameeka?

17 Nĩ ũndũ ũcio wĩtĩkio wiki ũtarĩ na ciĩko, nĩ mũkuũ.

18 Ĩndĩ hiihi mũndũ ahota kuuga atĩrĩ, “Wee-rĩ, wĩ na wĩtĩkio, na niĩ ndĩ na ciĩko.” Rĩu-rĩ, “Ta kĩnyonie ũrĩa mũndũ angĩkorwo na wĩtĩkio hatarĩ ciĩko, na niĩ nĩngũkuonia wĩtĩkio wakwa na ũndũ wa ciĩko iria njĩkaga!”

19 Wee nĩwĩtĩkĩĩtie atĩ Ngai nĩ ũmwe? Hau nĩwĩkaga wega! No o na ngoma nĩciĩtĩkĩĩtie o ro ũguo na nĩciinainaga nĩkũmwĩtigĩra.

20 Wee kĩrimũ gĩĩkĩ! Nĩũkwenda wonio wĩtĩkio ũtarĩ na ciĩko nĩ wa tũhũ?

21 Ithe witũ Aburahamu-rĩ, oonanirio nĩagĩrĩire mbere ya Ngai nĩkĩ? Oonanirio nĩagĩrĩire nĩ ciĩko ciake, hĩndĩ ĩrĩa aarutire mwana wake Isaaka, ũrĩa warĩ wa mũũmwe, kĩgongoonainĩ.

22 Nĩwakĩona atĩ wĩtĩkio wake nĩwarutithanirie wĩra na ciĩko ciake, naguo wĩtĩkio wake ũgĩtuuo mũiganĩru kũna nĩ ũndũ wa ciĩko icio ciake.

23 Namo Maandĩko magĩkĩhinga marĩa moigĩĩte atĩ, “Aburahamu nĩetĩkirie Ngai, na nĩ ũndũ ũcio Ngai akĩmwĩtĩkĩra ta mũndũ mũthingu,” na nĩ ũndũ ũcio agĩgĩĩtwo mũraata wa Ngai.

24 Nĩmũgũkĩona atĩ mũndũ aiguithanagio na Ngai nĩ ciĩko ciake, no ti tondũ wa wĩtĩkio guo wiki.

25 Ũguo noguo Rahabu ũrĩa warĩ mũmaraaya atariĩ. Nĩ ũndũ nĩatuirwo mũthingu nĩ Ngai nĩ ũndũ wa ciĩko ciake cia kũnyiita athigaani a Isiraeli ũgeni, na akĩmoonia njĩra ĩngĩ ya kũgera nĩguo matikoonwo.

26 Nĩ ũndũ ũcio, o ta ũrĩa mwĩrĩ ũtarĩ na muoyo ũkoragwo wĩ mũkuũ, noguo o naguo wĩtĩkio ũtarĩ na ciĩko wĩ mũkuũ.

Jakubu 3

Rũrĩmĩ

1 Atĩrĩĩrĩ, aariũ na aarĩ a Ithe witũ, tigaai kwenda gũtuĩka arutani mũno nĩ tondũ nĩmũũĩ atĩ ithuĩ arutani tũgaatuĩrwo ituĩro rĩa hinya makĩria ma andũ arĩa angĩ.

2 Nĩ ũndũ ithuothe nĩtwĩkaga mahĩtia kaingĩ kaingĩ. No rĩĩrĩ mũndũ ũrĩa ũtahĩtagia na mĩario yake, ũcio nĩ mwagĩrĩru biũ, na nĩahotaga kũmenyerera mwĩrĩ wake wothe.

3 Rĩu-rĩ, twĩkagĩra mbarathi matamu tũnua nĩguo itwathĩkĩre, na kwoguo nĩtũhotaga gũciroria o kũrĩa tũngĩenda.

4 Ta wĩciriei ũhoro wa meeri: o na ĩ nene ũguo ĩ nene, na ĩgatwarwo nĩ rũhuuho rũnene, nĩhotaga gũtwarwo na kĩgati kĩnyiinyi ĩgagĩthiĩ o kũrĩa mũmĩtwarithia ekwenda.

5 Kwoguo rũrĩmĩ o na rwĩ rũniini ũguo rwĩ rũniini no rwĩtĩĩe na ũhoro wa maũndũ manene.

Ta wĩciriei ũrĩa mũtitũ o na wĩ mũnene ũgwatagio nĩ karũrĩrĩmbĩ kaniini.

6 O naruo rũrĩmĩ nĩ ta mwaki. Rũrĩmĩ nĩ bũrũri wa ũũru ũkoragwo wĩ mĩĩrĩinĩ iitũ. Rũrĩmĩ rũthĩĩnagia mwĩrĩ wothe, rũgacina mĩikarĩre iitũ yothe na mwaki ũrĩa rũheagwo kuuma icuainĩ.

7 Mũndũ nĩahoteete kũhooreria ciũmbe iria ingĩ ciothe: nyamũ iria ithiaga na magũrũ mana, nyoni, nyamũ iria itambaga thĩ ta nyoka, na ciũmbe cia maaĩinĩ,

8 no gũtirĩ mũndũ ũrĩ wahota kũhooreria rũrĩmĩ. Rũrĩmĩ nĩ kĩndũ kĩũru mũno na rũkoragwo rũiyũirwo nĩ ũrogi.

