IBUKU RฤจA ลจHORO ลจRฤจA MWEGA (GIKCL)

Rwĩmbo rwa kũgooca

1 MWATHANI, wee nĩ we Ngai wakwa,

niĩ nĩndĩrĩgũtũũgagĩria,

na nĩndĩrĩkumagia rĩĩtwa rĩaku.

Nĩ gũkorwo nĩwĩkĩĩte maũndũ ma magegania;

mĩbango ĩrĩa wabangire o tene,

nĩũmĩhingĩĩtie ũtekũgarũrĩra o na haniini.

2 Nĩũtuĩte itũũra hĩba ya mahiga,

na ũkamomorania thingo iria irĩgitĩire.

Nyũmba ya ũnene ĩrĩa thũ ciitũ ciakĩĩte

nĩthengu o gũthenga, na ndĩgaakwo rĩ o rĩ.

3 Kwoguo andũ a ndũũrĩrĩ iria irĩ hinya nĩmarĩgũkumagia,

na wĩtigagĩrwo nĩ matũũra ma ndũũrĩrĩ iria nema kũhĩa.

4 Athĩĩni mooragĩra harĩ we,

arĩa abataru nao makoorĩra harĩ we hingo ya thĩĩna.

Megiritagia harĩ we hĩndĩ ya kĩhuuhũkanio,

na makeyũaga riũa hingo ya ũrugarĩ.

Nĩ gũkorwo andũ arĩa nema kũhĩa mahithũkanagĩra

o ta ndiihũ cia hĩndĩ ya mũiyũro wa maaĩ,

5 o na kana ta riũa werũinĩ.

No rĩĩrĩ, wee, MWATHANI, thũ ciitũ,

na ũgakiria inegene rĩa andũ arĩa nema kũhĩa,

o ta ũrĩa itu rĩhooragĩria ũrugarĩ mũthenya.

Ngai kũhaarĩria kĩrugo

6 Kĩrĩmainĩ gĩĩkĩ gĩa Zayuni nĩkuo MWATHANI Mwene Hinya Wothe akaahaarĩrĩria ndũũrĩrĩ ciothe kĩrugo kĩa irio njega mũno, nyama noru, na ndibei ĩrĩa njega.

7 Nokuo MWATHANI agaathengeria ndũũrĩrĩ ciothe nguo ya kĩeha ĩrĩa ihumbĩrĩĩte nayo,

8 na nokuo akaaniinĩra gĩkuũ agĩtoorie tene na tene. MWATHANI Ngai nĩakaagiria moothiũ moothe maithori na athengerie andũ aake gĩconoko kĩrĩa maaconoreetwo nakĩo thĩ yothe. Nĩ MWATHANI woiga ũguo.

9 Maũndũ macio maahinga, mũndũ o mũndũ akoigaga atĩrĩ, “Ũyũ nĩ we Ngai witũ, tũigĩĩte mwĩhoko witũ harĩ we atũhonokie. Ũyũ nĩ we MWATHANI, nĩtũigĩĩte mwĩhoko witũ thĩinĩ wake, rekeei tũkene na tũcanjamũke tondũ nĩatũhonokeetie.”

Ngai kũherithia Moabi

10 MWATHANI nĩakaagitĩra kĩrĩma gĩĩkĩ gĩa Zayuni, no nĩakaarangĩrĩria Amoabi thĩ, o ta ũrĩa rũũa rũrangagĩrĩrio kĩarainĩ.

11 Nao magaatambarũkia mooko maao o ta andũ magĩthambĩra, no MWATHANI nĩakaamagithia gĩtĩĩo na amaconorithie hamwe na mawĩra maao.

12 Akaamomorania mĩnaara ya kwĩgitĩra ya Amoabi; amĩrũnde thĩ ĩtuĩke mũthegethege.

Ngai kũhe andũ aake ũhootani

1 Mũthenya ũcio wakinya-rĩ

rwĩmbo rũũrũ nĩrũkainwo bũrũriinĩ wa Juda.

Itũũra riitũ nĩrĩirigĩre wega,

Ngai atuĩte atĩ kũhonokania gwake

nĩkuo thingo ciitũ cia na nja na cia na thĩinĩ.

2 Hingũraai ihingo;

mũreke rũũrĩrĩ rũrĩa rũthingu rũtoonye,

o rũu rwĩkaga maũndũ marĩa marũngĩrĩirie.

3 Mũndũ wothe ũikaraga akwĩhokeete, MWATHANI,

nĩũmũigaga na thaayũ

tondũ atũũraga akwĩrĩgĩrĩire.

4 Ikaragaai mwĩhokeete MWATHANI tene na tene,

tondũ we nĩ rwaro rwa ihiga rwa tene na tene.

5 Nĩahang’ũranĩĩtie arĩa maikaraga metũũgĩrĩĩtie,

akamomora itũũra rĩrĩa rĩirigĩre maikaraga,

thingo ciarĩo agacirekania o rũkũngũinĩ.

6 Athĩĩni na andũ matarĩ kĩene

marathiĩ marĩrangĩĩte na makinya maao.

7 Njĩra ya andũ arĩa athingu ndĩkoragwo na mĩhĩnga;

wee, MWATHANI, aragania njĩra yao.

8 Tũthiaga tũkĩhingagia wendi waku, wee MWATHANI,

na tũigĩĩte mwĩhoko witũ o thĩinĩ waku;

amu wee no we twĩriragĩria.

9 Ũtukũ nĩ we ndĩriragĩria na ngoro yakwa yothe;

# nayo thamiriyakwa ĩgakorwo ĩgĩgũtheethũkĩra.

Nĩ gũkorwo matua maaku moonekaga gũũkũ thĩ,

andũ arĩa matũũraga gũũkũ thĩ nĩmataũkagĩrwo nĩ ũthingu.

10 Mũndũ mwaganu o na angĩiguĩrwo tha,

nderutaga njĩra ya ũthingu.

Athiaga o na mbere kũgera ngero bũrũriinĩ wa andũ arĩa akinyanĩru,

na ndarĩ hingo oonaga riiri wa MWATHANI.

11 MWATHANI, nĩwambararĩĩtie guoko gwaku,

no thũ ciaku itirakuona.

Reke ikuone, na iconoke nĩ ũrĩa ũramataga andũ aaku na kĩyo;

gĩciniine na mwaki wa mang’ũrĩ maaku.

12 MWATHANI, nĩũgaatũhe thaayũ,

amu mawĩra maitũ moothe nĩ we ũtũrutĩire.

13 MWATHANI Ngai witũ, nĩtwathĩĩtwo nĩ aathani angĩ;

no ithuĩ no rĩĩtwa rĩaku riiki tũrĩheaga gĩtĩĩo.

14 Aathani acio nĩmakuĩte, matingĩcooka gũtũũra rĩngĩ,

ningĩ matingĩriũka o na atĩa,

tondũ ũmahũũrĩĩte ũkamaniina,

na ũgatũma mariganĩre o kũriganĩra.

15 Wee MWATHANI, nĩũkũrĩĩtie rũũrĩrĩ,

ũrũkũrĩĩtie ũkeegĩĩra na igweta;

na nĩwaramĩĩtie bũrũri na mĩena yothe.

