IBUKU RฤจA ลจHORO ลจRฤจA MWEGA (GIKCL)

Paũlũ na atũmwo a maheeni

1 Naarĩ korwo no mũũthikĩrĩrie o na hĩndĩ ĩrĩa ndĩ mũkĩĩgu haniini. Ndamũthaitha thikĩrĩriai!

2 Niĩ-rĩ, ndĩ na ũiru nĩ ũndũ wanyu, ũiru uumĩĩte kwĩ Ngai, inyuĩ mũhaana mũirĩĩtu thingi ũrĩa ndeerĩire mũndũ ũmwe nĩguo amũhikie, na nĩ we Jesũ Kristũ.

3 No nĩndĩretigĩra atĩ hiihi mwahota kũheenio, o ta ũrĩa nyoka yaheenirie Hawa na maheeni maayo ma wara, nĩguo mũthũũkio meciiria nĩ geetha mũtige kwĩrutĩra ũrĩa mwĩrutĩire Kristũ.

4 Tondũ nĩmwĩtĩkagĩra mũkeneete mũndũ o wothe ũrĩa ũngĩũka kũmũhunjĩria ũhoro wa Jesũ ũngĩ tiga ũrĩa twamũhunjĩirie, na nĩmwetĩkĩrire roho ũngĩ na ũhoro ũngĩ, ũtahaanaine na Roho kana ũhoro ũrĩa mwega ũrĩa mwaiguire kuuma kũrĩ ithuĩ!

5 Niĩ ndigwĩciiria atĩ nĩharĩ ũndũ o na ũmwe ũrĩ na acio mũreeta “Atũmwo” itarĩ naguo!

6 O na angĩkorwo ha ũhoro wa kwaria nĩkwĩĩga njĩgaga-rĩ, ũguo tiguo haana ũhoroinĩ wa ũũgĩ; ũguo nĩtũmuoneetie maũndũinĩ moothe rĩrĩa tũkoretwo na inyuĩ.

7 Hĩndĩ ĩrĩa ndamũhunjagĩria Ũhoro ũrĩa Mwega wa Ngai-rĩ, niĩ ndirĩ kĩndũ ndamwĩtagia; ndenyiihirie nĩguo inyuĩ mũtuĩke andũ a bata. Hiihi ũguo ndeekire nĩ mahĩtia?

8 Ningĩ-rĩ, hĩndĩ ĩrĩa ndamũtungataga ndaheagwo ũteithio nĩ makanitha marĩa mangĩ. Ũguo nĩkuuga atĩ nĩkũmaiya ndamaiyaga nĩguo ndĩmũteithie.

9 Ningĩ hĩndĩ ĩrĩa twarĩ na inyuĩ-rĩ, ndaagĩa na thĩĩna ndiathĩĩnirie mũndũ o na ũmwe nĩ tondũ aariũ na aarĩ a Ithe witũ arĩa moimĩĩte Makedonia nĩmaaheire indo cia kũigana. Nĩndageririe mũno ndikaae gũtuĩka wa gũthĩĩnia mũndũ o na ũmwe, na no ngũthiĩ na mbere kũgeria!

10 Ngũmwĩra atĩrĩ, andũ a Akaia matingĩtũma ndige kwĩraha, amu nĩnjũũĩ na ma atĩ ũhoro wa ma wa Kristũ nĩũkoragwo hamwe na niĩ.

11 Kĩrĩa gĩatũma njuge ũguo nĩ kĩĩ? Hiihi nĩgũtuĩka atĩ ndimwendeete? Ngai nĩoĩ atĩ nĩndĩmwendeete!

12 Niĩ ngũthiĩ o na mbere gwĩka ũrĩa njĩkaga nĩ geetha andũ arĩa macaragia kamweke ga gũtuĩka atĩ tũrutaga wĩra ũmwe nao ndĩmaagithie kamweke kau.

13 Andũ ta acio nĩ atũmwo a maheeni arĩa maheenanagia na wĩra wao metuĩte atũmwo a Kristũ.

14 Ũcio-rĩ, ti ũndũ wa kũũmakia tondũ o na Caitaani nĩetuaga mũraika wa ũtheri!

15 Kwoguo ti ũndũ mũnene ngombo ciake igĩĩtua ngombo cia ũthingu. Marigĩrĩrioinĩ nĩmakaagĩa na kĩrĩa kĩringaine na ciĩko ciao.

Paũlũ gũthĩĩnĩka ta mũtũmwo

16 Nĩngũcookera o rĩngĩ atĩrĩ: gũtirĩ mũndũ wagĩrĩirwo nĩgwĩciiria atĩ ndĩ mũkĩĩgu. No angĩkorwo nĩmũgwĩciiria atĩ ndĩ mũkĩĩgu-rĩ, njĩtĩkĩriai o ro ũguo haana nĩguo o na niĩ ndĩrahe haniini.

17 Atĩrĩĩrĩ, ũhoroinĩ ũyũ wa kwĩraha-rĩ, ndiraaria ta ũrĩa Ngai angĩenda njarie; no ndĩraaria ta kĩrimũ,

18 na tondũ andũ aingĩ nĩmeerahaga nĩ ũndũ wa indo cia thĩ, o na niĩ to ndĩkĩĩrahe.

19 Inyuĩ mũrĩ oogĩ mũno, na kwoguo nĩmwamũkagĩra irimũ na gĩkeno!

20 Inyuĩ-rĩ, nĩmũkiragĩrĩria mũndũ ũrĩa ũkũmũtua ngombo ciake kana ũkũrĩa indo cianyu, kana ũkũmũtwarĩrĩria, kana akeenenehia kana akamũhũũra.

21 Nĩngũconoka ngiuga atĩ tũtionekaga twĩ na hinya wa gwĩka ũguo.

Ngwaria ta kĩrimũ njuge atĩ ũrĩa mũndũ ũngĩ ekwĩraha nĩ ũndũ waguo, o na niĩ no ndĩrahe nĩ ũndũ waguo.

22 Angĩkorwo o nĩ Ayahudi, o na niĩ ndĩ Mũyahudi. Angĩkorwo o nĩ Aisiraeli, o na niĩ ndĩ Mũisiraeli. Angĩkorwo o nĩ a njiarwa cia Aburahamu, o na niĩ ndĩ wa rũciaro rwa Aburahamu.

23 Angĩkorwo o nĩ ndungata cia Kristũ, niĩ ndĩ ndungata njega makĩria. Hiihi mũraigua ta ndĩ mũgũrũku, no ndĩ ndungata njega kũmakĩra, amu ndanarutithio wĩra mũritũ, na ndanoohwo maita maingĩ kũmakĩra, na ndanahũũrwo iboko maita matangĩtarĩka na o na maita maingĩ ndanakuhĩrĩria gũkua!

24 Ayahudi nĩmaahũũrire maita mataano iboko mĩrongo ĩtatũ na kenda.

25 Aroma nĩmahũũrire na iboko maita matatũ, na nĩhũũrĩĩtwo na mahiga riita rĩmwe. Ndanathũũkĩrwo nĩ meeri maita matatũ. Na hĩndĩ ĩmwe nĩnjikarĩĩte iriainĩ mathaa mĩrongo ĩĩrĩ na mana.

26 Ndanathiĩ ng’endo cia magũrũ na igakorwo irĩ na mĩtino mĩingĩ ya njũũĩ nene, ya atuunyani, ya andũ aitũ Ayahudi o na andũ a Ndũũrĩrĩ; na ya gũkorwo mĩciĩinĩ mĩnene o na kũrĩa gũtarĩ mĩciĩ, ya iriainĩ o na ya kuuma kũrĩ aariũ na aarĩ a Ithe witũ a maheeni.

27 Ndanaruta mawĩra maritũ mũno na ngaaga gũkoma matukũ maingĩ; ndanakorwo na ng’aragu na nyoota; ndanaikara hehoinĩ itarĩ na irio kana maaĩ.