9 Nĩruo tũcookagĩria Mwathani na Ithe witũ ngaatho naruo, na noruo tũrumaga mũndũ ũrĩa ũngĩ naruo, o na oombĩĩtwo na mũhianĩre wa Ngai.

10 Ciugo cia gũcookia ngaatho na cia kũrumana ciumaga kanua o ro kamwe. Aariũ na aarĩ a Ithe witũ, ũguo tiguo kwagĩrĩire kũhaana!

11 Kwahoteka atĩa gĩthima o ro kĩmwe gĩtherũke maaĩ meega na maaĩ marũrũ.

12 Aariũ na aarĩ a Ithe witũ, mũkũyũ-rĩ, wakĩhota gũciara ndamaiyũ, kana mũthabibũ ũciare ngũyũ? No taguo gĩthima kĩa maaĩ ma cumbĩ gĩtangĩtherũka maaĩ meega.

Ũũgĩ kuuma igũrũ

13 Rĩu-rĩ, nĩharĩ mũndũ mũũgĩ ũtaũkagĩrwo nĩ maũndũ gatagatĩinĩ kaanyu? Mũndũ ũcio nĩakĩonanie ũndũ ũcio na mĩikarĩre yake mĩega, na ciĩko njega ciĩkĩĩtwo na ũhooreri na ũũgĩ.

14 No rĩĩrĩ, angĩkorwo ngoroinĩ cianyu mwĩ na rũthũũro na mwĩyendo, tigaai gũthaahia ũũma mũkĩĩgana ũrĩa mũrĩ oogĩ.

15 Ũũgĩ ũcio tiguo ũikũrũkaga kuuma igũrũ; nĩ wa gũũkũ thĩ, na ti wa kĩĩroho; nĩ wa gĩthemba kĩa ngoma.

16 Handũ hoothe harĩa hakoragwo na ũiru, na kwĩyenda, no ho hakoragwo na ngũĩ na mawaganu moothe.

17 No ũũgĩ wa kuuma igũrũ o mbere ũkoragwo wĩ mũtheru; ningĩ nĩ wa thaayũ, gũkiranĩrĩria, na kwendana; ũkoragwo ũiyũirwo nĩ tha na ciĩko njega, na ndũrĩ mũthuutũkanio o na kana ũhinga.

18 Maciaro ma ũthingu nĩmo magethagwo kuuma harĩ thaayũ ũrĩa ũhandagwo nĩ arĩa eendi thaayũ.

Jakubu 4

Gũthondeka ũraata na thĩ

1 Atĩrĩĩrĩ, mbaara na haaro iria mũkoragwo nacio-rĩ, ciumaga kũ? Githĩ itũũmaga o merirĩriainĩ maanyu ma maũndũ ma ikeno marĩa marũaga thĩinĩ wanyu.

2 Mwendaga indo na mũtigĩaga nacio; mũũraganaga na mũkerirĩria kũgĩa na indo no mũtihotaga kũgĩa nacio, na ningĩ nĩmũnegenanagia na mũkarũa. Mwagaga kũgĩa na kĩrĩa mũrenda nĩ tondũ mũtihooyaga Ngai amũhe.

3 Mũhooyaga na mũtiheeo tondũ mũhooyaga ũrĩa gũtaagĩrĩire, nĩ gũkorwo mwendaga kũhũthĩra kĩrĩa mũkũheeo na gwĩkenia na maũndũ mooru.

4 Inyuĩ andũ aya mũtarĩ ehokeku! Kaĩ mũtooĩ atĩ kũgĩa ũraata na thĩ nĩkũgĩa ũthũ na Ngai? Kwoguo mũndũ o wothe wendaga gũtuĩka mũraata wa thĩ atuĩkaga thũ ya Ngai.

5 Kana hiihi mũkwĩgereria atĩ Maandĩko Matheru maaragia ũhoro wa tũhũ rĩrĩa mekuuga atĩrĩ, “Roho ũrĩa Ngai eekĩrire thĩinĩ witũ ũkoragwo wĩ na ũiru mũnene.”

6 No wega ũrĩa Ngai aheanaga nĩ mũnene mũno makĩria. O ta ũrĩa Maandĩko moigĩĩte atĩrĩ, “Ngai nĩakararagia arĩa metĩĩaga, no arĩa ahooreri nĩamaheaga wega wake.”

7 Kwoguo kĩheyageei Ngai gĩtĩĩo. Reganaai na ngoma na nĩekũũra amweherere.

8 Kuhĩhĩriai Ngai, naake nĩekũmũkuhĩhĩria. Mwĩthambeei mooko maanyu inyuĩ eehia! Theriai ngoro cianyu inyuĩ hinga ici!

9 Iguai kĩeha mũrĩre mũkĩgirĩkaga; mĩtheko yanyu nĩgarũrũke ĩtuĩke kĩrĩro, nakĩo gĩkeno kĩanyu gĩtuĩke kĩeha.

10 Mwĩnyiihiei mbere ya Mwathani, naake nĩekũmũtũũgĩria.

Gũkaanio ũhoro wa gũtuĩra Mũkristiano ũrĩa ũngĩ

11 Aariũ na aarĩ a Ithe witũ, tigaai gũcambanagia. Mũndũ ũrĩa ũcambagia mũndũ ũrĩa ũngĩ akamũtuĩra nĩ Watho acambagia na akaũtuĩra. Angĩkorwo ũkĩrĩ wa gũtuĩra Watho-rĩ, wee ndũkĩhingagia Watho ũcio, no nĩkũũtuĩra ũũtuagĩra.

