Hagai 1

MWATHANI gwathana Hekaarũ yakwo rĩngĩ

1 Atĩrĩĩrĩ, mũthenya wa mbere wa mweri wa gatandatũ, mwakainĩ wa keerĩ wa wathani wa Dario mũthamaki wa Perisia, MWATHANI nĩarĩirie Zerubabeli mũrũ wa Shealitieli na Joshua mũrũ wa Jehozadaku. Zerubabeli aarĩ barũũthi wa Juda, naake Joshua aarĩ Mũthĩnjĩri Ngai Ũrĩa Mũnene. Aamaarĩirie ahũthĩrĩĩte mũnabii Hagai.

2 MWATHANI Mwene Hinya Wothe ekuuga atĩrĩ, “Andũ aya maroiga atĩ ihinda rĩa gwaka Hekaarũ rĩngĩ rĩtirĩ rĩrakinya.”

3 Hĩndĩ ĩyo MWATHANI akĩarĩria andũ ahũthĩrĩĩte mũnabii Hagai akĩmeera atĩrĩ,

4 “Nĩkĩ gĩgũtũma inyuĩ eene mũikare nyũmba cianyu iria mwakĩĩte wega, o rĩrĩa Hekaarũ yakwa ĩrĩ o kĩĩgĩĩgĩ?

5 Kaĩ mũtarona ũrĩa mũreekwo?

6 Mũhandaga nyingĩ, mũkagetha tũniini; mũrĩaga na mũtiiganagia; mũnyuaga na mũtinyootokaga; mwĩhumbaga nguo na gũtirĩ ũiguaga ũrugarĩ; arĩa maheagwo mĩcaara, mamĩĩkagĩra mĩhuko ĩrĩ na mahoro.

7 Kaĩ mũtareyũria mũreekwo ũguo nĩkĩ?

8 Atĩrĩĩrĩ, thiĩi irĩmainĩ mũteme mĩtĩ, mũũke mwake Hekaarũ yakwa rĩngĩ, nĩguo ngene na thaathaĩyo ta ũrĩa njagĩrĩirwo nĩguthaathaiyo.”

9 “Mũcaragia magetha maingĩ, no mũkoona maniini; mũmatwaraga mũciĩ, na niĩ ngatũma rũhuuho rũkamoombũra. Nĩmũũĩ njĩkaga ũguo nĩkĩ? Nĩ tondũ Hekaarũ yakwa nĩ kĩĩgĩĩgĩ, o rĩrĩa inyuĩ mũrũmbũyanagia na gwaka mĩciĩ yanyu.

10 Nĩkĩo gũtarĩ mbura na gũtarĩ kĩndũ kĩrakũra.

11 Nĩndũmĩĩte bũrũriinĩ kware na kũũme. Nĩndũmĩĩte irĩmainĩ, mĩgũndainĩ ya irio, ya mĩthabibũ o na ya mĩtamaiyũ kware na kũũme, na ngoomia irio ciothe iria ikũragio kuo. Ndũmĩĩte andũ maarĩrwo nĩ riũa, o ũndũ ũmwe na mahiũ o na kĩrĩa gĩothe andũ mageragia gũkũria.”

Andũ gwathĩkĩra MWATHANI

12 Hĩndĩ ĩyo Zerubabeli mũrũ wa Shealitieli na Mũthĩnjĩri Ngai Ũrĩa Mũnene Joshua mũrũ wa Jehozadaku, hamwe na andũ arĩa macookeete kuuma ithaamĩrio magĩathĩkĩra MWATHANI Ngai wao. O na nĩmaathĩkĩire mũnabii Hagai na makĩhe Ngai gĩtĩĩo.

13 Hagai agĩcooka akĩhe andũ oothe ndũmĩrĩri ya MWATHANI, atĩ MWATHANI nĩarĩkoragwo hamwe nao.

14 MWATHANI agĩgĩĩkĩra andũ oothe wendo wa gwaka Hekaarũ: Zerubabeli barũũthi wa Juda, Joshua Mũthĩnjĩri Ngai Ũrĩa Mũnene, na andũ oothe arĩa maacookeete kuuma ithaamĩrio. Nao makĩambĩrĩria wĩra wa gwaka Hekaarũ ya MWATHANI Mwene Hinya Wothe, Ngai wao.

15 Mawambĩrĩirie mũthenya wa mĩrongo ĩĩrĩ na ĩna wa mweri wa gatandatũ, mwakainĩ wa keerĩ wa wathani wa mũthamaki Dario.

Hagai 2

Riiri wa Hekaarũ Njerũ

1 Atĩrĩĩrĩ, mũthenya wa mĩrongo ĩrĩ na ũmwe wa mweri wa mũgwanja, mwakainĩ o ro ũcio wa keerĩ wa wathani wa mũthamaki Dario, MWATHANI nĩaririe rĩngĩ ahũthĩrĩĩte mũnabii Hagai.

2 Eerire Hagai aarĩrie Zerubabeli mũrũ wa Shealitieli barũũthi wa Juda, Mũthĩnjĩri Ngai Ũrĩa Mũnene Joshua mũrũ wa Jehozadaku, o na andũ oothe, amoorie atĩrĩ,

3 “Nũũ ũtigarĩĩte gatagatĩinĩ kaanyu wonire riiri ũrĩa Hekaarũ ya mbere yarĩ naguo? Rĩu mũrona ĩno ĩhaana atĩa? Githĩ ndĩhaana ta kĩndũ hatarĩ?

4 No rĩĩrĩ, tigaai gũkua ngoro. Thiĩi na mbere na wĩra, amu ndĩ hamwe na inyuĩ.

5 Rĩrĩa muoimire Misiri nĩndamwĩrĩire atĩ nĩndĩkoragwo hamwe na inyuĩ hĩndĩ ciothe. O na rĩu ndĩ o hamwe na inyuĩ, kwoguo tigaai gwĩtigĩra.”

6 MWATHANI Mwene Hinya Wothe ekuuga atĩrĩ, “Ihinda rĩtarĩ iraaya, nĩndĩinainia igũrũ, thĩ na iria.

7 Ningĩ nĩndĩinainia ndũũrĩrĩ ciothe, mĩthiithũ yacio yothe ĩreehwo gũũkũ nĩ geetha njiyũrie hekaarũ ĩno na riiri.

8 Atĩrĩĩrĩ, betha na thahabu ciothe nĩ ciakwa.

9 Hekaarũ ĩno ĩraakwo ĩgũkorwo ĩrĩ na riiri gũkĩra ĩrĩa ya mbere. Nĩngũtũma andũ aakwa magaacĩre gũũkũ na magĩe na thaayũ.” Ũguo nĩguo MWATHANI Mwene Hinya Wothe oiga.