16 MWATHANI wahũũrire andũ aaku,

nao magĩgũkaĩra hĩndĩ ya mathĩĩna maao.

17 O ta ũrĩa mũtumia ũrĩ na nda akinyĩrĩirwo nĩ ihinda rĩake rĩa kũheeo kaana,

eyunangaga na akarĩra nĩ ruwo,

noguo wee MWATHANI watũmire tũrĩre.

18 Nĩ ta twagĩire nda,

na nĩtũkinyĩrĩirwo nĩ ihinda riitũ rĩa gũciara.

Twĩyunangĩĩte na tũkarĩra no tũciarĩĩte o rũhuuho.

Tũtirĩ ũhootani tũreehete gũũkũ thĩ

o na kana tũkoongerera andũ a gũtũũra gũũkũ thĩ.

19 Andũ aaku arĩa makuĩte nĩmagaatũũra muoyo

na mĩĩrĩ yao nĩkaariũka.

Inyuĩ mũkomeete rũkũngũinĩ, ũkĩraai mũine mũkĩrũũharũũhagia.

O ta ũrĩa ime rĩnyootoraga thĩ,

noguo MWATHANI akaarahũra arĩa maakuire tene.

Gũtuĩrwo na gũcookanĩrĩrio

20 Inyuĩ andũ aakwa, toonyaai nyũmba cianyu mwĩhingĩre kuo.

Wĩhitheei kwa ihinda iniini

nginya maraakara ma Ngai mathire.

21 MWATHANI aroima gĩikaroinĩ gĩake,

ooke aherithie andũ a gũũkũ thĩ nĩ ũndũ wa meehia maao.

Thĩ nayo nĩĩkuonania thakame ĩrĩa yanaitwo kuo,

na ndĩgũcooka kũhitha andũ arĩa maanooragĩrwo kuo.

1 Mũthenya ũcio MWATHANI akaahũthĩra rũhiũ rwake rwa njora,

rũrĩa rũũgĩ na rwa hinya,

# aherithie Leviathani, ndamaathia ĩrĩa ya iriainĩ,

rĩĩrĩ ĩrethara na ĩrenyogonda;

akaamĩũragĩra o iriainĩ thĩinĩ.

2 Mũthenya ũcio MWATHANI,

nĩakainĩra rwĩmbo mũgũnda wake wa mĩthabibũ ũrĩa mũthaka rwĩmbo rũũrũ:

3 “Niĩ MWATHANI, nĩ niĩ mbaaragĩrĩra mũgũnda wakwa wa mĩthabibũ,

na ndĩũitagĩrĩria maaĩ hĩndĩ ciothe.

Ndĩũgitagĩra ũtukũ na mũthenya

ndũkaae gũthũũkio nĩ mũndũ.

4 Niĩ ndirĩ mũraakarie nĩ mũgũnda ũcio wakwa wa mĩthabibũ.

No kũngĩrĩ mĩtare na mĩigua-rĩ,

ingĩhũũrana nayo njooke ndĩmĩcine yothe.

5 Nĩ ũndũ ũcio mĩigua na mĩtare nĩgĩũke ĩĩgitie harĩ niĩ,

nĩĩiguithanie na niĩ,

ĩĩ, nĩĩiguithanie na niĩ.”

6 Matukũ nĩmagooka, andũ a Isiraeli, o o njiarwa cia Jakubu, matheereme,

maciare maiyũrie thĩ yothe maciaro maao,

na magĩe na mĩri o ta mĩtĩ.

7 MWATHANI nĩamahũũrĩĩte ta ũrĩa aahũũrire arĩa maamahũũraga?

Kana nĩmooragĩĩtwo na ũingĩ ta ũrĩa arĩa maamooragaga mooragirwo?

8 MWATHANI aaherithirie andũ a Isiraeli

akĩmatwarithia ithaamĩrioinĩ.

Aamatwarithirie na kĩhuuhũkanio kĩũru,

kĩa rũhuuho ruumĩĩte mwena wa na irathĩro.

9 Tondũ ũcio meehia ma Isiraeli makaahoroherio,

o rĩrĩa magaakorwo mathĩĩĩte mahiga ma igongoona cia ngai ingĩ

magatuĩka ta coka mũthĩe,

mathengeetie igongoona cia gũcinĩra ũbaani,

na magathengia mĩhianano ya ngai ĩrĩa ĩĩtagwo Ashera.

10 Itũũra rĩrĩa rĩirigĩre na thingo cia hinya nĩrĩthaamĩĩtwo,

rĩgatigwo o ũguo ta werũ.

Ng’ombe ikarĩithagio na igakomaga kuo.

11 Honge cia mĩtĩ ciũmĩĩte ikoinĩkanga,

nao atumia magaciũngania magathiĩ magacitua ngũ.

Nĩ gũkorwo andũ aya nĩmaagĩĩte ũmenyo,

nĩkĩo ũrĩa wamoombire ndakaamaiguĩra tha,

o na kana ameeke maũndũ ma ũtugi.

12 Mũthenya ũcio MWATHANI nĩagacookanĩrĩria andũ aake ũmwe kwa ũmwe

o ta mũndũ akĩhuuha ngano kuuma mahutiinĩ,

kuuma o gĩturi kĩa Farati nginya rũũĩ rwa Misiri.

13 Mũthenya ũcio, karumbeeta nĩgakaahuuhwo na hinya,

geete Aisiraeli arĩa oothe maathaamĩirio bũrũri wa Asiria na wa Misiri;

nao mooke mathaathaĩrie MWATHANI gũũkũ Jerusalemu,

o gũũkũ kĩrĩmainĩ gĩake kĩrĩa gĩtheru.

Ũthamaki wa mwena wa na rũgongo gũkaanio

1 Kaĩ atongoria a Efiraimu arĩa arĩĩu,

o acio meĩkĩraga thũmbĩ cia mwĩtĩĩo

me thĩĩnainĩ-ĩ!

Riiri wao o ũcio ũhaana ta mahũa marahooha

maigĩrĩirwo mĩtwe ya atongoria acio atoorie nĩ ndibei,

kaĩ wĩ thĩĩnainĩ-ĩ!

2 MWATHANI arĩ na mũndũ njamba na ũrĩ hinya;

ahaana o ta kĩhuuhũkanio gĩa kũniinana kĩa mbura ya mbembe,

na ta mũiyũro wa maaĩ moinĩĩte,

mũndũ ũcio akaamaharũrũkia thĩ na hinya.

3 Hĩndĩ ĩyo, thũmbĩ icio cia mwĩtĩĩo

cia atongoria a Efiraimu acio arĩĩu a ndibei,

nĩikaarangĩrĩrio thĩ na makinya.

4 Riiri wao o ũcio ũhaana ta wa mahũa marahooha,

wĩkĩrĩĩtwo mĩtwe ya atongoria etĩĩi,

ũkaahaana o ta ngũyũ ya mbere kwĩrua.

Ĩtuagwo nĩ mũndũ wa mbere kũmĩona,

na ĩgĩkinya guokoinĩ gwake ũguo nĩamĩrĩĩte.

5 Mũthenya ũcio MWATHANI Mwene Hinya Wothe agaatuĩka thũmbĩ ya riiri na ya ũthaka

harĩ andũ aake arĩa magaatigara.