12 Ngai we wiki no we mũheani wa watho, na no we mũtuanĩri. No we wiki ũngĩhota kũhonokia na kũniinana. Wee-rĩ, kaĩ ũkĩrĩ ũ ũtuagĩra mũndũ ũrĩa ũngĩ?

Gũkaanio ũhoro wa mwĩtĩĩo

13 Tathikĩrĩriai rĩu inyuĩ muugaga atĩrĩ, “Ũũmũũthĩ kana rũũciũ nĩtũgaathiĩ itũũra rĩna tũikare kuo mwaka ũmwe, tuonjorithie indo kuo twĩgĩĩre na mbeeca.”

14 No rĩĩrĩ, mũtiũĩ kana nĩmũgaakorwo mwĩ muoyo rũũciũ! Amu mũhaana o ta kĩbii kĩrĩa kĩonekaga ihinda o iniini gĩgacooka gĩgathira biũ.

15 Ũrĩa mwagĩrĩirwo nĩkuuga nĩ atĩrĩ, “Mwathani eenda na tũkorwo twĩ muoyo nĩtũgeeka maũndũ maya na maya.”

16 No rĩu inyuĩ nĩgwĩtĩĩa mũretĩĩa na mũkagĩa na nguthi; na mwĩtĩĩo ũcio wanyu nĩ mũũru.

17 Nĩ ũndũ ũcio, mũndũ ũrĩa ũũĩ gwĩka wega na ndeekaga, nĩkwĩhia eehagia.

Jakubu 5

Itonga gũkaanio

1 Rĩu-rĩ, tathikĩrĩriai inyuĩ itonga ici; rĩraai na mũgirĩke nĩ ũndũ wa maũndũ mooru marĩa mekũmũkora.

2 Ũtonga wanyu nĩũbuthĩĩte na nguo cianyu nĩirĩĩtwo nĩ memenyi.

3 O nayo thahabu na betha yanyu nĩrooteete. Kũroota kũu nĩ ũira atĩ nĩireganĩĩte na inyuĩ, na nĩikũmũrĩa mĩĩrĩ imũniine ta mwaki. Nĩmwĩigĩire mũthiithũ mũingĩ matukũinĩ maya ma thuutha.

4 No rĩĩrĩ mũtirĩhaga andũ arĩa marutaga wĩra mĩgũndainĩ yanyu. Tathikĩrĩriai mateta maao! Mũkayo wa arĩa mamũgethagĩra irio cianyu nĩũkinyĩire Ngai, o we Mwathani Mwene Hinya Wothe.

5 Mũtũũrĩre wanyu gũũkũ thĩ ũiyũrĩĩtwo nĩ mĩago na ikeno. Nĩmwĩnoreetie nĩ ũndũ wa mũthenya wa gũthĩnjwo.

6 Mwanatuĩra na mũkooraga andũ matahĩtĩĩtie, o na matarĩ na ũũru na inyuĩ.

Gũkirĩrĩria na kũhooya

7 Kwoguo aariũ na aarĩ a Ithe witũ, gĩkirĩrĩriei kinya rĩrĩa Mwathani witũ agooka. Taroraai ũrĩa mũrĩmi eetagĩrĩra irio cia mũgũnda wake iria cia bata ategũthethũka. Eetagĩrĩra ciurĩrwo nĩ mbura ĩrĩa nene na ĩrĩa niini.

8 O na inyuĩ gĩkirĩrĩriei. Haarĩriai ngoro cianyu nĩ amu mũthenya wa Mwathani wĩ hakuhĩ gũkinya.

9 Aariũ na aarĩ a Ithe witũ, tigagaai gũtetania mũndũ na ũrĩa ũngĩ nĩ geetha mũtikaanatuĩrwo nĩ Ngai. Taroraai muone mũtuanĩri e mũrangoinĩ.

10 Aariũ na aarĩ a Ithe witũ, mwĩruteei na maũndũ mooru marĩa anabii meekirwo, o arĩa maaririe thĩinĩ wa rĩĩtwa rĩa Mwathani. Rekeei maũndũ macio matuĩke kĩonereria gĩa gũkirĩrĩria na gũthĩĩnĩka kwanyu.

11 Tuugaga atĩrĩ, “Gũkena nĩ andũ acio nĩ ũndũ nĩmaakirĩrĩirie.” Nĩmũiguĩte ũrĩa Ayubu aakirĩrĩirie, o na nĩmũũĩ atĩ mũthiainĩ Mwathani nĩamũheire indo nyingĩ, tondũ Mwathani nĩ mwega na mũtugi.