28 Nĩkũrĩ mangĩ maingĩ itanagweta, na thĩinĩ wamo nĩharĩ ũmwe ũhinyagĩrĩria mũno, naguo nĩ gũtangĩka gwakwa nĩ ũndũ wa makanitha moothe.

29 Nũũ ũngĩkorwo aagĩĩte hinya na niĩ ndikorwo njagĩĩte hinya taake? Nũũ ũngĩhĩtithio na niĩ ndicinwo nĩ maraakara?

30 Angĩkorwo no mũhaka ndĩrahe, ngwĩraha nĩ ũndũ wa maũndũ marĩa moonanagia ũrĩa itarĩ na hinya.

31 Ngai, na no we Ithe wa Mwathani witũ Jesũ ũrĩa mũraathime kinya tene, na tene nĩoĩ na ma atĩ ndiraheenania.

32 Hĩndĩ ĩrĩa ndaarĩ Damasiki-rĩ, barũũthi ũrĩa wathanaga kuo rungu rwa mũthamaki Areta nĩeigire arangĩri marangĩre itũũra rĩu nĩguo anyiite,

33 no ngĩĩkirwo kĩondo ngĩgerio ndirica ngĩikũrũkĩrio rũthingoinĩ ngĩhonoka kũnyiitwo nĩ we.

Paũlũ kuonio na kũguũrĩrio maũndũ

1 No mũhaka ndĩrahe o na akorwo gũtirĩ kĩndũ ngũgĩa nakĩo o na ndetĩĩa. Rĩu ngwaria ũhoro wa cioneki iria Mwathani anyoneetie na marĩa anguũrĩirie.

2 Nĩnjũũĩ mũndũ ũmwe Mũkristiano wambatirio na igũrũ kinya igũrũ rĩa gatatũ mĩaka ikũmi na ĩna mĩthiru (ũrĩa itooĩ nĩ kana mũndũ ũcio aambatirio na mwĩrĩ kana atarĩ naguo; no Ngai ũũĩ.)

3 Ningĩ nĩnjũũĩ atĩ mũndũ ũcio nĩathiire kinya ikenero no ũrĩa itooĩ nĩ kana aathiire na mwĩrĩ kana atarĩ naguo, no Ngai ũũĩ.

4 Na rĩĩrĩ, kũu nĩaiguire maũndũ matangĩarĩrĩka na mũndũ atangĩhota kũmagweta.

5 Handũinĩ ha mũndũ ũcio niĩ nĩngwĩraha, no ndingĩĩraha nĩ ũndũ wakwa mwene tiga o wa maũndũ marĩa moonanagia atĩ ndirĩ hinya.

6 Angĩkorwo nĩngwenda kwĩraha ndingĩĩraha ta kĩrimũ, amu ngwaria o ũhoro wa ma. No rĩĩrĩ,rĩu ndikwĩraha tondũ ndingĩenda mũndũ oone ũhoro wakwa ta ũrĩ mũnene gũkĩra ũrĩa oonaga ngĩĩka kana akaigua ngiuga.

7 Nĩguo ndikerahe nĩ ũndũ wa maũndũ maingĩ marĩa nguũrĩirio-rĩ, nĩndaheirwo mũigua thĩinĩ wa mwĩrĩ wakwa ũrĩa arĩ guo mũrekio wa Caitaani, nĩguo ũthĩĩnagie nĩ geetha ndikaae gwĩtĩĩaga.

8 Nĩndathaithire Mwathani maita matatũ andute mũigua ũcio.

9 Naake akĩnjĩĩra atĩrĩ: “Wega wakwa nĩũkũiganĩĩte, tondũ hinya wakwa nĩwonekaga harĩa hatarĩ na hinya.” Kwoguo nĩngwĩraha ndĩ na gĩkeno nĩ ũndũ wakwa kwaga hinya, nĩguo hinya wa Kristũ ũikarage thĩinĩ wakwa.

10 Nĩ ũndũ ũcio, nĩngenaga nĩ ũndũ wa kwaga hinya, kũrumwo, gũthĩĩnĩka, kũnyariirwo, na kũnyamaario na mathĩĩna maingĩ nĩ ũndũ wa Kristũ. Amu hĩndĩ ĩrĩa itarĩ na hinya nĩguo ndĩ na hinya makĩria.

Paũlũ kũrũmbũiya Akorinitho

11 Atĩrĩĩrĩ, njĩkaga maũndũ ta kĩrimũ! No nĩ inyuĩ mwatũmire haane ũguo. Nĩ inyuĩ mwagĩrĩirwo nĩkũngaathĩrĩria, amu o na akorwo niĩ ndirĩ kĩene, “Atũmwo” arĩa anene aanyu matirĩ ũndũ mangĩrĩĩte naguo.

12 Tondũ-rĩ, maũndũ marĩa moonanagia atĩ mũndũ nĩ mũtũmwo wa ma nĩmeekĩĩtwo gatagatĩinĩ kaanyu na gũkirĩrĩria kũnene na ũndũ wa kũringa ciama na moorirũ.

13 Amu-rĩ, makanitha marĩa mangĩ mamũkĩrĩĩte na kĩ tiga o atĩ niĩ ndiigana kũũria ũteithio kuuma kũrĩ inyuĩ? Njoheraai mahĩtia macio!

14 Atĩrĩĩrĩ, rĩĩrĩ nĩ ihinda rĩa gatatũ ndĩhaarĩirie gũũka kwanyu, na ndirĩ kĩndũ o na kĩmwe ngenda kuuma kũrĩ inyuĩ, o tiga inyuĩ eene. Tondũ nĩmũũĩ atĩ ciana ti cio ciigagĩra aciari mũthiithũ, no aciari nĩ o maigagĩra ciana mũthiithũ.

15 Niĩ nĩngaakena nĩ ũndũ wa kũhũthĩra indo ciakwa ciothe, o na kwĩhũthĩra niĩ mwene, nĩ ũndũ wa mĩoyo yanyu. Hiihi inyuĩ no mũrege kũnyenda o na ndĩmwendeete ũguo wothe?

16 Nĩnjũũĩ nĩmũgwĩtĩkĩra atĩ ndiatuĩkire mũrigo harĩ inyuĩ, no nĩkũrĩ mũndũ ũngiuga atĩ nĩndaarĩ na mawara na ngĩmũtega na maheeni.

17 Mũndũ ũmwe wa arĩa ndatũmaga kũrĩ inyuĩ nĩ we hiihi watũmire mũnũmĩrĩre?

18 Nĩndathaithire Tito ooke kũrĩ inyuĩ, na ngĩtũma mũrũ wa Ithe witũ ũmwe mooke naake. Kaĩ hiihi Tito ooka amũtwarĩrĩirie? We na niĩ kaĩ tũtahaanaine wĩrainĩ witũ? Tũtiarũmagĩrĩra mĩtugo ĩhaanaine?

19 Mwahota gũkorwo mũgĩciiria atĩ ihinda rĩĩrĩ rĩothe nĩkwĩgitĩra tũregitĩra kuuma kũrĩ inyuĩ? Aaca; ithuĩ twaragia kũringana na wendi wa Kristũ, Ngai arĩ hamwe na ithuĩ. Maũndũ moothe marĩa twĩkaga araata aakwa, twĩkaga nĩ ũndũ wanyu.

20 Ndĩ na guoya atĩ hiihi ũrĩa ingĩenda mũgaakorwo mũhaana ndooka tiguo mũgaakorwo, o na inyuĩ mũtikaanyona ũrĩa mũngĩenda ngorwo haana. Nĩngaakora mwĩ na inegene, ũiru, maraakara, kwĩyenda, njiinũ na njuukũ, na kwaga mũbango.

21 Ndĩ o na guoya atĩ hĩndĩ ĩrĩa ngooka rĩngĩ Ngai wakwa ahota kũnjonora mbere yanyu, na nĩngũiguĩra andũ aingĩ tha arĩa meehirie o mbere matiĩrirĩĩte maũndũ mooru, ũmaraaya, na merirĩria mooru ma mwĩrĩ.