Mũnabii kũhooya athĩnjĩri Ngai kĩrĩra

10 Mũthenya wa mĩrongo ĩĩrĩ na ĩna wa mweri wa kenda, mwakainĩ wa keerĩ wa wathani wa mũthamaki Dario, MWATHANI nĩarĩirie mũnabii Hagai o rĩngĩ.

11 Aamwĩrire ũũ: “Tahooya athĩnjĩri Ngai kĩrĩra, ũmoorie atĩrĩ,

12 ‘Mũndũ angĩruta nyama ĩmwe ya iria nyamũre kuuma igongoonainĩ, akuue nyama ĩyo na ruuno rwa nguo yake-rĩ, nguo ĩyo yake ĩngĩhuutia mũgate o wothe, irio iria nduge, ndibei, maguta ma mĩtamaiyũ, o na kana irio ingĩ cia mũthemba o wothe-rĩ, no ĩtũme irio icio o nacio ituĩke nyamũre?’ ”

Rĩrĩa athĩnjĩri Ngai mooririo kĩũria kĩu macookirie atĩrĩ, “Aaca, ndĩngĩtũma ituĩke nyamũre.”

13 Hagai agĩcooka akĩmooria atĩrĩ, “Mũndũ ũrĩ na thaahu na ũndũ wa kũhuutia kĩimba, angĩhuutia indo icio-rĩ, ũndũ ũcio no ũtũme indo icio igĩe na thaahu?”

Athĩnjĩri Ngai magĩcookia atĩrĩ, “Ĩĩ, ũndũ ũcio no ũtũme.”

14 Hagai agĩkĩmeera atĩrĩ, “MWATHANI aroiga atĩ ũguo noguo andũ a bũrũri ũyũ mahaana o na indo ciothe iria makũragia. Nĩ ũndũ ũcio kĩrĩa gĩothe marutagĩra kĩgongoonainĩ kĩrĩ na thaahu.”

MWATHANI kwĩranĩra kĩraathimo

15 MWATHANI arooria atĩrĩ, “Kaĩ mũtarona ũrĩa mwĩkĩĩtwo? Mũtanaambĩrĩria gwaka rĩngĩ Hekaarũ-rĩ,

16 mũndũ arathiaga hĩbainĩ ya ngano ehokeete gũkora kiro magana meerĩ agakora o igana. Ningĩ mũndũ arathiaga mũtũngiinĩ wa ndibei erĩgĩrĩire gũtaha rita igana rĩmwe agakora o rita mĩrongo ĩna.

17 Ndamũrekeirie mbaa na mbura ya mbembe icine na ithũũkie indo ciothe iria mwakũragia, no mũtiigana kwĩrira.

18 Kuuma ũũmũũthĩ, mweri mĩrongo ĩĩrĩ na inya mweri wa kenda rĩrĩa mũthingi wa Hekaarũ warĩĩka, nĩmũkuona ũrĩa gũgũcooka kũhaana.

19 Atĩrĩĩrĩ, o na gũtuĩka gũtirĩ irio itigaire, na ningĩ mĩthabibũ, mĩkũyũ, mĩkongomanga o na mĩtamaiyũ ndĩciarĩĩte-rĩ, kuuma ũũmũũthĩ nĩngwambĩrĩria kũmũraathima.”

MWATHANI kũhe Zerubabeli kĩĩranĩro

20 Mũthenya o ro ũcio wa mĩrongo ĩĩrĩ na ĩna wa mweri wa kenda, MWATHANI nĩarĩirie Hagai o rĩngĩ.

21 Arĩria Zerubabeli, barũũthi wa Juda ũmwĩre atĩrĩ, “Nĩnjerekeire kũinainia igũrũ na thĩ.

22 Nĩngũng’aũrania moothamaki na niine maahinya maamo. Nĩngũng’aũrania ngaari cia mbarathi na arĩa mathiaga macihaicĩĩte. Mbarathi nĩigũkua, nao arĩa mathiaga macihaicĩĩte mooragane o eene.

23 Mũthenya ũcio nĩndĩkuoya wee Zerubabeli mũrũ wa Shealitieli, ndungata yakwa, ngũtue wa gwathanaga na rĩĩtwa rĩakwa. Wee nĩ we thuurĩĩte.” Ũguo nĩguo MWATHANI Mwene Hinya Wothe oiga.

Zefania 1

1 Ĩno nĩ yo ndũmĩrĩri ĩrĩa MWATHANI aaheire Zefania mũrũ wa Kushi mũrũ wa Gedalia mũrũ wa Amaria mũrũ wa mũthamaki Hezekia. Hĩndĩ ĩyo nĩrĩo Josia mũrũ wa Amoni aathanaga Juda.

Mũthenya wa MWATHANI wa gũtuanĩra

2 MWATHANI ekuuga atĩrĩ,

“Nĩngũniina indo ciothe gũũkũ thĩ,

3 ngũniina andũ oothe, nyamũ ciothe, nyoni ciothe, na thamaki ciothe,

na nyanange andũ arĩa aaganu.

Ngũniina andũ oothe gũũkũ thĩ.

Nĩ niĩ MWATHANI ndoiga ũguo.”

4 Ningĩ MWATHANI ekuuga atĩrĩ,

“Ngũtambũrũkia guoko hũũre atũũri a Juda

na atũũri oothe a Jerusalemu.

Nĩngũniina kĩrĩa gĩothe gĩtigarĩĩte gũũkũ kĩa Baali,

o na ndũme athĩnjĩri aayo maage gũkaaririkanwo rĩ o rĩ.

5 Nĩngũniina mũndũ o wothe ũthaathayagia riũa, mweri, na njata arĩ nyũmba igũrũ.

Nĩngũniina o na arĩa maathaathayagia na makehĩta na rĩĩtwa rĩakwa,

o na makehĩta na rĩĩtwa rĩa ngai ĩrĩa ĩĩtagwo Moleku.

6 Ngũniinanĩria arĩa maandiganĩirie makaaga kũũnũmĩrĩra

na arĩa matarĩ maamenya o na matarĩ maahooya.”

7 Gĩkireei mũrĩ mbere ya MWATHANI Ngai;

mũthenya wake wa gũtuanĩra ũrĩ hakuhĩ.

Nĩarehaarĩria kũruta andũ aake igongoona

na nĩetĩĩte thũ ciũke itharĩkĩre bũrũri wa Juda.