12 No rĩĩrĩ, igũrũ rĩa maũndũ moothe aariũ na aarĩ a Ithe witũ, mũtikaanehĩte mũkĩĩranĩra ũndũ. Mũtikaanehĩte na igũrũ kana thĩ kana mwĩhĩte na kĩndũ kĩngĩ o gĩothe. Angĩkorwo mũrenda kuuga ĩĩ, ugaai “Ĩĩ”, na angĩkorwo mũrenda kuuga aaca, ugaai, “Aaca” na mũtigaatuĩrwo nĩ Ngai.

13 Atĩrĩĩrĩ, nĩkũrĩ ũmwe thĩinĩ wanyu ũrathĩĩnĩka? Nĩahooe. Nĩkũrĩ mũndũ thĩinĩ wanyu wĩ na gĩkeno? Nĩainĩre Mwathani.

14 Nĩkũrĩ mũndũ thĩinĩ wanyu mũrũaru? Nĩete athuuri a kanitha mooke mamũhoere na mamũhake maguta rĩĩtwainĩ rĩa Mwathani.

15 Mahooya macio mangĩhooywo na wĩtĩkio mũndũ ũcio nĩekũhona; Mwathani nĩekũmũhonia na angĩkorwo nĩareekĩĩte meehia amwohere.

16 Kwoguo o mũndũ nĩoimbũragĩre mũndũ ũrĩa ũngĩ meehia maake, na o mũndũ ahooyagĩre ũrĩa ũngĩ nĩ geetha mũhonio. Mahooya ma mũndũ mũthingu nĩmakoragwo me na hinya mũnene mũno.

17 Elija-rĩ, aarĩ mũndũ o ta ithuĩ, na rĩrĩa aahoire Ngai na kinyi atĩ mbura ndĩkoire gũtirĩ mbura yoirire thĩ mĩaka ĩtatũ na mĩeri ĩtandatũ.

18 Naake agĩcooka akĩhooya o rĩngĩ, gũkiura mbura na irio igĩkũra.

19 Aariũ na aarĩ a Ithe witũ, mũndũ ũmwe wanyu angĩehera kuuma ũhoroinĩ ũrĩa wa ma-rĩ, naake mũndũ ũngĩ amũcookie,

20 ririkanaai atĩ mũndũ ũrĩa ũgarũraga mwĩhia kuuma njĩrainĩ ĩrĩa njũru nĩahonokagia muoyo wa mwĩhia ũciokuuma gĩkuũinĩ, na agagĩtũma meehia maingĩ moohanĩrwo.

Ahibrania 1

Ngai kwarĩria andũ na ũndũ wa Mũũriũ

1 Matukũinĩ ma tene Ngai nĩaragĩria maithe maitũ hĩndĩ o hĩndĩ o na njĩra mwanya mwanya na tũnua twa anabii.

2 Ĩndĩ matukũinĩ maya ma kũrigĩrĩria atwarĩirie na ũndũ wa Mũũriũ. Mũũriũ ũcio no we Ngai aatuire akaagaya indo ciothe, na Ngai oombire thĩ yothe na ũndũ wake.

3 Ningĩ nĩ we wonanagia ũkengu wa riiri wa Ngai; nĩ we mũhianĩre wa ũrĩa Ngai atariĩ, na no we ũnyiitĩrĩire thĩ yothe na kiugo gĩake kĩrĩ hinya. Naake arĩĩkia gũtheria andũ kuuma meehiainĩ maao nĩathiire agĩikara mwena wa ũrĩo wa Ngai Mwene Hinya Wothe kũũrĩa igũrũ.

Ũnene wa Mũrũ wa Ngai

4 Na rĩĩrĩ, Ngai nĩanenehirie Mũũriũ ũcio gũkĩra araika, o narĩo rĩĩtwa rĩrĩa aamũheire nĩ inene gũkĩra marĩĩtwa ma araika.

5 Amu gũtirĩ hĩndĩ Ngai arĩ eera mũraika wake o na ũmwe atĩrĩ,

“Wee wĩ Mũũriũ wakwa;

Ũũmũũthĩ nĩndatuĩka Thooguo.”

O na kana akĩmwĩra atĩrĩ,

“Nĩngaatuĩka Thooguo,

Nawe ũtuĩke Mũũriũ wakwa.”

6 No rĩĩrĩ, rĩrĩa aareehage Mũrũ wake wa irigithaathi gũũkũ thĩ Ngai oigire atĩrĩ,

“Araika oothe a Ngai no mũhaka mamũthaathayagie.”

7 Ha ũhoro wa araika Ngai oigire atĩrĩ,

“Ngai atuaga araika aake huuho,

arĩa mamũtungatagĩra akamatua nĩnĩmbĩ cia mwaki.”

8 No ha ũhoro wa Mũũriũ akiuga atĩrĩ,

“Wee Ngai, ũthamaki waku ũgũtũũra tene na tene!

# Amu wathaga andũ aakuna kĩhooto.

9 Wee wendeete ũthingu na ũgathũũra waganu.

Nĩ ũndũ ũcio, Ngai, o we Ngai waku,

nĩagũthuurĩĩte na agagũitĩrĩria maguta ma ũkeni

ũkĩĩrĩĩte ũrĩa aheete andũ a thiritũ yaku.”

10 Na ningĩ akiuga atĩrĩ,

“Wee, Mwathani, nĩ we wombire thĩ o kĩambĩrĩria,

nakuo matuinĩ ũgĩgũthondeka na mooko maaku.