Gũkaanio kwa mũthia na ngeithi

1 Rĩĩrĩ nĩrĩo ihinda rĩa gatatũ ngoreetwo ngĩũka kwanyu. Ũndũ o wothe ũrĩa ũkwĩrwo nĩwĩkĩĩtwo no mũhaka ũkorwo na aira eerĩ kana atatũ, o ta ũrĩa maandĩko moigĩĩte.

2 O mbere nĩndakaanirie andũ arĩa meehĩĩtie marĩ hamwe na andũ arĩa angĩ oothe; rĩu ndĩrandĩka ndĩmakaanie o na itarĩ kuo, o ta ũrĩa ndamakaanirie ihinda rĩa keerĩ rĩrĩa twarĩ na inyuĩ, na ndĩmeere atĩ gũtirĩ mũndũ o na ũmwe itakaaherithia,

3 tondũ nĩmũrooria muonio na kĩhooto atĩ Kristũ nĩaragia arĩ thĩinĩ wakwa. Ndakoragwo aagĩĩte hinya akĩruta wĩra harĩ inyuĩ, no nĩkuonania oonanagia hinya wake.

4 Tondũ o na akorwo nĩambirwo mũtĩ igũrũ nĩ ũndũ wa kwaga hinya, nĩatũũraga muoyo nĩ ũndũ wa hinya wa Ngai. O na ithuĩ nĩtwagire hinya nĩ ũndũ wa kũnyiitana hamwe naake, na ithuĩ hamwe na inyuĩ nĩtũtũũraga muoyo hamwe na Kristũ na ũndũ wa hinya wa Ngai.

5 Mwĩroreei na mwĩgerie muone kana nĩmũrũmĩĩtie wĩtĩkio wanyu. Kaĩ mũtooĩ atĩ Kristũ Jesũ arĩ thĩinĩ wanyu? Angĩkorwo tiguo mũkĩrĩ ahoote.

6 Ngwĩhoka nĩmũkuona atĩ ithuĩ tũtihooteetwo.

7 Nĩtũhooyaga Ngai atĩ mũtikeehie, no ti geetha tuonanie atĩ nĩtũhootanĩĩte, no nĩ geetha mwĩkage ũrĩa kwagĩrĩire, o na angĩkorwo nĩtũkuoneka ta tũhooteetwo.

8 Amu tũtingĩhota gwĩka ũndũ ũtaagĩrĩire, no twĩkire ũrĩa wagĩrĩire.

9 Hĩndĩ ĩrĩa tũtarĩ na hinya na inyuĩ mwĩ naguo-rĩ, nĩtũiguaga tũkeneete. O na nĩngĩ nĩtũmũhooyagĩra mũtuĩke aagĩrĩru.

10 Kĩrĩa kĩratũma nyandĩke ũhoro ũyũ o na ndĩ kũraaya na inyuĩ-rĩ; nĩguo hĩndĩ ĩrĩa ngooka ndikaanooneke ta ndĩrathana na hinya ngĩhũthĩra ũhoti ũrĩa heetwo nĩ Mwathani wa gũthondeka, no ti wa gũthũũkia.

11 Ngĩrĩĩkia aariũ na aarĩ a Ithe witũ, ngũmwĩra mũtigwo na wega! Thiagaai na mĩthiĩre ĩrĩa yagĩrĩire; thikagĩrĩriai mataaro maakwa; iguanagaai; ikaranagiai na thaayũ na Ngai wa wendo na thaayũ nĩarĩkoragwo hamwe na inyuĩ.

12 Geithaniai inyuothe na ngeithi cia kũmumunyana.

Andũ oothe a Ngai nĩmamũgeithia.

13 Wega wa Mwathani witũ Jesũ Kristũ, na wendani wa Ngai, na ngwatanĩro yaRoho Mũtheru iroikara na inyuĩ inyuothe.

1 Kuuma kũrĩ niĩ Paũlũ, o niĩ ndeetirwo na kwenda kwa Ngai nduĩke mũtũmwo wa Kristũ Jesũ, na kuuma kũrĩ Sosithene mũrũ wa Ithe witũ:

2 Kũrĩ kanitha wa Ngai ũrĩa ũrĩ Korinitho, na kũrĩ arĩa oothe meetĩĩtwo matuĩke andũ atheru a Ngai, arĩa matuĩkĩĩte aake thĩinĩ wa Kristũ Jesũ, o hamwe na andũ oothe a kũndũ guothe arĩa mathaathayagia Mwathani witũ Jesũ Kristũ, o we Mwathani wao na no we Mwathani witũ:

3 Wega na thaayũ wa Ngai Ithe witũ na wa Mwathani Jesũ Kristũ irogĩa na inyuĩ.

Iraathimo thĩinĩ wa Kristũ

4 Nĩnjookagĩria Ngai ngaatho hĩndĩ ciothe nĩ ũndũ wanyu tondũ wa wega ũrĩa amũheete thĩinĩ wa Kristũ Jesũ.

5 Tondũ wa gũkorwo mwĩ thĩinĩ wa Kristũ nĩamũtongirie maũndũinĩ moothe ma kwaria o na ma ũũgĩ.

6 Ũhoro wa Kristũ nĩũmũtoonyeete wega mũno

7 atĩ gũtirĩ kĩheeo o na kĩmwe mũtarĩ nakĩo rĩĩrĩ mwetereire kũguũranĩrio kwa Mwathani witũ Jesũ Kristũ.

8 Nĩekũmũũmĩrĩria kinya mũthia nĩ geetha mũthenya ũcio wa Mwathani witũ Jesũ Kristũ mũtikaanakorwo na wĩhia.

9 Ngai ũrĩa wamwĩtire mũrĩ na ngwatanĩro na Mũũriũ wake Jesũ Kristũ Mwathani witũ nĩ Ngai mwĩhokeku.

Njatũkano thĩinĩ wa kanitha

10 Aariũ na aarĩ a Ithe witũ, nĩndamũthaitha rĩĩtwainĩ rĩa Mwathani witũ Jesũ Kristũ, atĩ inyuothe mũiguithanagie na mũtikagĩe na njatũkano gatagatĩinĩ kaanyu. Koragwoi mũnyiitanĩire mwĩ na meciiria o mamwe na ngoro o ĩmwe.

11 Amu nĩmenyithĩĩtio ũhoro nĩ andũ a mũciĩ wa Kiloe atĩ nĩkũrĩ na njatũkano gatagatĩinĩ ka aariũ na aarĩ a Ithe witũ.

12 Andũ amwe aanyu maroiga atĩ: “Niĩ ndĩ wa Paũlũ”; angĩ, “Niĩ ndĩ wa Apolo”; angĩ “Niĩ ndĩ wa Kefa”; na arĩa angĩ, “Niĩ ndĩ wa Kristũ.”

13 Kaĩ Kristũ agayanĩĩtio?Paũlũ-rĩ, nĩ we wambirwo mũtharabainĩ nĩ ũndũ wanyu? Mwabatithirio thĩinĩ wa rĩĩtwa rĩa Paũlũ?

14 Nĩnjookagĩria Ngai ngaatho tondũ hatirĩ mũndũ o na ũmwe wanyu ndabatithirie tiga o Kirisipo na Gayo.

15 Kwoguo gũtirĩ mũndũ ũngĩkiuga atĩ aabatithirio thĩinĩ wa rĩĩtwa rĩakwa.

16 (Ĩndĩ nĩndabatithirie Sitefana na andũ a mũciĩ wake; tiga acio, ndikũririkana kana kũrĩ mũndũ ũngĩ ndabatithirie.)

17 Kristũ ndandũmire ngabatithanie. Aandũmire ngahunjie Ũhoro ũrĩa Mwega, na ndĩũheane itekũhũthĩra ciugo iria ciumanĩĩte na ũũgĩ wa mũndũ, nĩguo ndũme na ma gĩkuũ gĩa Kristũ mũtharabainĩ gĩtikaagithio kĩene.