8 MWATHANI ekuuga atĩrĩ,

“Mũthenya ũcio wa kũmaruta igongoona,

nĩngaaherithia atongoria, ciana cia mũthamaki,

o hamwe na arĩa oothe marũmagĩrĩra mĩtugo mĩgeni.

9 Mũthenya ũcio nĩngaaherithia

mũndũ wothe ũthaathayagia ngai cia mĩhianano,

ũiyaga na ũũraganaga

nĩguo oonere mũnene wake indo.”

10 MWATHANI ekuuga atĩrĩ,

“Mũthenya ũcio kĩrĩro nĩgĩkaiguuo

kĩhingoinĩ kĩrĩa gĩĩtagwo Kĩhingo gĩa Thamaki kũu Jerusalemu.

Ningĩ kũgirĩka kũiguuo

mwena ũrĩa ũraakirwo ica ikuhĩ wa itũũra,

na mũrurumo mũnene ũiguuo irĩmainĩ.

11 Inyuĩ mũtũũraga mwena wa na kĩanda wa itũũra, rĩraai mũthirwo nĩ maithori,

amu ahũũri oothe a mbiacara

na akũũrania a mbeeca mahũũrĩĩtwo makaniinwo biũ.

12 “Mũthenya ũcio niĩ MWATHANI nĩngouruuria Jerusalemu guothe ndĩ na mataawa,

na nĩngaaherithia mũndũ o wothe

ũtũũraga egangarĩĩte na ũtarũmbũyagia ũndũ,

na ũrĩa wothe wĩĩraga na ngoro

atĩ MWATHANI ndangĩmwĩka ũũru kana wega.

13 Indo ciao ciothe nĩigaatahwo,

na nyũmba ciao imomorwo.

Atĩrĩĩrĩ, andũ acio mangĩgaaka nyũmba, matigaacitũũra;

mangĩkaahanda mĩthabibũ,

matikaanyua ndibei ĩhihĩĩtwo kuuma thabibũ ciayo.”

14 Mũthenya mũnene wa MWATHANI wĩ hakuhĩ.

Wĩ hakuhĩ mũno na ũgũũka o narua.

Ũgũkorwo wĩ mũthenya wa MWATHANI wa maraakara.

Thigari iria njamba irĩrĩra ciũme ngoro.

15 Ũgũkorwo ũrĩ mũthenya wa maraakara,

mũthenya wa thĩĩna na kĩeha,

mũthenya wa mbũragano na kwanangwo,

mũthenya wa nduma na ihooru,

mũthenya wa kĩbii na nduma ndumanu.

16 Ũgũkorwo ũrĩ mũthenya ũrahuuhwo tũrumbeeta

na ũrĩ na mbugĩrĩrio ya thigari

igĩtharĩkĩra matũũra marĩa mairigĩre na thingo cia hinya,

o na igĩtharĩkĩra mĩnaara ĩrĩa mĩraaya.

17 MWATHANI ekuuga atĩrĩ,

“Mũthenya ũcio ngaareehithĩria andũ mĩthiro ũguo atĩ

magaathiaga makĩhambambataga ta itumuumu.

Tondũ nĩmaahĩtĩirie,

thakame yao ĩgaitwo o ta maaĩ,

nacio ciimba ciao ibuthĩre thĩ.

18 Mũthenya ũcio wa maraakara ma MWATHANI,

betha o na thahabu ciao itikaahota kũmahonokia.

Thĩ yothe nĩgaacinwo na mwaki wa maraakara maake,

na aniine o kũniina atũũri oothe a thĩ na ihenya.”

Zefania 2

Andũ kwĩrwo merĩre

1 Inyuĩ rũũrĩrĩ rũũrũ rwothe rũtarĩ thoni,

cookaniai ndundu,

2 mũtanaingatwo ta mahuti marĩa moombũragwo nĩ rũhuuho,

mũtanakorererwo nĩ maraakara marakana ta mwaki ma MWATHANI,

o na mũtanakorererwo nĩ mũthenya wa marũrũ ma MWATHANI.

3 Inyuĩ andũ arĩa enyiihia a bũrũri,

o inyuĩ mwathĩkagĩra maathani maake,

cookereraai MWATHANI.

Ĩkagaai maũndũ ma ũthingu,

na mwĩnyiihagĩrie MWATHANI.

Hiihi no mwage gũkaanaherithio mũthenya wa maraakara maake.

Ndũũrĩrĩ iria ihakaine na Isiraeli gũcookererwo nĩ mũthiro

4 Itũũra rĩa Gaza rĩgaatigwo rĩtarĩ andũ,

narĩo rĩa Ashikeloni rĩtuĩke maganjo,

andũ a itũũra rĩa Ashidodu makaarutũrũrwo itũũrainĩ rĩao thaa thita cia mũthenya,

nao andũ a itũũra rĩa Ekironi maingatwo kuuma itũũrainĩ rĩao.

5 Inyuĩ Afilisiti, o inyuĩ mũtũũraga rũteereinĩ rwa iria,

kaĩ mũrĩ thĩĩnainĩ-ĩ!

MWATHANI nĩarĩĩkĩĩtie kũmũtuĩra;

ekũmwananga, na gũtirĩ o na ũmwe wanyu ũkũhonoka.

6 Wee nawe bũrũri ũrĩa ũrĩ ndeereinĩ cia iria,

ũgũtuĩka gĩthaka gĩa kũrĩithagio ndũũru cia ng’ondu,

na gĩa gwakwo ciugũ na ithũnũ cia arĩithi.

7 Bũrũri ũcio ũrĩ ndeereinĩ cia iria

ũkeenyiitĩrwo nĩ andũ arĩa magaatigara a Juda,

marĩithagie ndũũru cia ng’ondu ciao kuo,

na maraarage nyũmba iria irĩ Ashikeloni.

MWATHANI Ngai wao nĩakaamarũmbũiya,

na atũme magaacĩre o rĩngĩ.

8 MWATHANI Mwene Hinya Wothe ekuuga atĩrĩ,

“Nĩnjiguĩte ũrĩa andũ a Moabi na a Amoni

maranyarara na mararuma andũ aakwa,

magĩtĩĩaga atĩ nĩmekwĩnyiitĩra bũrũri wao.

9 MWATHANI Mwene Hinya Wothe, o we Ngai wa Isiraeli, ekuuga atĩrĩ,

‘O ta ũrĩa ndũũraga muoyo-rĩ,

nĩngwananga Amoabi na Aamoni ta ũrĩa ndaanangire Sodomu na Gomora.

Ngũtua mabũrũri maao marima ma cumbĩ,

na kũndũ gũtiganĩrie tene na tene kũrĩkũraga o thabai.