11 Cio nĩigaathira, no wee ndũgaathira;

nĩigaakũra o ta nguo.

12 Nĩũgaacikũnjakũnja o ta nguo,

nacio nĩikaagarũrũka o ta nguo.

No wee ndũrĩ hĩndĩ ũgarũrũkaga,

na matukũ maaku matirĩ mũthia.”

13 Ngai gũtirĩ hĩndĩ arĩ eera mũraika wake o na ũmwe atĩrĩ,

“Ikara mwena wakwa wa ũrĩo

nginya rĩrĩa ngaatũma ũrangĩrĩrie thũ ciaku.”

14 Araika-rĩ, makĩrĩ a? O nĩ maroho marĩa matungatagĩra Ngai, na nĩmatũmagwo magateithie andũ arĩa makaahonokio nĩ Ngai.

Ahibrania 2

Ũhonokio mũnene

1 Nĩ ũndũ ũcio no mũhaka tũrũmbũiye wega ũhoro ũrĩa tũiguĩte nĩguo tũtikaae kweherio kuuma harĩ guo.

2 Amu angĩkorwo ndũmĩrĩri ĩrĩa yaheanirwo nĩ araika yarĩ ya ma, na arĩa oothe maaregire kũmĩrũmĩrĩra kana kũmĩathĩkĩra nĩmaaherithirio o ta ũrĩa kwagĩrĩire-rĩ,

3 ithuĩ tũgakĩaga kũherithio atĩa tũngĩaga kũrũmbũiya ũhonokio mũnene ta ũyũ? Mwathani o kĩambĩrĩria nĩ we wamenyithanirie ũhoro wa ũhonokio ũcio, o na ũgĩcooka kũmenyithanio kũrĩ ithuĩ atĩ nĩ wa ma nĩ arĩa maamũiguire.

4 O naake Ngai nĩarutire ũira wa kuonania atĩ ũhoro ũcio nĩ wa ma na ũndũ wa kuonania moorirũ, kũringa ciama, gwĩka ciĩko nyingĩ cia kũgegania, o na kũheana iheeo cia Roho Mũtheru kũrĩ mũndũ o wothe angĩthuura kũhe.

Jesũ nĩ we ũtũkinyagia ũhonokioinĩ

5 Amu Ngai ndatuire araika atĩ nĩ o magaathana thĩinĩ wa thĩ ĩrĩa ĩgooka, ĩrĩa tũraaria ũhoro wayo.

6 Tondũ handũ hamwe Maandĩkoinĩ nĩhoimbũrĩĩtwo atĩ:

“Ngai, kaĩ mũndũ akĩrĩ we kĩ

nĩguo ũikarage ũkĩmwĩciiragia?

Mũndũ ũrĩa arĩ o rũkũngũ akĩrĩ kĩ tondũ ũmũrũmbũyagia?

7 Wamũtuire kwa ihinda iniini mũnyiinyi kũrĩ araika;

# ũkĩmũhumba ũgooci na riiri,

8 na ũkĩmũtua mũnene wa indo ciothe.”

Ha ũhoro wa kũiga indo ciothe rungu rwa mũndũ, gũtirĩ o na kĩmwe aatigire gĩtarĩ rungu rwa mũndũ, no rĩu indo ciothe tũticionaga irĩ rungu rwake.

9 No nĩtuonaga Jesũ, ũrĩa kwa ihinda iniini watuĩtwo mũniini kũrĩ araika, nĩguo na ũndũ wa wega wa Ngai, akue nĩ ũndũ wa andũ oothe. Rĩu nĩtũmuonaga ahumbĩĩtwo thũmbĩ ya riiri na gĩtĩĩo nĩ ũndũ wa kũnyamaario o na gũkua gwake.

10 Amu Ngai, o we mũũmbi na mũtũũria wa indo ciothe nĩonire kwagĩrĩire atĩ Jesũ atuuo mwagĩrĩru na ũndũ wa kũnyamaario, nĩ geetha atũme andũ aingĩ makinyĩrwo nĩ riiri wa Ngai. Nĩ amu Jesũ nĩ we ũmoonagĩrĩria njĩra nĩ geetha Ngai amahonokie.

11 Jesũ nĩatheragia andũ kuuma meehiainĩ maao, naake arĩ hamwe na acio matheragio, oothe nĩ a Ithe ũmwe. Kwoguo nĩkĩo Jesũ ataconokaga kũmeeta aariũ na aarĩ a Ithe witũ.

12 Nĩeraga Ngai atĩrĩ,

“Nĩngwĩra andũ aitũ ũrĩa wĩkĩĩte;

ndĩgĩgũkumie ciũnganoinĩ ciao.”

13 Na ningĩ akoiga atĩrĩ, “Nĩngũiga mwĩhoko wakwa harĩ Ngai.” O na atĩrĩ, “Niĩ ũyũ haaha hamwe na ciana iria Ngai aheete.”