6 Nĩakaahe arĩa matuanagĩra ngoro ya waragania,

na arĩa marangagĩra kĩhingoinĩ amahe hinya.

Isaia na anabii arĩĩu a Bũrũri wa Juda

7 O nao anabii na athĩnjĩri Ngai nĩmarĩĩtwo nĩ ndibei na njoohi ndũrũ.

Marĩĩtwo atĩ marathiiĩ magĩtũgũũgaga;

marĩĩtwo magaturuura;

anabii marĩĩtwo makaaga kuona cioneki,

nao athĩnjĩri Ngai magaturuura matuainĩ maao.

8 Meetha ciothe iria maikaragĩra ciyũrĩĩte matahĩko

na gũtirĩ handũ o na hamwe hatheru.

9 Marateta igũrũ rĩakwa makoiga atĩrĩ,

“Nĩ andũ arĩkũ arathoomithia?

Nĩ a arahe kĩrĩra?

Kĩrĩra gĩake kĩagĩrĩire o ngeenge iria itigithĩĩtio kuonga

kana irutĩĩtwo nyondoinĩ.

10 Atĩrĩĩrĩ, ararutana kiugo gwa kiugo,

mũhari kwa mũhari,

gĩcunjĩ gwa gĩcunjĩ.”

11 Amu mwaga kũnjigua, Ngai ekũmwarĩria

na tũnua twa ndũũrĩrĩ iratondoira

na iraaria thiomi ng’eni.

12 Aamwĩrire atĩrĩ,

“Ũkaai mũhuurũke gũũkũ,

inyuĩ mũnogeete, ũkaai mũhuurũke.

Ũkaai mũhuurũke, gũũkũ kwĩ na ũhuurũko.”

No inyuĩ mũtiigana gũthikĩrĩria.

13 Nĩkĩo MWATHANI aramwarĩria kiugo gwa kiugo,

mũhari kwa mũhari,

gĩcunjĩ gwa gĩcunjĩ,

nĩ geetha mũgĩthiĩ mũturuure mũcooke na thuutha,

mũgũe muunangĩke,

na mũgũe mũtegoinĩ mũnyiitwo mĩgwate.

Ihiga rĩa mũthingi rĩa Zayuni

14 Inyuĩ andũ aya ang’athia,

o inyuĩ mwathaga andũ a Jerusalemu,

thikĩrĩriai ũrĩa MWATHANI aroiga.

15 Mũretĩĩa atĩ nĩmũthondekeete kĩrĩĩkanĩro na gĩkuũ,

na mũkagĩa kĩrĩĩko na bũrũri wa arĩa akuũ.

Mwĩ na ma atĩ rĩrĩa mũthiro ũrĩtuĩkania gũũkũ ndũrĩmũhuutia,

nĩ gũkorwo mwĩgiritanĩĩtie na maheeni,

na mũkeehitha ũrongoinĩ.

16 Nĩ ũndũ ũcio MWATHANI Mwene Hinya Wothe ekuuga atĩrĩ,

“Nĩngũiga ihiga rĩa mũthingi Zayuni,

ihiga rĩtangĩmumuthũka na rĩa goro,

rĩa gũthondeka mũthingi mũrũmu;

mũndũ o wothe ũkaarĩhoka ndagaconorithio.

17 Waragania ũgũtuĩka buutikamba ya gũthima mũthingi,

na ũthingu ũtuĩke kabirũ gakũũthima.”

Mbura ya mbembe ĩriura

ĩhaate maheeni marĩa mwĩgiritanĩĩtie namo,

nakĩo kĩguũ kĩiyũre kũrĩa mwĩhithĩĩte.

18 Hĩndĩ ĩyo kĩrĩĩkanĩro kĩanyu na gĩkuũ nĩkĩrĩthario,

nakĩo kĩrĩĩko kĩanyu na bũrũri wa arĩa akuũ kĩage kĩene.

Rĩrĩa mũthiro ũrĩtwĩkania ũrĩmũhũũra ũmũniine.

19 Maita moothe marĩa mũthiro ũrĩtuĩkanagia nĩũrĩmũkoragĩrĩra,

amu ũrĩtuĩkanagia kĩrooko o kĩrooko,

o na mũthenya na ũtukũ.

Mwaigua ũndũ ũcio, no kũmaka mũrĩmakaga.

20 Mũrĩhaana ta mũndũ ũrĩa ũgweteetwo thimoinĩ,

ũrĩa ũrĩrĩ wake nĩ mũkuhĩ

ũguo atĩ ndangĩhota gũkoma igũrũ rĩaguo,

naguo mũrĩngĩti wake nĩ mũceke

ũguo atĩ ndũngĩtũngana ehumbĩrĩĩte naguo.

21 Nĩ gũkorwo MWATHANI arĩrũwa o ta ũrĩa aarũire kĩrĩmainĩ kĩa Perazimu,

na ang’ũrĩke o ta ũrĩa aang’ũrĩkĩĩte kĩandainĩ kĩa Gibeoni.

Ihinda rĩĩrĩ egwĩka ũndũ wa kũmakania;

ndegwĩka ũrĩa mwĩrĩgĩrĩire nĩegwĩka.

22 Kwoguo-rĩ, tigaai kĩnyũrũri,

mũtigaatũme bĩngũ iria muoheetwo nacio inyiitanyiitio.

Tondũ nĩnjiguĩte itua rĩa MWATHANI Ngai Mwene Hinya Wothe

atĩ bũrũri wothe werekeire kũniinwo biũ.

Ũũgĩ wa Ngai

23 Tegaai matũ mũigue ũhoro wakwa,

thikĩrĩriai mũigue ũrĩa ndĩroiga.

24 Arĩmi matũũraga marĩmaga matukũ moothe?

Matũũraga mahũũraga tuuta hĩndĩ ciothe?

25 Githĩ marĩĩkia kũhaarĩria mũgũnda, maticookaga makaminja kũmini,

magaita ndengũ na mĩhari,

magacooka makahanda mbaarĩ na ngano mĩhakainĩ?

26 Nĩmooĩ wĩra wao,

tondũ Ngai wao nĩamarutĩĩte na akamoonia.

27 Amu mbegũ cia kũmini na cia ndengũ itihũũragwo na mũtĩ mũtungu,

o na kana ikahũũrwo na kũrangwo na magũrũ ma ngaari,

no ihũũragwo na karũthanju.

28 Ngano ndĩhũũragwo kinya ĩgakua;

ĩrangagwo na magũrũ ma ngaari ya kũguucio ya mbarathi,

na mbarathi itimĩhũũraga ĩgathĩĩĩka.

Nĩguo mũgate ũthondekwo

nĩgũthĩo ĩthĩagwo.

29 Ũũgĩ ũcio uumaga harĩ MWATHANI Mwene Hinya Wothe;

nĩ mũtaarani wa magegania

na ũũgĩ wake nĩ mũingĩ.

Marigĩrĩrio ma Jerusalemu

1 Kaĩ itũũra rĩa Jerusalemu, rĩrĩa rĩĩtagwo “ Kĩgongoona kĩa Ngai,” rĩ thĩĩnainĩ-ĩ!

Kaĩ Jerusalemu, itũũra rĩrĩa Daudi aatũũraga, rĩ thĩĩnainĩ-ĩ!