Kristũ nĩ we hinya na ũũgĩ wa Ngai

18 Tondũ ũhoro wa gĩkuũ gĩa Kristũ mũtharabainĩ nĩ ũrimũ kũrĩ andũ arĩa maroora; ĩndĩ kũrĩ ithuĩ arĩa tũrahonokio ũhoro ũcio nĩ hinya wa Ngai.

19 Tondũ nĩkwandĩkĩĩtwo atĩrĩ:

“Nĩngaathũũkia ũũgĩ wa arĩa oogĩ,

na njeherie ũmenyo wa imenyi.”

20 Mũndũ ũrĩa mũũgĩ akĩrĩ kũ? Mũrutani wa Watho o naake e kũ? Ũrĩa waragia na ũũgĩ mũingĩ wa matukũ maya o naake e kũ? Githĩ Ngai ndagĩtuĩte ũũgĩ wa thĩ ĩno o ũrimũ?

21 Tondũ kũringana na ũũgĩ wa Ngai, Ngai nĩatũmire andũ maage kũmũmenya na njĩra ya ũũgĩ wao. Handũ ha ũguo nĩonire kwagĩrĩire ahũthĩre ũrimũ wa ũndũ ũrĩa tũhunjagia nĩ geetha ahonokie arĩa meetĩkĩĩtie.

22 Amu Ayahudi meetagia ciama, nao Angiriki macaragia ũũgĩ.

23 No ithuĩ tũhunjagia Ũhoro wa Kristũ e mwambe, ũhoro ũrĩa kũrĩ Ayahudi nĩ ũndũ wa kũmahĩngĩĩca, na kũrĩ andũ a Ndũũrĩrĩ nĩ ũrimũ;

24 no kũrĩ arĩa meetĩĩtwo nĩ Ngai, Ayahudi na andũ a Ndũũrĩrĩ, ũhoro wa Kristũ nĩ hinya, o na ũũgĩ wa Ngai.

25 Tondũ ũndũ ũrĩa wonekaga ũrĩ ũrimũ wa Ngai nĩũrĩ ũũgĩ mũnene gũkĩra ũũgĩ wa andũ, na ũndũ ũrĩa wonekaga ũrĩ ũhũthũ wa Ngai nĩũrĩ hinya mũnene gũkĩra hinya wa andũ.

26 Aariũ na aarĩ a Ithe witũ, ririkanaai gwĩtwo kwanyu, ti aingĩ aanyu maarĩ oogĩ kũringana na maũndũ ma thĩ kana maarĩ na hinya kana maaciarĩirwo mĩciĩ ya gĩtĩĩo.

27 No Ngai aathuurire maũndũ ma gũũkũ thĩ marĩa moonagwo marĩ ma ũrimũ nĩguo aconore arĩa oogĩ, na agĩthuura maũndũ marĩa moonagwo matarĩ na hinya ma gũũkũ thĩ nĩguo aconore marĩa marĩ na hinya.

28 O na aathuurire indo iria andũ mamenaga magacitua atĩ itirĩ bata, o hamwe na maũndũ gũtarĩ nĩ geetha oonanie atĩ marĩa marĩ kuo matirĩ bata o na haniini.

29 Nĩ ũndũ ũcio gũtirĩ mũndũ o na ũmwe ũngĩtĩĩa mbere ya Ngai.

30 No Ngai nĩ we kĩhumo kĩa muoyo wanyu mwĩ thĩinĩ wa Kristũ Jesũ, ũrĩa aatuire ũũgĩ witũ uumĩĩte kwĩ Ngai, o na akĩmũtua ũtheru, ũthingu, na mũkũũri witũ,

31 o ta ũrĩa kwandĩkĩĩtwo atĩ: “Ũrĩa ũkwenda gwĩtĩĩa, nĩetĩĩe nĩ ũndũ wa maũndũ marĩa Mwathani eekĩĩte.”

Ũhoro wa Kristũ ũrĩa mwambe

1 Aariũ na aarĩ a Ithe witũ, hĩndĩ ĩrĩa ndookire kũrĩ inyuĩ ndamũhunjĩirie ndũmĩrĩri ya Ngaiĩrĩa yatũire hithoinĩ, itekũhũthĩra ciugo nditũ kana ũũgĩ mũnene.

2 Tondũ ndĩ gatagatĩinĩ kaanyu, nĩndatuĩte atĩ ndirĩ ũndũ ũngĩ ndeendaga kũmenya o tiga wa Jesũ Kristũ e mwambe mũtharabainĩ.

3 Kwa ũguo ndookire kũrĩ inyuĩ ta itarĩ na hinya, ngĩinainaga mũno o na ndĩ na guoya.

4 Ningĩ ũhoro wakwa o na kũhunjia gwakwa ndiaheanaga na ciugo cia ũũgĩ wa mũndũ, no ndaheanaga irĩ na ũira wa hinya wa Roho wa Ngai.

5 Nĩ ũndũ ũcio wĩtĩkio wanyu ndwĩhooceetie harĩ ũũgĩ wa andũ o tiga harĩ hinya wa Ngai.

Ũũgĩ wa Ngai

6 No rĩĩrĩ, andũ arĩa agima maũndũinĩ ma kĩĩroho tũmaheaga ũhoro wa ũũgĩ. No ti ũũgĩ wa matukũ maya kana wa aathani a matukũ maya arĩa meerekeire gũthira.

7 Ũũgĩ ũrĩa tũhunjagia nĩ hitho ya ũũgĩ wa Ngai, ũrĩa mũhithe kũrĩ andũ, na ũrĩa Ngai aathuurire o na mbere ya kũũmba thĩ nĩ ũndũ wa riiri witũ.

8 Gũtirĩ mũnene o na ũmwe wa matukũ maya wamenyire ũũgĩ ũcio tondũ korwo nĩmaũmenyire, matingĩambire Mwathani mwene riiri.

9 Amu o ta ũrĩa kwandĩkĩĩtwo atĩrĩ:

“Maũndũ marĩa gũtarĩ mũndũ ũrĩ wona kana akaigua,

marĩa matarĩ meciirĩrio nĩ mũndũ o na ũrĩkũ atĩ no meekĩke,

nĩ mo maũndũ marĩa Ngai athondekeire arĩa mamwendeete.”

10 No Ngai nĩatũguũrĩirie hitho icio ahũthĩrĩĩte Roho wake. Roho ũcio athuuthuuragia maũndũ moothe, o na nginya meciiria ma Ngai marĩa mahithe mũno.

11 Nũũ ũũĩ kĩrĩa gĩ thĩinĩ wa meciiria ma mũndũ tiga o roho ũrĩa ũrĩ thĩinĩ wake? Ũguo noguo kũhaana atĩ gũtirĩ mũndũ ũngĩmenya meciiria ma Ngai o tiga Roho wa Ngai.

12 Ĩndĩ ithuĩ tũtiamũkĩrĩĩte roho wa thĩ ĩno; no twamũkĩrĩĩte Roho ũrĩa uumĩĩte kwĩ Ngai, nĩ geetha tũkamenyaga iheeo iria Ngai atũheete.

13 Maũndũ macio tũtimaaragia na ciugo iria tũrutĩĩtwo nĩ ũũgĩ wa andũ, no twaragia na ciugo iria tũrutĩĩtwo nĩ Roho, tondũ tũtaaragĩria ũhoro wa kĩĩroho rĩrĩa tũgũtaarĩria andũ arĩa marĩ na Roho.

14 Mũndũ ũrĩa ũtarĩ na Roho ndangĩhota kwamũkĩra iheeo iria iheanagwo nĩ Roho wa Ngai. Mũndũ ta ũcio ndangĩhota gũtaũkĩrwo nĩ ũhoro wa iheeo icio, na kũrĩ we ũcio nĩ ũrimũ, nĩ tondũ bata wacio no ũmenyekire na njĩra ya kĩĩroho.

15 Mũndũ ũrĩa wĩ na Roho nĩahotaga gũkũũrana bata wa maũndũ moothe, no we gũtirĩ mũndũ ũngĩmũtuĩra.

16 Tondũ o ta ũrĩa maandĩko moigaga-rĩ,

“Nũũ ũngĩmenya meciiria ma Mwathani?