14 Hakĩrĩ ũguo-rĩ, kuona atĩ ciana, o ta ũguo egũciĩta, nĩ andũ me na mwĩrĩ na thakame, Jesũ o naake nĩagaire ũmũndũ ũcio wao agĩkĩhaana o ta o. Eekire ũguo nĩ geetha na ũndũ wa gĩkuũ gĩake aanange Ngoma ĩrĩa nyene hinya wa gĩkuũ,

15 na ahũthĩre gĩkuũ kĩu gũkũũra arĩa oothe maatũire matukũ maao moothe me ngombo nĩ ũndũ wa gwĩtigĩra gĩkuũ.

16 Amu nĩ ma atĩ ndateithagia araika, no ateithagia rũciaro rwa Aburahamu.

17 Ũguo nĩkuuga atĩ no mũhaka angĩahaananirio na aariũ na aarĩ a Ithe witũ maũndũinĩ moothe, nĩguo atuĩke Mũthĩnjĩri Ngai Ũrĩa Mũnene mwĩhokeku na wĩ tha wĩrainĩ wa Ngai nĩguo andũ mooherwo meehia maao.

18 Naake nĩahotaga gũteithia arĩa mageragio, nĩ ũndũ we mwene nĩageririo na agĩthĩĩnio.

Ahibrania 3

Jesũ nĩ mũnene gũkĩra Musa

1 Kwoguo aariũ na aarĩ a Ithe witũ, o inyuĩ atheru na mwĩtĩĩtwo nĩ Ngai, mwĩcũũranagiei ũhoro wa Jesũ, o we twatũmĩirwo atuĩke Mũthĩnjĩri Ngai Ũrĩa Mũnene thĩinĩ wa wĩtĩkio ũrĩa tuumbũraga.

2 We nĩatuĩkire mwĩhokeku harĩ Ngai ũrĩa wamũthuurire, o ta ũrĩa Musa o naake aatwĩkire mwĩhokeku wĩrainĩ wake thĩinĩ wa nyũmba ya Ngai.

3 Mũndũ ũrĩa wakaga nyũmba nĩaheagwo gĩtĩĩo gũkĩra nyũmba ĩrĩa aakĩĩte. Ũguo noguo o naake Jesũ aagĩrĩirwo nĩkũheeo gĩtĩĩo kĩnene gũkĩra Musa.

4 Na rĩĩrĩ, nĩtũkĩũĩ o wega atĩ gũtirĩ nyũmba ĩtarĩ mũmĩaki, na Ngai nĩ we mwaki wa indo ciothe.

5 Musa nĩatuĩkire mwĩhokeku maũndũinĩ moothe o ta ndungata nyũmbainĩ ya Ngai, nĩ geetha amenyithanie ũhoro ũrĩa ũkaaheanwo thuuthainĩ.

6 No Kristũ aatuĩkire mwĩhokeku agĩathana ta Mũũriũ nyũmbainĩ ya Ithe. Na rĩĩrĩ, ithuĩ nĩ ithuĩ nyũmba yake twathiĩ na mbere tũtegwĩtigĩra na twĩtĩkĩĩtie kĩrĩa twĩrĩgĩrĩire.

Ũhuurũko wa andũ a Ngai

7 Kwoguo o ta ũrĩa Roho Mũtheru oigaga atĩ:

“Ũũmũũthĩ mũngĩigua mũgambo wa Ngai,

8 mũtikaae gũtuĩka andũ aremi mataiguaga,

ta ũrĩa maithe maanyu maatariĩ rĩrĩa mookĩrĩire Ngai,

ta ũrĩa maatariĩ mũthenya ũrĩa maarĩ werũinĩ rĩrĩa maamũgeririe.

9 Me kũu werũinĩ nĩmaangeririe

o na aakorwo nĩmooneete ciĩko ciakwa itĩĩna rĩa mĩaka mĩrongo ĩna.

10 Nĩ ũndũ ũcio ngĩraakara nĩ ũndũ wa andũ acio,

ngĩkiuga atĩrĩ,

‘Aya nĩ andũ matũire marĩ aremi,

na gũtirĩ hĩndĩ maiguaga maathani maakwa.’

11 Ngĩkĩraakara na ngĩĩhĩta ngiuga atĩrĩ:

‘Matirĩ hĩndĩ magatoonya bũrũriinĩ kũrĩa ingĩkaamahe ũhuurũko!’ ”

12 Aariũ na aarĩ a Ithe witũ, mwĩmenyerereei gũtikaae gũkorwo kwĩ na mũndũ wĩ na ngoro njaganu na ĩteetĩkĩĩtie gatagatĩinĩ kaanyu, naake akĩyeherie kuuma harĩ Ngai ũrĩa ũrĩ muoyo.

13 Kaba mũũmanagĩrĩrie inyuĩ eene o mũthenya rĩrĩa rĩothe ũgwĩtwo “Ũũmũũthĩ,” nĩ geetha hatikaagĩe o na ũmwe wanyu ũgũtuĩka mũndũ mũremi ũtaiguaga nĩ ũndũ wa kũheenererio nĩ meehia.

14 Amu tũrĩ a ngwatanĩro ĩmwe na Kristũ angĩkorwo nĩtũgũtũũra tũrũmĩĩtie mwĩhoko ũrĩa tũtũire naguo kuuma o kĩambĩrĩria.

15 Tondũ Maandĩko moigĩĩte atĩrĩ:

“Ũũmũũthĩ mũngĩigua mũgambo wa Ngai,

mũtikaae gũtuĩka andũ aremi mataiguaga

ta ũrĩa maithe maanyu maatariĩ rĩrĩa mookĩrĩire Ngai.”