Mwaka nĩũrekwo ũrũmĩrĩre mwaka,

thigũkũ irekwo ithiĩ na mbere.

2 No rĩĩrĩ, nĩngaareehithĩria itũũra rĩu rĩĩtagwo “Kĩgongoona kĩa Ngai” thĩĩna,

nakuo kũgĩe kĩrĩro na macakaya,

rĩgĩtuĩke kĩgongoona kĩiyũire thakame harĩ niĩ.

3 Wee Jerusalemu, nĩngaagũthiũrũrũkĩria na mĩena yothe,

ngwakĩrĩre ngathĩ,

o na ndũũgamie ihumbu cia tĩĩri thingoinĩ ciaku nĩguo ngũtharĩkĩre.

4 Nĩũkaamomorwo waragie ũrĩ na kũu thĩ,

mũgambo waku uumage na kũu rũkũngũinĩ.

Mũgambo waku ũkĩiguagwo ũkiuma na kũu thĩ o ta wa ngoma;

ũkaiguagwo ta ũraaria na kĩheehũ na kũu tĩĩriinĩ.

5 No rĩĩrĩ, thũ icio ciaku irũrũnganĩĩte igaatuĩka o ta rũkũngũ;

mũrũrũngano ũcio wa thigari itarĩ tha ũgĩtuĩke o ta mahuti moombũrĩĩtwo nĩ rũhuuho.

Na rĩĩrĩ, o rĩmwe, o ta kũbucia kwa riitho,

6 MWATHANI Mwene Hinya Wothe nĩagooka akũhonokie,

arĩ na marurumĩ na gĩthingithia na ngwa nene;

arĩ na kĩhuuhũkanio na mũhũyũko mũnene wa rũhuuho,

o na arĩ na nĩnĩmbĩ cia mwaki wa kũniinana.

7 Ndũũrĩrĩ ciothe iria irahũũranaga na Jerusalemu, itũũra rĩrĩa rĩĩtagwo “Kĩgongoona kĩa Ngai,”

iria ciothe irĩtharĩkagĩra na irĩreehagĩra thĩĩna,

ikoona o ta arĩ kĩrooto kana kĩoneki gĩa ũtukũ.

8 Ikoona ta arĩ kĩrooto kĩa mũndũ ũhũũtiĩ;

araroota akĩrĩa irio, no ookĩra ageekora no ahũũtiĩ.

Kana ta mũndũ mũnyootu ũraroota akĩnyua maaĩ.

no ookĩra ageekora no anyootiĩ.

Ũguo noguo gũkaahaana

na ndũũrĩrĩ ciothe iria ihũũranaga

na kĩrĩma gĩa Zayuni.

Mataaro kũrangĩrĩrio

9 Wĩritiei na mũtuĩke irimũ,

wĩhingeei maitho na mũtuĩke itumuumu!

Tuĩkaai arĩĩu na mũtirĩĩtwo nĩ ndibei,

Tũgũũgaai na mũtirĩĩtwo nĩ njoohi ndũrũ!

10 MWATHANI nĩamũtũmĩire roho

wa gũtũma mũkome toro;

nĩahingĩĩte maitho maanyu, inyuĩ anabii,

na nĩakunĩkĩĩte mĩtwe yanyu inyuĩ ooni maũndũ.

11 Ũrathi wothe ũhaana o ta ibuku rĩtume harĩ inyuĩ. Rĩngĩtwarĩrwo mũndũ ũũĩ gũthooma, eerwo “Wenda tũthoomere ibuku rĩĩrĩ,” naake angĩcookia “Ndingĩhota, tondũ nĩrĩtume.”

12 Rĩngĩtwarĩrwo mũndũ ũtooĩ gũthooma eerwo, “Wenda tũthoomere ibuku rĩĩrĩ,” angĩcookia, “Ndiũĩ gũthooma.”

13 MWATHANI arakiuga atĩrĩ,

“Andũ aya manguhagĩrĩria o na tũnua,

maheaga gĩtĩĩo o na mĩromo,

ĩndĩ ngoro ciao irĩ kũraaya na niĩ.

Gĩtĩĩo kĩao harĩ niĩ no kĩa mawatho

marĩa andũ merutĩĩte kuuma kũrĩ arĩa angĩ.

14 Nĩ ũndũ ũcio-rĩ, nĩngwĩka rĩngĩ maũndũ ma

magegania harĩ andũ aya:

nyongerere magegania harĩ magegania marĩa mangĩ.

Ũũgĩ wa andũ arĩa imenyi nĩgũthira ũgũthira;

naguo wara wa andũ arĩa aara ndũũgĩa kĩene rĩngĩ.”

Kĩĩrĩgĩrĩro kĩa matukũ ma thuutha

15 Arĩa mahithaga MWATHANI, mĩbango yao,

na mageekaga maũndũ maao na hitho na makeĩĩraga,

gũtirĩ ũramoona o na kana ũramamenya,

kaĩ marĩ thĩĩnainĩ-ĩ!

16 Kaĩ nĩmeheeneetie-ĩ!

Mũũmbi no aigananio na rĩũmba?

Kĩndũ gĩa gũthondekwo no kĩĩre ũrĩa ũgĩthondekeete

“Wee ti we wathondekire.”

No kĩĩre ũrĩa ũgĩthondekeete

“Wee ndũrĩ mũũgĩ?”

17 Nĩ ihinda iniini rĩtigarĩĩte,

Lebanoni gũtuĩke mũgũnda ũthakarĩĩtio nĩ irio;

ningĩ mũgũnda ũcio ũthakarĩĩtio ũguo nĩ irio

ũcooke ũtuĩke mũtitũ.

18 Hĩndĩ ĩyo arĩa mataiguaga nĩmakaigua magĩthoomerwo ibuku.

Andũ arĩa matoonaga arĩa matũũraga ndumainĩ,

maitho maao nĩmakaahingũka.

19 Arĩa ahooreri, nĩmagaakena rĩngĩ thĩinĩ wa MWATHANI.

Arĩa athĩĩni nĩmagaacanjamũka nĩ ũndũ wa Ngai Ũrĩa Mũtheru wa Isiraeli.

20 Tondũ gũtigaakorwo andũ matarĩ tha;

arĩa mamenagĩrĩria arĩa angĩ nĩmagaathira,

arĩa nao macaragia o maũũru nĩmakaaniinwo.

21 Andũ arĩa mahĩtithagia arĩa angĩ na mĩario,

arĩa maigagĩra atuithania ciira mĩtego hau kĩhingoinĩ,

na arĩa magithagia andũ arĩa athingu ihooto ciao, na maũndũ ma tũhũ,

oothe nĩmakaaniinwo.

22 Kwoguo MWATHANI, Ngai wa Isiraeli,

ũrĩa wahonokirie Aburahamu kuuma mĩnyamaaroinĩ, aroiga atĩrĩ,

“Andũ aakwa, mũtigaacooka gũconorwo,

kana gũtukia ũthiũ.

23 Nĩ gũkorwo rĩrĩa mũkoona ciana cianyu,

iria irĩ wĩra wa mooko maakwa, irĩ gatagatĩinĩ kaanyu,

nĩmũkaagooca rĩĩtwa rĩakwa,

mũgooce Ngai ũrĩa Mũtheru wa Jakubu,

na mũheage Ngai wa Isiraeli gĩtĩĩo.