Nũũ ũngĩmũtaara?”

O na gwatuĩka ũguo-rĩ, ithuĩ tũrĩ na meciiria ma Kristũ.

Ndungata cia Ngai

1 Aariũ na aarĩ a Ithe witũ, inyuĩ ndingĩahotire kũmwarĩria ta ũrĩa ingĩarĩria andũ arĩa marĩ na Roho wa Ngai; ndamwarĩirie ta andũ a thĩ, kana o ta twana thĩinĩ wa Kristũ.

2 Ndamũheire iria amu ndingĩamũheire irio nyũmũ tondũ mũtingĩahotire gũcirĩa, na o na rĩu mũtirĩ mũratuĩka a kũhota gũcirĩa,

3 tondũ o na rĩu mũikaraga o ta andũ a thĩ. Amu rĩrĩa kwĩ na ũiru na ngarari gatagatĩinĩ kaanyu-rĩ, githĩ ti kuonania atĩ mũrĩ o a thĩ ĩno na mũikaraga kũringana na ũrĩa ĩhaana?

4 Tondũ rĩrĩa ũmwe wanyu ekuuga, “Niĩ ndĩ wa Paũlũ,” naake ũrĩa ũngĩ akoiga, “Niĩ ndĩ wa Apolo,” githĩ mũtigĩĩkaga o ta andũ a thĩ?

5 Apolo akĩrĩ ũ? O naake Paũlũ nũũ? Ithuĩ tũrĩ o ndungata cia Ngai ciamũreeheire wĩtĩkio. Ithuĩ o mũndũ aarutaga wĩra ũrĩa aheetwo nĩ Mwathani:

6 Niĩ ndahandire mbegũ, naake Apolo agĩciitĩrĩria maaĩ, no Ngai nĩ we watũmire ikũre.

7 Kwoguo ũrĩa ũhandaga na ũrĩa ũitagĩrĩria maaĩ matirĩ bata; ũrĩa ũrĩ bata nĩ Ngai ũrĩa ũtũmaga ikũre.

8 Hatirĩ ũtiganu wa mũhandi kana mũitĩrĩria wa maaĩ; Ngai akaarĩha o mũndũ mũcaara kũringana na wĩra wake.

9 Tondũ ithuĩ tũrutithanagia wĩra na Ngai, na inyuĩ nĩ inyuĩ mũgũnda wa Ngai.

Inyuĩ nĩ inyuĩ mwako wa Ngai.

10 Kũringana na wega ũrĩa ndaheirwo nĩ Ngai, ta mwakithia ũrĩa mũũgĩ niĩ ndaakire mũthingi, naake mũndũ ũngĩ nĩaraaka igũrũ rĩaguo. No mũndũ o wothe nĩakĩmenyagĩrĩre egwaka igũrũ rĩaguo atĩa.

11 Gũtirĩ mũthingi ũngĩ mũndũ angĩaka tiga ũrĩa ũrĩĩkĩĩtie gwakwo nĩ Ngai, na Jesũ Kristũ nĩ we mũthingi ũcio.

12 Mũndũ no aake igũrũ rĩa mũthingi ũcio na thahabu kana betha, kana mahiga ma goro, kana mbaaũ, kana nyeki o na kana rũũa.

13 No rĩĩrĩ, wĩra wa mũndũ o mũndũ nĩũkaamenyeka hĩndĩ ĩrĩa Mũthenya wa Kristũ ũgaatũma wĩra ũcio wonekane. Amu mũthenya ũcio, mwaki nĩũkaamenyithania wĩra wa o mũndũ; wĩra ũcio ũkaagerio na mwaki nĩguo ũmenyeke ũrĩa ũhaana.

14 Angĩkorwo kĩrĩa mũndũ aakire igũrũ rĩa mũthingi ũcio nĩgĩgeetiiria mwaki, nĩakaamũkĩra mũcaara.

15 No angĩkorwo kĩrĩa gĩakirwo nĩgĩkaahĩa, ũrĩa wagĩakire nĩagaathiĩ hathara, no we mwene nĩakaahonoka o ta ũrĩa mũndũ angĩhonoka agereire mwakiinĩ.

16 Atĩrĩĩrĩ, kaĩ mũtooĩ atĩ inyuĩ mũrĩ Hekaarũ ya Ngai, na atĩ Roho wa Ngai aikaraga thĩinĩ wanyu?

17 Hakĩrĩ ũguo-rĩ, mũndũ angĩthũũkia Hekaarũ ya Ngai, Ngai naake nĩakaamũthũũkia nĩ gũkorwo Hekaarũ ya Ngai nĩ theru, na inyuĩ nĩ inyuĩ Hekaarũ ĩyo.

18 Gũtikaagĩe mũndũ ũkwĩheenia. Angĩkorwo gatagatĩinĩ kaanyu nĩharĩ mũndũ wĩciiragia atĩ nĩ mũũgĩ na ũũgĩ wa matukũinĩ maya, nĩatuĩke kĩrimũ nĩ geetha agĩtuĩke mũũgĩ.

19 Tondũ ũũgĩ wa thĩ ĩno nĩ ũrimũ mbere ya Ngai, amu nĩkwandĩkĩĩtwo atĩrĩ, “Ngai nĩategaga arĩa oogĩ na ũũgĩ wao;”

20 o na gũkaandĩkwo handũ hangĩ atĩrĩ, “Mwathani nĩoĩ atĩ meciiria ma arĩa oogĩ matirĩ bata.”

21 Kwoguo mũndũ o ũrĩkũ ndakaae kwĩraha nĩ ũndũ wa maũndũ marĩa andũ mangĩĩka, tondũ maũndũ moothe nĩ maanyu:

22 Paũlũ, Apolo na Petero; o na thĩ ĩno, muoyo, gĩkuũ, indo cia matukũ maya na cia matukũ marĩa magooka, icio ciothe nĩ cianyu.

23 Inyuĩ na inyuĩ mũrĩ a Kristũ, naake Kristũ nĩ wa Ngai.

Atũmwo a Kristũ

1 Andũ maagĩrĩirwo nĩgũtuonaga ta ndungata cia Kristũ iria ciĩhokeirwo maũndũ ma hitho cia Ngai.

2 Ndungata iria ciĩhokeirwo indo ciagĩrĩirwo nĩ gũkorwo irĩ njĩhokeku harĩ mwathani wacio.

3 Harĩ niĩ-rĩ, gũtuĩrwo nĩ inyuĩ o na kana nĩ igooti rĩa andũ gũtiimakagia; o na niĩ mwene ndiĩtuagĩra.

4 Niĩ ndirĩ ũndũ o na ũmwe ingĩĩcuukĩra, no ũguo ti kuuga atĩ ndĩ mwagĩrĩru, ũrĩa ũnduagĩra nĩ Mwathani.

5 Kwoguo mũtiagĩrĩirwo nĩgũtua ũndũ mbere ya hĩndĩ ĩrĩa yagĩrĩire, etereraai Mwathani ooke. Hĩndĩ ĩyo nĩakaareehe ũtheriinĩ maũndũ moothe marĩa mahithĩĩtwo ndumainĩ na oimbũre maũndũ marĩa mahithe marĩa andũ meciiragia na ngoro. Na rĩĩrĩ, hĩndĩ ĩyo mũndũ o wothe nĩakaagaathĩrĩrio nĩ Ngai ta ũrĩa aagĩrĩirwo.

6 Maũndũinĩ maya moothe ndĩraheana ngerekano iitũ na Apolo nĩ ũndũ wanyu aariũ na aarĩ a Ithe witũ, nĩ geetha mwĩrute na ithuĩ mũtikahĩtie ũrĩa kwandĩkĩĩtwo atĩ mũndũ ndagetĩĩe na ũndũ wa kwenda mũndũ ũmwe agathũũra ũrĩa ũngĩ.

7 Tondũ rĩĩrĩ, wee ũrĩ na ũtiganu na andũ arĩa angĩ? Nĩ kĩĩ wĩ nakĩo ũtaaheirwo? Na akorwo nĩkũheeo waheirwo-rĩ, ũgĩĩtĩĩaga nĩkĩ ta atarĩ kũheeo waheirwo?