Njooke ndeke andũ aakwa arĩa magaakorwo matigarĩĩte,

matahe indo ciao na marigie na mabũrũri maao.’ ”

10 Ũguo nĩguo Amoabi na Aamoni makaaherithio

nĩ ũndũ wa mwĩtĩĩo wao,

amu nĩmaanyararire na makĩruma andũ a MWATHANI Mwene Hinya Wothe.

11 MWATHANI nĩagaatũma maiyũrwo nĩ guoya,

acooke atue ngai ciothe cia gũũkũ thĩ tũhũ mũtheri,

nacio ndũũrĩrĩ ciothe icooke kũmũthaathaiya,

o rũũrĩrĩ rũmũthaathayagĩrie bũrũriinĩ waruo.

12 Atĩrĩĩrĩ, inyuĩ andũ a Ethiopia,

no mũkaaniinwo na rũhiũ rwa njora.

13 MWATHANI akaahũthĩra hinya wake kwananga bũrũri wa Asiria,

acooke atue itũũra rĩa Nineve maganjo

na kũndũ kũũmũ o ta werũ.

14 Mahiũ na nyamũ cia gĩthaka nĩcio ikaarimũũthaga kuo.

Ndundu ikaarĩragĩra ndiricainĩ cia kũu gũtharũranĩĩtio,

magoogo magambage marĩ mĩrangoinĩ yakuo,

nayo mĩtarakwa ĩrĩa yakĩĩte kuo ĩtharũranio gũtigwo ũtheri.

15 Itũũra rĩrĩa rĩrerahaga

rĩgĩĩtĩĩaga ũrĩa rĩrĩ na thaayũ,

na rĩkeyona rĩkiugaga atĩ gũtirĩ itũũra rĩngĩ inene thĩinĩ wa thĩ kũrĩkĩra,

rĩu nĩrĩmomoreetwo biũ,

rĩgatuĩka kũndũ gwa kũrimũũthagwo nĩ nyamũ cia gĩthaka.

Mũndũ o wothe ũrĩhĩtũkagĩra kuo

ariugaga hĩ hĩ hĩ hĩ-ĩ! akĩinainagia mũtwe.

Zefania 3

Jerusalemu kwĩhia na gũkũũrwo

1 Kaĩ itũũra rĩa Jerusalemu rĩrĩ thĩĩnainĩ-ĩ!

Nĩ itũũra iremi, rĩiyũire ungumania,

na rĩhinyagĩrĩria andũ aarĩo.

2 Nĩ itũũra rĩtathikagĩrĩria MWATHANI

na rĩtiĩtĩkagĩra kũrũngwo nĩ we.

Rĩtimwĩhokeete na rĩtimũhooyaga ũteithio.

3 Anene aarĩo mahaana o ta mĩrũũthi ĩrararama;

aciirithania aarĩo nao mahaana o ta njũũi ngoroki,

ũguo atĩ gũgĩkĩa gũtirĩ kĩndũ ikoragwo itigĩĩtie.

4 Anabii aarĩo matirĩ kĩhaarĩro na ti ehokeku;

athĩnjĩri Ngai aarĩo mathaahagia indo iria theru,

na makoogomia watho wa Ngai nĩguo megune o eene.

5 No rĩĩrĩ, MWATHANI no akoragwo o itũũra rĩu;

eekaga maũndũ ma kĩhooto na ndarĩ ũũru eekaga.

O rũũciinĩ areehithagĩria andũ aake ũhoro wa waragania,

na ndanogaga nĩgwĩka ũguo.

O na kũrĩ ũguo-rĩ, andũ acio matarĩ athingu,

mathiaga o na mbere gwĩka ũũru na maticonokaga.

6 MWATHANI aroiga atĩrĩ,

“Nĩniinĩĩte ndũũrĩrĩ ciothe,

ngaananga matũũra maacio,

na ngamomorania thingo na mĩnaara yacio.

Gũtirĩ mũndũ ũtigĩĩtwo matũũrainĩ maacio

o na barabarainĩ ciamo gũtirĩ andũ maratuĩkania.

Gũtirĩ mũndũ o na ũmwe ũtigarĩĩte.

7 Ndĩreciiragia atĩ nĩ hĩndĩ andũ aakwa mekũndĩĩa,

meetĩkĩre ndĩmarũnge,

na maage gũcooka kũriganĩrwo nĩ maũndũ marĩa ndĩmarutĩĩte.

No o no gũthiĩ mathiĩte na mbere

gwĩka maũndũ mooru makĩria.”

8 MWATHANI egũkiuga atĩrĩ,

“Taetereraai!

Etereraai mũthenya ũrĩa ngaarũũgama gũthitanga ndũũrĩrĩ.

Nĩnduĩte itua gũcookanĩrĩria ndũũrĩrĩ na moothamaki hamwe

nĩguo ndĩmaitĩrĩrie maraakara maakwa.

Thĩ yothe nĩgũcinwo nĩ mwaki wa mang’ũrĩ maakwa.

9 “Hĩndĩ ĩyo-rĩ, nĩngaagarũra andũ a ndũũrĩrĩ,

macooke kũũhooyaga o niĩ nyiiki,

na matikaahooyage ngai ingĩ.

Oothe nĩmakaanjathĩkagĩra.

10 Ningĩ o na kuuma bũrũri wa Ethiopia ũrĩa wĩ kũraaya

andũ aakwa arĩa mahurunjũkĩĩte nĩmakaandeehagĩra matega.

11 Hĩndĩ ĩyo, inyuĩ andũ aakwa, mũtigaacooka gũconoka

nĩ ũndũ wa ũrĩa mwananemera.

Tondũ nĩngaathengia gatagatĩinĩ kaanyu andũ arĩa etĩĩi na ang’athia

na mũtigaacooka kũũnemera

mũrĩ kĩrĩmainĩ gĩakwa kĩrĩa gĩtheru.

12 Ngaatigia o andũ arĩa enyiihia na ahooreri gatagatĩinĩ kaanyu,

arĩa marĩũkaga gũcaria ũteithio harĩ niĩ.

13 Andũ a Isiraeli arĩa magaatigara

matigeekaga ũndũ mũũru,

matikaaragia maheeni,

kana maaragie mathaara.

Nĩ gũkorwo makaarĩaga na magakoma,

matarĩ na mũndũ wa kũmaiga na guoya.”

Rwĩmbo rwa gĩkeno

14 Andũ a Isiraeli, inaai na kayũ kanene mũkeneete!

Jerusalemu, rũũharũũhia na ngoro yothe!