24 Andũ arĩa ariitu nĩmageetĩkĩra kũgĩa na ũmenyo

na arĩa matũũraga mang’ong’oraga makenere gũthoomithio.”

Kĩrĩĩkanĩro gĩa tũhũ gatagatĩinĩ ka Juda na Misiri

1 MWATHANI aroiga atĩrĩ,

“Kaĩ arĩa maathanaga Juda marĩ thĩĩnainĩ nĩ ũndũ nĩmaanemeire-ĩ!

Marathondeka mĩbango, na matinjũũrĩĩtie.

Marathondeka irĩĩkanĩro, na itirangenia;

magakĩongerera meehia igũrũ rĩa meehia!

2 Moimagarĩĩte mathiĩ Misiri,

matanjũũrĩĩtie ũtaaro.

Maracaria gwa kwĩgitia Misiri,

na maigĩĩte mwĩhoko wao harĩ mũthamaki wa Misiri.

3 Kwĩgitia harĩ mũthamaki wa Misiri

gũgaatuĩka gĩconoko harĩ inyuĩ;

kũiga mwĩhoko o kũu Misiri

nakuo gũtuĩke thoni.

4 O na gũtuĩka njaama ciake nĩikinyĩĩte Zoani

na atũmwo aake magakinya Hanesi,

5 andũ oothe a Juda nĩmakeerira nĩ ũndũ mehokeete rũũrĩrĩ rũtangĩmateithia,

no nĩ rwakũmareehithĩria gĩconoko na thoni.”

6 Ĩno nĩ ndũmĩrĩri nditũ

ĩkoniĩ nyamũ cia werũ wa mwena wa kĩanda;

“Atũmwo maratuĩkanĩria bũrũri wa mathĩĩna na kĩmako,

bũrũri ũrĩ mĩrũũthi, nyamũ cia thĩ irĩ na thumu, na ingĩ njũru mũno ikũũmbũka.

Makuuithĩĩtie ndigiri na ngamĩĩra indo cia goro,

macitwarĩre rũũrĩrĩ rũtangĩhota kũmateithia.

7 Na tondũ ũteithio wa Misiri ndũrĩ kĩene na nĩ wa tũhũ,

nĩkĩo njĩtĩĩte bũrũri ũcio

‘Ndamaathia ndoorie.’ ”

Mũingĩ mũremi

8 Thiĩ ũmaandĩkĩre ũndũ ũyũ kĩhengereinĩ

na ũũtoonyie mabukuinĩ;

ũndũ ũcio ũgĩtuĩke ũira nĩ ũndũ wa mahinda marĩa magooka,

o nginya tene na tene.

9 Ũyũ nĩ mũingĩ mũremi,

na nĩ ciana itũmagĩra maheeni.

Nĩ ciana iteendaga kũigua mataaro ma MWATHANI.

10 Ciĩraga arathi atĩrĩ,

“Tigaai gũtũrathĩra.

Mũtigatũrathĩre maũndũ marĩa makoniĩ ũthingu,

tũrathagĩreei o maũndũ marĩa mangĩtũkenia,

o maũndũ ma matũhũũhũ.

11 Eheraai njĩrainĩ ciitũ,

tigaai gũtũhĩngĩrĩria.

Tũtigithiei ndeto cia Ngai Ũrĩa Mũtheru wa Isiraeli.”

12 Ngai Ũrĩa Mũtheru wa Isiraeli egũkiuga atĩrĩ,

“Mũregeete ndeto ciakwa,

mũkeehoka kũhinyanĩrĩria na ungumania.

13 Ũũru ũgũkĩmũgũĩra o mu ũmũkomere

o ta rũthingo rũraihu na igũrũ rwatũkangu,

rĩrĩa rwamomoka na ihenya

o ta kũbucia kwa riitho na rũterĩgĩrĩirwo.

14 Ũgũkĩmũmemenda ũtarĩ na tha mũkue o ta nyũngũ,

ĩrĩa ĩtatigaraga o naarĩ rũgĩo, rũngĩruta mwaki riiko,

o na rũtangĩtaha maaĩ itangiinĩ.”

15 MWATHANI Ngai Ũrĩa Mũtheru wa Isiraeli aramwĩra atĩrĩ;

“Mũngĩhonoka o mũngĩmũcookerera na mũmwĩhoke.

Mũngĩkirĩrĩria na mũmwĩhoke,

norĩo mũngĩgĩa na hinya.”

No inyuĩ nĩmũregeete maũndũ macio.

16 Mũroiga atĩrĩ,

“Aaca! Nĩkũũra tũkũũra tũhaicĩĩte mbarathi!”

Nĩ ma nĩmũkũũra.

Mũroiga mũkũũra mũhaicĩĩte mbarathi irĩ na ihenya,

no arĩa makũingatana na inyuĩ,

megũkorwo me na mbarathi irĩ na ihenya makĩria.

17 Andũ aanyu ngiri ĩmwe makaingatithagio nĩ mũndũ ũmwe.

Andũ ataano magaakorwo marĩ aiganu a kũmũingatithia inyuothe,

nginya mũtigwo mũhaana mũtĩ wa bendera ũrũngiĩ kĩrĩma igũrũ.

Ngai nĩakaraathima andũ aake

18 No rĩĩrĩ, MWATHANI aikaire eetereire kũmũiguĩra tha.

Eetereire kũmũtuga

nĩ gũkorwo MWATHANI Ngai eekaga o maũndũ ma kĩhooto.

Arĩa maikaraga mamwĩhokeete

maikaraga makeneete.

19 Inyuĩ mũtũũraga Jerusalemu, mũtigaacooka gũikara mũkĩrĩraga rĩ kana rĩ. MWATHANI nĩarĩmũiguagĩra tha mwamũkaĩra; aigua kĩrĩro kĩanyu, nĩarĩmwĩtĩkaga.

20 MWATHANI no areke muone thĩĩna kana mũhinyĩrĩrio, no rĩĩrĩ, mũrutani wanyu ndegũcooka kwĩhitha, no nĩmũrĩmuonaga na maitho maanyu.

21 Mũngĩhĩtia njĩra, mũrore ũrĩo kana ũmotho, nĩarĩmwaragĩria akamwĩra atĩrĩ, “Njĩra nĩ ĩno. Gereraai yo.”

22 Mũgĩcooke muoe mĩhianano yanyu ĩrĩa ĩhumbĩrĩĩtwo na betha na na ĩrĩa ĩhumbĩrĩĩtwo na thahabu mũmĩikie kũraihu na inyuĩ o ta gĩko, mũkiugaga atĩrĩ, “Ĩroora.”

23 MWATHANI agĩcooke amuurĩrie mbura mwahanda irio; irio ikũre mĩgũndainĩ yanyu na ciumie mũno. Mahiũ maanyu hĩndĩ ĩyo makĩone ũrĩithio mwariĩ.

24 Nacio ndeegwa cia mĩraaũ na ndigiri iria mũtũmagĩra mũkĩrĩma mĩgũnda yanyu, ikĩrĩage irio thondeke wega ihuuhĩĩtwo na itaarũrũ na icungi.