8 Inyuĩ-rĩ, nĩmũgĩĩte na maũndũ moothe marĩa mwagĩrĩirwo kũgĩa namo? Nĩmũrĩĩkĩĩtie gũtonga? Nĩmũtuĩkĩĩte athamaki, o na gũtuĩka ithuĩ tũtirĩ athamaki? Naarĩ korwo mũrĩ athamaki nĩ geetha tũtuĩke athamaki hamwe na inyuĩ!

9 Tondũ nguona ta Ngai aatũtuire ithuĩ atũmwo tuonekage ta tũrĩ a thuutha harĩ andũ oothe, o ta andũ matuĩrĩirwo kũũragwo, tũgatuĩka kĩndũ gĩa kwĩrorerwo nĩ thĩ, araika na andũ.

10 Ithuĩ tũtuĩkĩĩte irimũ nĩ ũndũ wa Kristũ, no inyuĩ mũrĩ oogĩ tondũ mũrĩ thĩinĩ wa Kristũ! Ithuĩ nĩkwaga twagĩĩte hinya, no inyuĩ mwĩ naguo! Inyuĩ nĩmũtĩĩĩtwo na ithuĩ tũkamenwo!

11 Kinya o na ihinda rĩĩrĩ no tũhũũtaga na tũkanyoota; twĩhumbaga nguo ndarũku; nĩtũhũũragwo; tũtikoragwo na ũikaro;

12 ningĩ nĩtwĩnogagia na kũruta wĩra na mooko maitũ. Hĩndĩ ĩrĩa twarumwo nĩ andũ, ithuĩ nĩkũraathima tũmaraathimaga; rĩrĩa twanyariirwo, nĩkũũmĩrĩria tũũmagĩrĩria;

13 rĩrĩa twarumwo, ithuĩ twaragia o wega. Tũtuĩkĩĩte ta mathangũ ma kwĩrihũraga na andũ, tũgagĩtuĩka kĩndũ kĩ magigi kinya o na rĩu!

14 Ndirandĩka ũhoro ũyũ atĩ nĩguo ndĩmũconore, no nĩ geetha ndĩmũtaare ta ciana ciakwa iria nyendeete.

15 O na kũngĩkorwo mwĩ na arutani ngiri na ngiri ũhoroinĩ wa Kristũ Jesũ-rĩ, mũtirĩ na maithe maingĩ. Nĩ gũkorwo thĩinĩ wa Kristũ nĩ niĩ ndamũciarire rĩrĩa ndamũhunjĩirie Ũhoro Mwega.

16 Kwoguo ndamũthaitha mũrũmĩrĩre mũhiano wakwa.

17 Nĩ ũndũ ũcio nĩndamũtũmĩra mwana wakwa Timotheo, ũrĩa nyendeete, na mũndũ mwĩhokeku thĩinĩ wa Mwathani. Nĩekũmũririkania maũndũ marĩa nũmagĩrĩra mũtũũrĩreinĩ wakwa mwerũ ndĩ thĩinĩ wa Kristũ Jesũ na no mo ndutanaga makanithainĩ kũndũ guothe.

18 Amwe aanyu nĩmaretĩĩa tondũ mareciiria atĩ ndigũũka kũmũceerera.

19 No Mwathani eenda, nĩngũũka o na ihenya kũrĩ inyuĩ, na nĩndĩkĩmenya ũrĩa hinya wa acio maretĩĩa ũigana, no ti ũrĩa maroiga.

20 Amu ũthamaki wa Ngai ti wa mĩario mĩtheri no nĩ wa hinya.

21 Atĩrĩĩrĩ, mũkwenda atĩa? Mũkwenda njũke kũrĩ inyuĩ na kĩboko kana na roho wa wendani na hooreire?

Waganu thĩinĩ wa kanitha

1 Atĩrĩĩrĩ, nĩkũraiguĩka atĩ gatagatĩinĩ kaanyu kũrĩ na ũtharia mũũru mũno o na ũtangĩkorwo gatagatĩinĩ ka andũ arĩa mateetĩkĩĩtie. Nĩnjiguĩte atĩ kũrĩ mũndũ ũrakoma na mũtumia wa ithe!

2 Handũ ha gwĩtĩĩa-rĩ, kaĩ mũtangĩigua kĩeha na mũingate mũndũ ũcio oime ngwatanĩroinĩ yanyu?

3-4 O na akorwo kĩĩmwĩrĩ ndirĩ hamwe na inyuĩ, ndĩ hamwe na inyuĩ kĩĩroho; mũndũ ũcio wĩkĩĩte ũndũ ũcio mũũru ũguo nĩndĩkĩĩtie kũmũtuĩra rĩĩtwainĩ rĩa Mwathani Jesũ, o ta ndĩ hamwe na inyuĩ. Rĩrĩa mũrĩcemania na ndĩkorwo hamwe na inyuĩ kĩĩroho, na ũndũ wa hinya wa Mwathani witũ Jesũ Kristũ ũrĩa ũrĩ hamwe na ithuĩ,

5 mũndũ ũcio mũrĩmũneana kũrĩ Caitaani nĩguo mwĩrĩ wake wanangwo, nĩ geetha muoyo wake ũkaahonoka Mũthenya ũrĩa wa Mwathani.

6 Mũtirĩ na kĩhooto gĩa gwĩtĩĩa! Kaĩ mũtooĩ atĩ ndaawa niini ya kũimbia mĩgate ĩimbagia mũtu wothe mũkande?

7 Kwoguo eheriai ndaawa ya kũimbia mĩgate ĩrĩa ngũrũ nĩ geetha mũtuĩke mũtu ũtarĩ mũhũthĩre, amu mũtirĩ eekĩre ndaawa ya kũimbia mĩgate. Tondũ Kristũ arĩ we Gatũrũme ka Bathaka, nĩarutĩĩtwo igongoona nĩ ũndũ witũ.

8 Kwoguo rekeei tũkũngũĩre Bathaka no ti na mũgate mwĩkĩre ndaawa ĩrĩa ngũrũ ya kũimbia, na nĩ yo maũũru na mawaganu; no nĩtũmĩkũngũĩre tũrĩ na mũgate ũtarĩ ndaawa ya kũimbia, naguo nĩ mũgate wa wĩhokeku na wa ũhoro wa ma.

9 Marũainĩ marĩa ndamwandĩkĩire nĩndamwĩrire atĩ mũtigakoragwo mwĩ na thiritũ na ahũũri maraaya.

10 Rĩu-rĩ, ngiuga ũguo ndioigaga andũ arĩa matarĩ ndini arĩa maraaya kana arĩa akoroku kana atuunyani kana ahooi mĩhianano, tondũ gũkorwo mũtarĩ thiritũ nao-rĩ, no mũkiumire thĩ ĩno.

11 Ũrĩa ndamwandĩkĩire ngĩmwĩra nĩ atĩ mũtigaakoragwo thiritũ na mũndũ ũreĩĩta Mũkristiano na nĩakoragwo arĩ mũmaraaya, kana arĩ mũkoroku, kana arĩ mũhooi mĩhianano, kana arĩ mũrumani, kana arĩ mũtuunyani o na kana arĩ mũrĩĩu. Mũndũ ta ũcio o na mũtiagĩrĩirwo nĩkũrĩanĩra naake.

12 Amu ti wĩra wakwa gũtuĩra arĩa matarĩ a ngwatanĩro iitũ. Ngai nĩ we ũgaatuĩra arĩa matarĩ a ngwatanĩro iitũ. Githĩ inyuĩ ti arĩa me thĩinĩ wa kanitha mwagĩrĩirwo nĩgũtuĩra?