15 MWATHANI nĩatigĩĩte gũkũherithia,

agagũthengeria thũ ciaku.

MWATHANI, o we Mũthamaki wa Aisiraeli, arĩ hamwe nawe,

kwoguo rĩu ndũkĩrĩ na gĩtũmi gĩa gwĩtigĩra.

16 Ihinda nĩrĩrooka rĩrĩa Jerusalemu ĩkeerwo atĩrĩ,

“Wee itũũra rĩa Zayuni, tiga kũmaka!

Tiga kũregeria mooko maaku!

17 MWATHANI Ngai waku arĩ hamwe nawe;

nĩ njamba na nĩegũkũhe ũhootani.

Nĩarĩkenaga nĩ ũndũ waku

na akũhe ũtũũro mwerũ nĩ ũndũ nĩakwendeete.

Arĩinaga na agakenagio nĩ we,

18 o ta ũrĩa andũ makenaga hĩndĩ ya thigũkũ.”

MWATHANI ekuuga atĩrĩ,

“Nĩngũthengeirie mũthiro,

na ngakwehereria gĩconoko.

19 Atĩrĩĩrĩ, ihinda nĩrĩrĩũka

na nĩndĩrĩherithia arĩa makũhinyagĩrĩria,

honokie arĩa mathuaga,

na njookie arĩa mathaamĩĩtio mũciĩ.

Nĩndĩrĩtũma maheeo gĩtĩĩo handũ ha gũconorwo,

nayo thĩ yothe nĩrĩmagoocaga.

20 Ihinda nĩrĩrooka,

rĩrĩa ndĩrĩmũcookanĩrĩria ndĩmũcookie mũciĩ.

Ndĩrĩmũtua andũ marĩ igweta thĩ yothe,

na ndũme mũgaacĩre rĩngĩ.”

Ũguo nĩguo MWATHANI oiga.

Habakuku 1

1 Ĩno nĩ yo ndũmĩrĩri nditũ ĩrĩa MWATHANI aaguũrĩirie mũnabii Habakuku.

Habakuku gũteta nĩ ũndũ wa kĩhooto kwaga

2 MWATHANI, ngũtũũra hĩndĩ ĩigana atĩa ngũkayagĩra ũndeithie ũkaaga kũnjigua,

na ũkaaga kũũhonokia harĩ andũ arĩa matũmagĩra hinya?

3 Nĩkĩ gĩgũtũma ũnyonie o maũndũ ma mahĩtia na ma mathĩĩna?

Mwanangĩko na maũndũ ma kũhinyanĩrĩria

no mo marĩ mbere ya maitho maakwa;

mbaara na haaro ironeka na mĩena yothe.

4 Watho nĩũregereetio

nakĩo kĩhooto gĩkaaga.

Nĩ gũkorwo andũ arĩa aaganu nĩmarigiicĩirie arĩa athingu,

na kwoguo kĩhooto nĩkĩhotomeetio.

MWATHANI gũcookeria Habakuku.

5 Naake MWATHANI akĩĩra andũ aake atĩrĩ,

“Taikiani maitho mwĩrorere ndũũrĩrĩ;

nĩmũgũtuĩka nda mũno na mũgegeare.

Nĩ gũkorwo mahindainĩ maya maanyu,

nĩngwĩka kĩũndũ mũtageetĩkia,

rĩrĩa mũkaigua ũhoro wakĩo.

6 Atĩrĩĩrĩ, nĩngwarahũra Ababilonia,

andũ ooru na matarĩ tha,

andũ matuĩkanagia mabũrũri makĩĩnyiitagĩra matũũra matarĩ maao.

7 Nĩ andũ a gwĩtigĩrwo na a kũmakania mũno,

nĩ etĩĩi ũguo atĩ, no o kĩhooto na no o matũũganagĩria.

8 Mbarathi ciao nacio irĩ ihenya gũkĩra ngarĩ,

na nĩ njũru kũrũũga njũũi iria icangaga kĩhwaĩinĩ.

Thigari ciao cia mbarathi

ciumaga kũndũ kũraaya ikomookera thũ ciacio

o ta ũrĩa rwĩgĩ rwomokagĩra irio ciaruo.

9 “Thigari icio igũũka na marũrũ maingĩ mũno,

andũ maaciigua makaringĩka o na itarĩ irakinya.

Igũthiĩ ikĩnyiitaga andũ aingĩ ta mũthanga

imatue mĩgwate.

10 Nĩkũnyarara ikũnyarara athamaki

na ithekerere anjaama arĩa anene.

Nĩikũira nyũmba irĩa njake na thingo cia hinya cia kwĩgitĩra

amu igwakĩrĩra ihumbu cia tĩĩri nyũmba icio o nginya cicitoorie.

11 Thuutha ũcio ithiĩ ihĩtũkĩĩte ihaatĩĩte o ta rũhuuho,

nĩ andũ aaganu na hinya wao nĩguo ngai yao.”

Habakuku gũtetia MWATHANI rĩngĩ

12 MWATHANI Ngai wakwa, o Wee ũrĩa wakwa Mũtheru,

githĩ ndũtũire tene na tene?

# Kwoguo tũtigũkua.

MWATHANI Ngai, o Wee ũngitagĩra,

ũthuurĩĩte Ababilonia na ũkamahe hinya

nĩ geetha matũherithie.

13 No rĩĩrĩ, maitho maaku nĩ matheru mũno

matiagĩrĩirwo nĩkwĩrorera ũũru.

Wee nawe-rĩ, ndwagĩrĩirwo nĩgũcũũthĩrĩria meehia.

Nĩkĩ gĩgũtũma ũcũũthĩrĩrie andũ aaganu?

Nĩkĩ gĩgũtũma ũkire rĩrĩa andũ aaganu

marameria arĩa athingu kũmakĩra?

14 Ũngĩhota atĩa gũtua andũ ta thamaki,

kana ta tũnyamũ tũrĩa tũtaambaga, tũtarĩ na wa gũtũtongoria?

15 Ababilonia magwatagia andũ

na ndwano o ta arĩ thamaki

makamaguucũrũrũkia makameekĩra netiinĩ ciao

na makarũũhia nĩkũnyiita andũ aingĩ.

16 Neti ciao nĩcio imahotithĩĩtie gũtũũra mũtũũrĩre wa igũrũ

na ikamahe irio njega mũno.

Nĩkĩo nĩmacirutagĩra magongoona

na magacitoogereria ũbaani.

17 Kaĩ magũgĩtũũra macomoranagĩra hiũ cia njora,

na maanangaga ndũũrĩrĩ mategũciiguĩra tha?