25 Hĩndĩ ĩyo matũũra marĩa mairigĩre na thingo cia hinya ma thũ, mamomorwo, na thũ cianyu nyingĩ ciũragwo; irĩmainĩ ciothe iria ndaaya na tũthũngũriinĩ tuothe, kuume tũrũũĩ tũgũtherera.

26 Mweri ũkaara o ta riũa; naguo ũtheri wa riũa ũkorwo na hinya maita mũgwanja, kana ũtheri wa mĩthenya mũgwanja ũturanĩirwo hamwe. Hĩndĩ ĩyo MWATHANI nĩakooha ironda na ahonie nguraro iria eekĩrĩĩte andũ aake.

Ngai kũherithia Aasiria

27 Riiri na hinya wa MWATHANI ũroneka o kũraaya.

Arooka aakanĩĩte ta mwaki,

na kũrĩ na ndoogo ndumanu

nĩ geetha oonanie ũrĩa araakarĩĩte.

Aaria mĩgambo yake ĩracina o ta mwaki ũrarĩrĩmbũka.

28 Mĩhũũmũ yake ĩhaana o ta rũũĩ rũiyũrĩĩte

rũgakinya mũndũ o ngingo;

ĩramũrania ndũũrĩrĩ,

ĩgacihũũra na matũhũũhũ,

ĩgaciĩkĩra matamu kanua nĩ geetha ithiio nacio.

29 No inyuĩ mũkaina mũkeneete, o ta ũrĩa mwĩkaga ũtukũ ũrĩa gũkoragwo thigũkũ theru kana ta rĩrĩa andũ mathiaga makĩinaga gũkĩhuuhagwo mĩtũũrirũ, meerekeire kĩrĩmainĩ kĩa MWATHANI, o we mũhonokia wa Isiraeli.

30 MWATHANI nĩakaareka andũ oothe maigue mũgambo wake wĩ na riiri, na moone hinya wa maraakara maake. Gũgaakorwo kũrĩ na mwaki ũrarĩrĩmbũka, marurumĩ, mbura nene ya mbembe, na kĩguũ kĩingĩ.

31 Aasiria nĩmakaanyiitwo nĩ kĩmako kĩnene, maigua mũgambo wa MWATHANI na moona ũrĩa aramaherithia.

32 Maita moothe MWATHANI anahũũra Aasiria, andũ aake marũũhagia makĩhũũraga ndarama na inanda. Ngai we mwene nĩ we ũkaahũũra Aasiria.

33 Icua rĩa mwaki rĩhaarĩĩrio ihinda iraaya, na nokuo mũthamaki wa Aasiria akaahĩĩra. Nĩ irima rĩariĩ na iriku rĩrĩ na ngũ nyingĩ na mwaki mũnene. MWATHANI nĩ we mwene ũgwakia mwaki ũcio na mĩhũũmũ yake ĩrĩa ĩhaana ta mwaki wa ũbiriiti.

Ngai kũgitĩra Jerusalemu

1 Kaĩ andũ arĩa mathiaga Misiri gũcaria ũteithio marĩ thĩĩnainĩ-ĩ!

Andũ acio mehokeete mbarathi, na ũingĩ wa ngaari cia mbarathi cia mbaara,

ningĩ mehokeete ũcamba wa thigari cia mbarathi.

Matiĩhokaga MWATHANI, Ngai Ũrĩa Mũtheru wa Isiraeli,

o na matimũhooyaga kĩrĩra.

2 No rĩĩrĩ, MWATHANI nĩoĩ ũrĩa egwĩka;

ekũreehithia matũhũhũ na ndericũkwo;

ekũmareehithia aherithie arĩa meekaga maũndũ mooru

o na arĩa magitagĩra andũ acio ooru.

3 Rĩu-rĩ, andũ a Misiri, no andũ tu,

na ti Ngai.

Mbarathi ciao nacio, no mbarathi tu,

itiũmbĩĩtwo irĩ maroho.

MWATHANI rĩrĩa arĩtambũrũkia guoko gwake,

mũteithania arĩhĩngwo, naake mũteithio agũe,

eerĩ makĩniinwo hamwe.

4 MWATHANI aranjĩĩra atĩ,

“O ta ũrĩa mũrũũthi, kana kaana kaaguo, ũraramaga ũnyiitĩĩte nyamũ,

na ndũmakagio nĩ inegene kana nĩgũkaĩrĩrio

rĩrĩa gĩkundi kĩa arĩithi mooka kũũingata,

noguo niĩ MWATHANI Mwene Hinya Wothe ngooka ngitĩre kĩrĩma gĩa Zayuni.

5 Ningĩ o ta ũrĩa nyoni ireraga igũrũ rĩa itara ciacio,

nĩguo igitĩre tũcui twacio,

noguo niĩ MWATHANI Mwene Hinya Wothe ngaagitĩra Jerusalemu,

na ndĩmĩrũĩrĩre.

6 “Andũ a Isiraeli njookereraai, nĩmũhĩtĩirie mũno.

7 Tondũ mũthenya nĩũrooka,

inyuothe mũte ngai cianyu cia betha na cia thahabu

iria mwĩthondekeire na mooko maanyu igatũma mwĩhie.

8 Mũthenya ũcio Aasiria makooragwo na rũhiũ rwa njora,

no ti rwa andũ!

Rũhiũ rwa njora, no ti rwa andũ nĩruo rũkaamaniina.

Makoorĩra rũhiũ rwa njora,

nacio ciana ciao ituuo ngombo.

9 Mũthamaki wao akaanyiitwo nĩ guoya, ethare,

nao atongoria matiganĩrie bendera yao, nĩkũmaka.”

Ũguo nĩguo MWATHANI, ũrĩa ũthaathayagĩrio Zayuni

na ũrĩa mwaki wake wa magongoona ũkoragwo Jerusalemu, oiga.

Mũthamaki wa ũthingu

1 Atĩrĩĩrĩ, nĩgũgooka mũthamaki,

naake agaathamakaga na ũthingu,

nao atongoria maathanage na waragania.

2 Oothe magatuĩkaga ta kũndũ gwa kwĩgitia rũhuuho,

ta kũndũ gwa kwĩyũa mbura,

ta karũũĩ karĩa gathereraga werũinĩ,

ta kĩĩgunyĩ kiumĩĩte ihigainĩ inene

rĩrĩ bũrũriinĩ mũthaatu.

3 Maitho ma arĩa moonaga matigaacooka kũhingwo,

na matũ ma arĩa maiguaga nĩmakeeruta gũthikĩrĩria.

4 Ngoro cia arĩa matarĩ tha

nĩikaamenyera gũthugundaga maũndũ,

nayo mĩario ya arĩa matondoiraga

ĩkoimũkanagio na ihenya.

5 Andũ arĩa akĩĩgu matigaacooka kũgaathĩrĩrio,

kana imaramari icooke gũtũũgĩrio.

6 Irimũ ciaragia ũrimũ

na ciĩciiragia o gwĩka maũndũ mooru.

Mĩario yacio na ciĩko ciacio no cia kũruma MWATHANI

na itiheaga arĩa ahũũtu irio

o na kana ikahe arĩa anyootu gĩa kũnyua.

7 Imaramari nĩ andũ ooru

na ithugundaga na mĩgambo ya maheeni kũũnũha athĩĩni,

o na angĩkorwo rĩngĩ andũ acio athĩĩni moima na kĩhooto.