13 O ta ũrĩa Maandĩko moigĩĩte, atĩrĩ, “Ingataai mũndũ ũrĩa mwaganu kuuma ngwatanĩroinĩ yanyu.”

Maciira gatagatĩinĩ ka Akristiano

1 Na rĩĩrĩ, hĩndĩ ĩrĩa mũkristiano ũmwe wanyu ahĩtĩrio nĩ Mũkristiano ũrĩa ũngĩ-rĩ, nĩ kĩĩ gĩgũtũma athĩgĩrĩrie gũthiĩ kũrĩ aciirithania arĩa mateetĩkĩĩtie handũ ha gũthiĩ kũrĩ andũ a Ngai nĩguo marore ũhoro ũcio?

2 Kaĩ mũtooĩ atĩ andũ a Ngai nĩ o magaatuĩra andũ a thĩ? Na angĩkorwo nĩ inyuĩ mũgaatuĩra andũ a thĩ-rĩ, githĩ mũtikĩagĩrĩirwo nĩgũtuithania o na maũndũ marĩa maniini?

3 Kaĩ mũtooĩ atĩ nĩ ithuĩ tũgaatuĩra araika? Na angĩkorwo nĩ ũguo-rĩ, githĩ tũtikĩagĩrĩirwo nĩgũtuithania o na maũndũ ma gũũkũ thĩ ma mũthenya o mũthenya?

4 Maũndũ ta macio mangĩgĩũka-rĩ, nĩmũkĩagĩrĩirwo gũtwarĩra andũ arĩa matarĩ bata kanithainĩ mamũtuithanie maũndũinĩ macio?

5 Ndoiga ũguo nĩ geetha ndĩmũconore. Tondũ wa rĩĩrĩ, kaĩ gũtarĩ mũndũ mũũgĩ o na ũmwe ũngĩoneka gatagatĩinĩ kaanyu wa kũhota kũiguithania Akristiano arĩa mahĩtanĩĩtie?

6 No kinya Mũkristiano atware ũrĩa ũngĩ igootiinĩ magatuithanio nĩ aciirithania arĩa mateetĩkĩĩtie?

7 Gũkorwo mũrĩ na maciira gatagatĩinĩ kaanyu, gũkuonania atĩ nĩkũhootwo mũhooteetwo o biũ! Kaĩ mũtangĩĩtĩkĩra kũhĩtĩrio kana o na gũtuunywo?

8 Inyuĩ eene nĩkũhĩtĩria mũhĩtagĩria aariũ na aarĩ a Ithe witũ o na mũkamatuunya indo ciao!

9 Mũtikũmenya atĩ andũ arĩa aaganu matikaagaya ũthamaki wa Ngai? Mũtikaae kwĩheenia; andũ arĩa aaganu, ahooi mĩhianano, itharia, arũme arĩa makomaga na arũme arĩa angĩ,

10 aici, andũ arĩa akoroku, arĩĩu, arumani, o na atuunyani gũtirĩ o na ũmwe ũkaagaya ũthamaki wa Ngai.

11 Amwe aanyu ũguo noguo maahaanaga; no nĩmwathambirio mũgĩtherio, mũgĩkĩiguithanio na Ngai nĩ Mwathani Jesũ Kristũ o na nĩ Roho wa Ngai witũ.

Goocithagiai Ngai na mĩĩrĩ yanyu

12 Mũndũ ahota kuuga atĩrĩ, “Nĩnjĩtĩkĩrĩĩtio gwĩka maũndũ moothe.” Ĩĩ, nĩguo. No kaĩ ti maũndũ moothe marĩ uumithio-ĩ! Nĩnjĩtĩkĩrĩĩtio maũndũ moothe, no niĩ ndigeetĩkĩra ũndũ o na ũmwe ũndue ngombo.

13 Irio nĩ cia nda, na nda nĩ ya irio, no Ngai nĩagaaciniina cierĩ. Mwĩrĩ ti wa kũhũthĩrwo na ũmaraaya no nĩ wa gũtungatĩra Mwathani, naake Mwathani aathage mwĩrĩ ũcio.

14 Ngai nĩariũkirie Mwathani, na o na ithuĩ nĩagaatũriũkia nĩ ũndũ wa hinya wake.

15 Kaĩ mũtooĩ atĩ mĩĩrĩ yanyu nĩ ciĩga cia Kristũ? Ndakĩhota kuoya atĩa kĩĩga gĩa Kristũ ndĩgĩtue kĩĩga kĩa mwĩrĩ wa mũmaraaya? Ũguo gũtingĩhoteka!

16 Kana hiihi mũtiũũĩ atĩ mũndũ ũrĩa wĩyohanagia na mũmaraaya atuĩkaga mwĩrĩ ũmwe naake? Amu o ta ũrĩa kwandĩkĩĩtwo, “Eerĩ magaatuĩka mwĩrĩ ũmwe.”

17 No mũndũ ũrĩa wĩyohanagia na Mwathani atuĩkaga roho ũmwe na Mwathani.

18 Ũragĩraai waganu. Rĩĩhia rĩngĩ o rĩothe rĩrĩa mũndũ angĩĩka rĩtinyiitanĩĩte na mwĩrĩ wake, no ũrĩa ũhũũraga ũmaraaya nĩahĩtagĩria mwĩrĩ wake mwene.

19 Kaĩ mũtooĩ atĩ mĩĩrĩ yanyu nĩ Hekaarũ ya Roho Mũtheru ũrĩa ũrĩ thĩinĩ wanyu, o ũrĩa mũheetwo nĩ Ngai? Inyuĩ mũtirĩ aanyu inyuĩ eene mũrĩ a Ngai;

20 mwagũrirwo goro, nĩ ũndũ ũcio hũthagĩraai mĩĩrĩ yanyu kũgoocithia Ngai.

Ciũria ciĩgiĩ ũhoro wa ũhikania

1 Na rĩĩrĩ, ha ũhoro wa maũndũ marĩa mwandĩkire-rĩ, nĩ ũndũ mwega mũndũ mũrũme kwaga kũhikania.

2 No tondũ maũndũ ma ũmaraaya me kuo maingĩ-rĩ, o mũndũ mũrũme nĩagĩe na mũtumia wake mwene, na o mũtumia agĩe na mũthuuri wake mwene.

3 Mũthuuri no mũhaka ahingagĩrie mũtumia wake mabata maake ta mũthuuri, naake mũtumia no mũhaka ahingagĩrie mũthuuri wake mabata maake ta mũtumia. O mũndũ nĩakĩhingangĩrie ũrĩa ũngĩ bata wake ũrĩa kwagĩrĩire.

4 Amu mũtumia ndarĩ ũhoti harĩ mwĩrĩ wake we mwene, no mũthuuri wake ũkoragwo naguo; o taguo mũthuuri ndarĩ ũhoti harĩ mwĩrĩ wake we mwene, no mũtumia wake ũkoragwo naguo.

5 Tigagaai kũimanaga, o tiga mũngĩkorwo nĩmũiguithanĩirie mwĩke ũguo kwa ihinda iniini nĩ geetha mũhote kũhooya, mũcooke mũcookanwo rĩngĩ nĩ geetha Caitaani ndakaae kũmũgeria nĩ ũndũ wa kũremwo nĩkwĩnyiita maũndũinĩ ma mwĩrĩ.

6 Ũndũ ũrĩa nguuga nĩkũmũtaara ngũmũtaara no ti kũmwatha ngũmwatha.

7 Niĩ no nyende andũ oothe mahaane ta niĩ, tiga atĩ o mũndũ nĩaheetwo kĩheeo gĩake nĩ Ngai, ũmwe gĩĩkĩ, ũrĩa ũngĩ kĩngĩ.

8 Andũ arĩa matahikanĩĩtie na arĩa a ndigwa ngũmeera atĩ nĩ wega korwo no mahote gũikara marĩ oiki ta niĩ.

9 No angĩkorwo matingĩhota kwĩgirĩrĩria merirĩria ma mwĩrĩ-rĩ, nĩmahikanie. Nĩ kaba kũhikania gũkĩra gũkorwo mũndũ agĩcinwo nĩ merirĩria ma mwĩrĩ.