16 Nĩ andũ arĩkũ maiguire mũgambo wa Ngai magĩcooka kũmũũkĩrĩra? Githĩ ti arĩa oothe moimĩĩte Misiri matongoreetio nĩ Musa?

17 O na rĩĩrĩ, nĩ andũ arĩkũ Ngai aatũire araakarĩire mĩaka mĩrongo ĩna? Githĩ to acio meehirie na magĩkuĩra kũu werũinĩ?

18 Ningĩ rĩrĩa Ngai eehĩtire akiuga atĩ matigaatoonya bũrũriinĩ ũrĩa angĩkaamahe ũhuurũko-rĩ, nĩ andũ arĩkũ aaragia ũhoro wao tiga o acio maamũũkĩrĩire?

19 Kwoguo tũgakĩona atĩ matiahotire kũingĩra kuo nĩ ũndũ matietĩkĩĩtie.

Ahibrania 4

1 Hakĩrĩ ũguo-rĩ, kuona atĩ twĩ na kĩĩranĩro gĩa gũgatoonya ũhuurũkoinĩ ũrĩa Ngai eeranĩire, rekeei tũikarage twĩmenyereire nĩguo mũndũ o na ũrĩkũ gatagatĩinĩ kaanyu ndakaage gũkinya kuo.

2 Nĩ amu Ũhoro ũrĩa Mwega wareehirwo kũrĩ ithuĩ o ta ũrĩa o nao maareeheirwo. Ĩndĩ o na maũigua, ndũigana kũmateithia tondũ matiawamũkĩrire me na wĩtĩkio.

3 No ithuĩ arĩa twĩtĩkĩĩtie nĩtũtoonyaga ũhuurũkoinĩ ũcio Ngai eeranĩire, o ta ũrĩa we mwene oigire atĩrĩ,

“O ta ũrĩa ndehĩtire ndaakarĩĩte ngiuga atĩ:

‘Matirĩ hĩndĩ makaingĩra bũrũriinĩ ũrĩa ingĩkaamahe ũhuurũko!’ ”

Oigire ũguo o na angĩkorwo nĩarĩĩkĩĩtie wĩra wake o rĩrĩa oombire thĩ.

4 Nĩ amu Maandĩko maarĩĩtie ũhoro wa mũthenya wa mũgwanja handũ hana makoiga atĩrĩ: “Ngai nĩahuurũkire kũruta wĩra wake wothe mũthenya wa mũgwanja.”

5 Hagacooka o hangĩ Maandĩkoinĩ hakeerwo atĩrĩ: “O matirĩ hĩndĩ makaingĩra bũrũriinĩ ũrĩa ingĩkamahe ũhuurũko.”

6 Andũ arĩa maiguire Ũhoro ũrĩa Mwega o mbere matiagĩire na ũhuurũko nĩ tondũ matietĩkirie. Kwoguo nĩgũkĩrĩ na andũ angĩ meetĩkĩrĩĩtio kũgĩa na ũhuurũko ũcio.

7 Ũndũ ũcio nĩwonanĩĩtio nĩ Ngai nĩ ũndũ nĩathondekeete mũthenya ũngĩ ũrĩa wĩtagwo “Ũũmũũthĩ.” Thuutha wa mĩaka mĩingĩ gũthira Ngai nĩatũmire Daudi aarie ũhoro ũcio ta ũrĩa maandĩko moigĩĩte atĩrĩ:

“Ũũmũũthĩ mũngĩigua mũgambo wa Ngai,

mũtikaae gũtuĩka andũ aremi mataiguaga.”

8 Amu korwo Joshua nĩaheire andũ ũhuurũko ũrĩa meerĩirwo, Ngai ndangĩagĩcookire kwaria ũhoro wa mũthenya ũngĩ.

9 O na kũhaana ũguo nĩgũtigarĩĩte mũthenya wa andũ a Ngai wa kũhuurũka, o ta ũrĩa Ngai aahuurũkire mũthenya wa mũgwanja.

10 Amu mũndũ o wothe ũrĩĩkĩĩtie kũingĩra ũhuurũkoinĩ ũrĩa Ngai eeranĩire nĩahuurũkĩĩte na agatigana na wĩra wake o ta ũrĩa Ngai naake aahuurũkire agĩtigana na wĩra wake.

11 Kwoguo kĩrekeei tũgerie na kĩyo kũingĩra ũhuurũkoinĩ ũcio o na twĩmenyerere nĩguo mũndũ o na ũrĩkũ ndakagirĩrĩrio kũũtoonya nĩ ũndũ wa ũremi ta ũcio wao.

12 Ũhoro wa Ngai ũkoragwo wĩ muoyo na nĩũrutaga wĩra, na nĩ mũũgĩ gũkĩra rũhiũ rwa njora. Ũtemaga ũrũngĩrĩirie wega, ũgakĩhota kũgayania kinya harĩa muoyo na roho inyiitanĩire, na ũkahota kũgayania marũngo na maguta marĩa makoragwo thĩinĩ wa mahĩndĩ. Ningĩ nĩũhotaga kũmenya merirĩria na meciiria ma ngoro.