8 No rĩĩrĩ, andũ a gĩtĩĩo

mathugundaga o maũndũ meega,

na makarũũgama o kĩhootoinĩ.

Gũtuĩrwo na gũcookanĩrĩrio

9 Atĩrĩĩrĩ, inyuĩ andũ a nja mũikaraga mwĩgangarĩĩte,

thikĩrĩriai mũgambo wakwa.

Inyuĩ airĩĩtu mũikaraga ta mwĩiganĩĩtie,

tegaai matũ mũigue ndeto ciakwa.

10 Mwaka na matukũ maniini magĩthira,

inyuĩ andũ a nja arĩa mũikaraga ta mwĩiganĩĩtie mũgaakorwo mũkĩrĩra.

Amu gũtigaakorwo na thabibũ cia kũgetha,

na gũtigaakorwo na magetha makũiga thitoo.

11 Inyuĩ andũ a nja arĩa mũikaraga mwĩgangarĩĩte,

na inyuĩ mũikaraga mwĩiganĩĩtie

inainai nĩ kĩmako.

Rutaai nguo cianyu,

mwĩyohe cia makũnia njohero.

12 Mwĩthikĩreei nĩ kĩeha,

mũrĩrĩre mĩgũnda ĩrĩa ĩrathakarĩĩtio nĩ irio,

na mĩthabibũ ĩrĩa ĩraarĩ mĩciaru mũno.

13 Mwĩthikĩreei tondũ mĩigua na mĩtare nĩ yo ĩrakũra mĩgũndainĩ ya andũ aakwa.

Mũrĩre nĩ ũndũ wa nyũmba ciothe

kũrĩa andũ maratũũraga na gĩkeno;

o na nĩ ũndũ wa itũũra rĩrĩa rĩraiyũire ngemi.

14 Ningĩ mwĩthikĩreei tondũ nyũmba ya mũthamaki nĩgaatiganĩrio,

ningĩ tondũ itũũra rĩrĩa rĩraarĩ na andũ aingĩ rĩtikorwo na andũ;

Mwĩthikĩreei nĩ ũndũ mĩciĩ na mĩnaara ya arangĩri

ĩgũtũũra ĩrĩ ciĩgĩĩgĩ tene na tene.

Ndigiri cia gĩthaka igaatũũraga ciĩgangarĩĩte kuo

namo mahiũ moonage ũrĩithio kuo.

15 Mũgeethikĩra nginya rĩria Ngai akaamũtũmĩra roho wake kuuma igũrũ,

naguo werũ ũtuĩke mũgũnda ũthakarĩĩtio nĩ irio;

mũgũnda ũcio nĩũgaakorwo na maciaro maingĩ.

16 Hĩndĩ ĩyo waragania nĩũkeehanda kũu werũinĩ,

naguo ũthingu ũtũũre kũu mũgũndainĩ ũcio ũthakarĩĩtio nĩ irio.

17 Thaayũ, kũhoorera na kwĩhoka Ngai

igaatuĩka maciaro ma ũthingu tene na tene.

18 Ningĩ andũ aakwa magaatũũra mĩciĩ yao na thaayũ,

magaacĩire na mahooreire,

19 o na mĩtitũ yathũũkangio

na matũũra maanangwo.

20 Ĩ mũtigaakenaga mũkĩhanda irio ndeereinĩ cia tũrũũĩ tuothe,

na mũkĩrekereria mahiũ maanyu na ndigiri cianyu irimũũthage kũndũ guothe itegwĩtigĩra!

Ihooya rĩa gwĩtia ũteithio

1 Kaĩ inyuĩ thũ ciitũ mũrĩ thĩĩnainĩ-ĩ!

Mũroonũhana o rĩrĩa inyuĩ mũtoonũhĩĩtwo.

Mũreeka arĩa angĩ maũndũ ma ungumania,

o rĩrĩa gũtarĩ mũndũ ũmwĩkĩĩte ũguo.

Rĩrĩa mũgaatiga kũũnũhana,

inyuĩ na inyuĩ nĩrĩo mũkoonũhwo.

Rĩrĩa mũgaatiga gwĩka maũndũ ma ungumania,

inyuĩ na inyuĩ nĩrĩo mũgeekwo mo.

2 MWATHANI tũtugage,

we nĩ we twĩhokeete.

Tũgitagĩre mũthenya o mũthenya

na ũtũhonokagie hĩndĩ ya mathĩĩna.

3 Andũ maigua mũrurumo wa inegene nĩkũũra moorire,

nacio ndũũrĩrĩ ciona riiri waku ikĩhurunjũka.

4 Indo cia ndũũrĩrĩ icio igĩtahwo ikĩũngũrũrio

o ta ũrĩa igunyũ ciũngũrũragia,

ikĩomokerwo o ta ũrĩa ngigĩ ciomokagĩra irio.

5 Ĩ MWATHANI ti mũnene!

nĩ we wathaga indo ciothe.

Nĩaiyũrĩĩtie Jerusalemu waragania na ũthingu.

6 Nĩatũmĩĩte mũgaacĩre matukũinĩ maanyu

na akamũhe ũhonokio, ũũgĩ, na ũmenyi wa maũndũ.

Ũtonga ũrĩa mũnene wanyu nĩkũhe MWATHANI gĩtĩĩo.

7 Andũ arĩa njamba mararĩrĩra na kũu barabarainĩ;

arĩa maatũmĩĩtwo magacarie thaayũ mararĩra makĩgirĩkaga.

8 Barabara iria nene nĩitiganĩirio,

na gũtirĩ mũndũ ũrathiĩra kuo.

Irĩĩkanĩro nĩciagĩĩte kũrũmio

na ũira ũkaaga kũrũmĩrĩrwo;

gũtirĩ mũndũ ũraheeo gĩtĩĩo.

9 Bũrũri nĩgũtiganĩrio ũtiganĩirio,

mũtitũ wa Lebanoni nĩgũthira ũrathira;

gĩtuamba gĩa Sharoni kĩrĩa kĩnoru gĩtuĩkĩĩte o ta werũ,

irĩmainĩ cia Karimeli na Bashani mĩtĩ nĩkũhũrũrũka irahũrũrũka.

MWATHANI gũkaania thũ ciake

10 MWATHANI aroiga atĩrĩ,

“Rĩu nĩngwĩka ũndũ;

nĩnguonania hinya wakwa.

11 Mũbangaga maũndũ matarĩ kĩene

na mũgeeka matarĩ bata.

Nĩ inyuĩ mũreniina.

12 Andũ magaacinwo ta ũrĩa mahiga macinagwo mathondeke coka,

magacinwo na mwaki ta mĩigua ĩtemeetwo.

13 Inyuĩ mũikaraga kũraaya, iguai ũrĩa njĩkĩĩte.

Inyuĩ mũrĩ gũkuhĩ, menyaai atĩ ndĩ hinya.”

14 Andũ arĩa imaramari marĩ Zayuni nĩmanyiitĩĩtio nĩ guoya,

arĩa matiganĩirie Ngai nĩkũinaina marainaina, makĩũranagia atĩrĩ,

“Nĩ ũrĩkũ witũ ũngĩĩtiiria mwaki ũrarĩrĩmbũka?

Nũũ witũ ũngĩũmĩrĩria mwaki ũcio ũtahoraga tene na tene?”