Habakuku 2

MWATHANI gũcookeria Habakuku

1 Ngũhaica mũnaara igũrũ,

njeterere nyone ũrĩa MWATHANI ekũnjĩĩra ngoige,

na nyone mateta maakwa ekũmacookia atĩa.

2 Naake MWATHANI akĩnjookeria atĩrĩ,

“Ta andĩka ũrĩa ngũkũguũrĩria,

ũwandĩke ihengere igũrũ na ndemwa nene,

nĩ geetha ũthoomeke wega na na ihenya.

3 Wandĩke nĩ gũkorwo ihinda rĩa ũgĩkaahinga ti ikinyu,

no nĩrĩgũũka o narua.

Ũndũ ũrĩa ngũkuonia no ũkaahinga.

Wahota kuoneka ta ũrooka kahora,

no we weterere, gũtirĩ nganja no ũgũũka na ndũgũtĩĩrio.

4 Naguo nĩ atĩrĩ, ‘Mũndũ ũrĩa ũtarĩ mũthingu ngoroinĩ nĩekũniinwo,

no mũndũ ũrĩa mũthingu egũtũũra muoyo tondũ nĩehokeete Ngai.’ ”

Marigĩrĩrio ma mũndũ ũrĩa ũtarĩ mũthingu

5 Ũtonga nĩũtũmaga mũndũ aheeneke;

Ũkoroku wake ũtũmaga aathamie kanua o ta bũrũri wa arĩa akuũ.

Ta ũrĩa gĩkuũ gĩtaiganagia,

noguo naake ataiganagia.

Nĩkĩo eyũnganagĩria ndũũrĩrĩ ciothe,

agacookanĩrĩria andũ oothe matuĩke aake.

6 Andũ acio oothe mekũmũũkĩrĩra mamũnyarare,

na mamũthekerere na kĩnyũrũri,

moige atĩrĩ, “Mũndũ ũrĩa ũroyaga indo itarĩ ciake,

na akeiigĩrĩra mũrigo wa mathiirĩ,

kaĩ arĩ thĩĩnainĩ-ĩ!

Egũtũũra eekaga ũguo nginyagia rĩ?”

7 Githĩ andũ acio ũrĩ na thiirĩ wao matigũgũũkĩrĩra,

na magũũkĩrĩra makũinainie, ũgĩtuĩke ngombo yao?

8 Atĩrĩĩrĩ, tondũ nĩũtharĩkĩire ndũũrĩrĩ nyingĩ,

namo matigari ma ndũũrĩrĩ icio nĩmegũgũtharĩkĩra nĩ ũndũ wa ũrĩa wanaita thakame nyingĩ.

Ningĩ megũgũtharĩkĩra nĩ ũndũ wa ũrĩa wanahinyĩrĩria bũrũri,

na matũũra o na andũ arĩa matũũraga kuo.

9 Kaĩ mũndũ ũrĩa ũcaragĩria mũciĩ wake ũtonga na njĩra cia ũtuunyani,

ageetũũgĩria igũrũ rĩa andũ arĩa angĩ,

nĩguo ndagaakinyĩrĩrwo nĩ ũgwati o na ũrĩkũ,

arĩ thĩĩnainĩ!

10 Na mĩbango yaku mĩũru nĩũreeheire mũciĩ waku gĩconoko,

ũkaniina ndũũrĩrĩ nyingĩ,

na ũkaagithia ũtũũro waku riiri.

11 Tondũ ihiga rĩrĩkwanagĩrĩra rĩrĩ o rũthingoinĩ,

naguo mũitĩrĩro ũgacookagia ũrĩ o nyũmba igũrũ.

12 Kaĩ ũrĩ thĩĩnainĩ-ĩ!

Wee ũrũũgamĩĩtie itũũra na ũũragani,

na ũkarĩaka na kũgera ngero.

13 MWATHANI Mwene Hinya Wothe nĩegũtũma mawĩra marĩa andũ acio maarutire,

matuĩke ma gũcinwo,

na mĩnoga yao ĩtuĩke ũndũ ũtarĩ kĩene.

14 No rĩĩrĩ, ũmenyo wa riiri wa MWATHANI nĩũkũiyũra thĩ yothe,

o ta ũrĩa maaĩ maiyũrĩĩte iria.

15 Kaĩ ũrĩ thĩĩnainĩ-ĩ!

Wee ũitũrũragĩra andũ arĩa mũriganĩĩtie nao marũrũ maaku,

o nginya magatuĩka ta arĩĩu,

ũkamaagithia gĩtĩĩo na ũkamaconorithia.

16 Ũkũiyũrwo nĩ gĩconoko handũ ha gĩtĩĩo.

Ũgũkĩnyua ũrĩĩo kinya ũtũgũũge!

MWATHANI egũtũma ũnyue gĩkombe kĩa ihera

nakĩo gĩtĩĩo kĩrĩa ũheagwo kĩgarũrwo gĩtuĩke gĩconoko.

17 Tondũ nĩũtemeete mĩtitũ ya Lebanoni,

rĩu we nawe nĩũgũtemwo.

Nĩũũragĩĩte nyamũ cia mĩtitũ ĩyo,

rĩu nyamũ icio nĩcio igũgwĩkĩra guoya.

Maũndũ macio megũgũkorerera

nĩ ũndũ wa ũrĩa wanooragana,

o na tondũ wa ũrĩa waahinyĩrĩria bũrũri na matũũra,

o na andũ arĩa matũũraga kuo.

18 Bata wa mũhianano ũkĩrĩ ũrĩkũ?

Guo no kĩndũ gĩthondekeetwo nĩ mũndũ,

na ndũrĩ ũndũ uugaga o tiga maheeni.

Gũkĩwĩhoka gũgũkĩguna mũũthondeki na kĩ?

Ũkĩrĩ o mũhianano ũtangĩhota o na kwaria.

19 Kaĩ ũrĩ thĩĩnainĩ-ĩ!

Wee wĩraga gĩcunjĩ kĩa mũtĩ “Tarũũgama”

kana ũkeera ihiga rĩtaaragia, “Ta ũkĩra.”

Atĩrĩĩrĩ, mũhianano no ũkũguũrĩrie ũndũ o na ũrĩkũ?

O na ũngĩkorwo ũhakĩĩtwo betha kana thahabu,

thĩinĩ waguo ndũrĩ mĩhũũmũ o na haniini.

20 No rĩĩrĩ, MWATHANI arĩ thĩinĩ wa Hekaarũ yake ĩrĩa theru;

mũndũ o wothe arĩ mbere yake.