10 Kũrĩ andũ arĩa mahikanĩĩtie-rĩ, ndĩ na watho, no ti wakwa nĩ wa Mwathani atĩ: mũtumia ndagatige mũthuuri wake;

11 angĩmũtiga, nĩaikare atahikĩĩte kana acookerere mũthuuri wake; o naake mũthuuri ndagatige mũtumia wake.

12 Kũrĩ arĩa angĩ, na nĩ niĩ ndĩraaria ti Mwathani, nguuga atĩ: angĩkorwo mũthuuri o wothe wĩtĩkĩĩtie arĩ na mũtumia ũtarĩ mwĩtĩkia, na mũtumia ũcio eetĩkĩre gũikarania naake, ndakaae kũmũtiga.

13 Na angĩkorwo mũtumia o wothe mwĩtĩkia arĩ na mũthuuri ũtarĩ mwĩtĩkia, na nĩetĩkĩrĩĩte gũikarania naake-rĩ, ndakaae kũmũtiga.

14 Mũthuuri ũrĩa ũtarĩ mwĩtĩkia nĩetĩkĩrĩkaga nĩ Ngai nĩ ũndũ wa kũnyiitana na mũtumia wake, na o naake mũtumia ũtarĩ mwĩtĩkia nĩetĩkĩrĩkaga nĩ Ngai nĩ ũndũ wa kũnyiitana na mũthuuri wake. Korwo tiguo kũrĩ, ciana ciao ingĩrĩ cia meehia; no rĩu ti cia meehia.

15 No rĩĩrĩ, angĩkorwo ũcio ũteetĩkĩĩtie nĩekwenda kũmũtiga-rĩ, nĩarekwo athiĩ. Hĩndĩ ta ĩyo ũrĩa wĩtĩkĩĩtie, arĩ mũthuuri kana mũtumia, ndoohanĩĩtio na ũcio ũngĩ; amu Ngai aatwĩtire tũtũũranie na thaayũ.

16 Wee mũtumia ũũĩ atĩa na ma kana hiihi ndũkahonokia mũthuuri waku? O nawe mũthuuri ũũĩ atĩa na ma kana hiihi ndũkahonokia mũtumia waku?

Ikaraai o ũrĩa mũndũ eetirwo atariĩ

17 O mũndũ o wothe nĩarekwo athondeke mĩikarĩre yake kũringana na kĩheeo kĩrĩa aaheirwo nĩ Mwathani, na aikare o ta ũrĩa aatariĩ ataaneetwo nĩ Ngai. Ũyũ nĩ watho ndĩraheana kũrĩ makanitha moothe.

18 Angĩkorwo mũndũ eetirwo nĩ Ngai arĩ mũruu, nĩaikare ta mũndũ mũruu; angĩkorwo mũndũ eetirwo atarĩ mũruu, ndakarue.

19 Amu kũrua kana kwaga kũrua itirĩ bata; bata nĩkũhingia maathani ma Ngai.

20 O ũrĩa mũndũ eetirwo atariĩ, nĩaikare guo.

21 Wetirwo ũrĩ ngombo? Ndũgatue ũndũ, no angĩkorwo wona mweke wa kũrekererio ndũkaae gũte mweke ũcio.

22 Amu mũndũ ũrĩa wetirwo nĩ Mwathani arĩ ngombo nĩ mũndũ wa Mwathani ũtarĩ ngombo, na ũrĩa wetirwo atarĩ ngombo nĩatuĩkire ngombo ya Kristũ.

23 Mwagũrirwo goro, kwoguo mũtigagĩtuĩke ngombo cia andũ.

24 Aariũ na aarĩ a Ithe witũ, o mũndũ nĩaikare arĩ na ngwatanĩro na Ngai na aikare o ũrĩa aatariĩ hĩndĩ ĩrĩa eetirwo.

Ciũria ikoniĩ arĩa matahikanĩĩtie o na andũ a ndigwa

25 Ha ũhoro wa arĩa matahikanĩĩtie na arĩa matahikĩĩte-rĩ: ndirĩ na watho kuuma kũrĩ Mwathani, no nĩngũheana rĩciiria rĩakwa, ta mũndũ mwĩhokeku nĩ ũndũ wa tha cia Mwathani.

26 Ngwĩciiria kũringana na mathĩĩna ma matukũ maya-rĩ, nĩ ũndũ mwega mũndũ angĩikara ũrĩa atariĩ.

27 Angĩkorwo ũrĩ na mũtumia, ndũgaatigane naake. Ũngĩkorwo ndũhikanĩĩtie, ndũkaahikanie.

28 No ũngĩhikania ndwĩkĩĩte meehia, na mũirĩĩtu angĩhika ndeekĩĩte meehia. Arĩa mahikania kana mahika nĩmagĩaga na mĩhang’o ya thĩ, na nĩ yo ndĩramũgitĩra.

29 Ndĩroiga atĩrĩĩrĩ aariũ na aarĩ a Ithe witũ, mahinda marĩa matigarĩĩte nĩ maniini, na kwoguo arĩa mahikanĩĩtie nĩmaikare ta matahikanĩĩtie;

30 arĩa mararĩra maikare ta matararĩra; arĩa marĩ na gĩkeno maikare ta matakeneete; arĩa maragũra maikare ta matarĩ eene kĩrĩa magũrĩĩte;

31 nao arĩa meehang’agia na maũndũ ma thĩ maikare ta matarĩ namo, tondũ thĩ ĩno ũguo ĩtarie yerekeire gũthira.

32 Ngwenda mũikare mũtegwĩtanga. Mũndũ ũrĩa ũtahikanĩĩtie eriragĩria maũndũ ma Mwathani, na acaragia o ũrĩa angĩkenia Mwathani naguo.

33 No mũndũ ũrĩa ũhikanĩĩtie acaragia maũndũ ma thĩ ma ũrĩa angĩkenia mũtumia wake.

34 Kwoguo wendi wake nĩmũgayũkanu. Mũtumia ũrĩa ũtarĩ mũhiku kana mũirĩĩtu thingi, acaragia maũndũ ma gũkenia Mwathani nĩguo akorwo arĩ mũtheru mwĩrĩ o na roho, no ũrĩa mũhiku acaragia maũndũ ma gũũkũ thĩ ma ũrĩa angĩkenia mũthuuri wake.

35 Ndĩramwĩra maũndũ maya nĩ ũndũ wa kwenda kũmũteithia no ti kũmũgiria ndĩramũgiria. Ndĩrenda mwĩkage o ũrĩa kwagĩrĩire, na mwĩheanage gũtungatĩra Mwathani mũtarĩ na kĩgirĩrĩria.

36 No mũndũ angĩkorwo nĩekuona atĩ ndareeka ũrĩa kwagĩrĩire kũrĩ mũirĩĩtu ũrĩa oorĩĩtie amũhikie,na merirĩria maake nĩmamũkĩrĩĩtie hinya-rĩ, nĩmahikanie o ta ũguo ekwenda: macio ti meehia.

37 No rĩĩrĩ, angĩkorwo mũndũ nĩatuĩte ngoroinĩ yake atekũringĩrĩrio nĩ mũndũ, na nĩahotaga gwatha merirĩria maake, atĩ nĩegũtũũria ndũgũ na mũirĩĩtu ũrĩa oorĩĩtie o na ategũkoma naake, nĩegwĩka wega.

38 Kwoguo ũrĩa ũhikagia mũirĩĩtu ũrĩa oorĩĩtie nĩekaga wega, no ũrĩa ũtahikanagia nĩekaga wega makĩria.

39 Mũtumia mũhiku nĩohanĩĩtio na mũthuuri wake hĩndĩ ĩrĩa yothe mũthuuriwe arĩ muoyo, no mũthuuri angĩkua mũtumia ũcio nĩmuohore, na angĩenda kũhika no ahikĩre mũndũ ũrĩa angĩenda, no mũndũ ũcio akorwo e Mũkristiano.

40 No niĩ ngwĩciiria korwo no aikare ũguo ahaana no akoragwo akeneete makĩria. Ngwĩciiria o na niĩ ndĩ na Roho wa Ngai.

Irio iria irutĩirwo mĩhianano