15 Mũndũ ũrĩa wĩkaga maũndũ ma ũthingu,

ũrĩa waragia maũndũ ma ma,

ũrĩa ũteendaga kũhinyanĩrĩria,

ũrĩa ũtatambarũkagia guoko aamũkĩre mahaki,

ũrĩa ũteendaga kũigua ndeto cia mbaara,

na ũrĩa ũtakenagĩra ũũru,

16 mũndũ ta ũcio nĩ we ũrĩtũũgagĩrio,

arĩikaraga agitĩirwo ta arĩ nyũmbainĩ cia kwĩgitĩra ciakĩĩtwo na thingo cia hinya,

na ndarĩ hingo arĩagaga gĩa kũrĩa na kũnyua.

Matukũ meega marĩa magooka

17 Atĩrĩĩrĩ, nĩmũkeeyonera mũthamaki ũraathana e na riiri,

agĩatha bũrũri waramĩĩte mĩena yothe.

18 Mũkaaririkanaga maũndũ ma tene mũrĩ na guoya, mũkooria atĩrĩ,

“Ĩ kaĩ mũndũ ũrĩa wataraga andũ,

na ũrĩa wetagia igooti,

na ũrĩa wataraga nyũmba iria nene cia ngoroba, maathiire kũ?”

19 Mũtigaacooka kuona andũ acio matarĩ tha,

andũ maaragia thiomi nditũ na ng’eni iria mũtekũigua.

20 Tamwĩrorereei Zayuni kũrĩa tũcemanagia hĩndĩ ya thigũkũ ciitũ!

Tamwĩrorereei Jerusalemu! Kaĩ nĩ itũũra rĩgaakorwo rĩhooreire-ĩ!

Nĩ kambĩ ĩtaagathario,

gũtirĩ higĩ o na ĩmwe ya yo ĩkaamunywo,

o na kana mũkanda o na ũmwe wayo ũtinio.

21 Kũu nĩkuo MWATHANI agaatuonagĩria riiri wake.

Tũgaatũũraga ndeereinĩ cia njũũĩ njariĩ na cia ithima,

na gũtirĩ meeri cia thũ ikaagerera kuo.

22 Nĩ gũkorwo MWATHANI nĩ we ũgaakoragwo arĩ mũtuithania witũ,

nĩ we mwathi witũ

nĩ we ũgaakoragwo arĩ mũthamaki witũ,

na nĩ we ũgaatũhonokagia.

23 Mĩkanda yothe ya meeri icio nĩ mĩregeru

ndĩngĩhota kũrũũgamia mĩringoti handũ haayo

o na kana ĩhote gũtũma matanga matambarũke mahotithie meerĩ gũthiĩ.

Hĩndĩ ĩyo nĩtũkeyoera ũtonga wothe wa thũ ciitũ;

ũgaakorwo ũrĩ mũingĩ mũno ũguo atĩ,

o na arĩa matarĩ hinya nĩmakaawĩyoera.

24 Andũ arĩa marĩ bũrũriinĩ witũ,

matigaacooka gwĩthikĩra nĩ kũrũara

na nĩmakooherwo meehia maao moothe.

Ngai gũkaaherithia thũ ciake

1 Andũ a ndũũrĩrĩ ciothe ũkaai!

Cookanĩrĩraai mũtege matũ!

Thĩ yothe na mũndũ o wothe ũtũũraga kuo,

ũkaai mũthikĩrĩrie!

2 MWATHANI nĩaraakarĩire ndũũrĩrĩ ciothe,

na akang’ũrĩka nĩ thigari ciacio ciothe;

na nĩacituĩrĩire kũniinwo.

3 Ciimba ciacio itigaathikwo,

ikaaraganio ibuthe na inunge;

thakame yacio ikaiyũra irĩmainĩ ĩtherere o ta maaĩ.

4 Riũa, mweri, na njata igaatuĩka o ta rũkũngũ.

Igũrũ gũkaabuĩria o ta ibuku rĩa gĩkũnjo rĩgĩkũnjwo.

Njata ikaaharũrũka o ta mathangũ mahoohu

makiuma mũthabibũinĩ kana mũkũyũinĩ.

5 MWATHANI nĩahaarĩirie rũhiũ rwake rwa njora kũu igũrũ,

arwerekeirie kũhũũra Edomu,

o andũ arĩa atwĩrĩire kũniinwo.

6 Rũhiũ rũu rwake rwa njora rũkaiyũrwo nĩ thakame na maguta maao,

o ta arĩ thakame na maguta ma ng’ondu na mbũri iria irutĩĩtwo igongoona.

MWATHANI akaarutĩra igongoona rĩu itũũrainĩ rĩa Bozira,

na nĩagaatũma kũgĩe na ũiti mũingĩ mũno wa thakame bũrũriinĩ wa Edomu.

7 Andũ makaaraganio kuo mahaana o ta mbogo na ndeegwa njĩthĩ;

tĩĩri naguo ũtuunĩhio nĩ thakame yao na ũnorio nĩ maguta maao.

8 Hĩndĩ ĩyo nĩ yo MWATHANI akaahonokia itũũra rĩa Zayuni,

na arĩrĩhĩrie harĩ thũ ciarĩo.

9 Njũũĩ cia Edomu igaatuĩka rami,

na tĩĩri wakuo ũtuĩke ũbiriiti;

bũrũri wothe ũgaakanaga o ta rami.

10 Bũrũri ũgaakanaga mũthenya na ũtukũ,

na kuumage ndoogo tene na tene.

Ũgaatũũra ũrĩ mwanangĩku aagu na aagu,

gũtirĩ mũndũ ũgaacooka kũũtuĩkania rĩ kana rĩ.

11 Ndundu na magoogo nĩcio igaatuĩka eene kuo.

MWATHANI akaaũiga ũrĩ mũthaatu,

o ta ũrĩa wahaanaga thĩ ĩtaanoombwo.

12 Gũtikooneka mũthamaki ũngĩ wa gwatha bũrũri ũcio

o na kana kũgĩe na atongoria angĩ.

13 Mĩigua na mĩtare ĩgaakũraga nyũmbainĩ cia ũthamaki

na matũũrainĩ marĩa mairigĩre na thingo cia hinya.

Ndundu na mbwe nĩcio igaatũũraga kuo.

14 Nyamũ cia gĩthaka igaacangacangaga kuo,

ngoma ciĩtanage kuo,

na marimũ ma ũtukũ mathiage kuo gũcaria ũtũũro.

15 Ndundu igaaka itara ciacio kuo,

irekie matumbĩ, matũrĩke na irerere tũcui kuo.

Nderi ikaagomanaga kuo

ciumanĩĩte thuutha njamba na mwera.

16 Thuuthuuriai ibukuinĩ rĩa MWATHANI mũthoome

muone atĩ, gũtirĩ o na ĩmwe yacio ĩkaaga,

na igaakoragwo o njamba na mwera.

MWATHANI nĩ we wathanĩĩte ũguo,

na nĩ we ũgaacicookanĩrĩria hamwe.

17 Nĩ we ũgaacigayania bũrũri

na ahe ĩmwe o ĩmwe gĩcunjĩ kĩayo.

Ikaawĩnyiitĩra aagu na aagu,

na itũũre kuo tene na tene.