Habakuku 3

Ihooya rĩa Habakuku

1 Rĩĩrĩ nĩrĩo ihooya rĩa mũnabii Habakuku:

2 MWATHANI nĩnjiguĩte maũndũ marĩa wĩkĩĩte

magagĩtũma njiyũrwo nĩ guoya.

Maũndũ macio wekire tene, meeke o na mahinda maya.

Maũndũ macio wekaga tene, o na rĩu marurumũkie.

O na ũngĩkorwo ũrĩ mũraakaru, ririkana tha ciaku.

3 Ngai arooka rĩngĩ oimĩĩte Edomu;

Ngai ũrĩa Mũtheru aroima irĩmainĩ cia Parani.

Ũkengu wake ũhumbĩrĩĩte matu

na kũgoocwo gwake gũkaiyũra thĩ.

4 Egũũka na ũkengu ta wa rũheni,

ũtheri ũkĩhenũkaga uumĩĩte mookoinĩ maake,

hau nĩ ho ahithĩĩte hinya wake.

5 Atũmaga mũrimũ ũmũtongorie

na agaatha gĩkuũ kĩmuume thuutha.

6 Rĩrĩa arũũgama, thĩ nĩgũthingitha ĩthingithaga,

ndũũrĩrĩ ikainaina rĩrĩa acirora,

irĩma iria itũũraga aagu na aagu ikaharagana,

tũrĩma tũrĩa twa tene na tene natuo tũkarikĩra na thĩ.

Kũu nĩkuo atũire athiagĩra.

7 Nĩndoonire andũ a Kushani manyiitwo nĩ guoya

o na Amidiani mainaina.

8 MWATHANI, kaĩ arĩ njũũĩ ciakũraakarĩĩtie?

Kaĩ arĩ iria rĩatũmĩĩte ũnyiitwo nĩ mang’ũrĩ?

Ũthiaga ũhaicĩĩte matu,

itu rĩa kĩhuuhũkanio nĩrĩo ngaari yaku ya mbarathi

ũkĩreehithĩria andũ aaku ũhootani.

9 Nĩwahaarĩirie gũtũmĩra ũta waku,

na ũkĩhaarĩria gũikia mĩguĩ yaku.

Nĩ we watũranganirie thĩ na njũũĩ.

10 Irĩma ciakuona igĩthingitha,

maaĩ magĩthothoka moimĩĩte igũrũ.

Maaĩ marĩa marĩ kũu thĩ kũrĩa kũriku magĩtherũka,

namo makũmbĩ ma iriainĩ makĩambarara na igũrũ mũno.

11 Riũa na mweri nĩciarũũgamire o ro ũguo,

rĩrĩa mĩguĩ yaku yahenũkaga na ihenya,

na rĩrĩa matimũ maaku maamenamenũkaga.

12 Ũgĩgĩtuĩkania thĩ ũng’ũrĩkĩĩte,

na ũkĩrangĩrĩria ndũũrĩrĩ nĩ ũrĩa waraakarĩĩte.

13 Woimagarire ũkahonokie andũ aaku,

o na ũkahonokie mũthamaki ũrĩa wethuurĩire.

Ũgĩkĩhehenja mũthamaki ũrĩa wamahinyagĩrĩria,

na ũkĩananga andũ aake.

14 Mĩguĩ yaku nĩyatheecire mũnene wa thigari ciake,

iria ciokaga o ta kĩhuuhũkanio gũtũhurunja,

o icio ciakenagio nĩkũhinyĩrĩria andũ arĩa athĩĩni na hitho.

15 Ũkĩranga iria na makinya ma mbarathi ciaku,

narĩo rĩkĩhuuhũkania.

16 Ngũigua maũndũ macio moothe, ngatuĩka nda,

mĩromo yakwa ĩkooyoya nĩ guoya,

mwĩrĩ wakwa ũgatuĩkĩra,

na magũrũ maakwa makaremwo nĩgũthiĩ.

Ngũgĩikara hooreire njeterere mũthenya ũkinye,

rĩrĩa MWATHANI akaaherithia arĩa matũtharĩkagĩra.

17 No rĩĩrĩ, o na mĩkũyũ ĩngĩaga gũciara,

mĩthabibũ yage kũruta thabibũ,

kĩmera kĩa mĩtamaiyũ gĩthũũke,

mĩgũnda yage kuumia ngano,

o na ciugũ cia ng’ondu na ng’ombe itigwo ũtheri,

18 ndĩikaraga ndĩ mũkenu,

na ndĩ mũcanjamũku,

nĩ gũkorwo MWATHANI Ngai nĩ mũhonokia wakwa.

19 MWATHANI nĩ we ũnjĩkagĩra hinya,

atũmaga magũrũ maakwa mahũthe wega o ta ma thwariga,

na nĩangitagĩra ndĩ o kũu irĩmainĩ.

Nahumu 1

1 Ĩno nĩ ndũmĩrĩri nditũ ĩkoniĩ Nineve. Ningĩ nĩ maũndũ marĩa maaguũrĩirio Nahumu ũrĩa woimĩĩte itũũra rĩetagwo Elikoshi.

MWATHANI kũraakarĩra Nineve

2 MWATHANI Ngai ndeendaga kũigananio na ũngĩ:

nĩaherithagia arĩa mamũkararagia.

Nĩerĩhagĩria harĩ o e na mang’ũrĩ.

3 MWATHANI ndahiũhaga kũraakara,

no nĩarĩ hinya

na ndangĩaga kũherithia mũndũ mwaganu.

Harĩa MWATHANI agerera, hoimaga kĩhuuhũkanio,

namo magũrũ maake moombũraga mbĩĩri ndumanu.

4 Akũũmaga iria rĩkahũa!

Agatũma njũũĩ ihũe,

ithaka cia Bashani ciũme,

kĩrĩma gĩa Karimeli kĩhũrũrũke,

namo mahũa ma kũu Lebanoni mahoohe.

5 Irĩma nĩgũthingitha ithingithaga ciamuona,

nacio ithũngũri ikaringũka.

Thĩ yamuona no kũinaina ĩinainaga,

mabũrũri na andũ oothe makaiyũrwo nĩ guoya.

6 Nũũ ũngĩhota gwĩtiiria maraakara maake?

O na kana etiirie mang’ũrĩka maake?

Aitũrũraga maraakara maake mahaana ta mwaki ũkũrĩrĩmbũka,

na agaatũranga ndwaro cia mahiga icunjĩ icunjĩ.

7 MWATHANI nĩ mwega,

nĩagitagĩra andũ aake hĩndĩ ya mathĩĩna;

na nĩamenyagĩrĩra arĩa mamwĩhokeete.