13 Gũtirĩ ũndũ o na ũmwe Ngai angĩhithwo; maũndũ moothe makoragwo matarĩ mahithĩku maithoinĩ maake. Ũcio nĩ we twagĩrĩirwo nĩkwĩneana kũrĩ we.

Jesũ Mũthĩnjĩri Ngai Ũrĩa Mũnene mũno

14 Kĩrekeei tũrũmie biũ wĩtĩkio witũ ũrĩa tuumbũraga tondũ twĩ na Mũthĩnjĩri Ngai Ũrĩa Mũnene Mũno ũrĩa ũrĩĩkĩĩtie gũkinya kwĩ Ngai, na nĩ we Jesũ Mũrũ wa Ngai.

15 Mũthĩnjĩri Ngai ũcio Mũnene twĩ naake ti atĩ ndangĩhota gũtũiguĩra tha tondũ nĩtwagĩĩte hinya. Wee-rĩ, nĩageririo na njĩra ciothe iria tũgeragio nacio, na ndeehirie.

16 Kwoguo kĩrekeei tũkuhĩrĩrie tũũmĩrĩirie gĩtĩinĩ kĩa Ngai kĩa ũnene, harĩa wega wake ũikaraga na nĩtũkũiguĩrwo tha o na tũheeo wega wa gũtũteithagia rĩrĩa rĩothe twabatario nĩguo.

Ahibrania 5

1 Rĩu-rĩ, Mũthĩnjĩri Ngai Ũrĩa Mũnene o wothe athuuragwo kuuma gatagatĩinĩ ka andũ agatuuo wa gũtungatagĩra Ngai handũ haao, nĩ geetha arutagĩre Ngai mahaki na magongoona nĩ ũndũ wa meehia.

2 Na tondũ o naake aanakorwo atarĩ na hinya, nĩahotaga gũkirĩrĩria arĩa ahũhũũtĩki o na arĩa mahĩtagia.

3 Tondũ o naake ndakĩrĩ hinya, no mũhaka akĩrute igongoona nĩ ũndũ wa meehia maake, o ta ũguo arutaga nĩ ũndũ wa meehia ma kĩrĩndĩ.

4 Na rĩĩrĩ, gũtirĩ mũndũ wĩthuuraga akeehe gĩtĩĩo gĩa gũtuĩka Mũthĩnjĩri Ngai Ũrĩa Mũnene, no nĩgwĩtwo eetagwo nĩ Ngai, o ta ũrĩa Harũni eetirwo.

5 Ũguo noguo Kristũ naake ataigana gwĩtũũgĩria atĩ nĩ geetha atuĩke Mũthĩnjĩri Ngai Ũrĩa Mũnene. Handũ ha ũguo Ngai aamwĩrire atĩrĩ,

“Wee wĩ Mũrũ wakwa;

ũũmũũthĩ nĩndatuĩka Thooguo.”

6 Na agacooka akoiga handũ hangĩ atĩrĩ,

“Wĩ mũthĩnjĩri Ngai nginya tene,

wa gĩthemba kĩa Melikizedeki.”

7 Hĩndĩ ĩrĩa Kristũ aatũire gũũkũ thĩ, nĩahooyaga na agathaithaga Ngai agĩkayaga na agĩitaga maithori, tondũ no we ũngĩahotire kũmũhonokia amũrute gĩkuũinĩ. Naake nĩaiguirwo nĩ Ngai nĩ ũndũ wa kwĩnyiihia na kwĩĩrutĩra gwake.

8 O na akorwo aarĩ Mũrũ wa Ngai, we nĩamenyire gwathĩka tondũ wa kũnyamaarĩka kũrĩa anyamaarĩkire.

9 Na rĩĩrĩ, arĩĩkia gũtuuo mwagĩrĩru kũna nĩatuĩkire kĩhumo kĩa ũhonokio ũrĩa ũtagaathira nĩ ũndũ wa arĩa oothe mamwathĩkagĩra.

10 Naake Ngai agĩkĩmũtua Mũthĩnjĩri Ngai Ũrĩa Mũnene wa gĩthemba kĩa Melikizedeki.

Mwĩmenyerereei mũtikaae gũtiga gwĩtĩkia Kristũ

11 Na rĩĩrĩ, ha ũhoro ũcio, twĩ na maũndũ maingĩ twagĩrĩirwo nĩkuuga, no he na hinya wa kũmũtaarĩria nĩ tondũ mũtiiguaga na ihenya.

12 O na gũtuĩka mahinda maya inyuĩ mwagĩrĩirwo gũkorwo mũrĩ arutani-rĩ, nĩmũkwenda mũndũ wa kũmũruta rĩngĩ maũndũ marĩa mwarutirwo o kĩambĩrĩria ma ũhoro wa Ngai. Ningĩ handũ ha mũrĩe irio nyũmũ, inyuĩ no mũnyuire iria,

13 nĩ amu mũndũ o wothe ũtũirio nĩ iria no gakenge gatataũkĩirwo nĩkũmenya ũhoro wa ũthingu.

14 Nĩ ũndũ-rĩ, irio nyũmũ nĩ cia arĩa agima, o arĩa nĩ ũndũ wa gũcimenyera mahotaga gũkũũrana wega na ũũru.