8 Thũ ciake aciniinaga ta iniinĩĩtwo nĩ mũiyũro wa rũũĩ,

nao arĩa mamũkararagia akameerekeria o gĩkuũinĩ.

9 Nĩ ũndũ ũrĩkũ ũrathugundĩra MWATHANI?

Nĩkũniina egũkũniina.

Gũtirĩ ũngĩrũũgamana naake keerĩ.

10 Inyuĩ arĩĩu mũgaacinwo mũthire biũ,

o ta mĩigua mĩtumanu mũno,

o na kana ta rũũa rũũmũ.

11 Atĩrĩĩrĩ, andũ a Nineve,

he na mũndũ ũrĩ na mĩbango mĩũru uumĩĩte kũu kwanyu.

Mũndũ ũcio-rĩ, nĩathugundĩire MWATHANI mathugunda mooru.

12 Na rĩĩrĩ, MWATHANI arakĩĩra andũ aake a Isiraeli atĩrĩ,

“O na angĩkorwo Aasiria marĩ na hinya mũno na nĩ aingĩ-rĩ,

gũtirĩ hingo matakaaniinwo mathire biũ.

Atĩrĩĩrĩ, inyuĩ andũ aya aakwa, nĩndĩmũhũũrĩĩte,

no ndigũcooka kũmũhũũra rĩngĩ.

13 Na rĩu, nĩngũniina hinya wothe wa Aasiria,

na nduange mĩnyororo yothe ĩrĩa mamuoheete nayo.”

14 Atĩrĩĩrĩ, MWATHANI aathanĩĩte igũrũ rĩa Aasiria akoiga atĩrĩ,

“Aasiria makaaniinwo na hatirĩ njiarwa ciao igaatigara.

Nayo mĩhianano ya ngai ciao ĩrĩa ĩrĩ hekaarũinĩ ciao, nĩngaamĩananga yothe.

Atĩrĩĩrĩ, inyuĩ Aasiria nĩkwenjithia ndĩramwenjithĩria mbĩĩrĩra,

nĩ ũndũ mũtiagĩrĩirwo nĩgũtũũra muoyo.”

15 Oneei, kwĩ na mũndũ ũroima na irimainĩ amũreeheire ũhoro mwega!

Aramũreehera ndũmĩrĩri ya ũhootani!

Atĩrĩĩrĩ, inyuĩ andũ a Juda rĩai maruga maanyu mũkeneete,

nĩmũhingĩirie MWATHANI mĩĩhĩtwa yanyu.

Imaramari icio cia Asiria itigaacooka gũtuĩkania bũrũri wanyu rĩngĩ.

Rĩu nĩiniinĩĩtwo igathira biũ!

Nahumu 2

Kũng’aũranio kwa Nineve

1 Atĩrĩĩrĩ, andũ aya a Nineve, rĩu mũrĩ athiũrũrũkĩrie!

Mũmũniini nĩakinya.

Ita cianyu nĩciĩhotore!

Rangĩraai njĩra.

Mwĩhaarĩriei kũrũa mbaara.

2 (Nĩ gũkorwo MWATHANI nĩarehaarĩria gũcookeria Aisiraeli riiri wao,

riiri o ũrĩa maarĩ naguo mbere ya kwanangwo nĩ thũ.)

3 Thũ cianyu ikuuĩĩte ngo nduune

na ikehumba nguo nduune cia mbaara.

Nĩciĩhaarĩirie gũtharĩkĩra!

Ngaari ciacio cia mbarathi irahenahenũka ta mwaki.

Mbarathi ciacio no gũtuuma iratuumatuuma.

4 Ngaari ciacio cia mbarathi ihithũkĩĩte na ũũru mũingĩ kũu njĩrainĩ,

irateng’era na gũũkũ na kũũrĩa itũũrainĩ.

Ironwo ihaana ta imũrĩ cia mwaki,

na irahiũka ta rũheni.

5 Atongoria nĩmeetĩĩtwo hamwe,

marooka makĩhĩngagwo.

Marahiũhahiũha makinye rũthingoinĩ rwakuo

nĩ geetha mahaarĩrie indo cia kũrũtharĩkĩra.

6 Ihingo iria irĩ ndeereinĩ cia rũũĩ nĩhingũre;

nayo nyũmba ya ũthamaki ĩiyũire kĩmako

7 Kwini nĩanyiitĩĩtwo agatahwo,

ndungata ciake irarĩra ta ndutuura, ikĩĩhũũrahũũraga gĩthũri nĩ kĩeha.

8 Nineve kũhaana o ta iria riunĩĩte,

andũ aakuo nĩkũũra maroora.

Kũraanĩrĩrwo gũkiugagwo atĩrĩ,

“Tigaai kũũra! Tigaai kũũra!”

No rĩĩrĩ, gũtirĩ o na ũ ũrehũgũra.

9 Tahaai betha na thahabu o gũtaha,

ũtonga ũrĩa ũrĩ itũũra rĩĩrĩ nĩ mũingĩ!

10 Itũũra rĩa Nineve nĩrĩanange, nĩrĩtiganĩrie, rĩkirĩĩte ihooru!

Ngoro nĩkũhũũra ĩrahũũra nĩ guoya;

maru nĩ maregeru,

hinya wothe nĩ mũthiru,

nacio ithiithi nĩ thitu.

11 Rĩu-rĩ, itũũra rĩrĩa rĩrahaanaga ta kĩmaamo kĩa mĩrũũthi rĩrĩ ha?

O itũũra rĩrĩa mĩrũũthi ĩraheyagĩra ciana ciayo gĩa kũrĩa,

o kũndũ kũrĩa mĩrũũthi ya njamba o na ya mĩgoma ĩratũũraga,

na kũrĩa ciana ciayo iratũũraga na thaayũ.

12 Mũrũũthi woragĩire ciana ciaguo nyamũ cia gũciigana,

o na cia kũhũũnwo nĩ mĩrũũthi ya mĩgoma.

Ningĩ ũkĩiyũria kĩmaamo kĩaguo

na icunjĩ cia nyama.

13 MWATHANI mwene hinya wothe aroiga atĩrĩ, “Nĩ niĩ thũ yaku. Ngũcina ngaari ciaku ciothe cia mbarathi na mwaki. Thigari ciaku ikooragĩrwo mbaarainĩ, na niĩ nguue indo ciothe iria watuunyĩĩte andũ arĩa angĩ. Mĩgambo ya arekio aaku ndĩgaacooka kũiguuo o na rĩ.”